މަރުވެފައިވާ ރިޝީގެ ފަހުގެ ފިލްމު މި މަހު ނެރެެނީ

ރިޝީގެ އެންމެ ފަހުގެ ފިލްމުގެ ޕޯސްޓަރެއް--

10 މާޗް 2022 - 06:46

ކެންސަރަށް ފަރުވާކުރަމުން އަންނަނިކޮށް މަރުވި ބޮލީވުޑްގެ އެކްޓަރު ރިޝީ ކަޕޫރް މަރުވުމުގެ ކުރިން ކުޅުނު އޭނާގެ އެންމެ ފަހު ފިލްމު ނެރޭނެ ދުވަސް އިއުލާންކޮށްފި އެވެ.

ޑައިރެކްޓަރު ރިތޭޝް ބާޓިއާގެ "ޝަރްމާޖީ ނަމްކީން" ނެރޭ ދުވަސް އާންމުކޮށް އެމެޒަން ޕްރައިމް ވީޑިއޯ އިން ކުރި ޕޯސްޓުގައި ވަނީ މި މަހު 31 ގައި އެ ފިލްމު ޕްރިމިއާ ކުރާނެ ކަމަށް ބުނެފަ އެވެ. އެކްސެލް އެންޓަޓެއިންމަންޓްގެ ދަށުން ނެރޭ އެ ފިލްމުގައި ރަންބީރު ކަޕޫރްގެ ބައްޕަ، ރިޝީގެ އިތުރުން ޕަރޭޝް ރަވަލް އާއި ޖޫހީ ޗާވްލާ ފަދަ ތަރިން ވެސް ފެންނާނެ އެވެ.

ޕްރައިމް ވީޑިއޯގެ ކޮންޓެންޓް ލައިސެންސިންގެ ހެޑް މަނީޝް މެންގާނީ ބުނީ އެއީ ބެލުންތެރިން މުނިފޫހިފިލާނެ ވަރުގެ ސަޅި ފިލްމަކަށް ވާނެ ކަމަށެވެ. އަދި އެ ފިލްމު ހާއްސަ ވަނީ އެއީ ފިލްމީ ދާއިރާގައި ކުޅަދާނަ ހުނަރުތައް ދައްކާލި ރިޝީ އަށް ދޭ ޓްރިބިއުޓަކަށް ވާތީ ކަމަށް އޭނާ ބުންޏެވެ. އެ ފިލްމުގައި ރިޝީއާ އެކު ދެން ފެންނާނެ ލެޖެންޑަކީ ޕަރޭޝް ކަމަށާއި އެ ދެ ތަރިން ވެސް ވަނީ ވަރުގަދަ ހުށަހެޅުންތަކެއް ގެނެސްދީފައި ކަމަށް އޭނާ ބުންޏެވެ.

all rise, for the first time 2 legends have arrived to cook up something namkeen and add some spice to your life ✨#SharmajiNamkeenOnPrime, world premiere, March 31@chintskap @SirPareshRawal @thisisnothitesh @excelmovies @MacguffinP pic.twitter.com/S2W6KmQ9eG
— amazon prime video IN (@PrimeVideoIN) March 9, 2022

ސެޕްޓެމްބަރު 2018 އިން ފެށިގެން އެމެރިކާގެ ނިއު ޔޯކްގައި އަހަރެއް ވަންދެން ކެންސަރަށް ފަރުވާ ހޯދުމަށް ފަހު ރިޝީ އެނބުރި އިންޑިއާގައި ދިޔަ ފަހުން ވެސް އުޅުނީ ވަރަށް ބަލިވެ އެވެ. އެކަމަކު އޭރު ވެސް ފިލްމީ މަސައްކަތަށް ނިކުތީ "ޝަރްމާޖީ ނަމްކީން" އަށް އޭނާ ސޮއިކޮށްފައި އޮތުމުންނެވެ. އޭނާ މަރުވީ ފިލްމުގެ މަސައްކަތްތަށް ނިމުނު ފަހުންނެވެ.