އެމްޓީސީސީން މާލީ ރެކޯޑަކަށް ފަހު ރެކޯޑެއް

ކޮވިޑްގެ އުނދަގޫ ހާލަތުގައި ވެސް ހުއްޓުމެއް ނެތި ސަރުކާރުން ރައްޔިތުންނަށް ވީ ގިނަ އުމްރާނީ ތަރައްގީގެ ވައުދުތަކުގައި ކުލަޖައްސާލަދިން އެއް ކުންފުންޏަކީ އެމްޓީސީސީ އެވެ. މީގެ 41 އަހަރު ކުރިން، އުފެދުނު އެމްޓީސީސީ ވެގެން ދިޔައީ ވޭތުވެދިޔަ ތިން އަހަރު ވެސް، ރާއްޖެއަށް ބޭނުންވާ އުމްރާނީ ތަރައްގީ ގެނެސްދިނުމުގައި ސަރުކާރުގެ އެންމެ އިތުބާރު ލިބުނު ކުންފުންޏެވެ. ނަތީޖާއެއްގެ ގޮތުން ރައްޔިތުން ބޭނުންވާ ސްޕީޑްގައި މަޝްރޫއުތައް ކުރިއަށްގެން ގޮސް ރައްޔިތުންގެ ހިތްތަކަށް ހިތްހަމަޖެހުމާއި އުފާވެރިކަން ލިބިގެންދިއަ އިރު، އެ ކުންފުނީގެ ހިއްސާދާރުން ވެސް ތިބީ އުފަލުން ފޮޅިފަ އެވެ.

މިއަދު އާންމުކުރި އެ ކުންފުނީގެ މިދިޔަ އަހަރުގެ ހަތަރުވަނަ ކުއާޓާގެ މާލީ ނަތީޖާއިން ވެސް އެކުންފުންޏަށް މިދިޔަ އަހަރު ލިބުނު ކާމިޔާބީ ސާފުވެ އެވެ. ހަތަރުވަނަ ކުއާޓާގައި ޖުމްލަ 626 މިލިއަން ރުފިޔާގެ ކޮށްގެން ވިޔަފާރި ކޮށްގެން 67 މިލިއަން ރުފިޔާ، ހިންގުމުގެ ފައިދާގެ ގޮތުގައި ވަނީ ލިބިފަ އެވެ. އެކުންފުންޏަށް 2020 ވަނަ އަހަރުގެ ހަތަރުވަނަ ކުއާޓާގައި 409 މިލިއަން ރުފިޔާގެ އާމްދަނީ އެއް ލިބުނު އިރު ފައިދާގެ ގޮތުގައި ލިބުނީ 99 މިލިއަން ރުފިޔާގެ ފައިދާ ވަނީ ލިބިފަ އެވެ.

މިދިޔަ އަހަރު ޖުމްލަ 1.96 ބިލިއަން ރުފިޔާގެ (2020 ވަނަ އަހަރުގެ މިމުއްދަތުގައި: 1.36 ބިލިއަން ރުފިޔާ) ވިޔަފާރިކޮށްގެން، ޓެކުހަށް ކެނޑުމުގެ ކުރިން ލިބުނު ފައިދާ ވަނީ 264.4 މިލިއަން ރުފިޔާ އަށް އަރާފަ އެވެ. އެމްޓީސީސީއަށް 2020 ވަނަ އަހަރު ޖުމްލަ ފައިދާގެ ގޮތުގައި ލިބުނީ 1.36 ބިލިއަން ރުފިޔާ އެވެ. އަދި ޓެކުހަށް ކެނޑުމަށް ފަހު ފައިދާގެ ގޮތުގައި 221 މިލިއަން ރުފިޔާ ލިބިފައިވެ އެވެ. މިދިޔަ އަހަރުގެ ހަތަރު ވަނަ ކުއާޓާގައި ޓެކުހަށް ކެނޑުމަށްފަހު 52.2 މިލިއަން ރުފިޔާގެ ފައިދާ ވަނީ ލިބިފަ އެވެ. އޭގެ ކުރީ އަހަރު ޓެކުހަށް ކެނޑުމަށްފަހު ސާފު ފައިދާގެ ގޮތުގައި ރެކޯޑު ކޮށްފައިވަނީ 81 މިލިއަން ރުފިޔާ އެވެ. މިދިޔަ 2021 ވަނަ އަހަރަށް ވުރެ 2020 ވަނަ އަހަރުގެ ހަތަރުވަނަ ކުއާޓާގައި ޓެކުހަށް ކެނޑުމުގެ ކުރިން ލިބުނު ފައިދާ ދަށްވި ނަމަވެސް މިދިޔަ އަހަރު ޖުމްލަގެ ނަތީޖާ އަކީ އެކުންފުނީގެ ދިގު ތާރީހުގައި ހާސިލު ކުރެވުނު އެންމެ ރަނގަޅު ނަތީޖާ ކަމަށް އެކުންފުނިން ބުންޏެވެ.

މިވޭތުވެދިޔަ އަހަރު އެމްޓީސީސީއަށް އެންމެ ގިނަ ކާމިޔާބީ ހާސިލް ކުރެވިފައިވާ އެއް ދާއިރާއަކީ އިމާރާތް ކުރުމާއި އުމްރާނީ ތަރައްގީގެ ދާއިރާ އެވެ. އެމްޓީސީސީ އަކީ އުމްރާނީ ތަރައްގީ އާއި އިމާރާތްކުރުމުގެ ދާއިރާގައި އެންމެ ކުރިއަރާފައިވާ ދިވެހި ކުންފުންޏެވެ. އުމްރާނީ ތަރައްގީއާއި އިމާރާތްކުރުމުގެ ސިނާއަތުގެ ތެރެއިން ބަނދަރު ހެދުން، ބިންހިއްކުން، ގޮނޑުދޮށް ހިމާޔަތްކުރުން، ގޮނޑުދޮށް ހެދުން އަދި ޝީޓް ޕައިލްކުރުމުގެ މަސައްކަތުގައި ހުނަރުވެރި ގާބިލް ކުންފުންޏެއްގެ ގޮތުގައި އެމްޓީސީސީ ވަނީ އެންމެހާ ކަސްޓަމަރުންނާއި ރައްޔިތުންގެ މަގްބޫލުކަން ހޯދާފަ އެވެ. ވޭތުވެދިޔަ އަހަރުތަކުގައި އިތުރު ދާއިރާތަކުގައި މަސައްކަތްކުރުމުގެ ގާބިލްކަން ހޯދާ، އެ ދާއިރާތަކުގައި އެމްޓީސީސީގެ ފަންވަރާއި، ފެންވަރު ވަނީ މަސައްކަތުން ދައްކާފަ އެވެ.

އެއާޕޯޓާއި، މަގު ހެދުމާއި، ފެނާއި ނަރުދަމާގެ ބޮޑެތި މަޝްރޫއުތަކާއި އިމާރާތްކުރުމުގެ މަޝްރޫއުތައް ހިމެނެ އެވެ. މިދިޔަ އަހަރަކީ އެމްޓީސީސީގެ ބޭރުގެ ކްލައިންޓަކަށް ފުރިހަމަކޮށްދިން އަގުގެ ގޮތުން އެންމެ ބޮޑު މަޝްރޫއު ފުރިހަމަ ކޮށްދިން ވެސް އަހަރެވެ. "ސެންޓާރާ ނިއު ރިސޯޓްސް މޯލްޑިވްސް: ރެކްލެމޭޝަން އޮފް ތްރީ އައިލެންޑްސް" މަޝްރޫއުގެ މަސައްކަތް ނިންމާ ކްލައިންޓާއި ރަސްމީކޮށް ހަވާލުކުރެވުނު ތާރީހީ ރަސްމިއްޔާތު ބޭއްވީ ނޮވެމްބަރު 25، ވަނައިގަ އެވެ. މި މަޝްރޫއުގެ އަގަކީ 26.2 މިލިއަން ޑޮލަރެވެ. އަދި މިއަދު އެމްޓީސީސީ އަކީ އެއްފަހަރާ 70 މަޝްރޫއެއްގެ މަސައްކަތް ރާއްޖޭގެ އެކިކަންކޮޅުތަކުގައި ހިންގުމުގެ ގާބިލުކަން ލިބިފައިވާ ކުންފުންޏެކެވެ. އެމްޓީސީސީގެ މަޝްރޫއެއް ކުރިއަށް ނުދާ އެންމެ އަތޮޅެއް ވެސް މިވަގުތު ރާއްޖޭގައި ނެތެވެ. އަދި މިވަގުތު އެކި މަރުހަލާގައި 103 މަޝްރޫއެއްގެ މަސައްކަތް އެކުންފުނިން އަންނަނީ ހަލުވިކަމާ އެކު ކުރިއަށްގެންދަމުންނެވެ.

އާންމު ދަތުރުފަތުރުގެ ޚިދުމަތަކީވެސް ކުންފުނީގެ ކާމިޔާބީގެ ދުވެލީގެ އަވަސްމިން ވަޒަންކުރެވޭ އެއް ހިދުމަތެވެ. އެމްޓީސީސީ އަކީ ރާއްޖޭގައި އެންމެ ފުޅާ ދާއިރާއެއްގައި އެއްގަމާއި ކަނޑު ދަތުރުފަތުރުގެ ހިދުމަތްދޭ ކުންފުންޏެވެ. މިހާރު ދުވާލަކު ފަނަރަހާސް މީހުން އެމްޓީސީސީގެ ދަތުރު ފަތުރުގެ ހިދުމަތްތައް ރާއްޖޭގެ އެކި ކަންކޮޅުތަކުގައި ބޭނުންކުރަމުން ގެންދެ އެވެ. މުޅި ރާއްޖޭގައި ކުންފުނިން ގާއިމްކޮށްފައިވާ އެއްގަމާއި ކަނޑު ދަތުރުފަތުރުގެ ނިޒާމާއި ގްރޭޓާ މާލެ ސަރަހައްދުގައި ދެވޭ އެއްގަމުގެ ދަތުރުފަތުރުގެ ހިދުމަތުގައި އަހަރަކު ހަ މިލިއަން ފަސިންޖަރުން މިހާރު ދަތުރުކުރެ އެވެ. އެމްޓީސީސީގެ ފެރީ ހިދުމަތަށް އިތުރު އާރޯކަމެއް ލިބިގެން ދިޔައީ ރާއްޖެ ހައި-ސްޕީޑް ފެރީ ނިޒާމަކުން ގުޅާލުމަށް ފަރުމާކޮށްފައިވާ "އިންޓަރގްރޭޓެޑް ނެޝަނަލް ޕަބްލިކް ފެރީ ނެޓްވޯރކް" ގެ ފުރަތަމަ ފިޔަވަހި ސަރުކާރުން 2021 ތެރޭ އެމްޓީސީސީއާއި ހަވާލުކުރި ހިސާބުންނެވެ. ފުރަތަމަ ފިޔަވަހީގެ ދަށުން ޒޯން އެކެއް (ހއ، ހދ އަދި ށ) ގެ ރަށްތަކަށް ހިދުމަތް ދޭން ވާންޖެހޭ ތައްޔާރީތައް އެމްޓީސީސީން މިހާރު އަންނަނީ ވަމުންނެވެ.

މި ފެރީ ނިޒާމުން ލުއިފަސޭހަ އަވަސް ހިދުމަތެއް ދަތުރުކުރާ ފަރާތްތަކަށް ފޯރުކޮށްދޭނެ އެވެ. ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނާއި އެއްގޮތްވާ ގޮތުގެ މަތިން، ރާއްޖޭގެ އެކި ރަށްރަށުގައި ދިރިއުޅޭ ރައްޔިތުން ގުޅުވާލާ، އެ ރައްޔިތުންނަށް ބޭނުންވާ ހިދުމަތްތައް ފަސޭހަކަމާ އެކު ފޯރުކޮށްދީ، އެކަމުން ރާއްޖޭގެ އިގްތިސާދީ އަދި އިޖުތިމާއީ ތަރައްގީއަށް ކުރިއެރުންތަކެއް ލިބި، ސަރަހައްދީ ގޮތުން ރައްތަކަށް ތަރައްގީ ލިބިގެންދާނެ އެވެ. އެމްޓީސީސީގެ ދަށަށް، މޯލްޑިވްސް ޕޯޓްސް ލިމިޓެޑުން ދެމުންގެން ދިޔަ އާންމު ދަތުރުފަތުރުގެ ހިދުމަތް ބަދަލު ކުރެވުނީ ވެސް 2021 ވަނަ އަހަރުތެރޭގަ އެވެ. އަދި އައްޑޫ ސިޓީ، ފުވައްމުލައް ސިޓީ އަދި ލާމު އަތޮޅު (ގަމާއި ފޮނަދޫ) އަދި ލ. އިސްދޫ ކަލައިދޫގައި ދެމުންގެންދިޔަ އާންމު ދަތުރުފަތުރުގެ ހިދުމަތް އެމްޓީސީސީގެ ދަށަށް ބަދަލުވެގެން ދިޔަ އެވެ. މި ބަދަލާއެކު މުޅި ރާއްޖެއަށް ދަތުރުފަތުރުގެ ހިދުމަތް ފޯރުކޮށްދޭ ކުންފުންޏަކަށް އެމްޓީސީސީ ވެއްޖެ އެވެ.

އެމްޓީސީސީގެ އިންޖިނިއަރިންގް އަދި ޑޮކިންގް ހިދުމަތް ފެށިފައިވަނީ ކުންފުނީގެ އުޅަނދުތަކާއި ވެހިކަލްތަކަށް ބޭނުންވާ މަރާމާތުތައް ކުރުމަށް ކަމުގައިވިއަސް، މިހާރު މި ހިދުމަތަކީ އާންމު ފަރާތްތަކަށް ހުޅުވާލެވިފައިވާ ހިދުމަތެކެވެ. މާލެ އަތޮޅު ތިލަފުށީގައި ގާއިމްކޮށް ހިންގަމުންދާ އެމްޓީސީސީ ބޯޓްޔާޑަކީ އެއްފަހަރާ 20 އުޅަނދު ޑޮކްކުރުމުގެ ޖާގަ އޮތް ބޯޓްޔާޑެކެވެ. އެމްޓީސީސީން 2017 ވަނަ އަހަރު ހިދުމަތަށް ނެރެވުނު 200 ޓަނުގެ ބޯޓް ހޮއިސްޓާ އެކު އެމްޓިސީސީ ބޯޓްޔާޑް ވެފައިވަނީ ޑޮކް ކުރުމަށް ޖާގައިގެ ގޮތުން ރާއްޖޭގެ އެންމެ ތަނަވަސް އެއް ބޯޓްޔާޑަށެވެ. މިދިޔަ އަހަރުތެރޭ އެމްޓީސީސީ ވަނީ މިދާއިރާއިން އައު އުސްމިންތަކަކަށް ދަތުރުކޮށްފަ އެވެ. އިންޓަނޭޝަނަލް އެސޯސިއޭޝަން އޮފް ކްލެސިފިކޭޝަން ސޮސައިޓީޒް (އައިއޭސީއެސް) ސަޓިފައިޑް ވެލްޑާސް މިހާރު އެމްޓީސީސީ ބޯޓު ޔާޑްގައި މަސައްކަތްކުރެ އެވެ. އަދި ބޭރު ގައުމުތަކުގެ އުޅަނދު ފަހަރުތަކަށް އެމްޓީސީސީ ބޯޓް ޔާޑުން މިހާރު އަންނަނީ ހިދުމަތް ދެމުންނެވެ. އަދި އޮޑިދޯނިފަހަރު ބަނުމުގެ ވިޔަފާރިއަށް ވަނުމުގެ ގޮތުން 75 ފޫޓުގެ ފައިބާ ފެރީއެއް ޑިޒައިންކޮށް އޮޑި ބަނުމުގެ މަސައްކަތް މިދިޔަ އަހަރުތެރޭގައި ވަނީ ފެށިފަ އެވެ.

އެމްޓީސީސީގެ ސީއީއޯ އާދަމް އާޒިމް ވިދާޅުވެފައިވާ ގޮތުގައި ކުންފުނި އުފެދުނީއްސުރެ ކުންފުނީގެ ކުރިއެރުމުގެ ފަހަތުގައި ވަނީ އެމްޓީސިސީގެ ޓީމެވެ. އެމްޓީސީސީގެ ކާމިޔާބީގެ ސިއްރަކީ ރާއްޖޭގެ އެކި ކަންކޮޅުތަކުގައި ކުންފުނީގެ ހިދުމަތްތަކާއި ހައްލުތައް ފޯރުކޮށްދިނުމުގައި ރެއާއި ދުވާލު މަސައްކަތްކުރާ އެމްޓީސީސީގެ ހީވާގި މުވައްޒަފުންނެވެ. މުވައްޒަފުން ތަމްރީން ކުރުމަށާއި ގާބިލު މުވައްޒަފުން ވަޒީފާތަކަށް ނެރުމަށް ވެސް އެ ކުންފުނިން އަންނަނީ ގިނަގުނަ މަސައްކަތްތަކެއް ކުރަމުންނެވެ.

މިދިޔަ އަހަރުގެ ޖެނުއަރީ މަހުން ފެށިގެން ކުރިއަށްދިއަ "ހުނަވަރު ލައިސެންސިންގް ޕްރޮގްރާމް" ގެ ދަށުން 23 މީހުން ޝޯޓް ލިސްޓް ކުރެވި 15 މީހުންވަނީ ޕްރޮގްރާމް ފަށާފަ އެވެ. އަދި މިފަރާތްތައް މަސައްކަތް ކުރަމުންދަނީ ޏ. ފުވައްމުލަށް، ގދ. ތިނަދޫ އަދި ލ. ފޮނަދޫގަ އެވެ. އަދި މީގެތެރެއިން 13 މީހަކު ޕްރޮގްރާމް ފުރިހަމަކޮށް އެމްޓީސީސީ އެކްސްކަވޭޓަ އޮޕަރޭޓަރުންގެ ގޮތުގައި އަންނަނީ ވަޒީފާ އަދާކުރަމުންނެވެ. މިދިޔަ އަހަރު ފެށި "ހުނަވަރު ޓެކްނިކަލް ސްކިލްސް ޕްރޮގްރާމް" ގެ ދަށުން، ކުރިއަށް އޮތް ތިން އަހަރުތެރޭ 100 މީހުން ތަމްރީން ކުރާނެ އެވެ. މި ޕްރޮގްރާމްގެ ދަށުން، ވެލްޑިންގް، ޕްލަމްބަރިންގ، އިލެކްޓްރިކް މަސައްކަތް، އޮޓޮމޯޓިވް މެކޭނިކް މަސައްކަތް، ވަޑާންކުރުން އަދި ކޮންސްޓްރަކްޝަން ސައިޓް ސުޕަވައިޒް ކުރުން ފަދަ ދާއިރާތަކަށް މީހުން ތަމްރީން ކުރެވޭނެ އެވެ.

މުޖުތަމައުގެ ކަންކަމުގައި ބައިވެރިވުމުގެ ރޫހަކީ ކުންފުނި އުފެދުނީއްސުރެ އެމްޓީސީސީގެ ސަގާފަތުގައި ހިމެނޭ ކަމެކެވެ. ކުންފުނީގެ ތަސައްވުރާއި ކުންފުނިން އަގު ވަޒަންކުރާ ކަންކަމުގައި، ކުންފުނިން ހިންގާ ވިޔަފާރީގެ ހަރަކާތްތައް މެދުވެރިކޮށް ކުންފުނީގެ އިޖުތިމާޢީ ޒިންމާ ތަންފީޒުކުރަމުން ގެންދެވެ އެވެ.

މީގެ މަގްސަދަކީ އިގްތިސާދީ ނަފާ ފޯރުކޮށްދީ، ހަމަޖެހުން ބޮޑު ދެމެހެއްޓެނިވި މުޖުތަމައުއެއް ބިނާކުރުމަށް ހިއްސާވުމެވެ. އެމްޓީސީސީން އިޖްތިމާއީ ޒިންމާއަށް ދީފައިވާ ސަމާލުކަމުގެ ހަގީގީ އަޞްލަކީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ރައްޔިތުންނަށް ހެޔޮކޮށް ހިތައި، ރައްޔިތުންނަށް ކޮށްދެވެން ހުރި އެއްވެސް ކަމެއް ދޫނުކޮށްލުމަށް ދެއްވާފައިވާ ނަސޭހަތެވެ. އެމަނިކުފާނުގެ އިރުޝާދާ އެކު އެމްޓީސީސީ އިން 2020 އަދި 2021 ވަނަ އަހަރުތެރޭ ވަނީ ޖުމްލަ 365 އިޖްތިމާއީ ޒިންމާއާއި ގުޅުންހުރި މަސައްކަތެއް، 93 ރަށެއްގައި ކުރިޔަށް ގެންގޮސްފަ އެވެ. މިދިޔަ އަހަރު އިޖުތިމާއީ ޒިންމާއަށް ހިންގާފައިވާ ހަރަދުގެ ތެރޭގައި، އަތޮޅު ތެރޭގައި ހިންގިފައިވާ މަސައްކަތްތަކުގެ އިތުރުން، ހުޅުމާލޭ ހާފްވޭ ހައުސްގެ އާބާތުރަ ފިލުވުމުގެ މަސައްކަތަށް ހިންގާނެ ހަރަދާއި، އާޓިފިޝަލް ބީޗުގައި ހާއްސަ އެހީއާއް ބޭނުންވާ ފަރާތްތަށް ބޭނުން ކުރުމަށް އެޅުނު ރޭމްޕަށް ހެދީ ވެސް އެމްޓީސީސީގެ ހަރަދުގަ އެވެ.

އެމްޓީސީސީގެ އަމާޒަކީ ހިކުމަތްތެރިކަމާ އެކު ވިޔަފާރިތައް ފުޅާކޮށް، ދެމެހެއްޓެނިވި ގޮތެއްގައި ކުންފުނީގެ ވިޔަފާރި ކުރިއަށް ގެންދިޔުމެވެ. ކަސްޓަމަރުންނާއި ހިއްސާދާރުންނާއި ވިޔަފާރީގެ ބައިވެރިންނާއި އާއްމު ރައްޔިތުން، ވޭތުވެދިޔަ 41 އަހަރު ދެގޮތެއް ނުވެ ކުންފުންޏަށް ކުރަމުން އައި އިތުބާރު ދެމެހެއްޓުމެވެ. ކުންފުނީގެ ހީވާގި އިހްލާސްތެރި ވެރީންނާއި މުވައްޒަފުން މި އަމާޒަށް ވާސިލުވުމަށް ކެނޑިނޭޅި އަންނަނީ މަސައްކަތް ކުރަމުންނެވެ. މިދިޔަ އަހަރެކޭ އެއްފަދައިން މިއަހަރާއި ކުރިއަށްއޮތް އަހަރުތަކަކީވެސް ކުންފުނީގެ ތާރީހުގައި ރަން އަކުރުން ލިޔެލެވޭ އަހަރުތަކެއް ކަމުގައި ހެދުމުގެ ތަޅުދަނޑި އޮތީ ޓީމް އެމްޓީސީސީގެ އަތްމަތީގަ އެވެ.

އެޑިޓަރުގެ ނޯޓް: މިއީ އެމްޓީސީސީގެ ޕްރޮމޯޝަނަލް އާޓިކަލްއެކެވެ.