ދެ އަހަރުގެ ތެރޭގައި ދެން ފެންނާނީ މުޅި މަންޒަރު ބަދަލުވެފައިވާ އެއާޕޯޓެއް!

މީގެ ހަތަރު މަހެއްހާ ދުވަސް ކުރިން އެމްއޭސީއެލްގެ އެކްޓިން މެނޭޖިން ޑިރެކްޓަރުގެ މަގާމާ އިބްރާހިމް ތޯހާ ހަވާލުވެވަޑައިގަތުމާ އެކު، ސަރުކާރުން އެ ކުންފުނީގައި އެދުނީ އެ ވަގުތަށް ވެސް ދެ ކަމެއް ހައްލު ކޮށްދޭށެވެ. އެއް ކަމަކީ އެއާޕޯޓް ބިޒީވެ، ފްލައިޓްތައް މަތީގައި އުދުހޭ ވަގުތުތައް އިތުރުވެ، ގަޑިއަށް ފްލައިޓްތަކަށް ނުޖެއްސޭ މައްސަލަ ހައްލު ކޮށްދިނުމެވެ. އަނެއް ކަމަކީ އާ ވީއައިޕީ ޓާމިނަލް އަވަހަށް ބޭނުންކުރެވޭނެ މަގެއް ހޯދައިދިނުމެވެ.

އެކްޓިން އެމްޑީގެ ހައިސިއްޔަތުން ތޯހާ ދެއްވި އިރުޝާދުގެ ބޭނުން އެ ތަނުގެ މުވައްޒަފުން ވަރަށް ރަނގަޅަށް ހިފި އެވެ. ވެލާނާ އިންޓަނޭޝަނަލް އެއާޕޯޓްގައި މަސައްކަތް ކުރައްވާތާ 32 އަހަރު ވެފައިވާއިރު، ތަޖުރިބާގެ އަލީގައި، ކުރު މުއްދަތެއްގެ ތެރޭގައި ނަތީޖާ ތޯހާ ނެރެދެއްވި އެވެ. ކުރެއްވީ ކުޑަކުޑަ ކަމެކެވެ. އާ ރަންވޭ މި ވަގުތަށް ޓެކްސީވޭއެއްގެ ގޮތުގައި ބޭނުންކުރަން ފެށީ އެވެ. އެއީ ދުރުގައި ބަލަން ތިބި ބައެއް މީހުން ވެސް ބުނަމުން އައި އެއް ވާހަކަ އެވެ. ފްލައިޓްތައް އެއާޕޯޓަށް ޖެއްސުމާއި ފުރުން ޑިލޭވާ މައްސަލަ އަށް އޮތް ވަގުތީ ހައްލެވެ.

"އަޅުގަނޑުމެން ކުރިން ވެސް އައީ ސްޓަޑީތަކެއް ހަދަމުން، ތައްޔާރީތަކެއް ވަމުން. އެހެންވީމާ ބާ ރަންވޭ އަށް ޖައްސާފައި ބޯޓުތައް [މިހާރު] މި ފައިބަނީ އާ ރަންވޭ އަށް. ބޯޓުތައް މި ވެކޭޓް ކުރަނީ އާ ރަންވޭ އަށް. ވެކޭޓް ކުރުމާއެކު، ގާތްގަނޑަކަށް ތިން މިނިޓުން ބޯޓެއް ޖައްސާނެ. އެހެންވީމާ އެ ބައި [ރަންވޭ އިން ޖާގަ ނުލިބި ފްލައިޓްތައް ޖެއްސުން ލަސްވާ މައްސަލަ] މިހާރު ވެސް ގާތްގަނޑަކަށް ހައްލުވެފައި އެ އޮތީ،" ތޯހާ ވިދާޅުވި އެވެ.

"އަދި އާ ރަންވޭއާއެކު އެ އަށް ވުރެ ވެސް އެފިޝަންސީ އިތުރު ވެގެންދާނެ."

މީގެ ދުވަސްތަކެއް ކުރިން ފެނުނީ ފްލައިޓްތައް ވެލާނާ އިންޓަނޭޝަނަލް އެއާޕޯޓަށް ޖެއްސުމާއި ޑިލޭވުން ލަސްވެ، އެއާޕޯޓުގައި ފަސިންޖަރުން އެއްފަހަރާ ތޮއްޖެހި، އެތައް ބައެއްގެ ޝަކުވާތައް އިތުރުވި ތަނެވެ. އެންމެ ޕީކް ގަޑީގައި ނަމަ އެއްފަހަރާ ފަސް ފްލައިޓް ވެސް ރަންވޭ އަށް ނުޖެއްސިގެން މަތީގައި އުދުހިއުދުހި ތެޔޮ އަންދައިއަންދައި ތިބެން ޖެހުނެވެ. ނަމަވެސް މިހާރުގެ ހާލަތަކީ އެއާޕޯޓަށް ޖައްސަން އޮންނަ ޝެޑިއުލަށް ވުރެ ކުޑަތަންކޮޅެއް އަވަހަށް އަންނަ ފްލައިޓް ވެސް އެ ޝެޑިއުލަށް ވުރެ އަވަހަށް ޖެއްސުމެވެ. އެއާޕޯޓުން ޖާގަ ލިބެންދެން މަތީގައި އުދުހި، ތެޔޮ އަންދާ އެންދުން ގާތްގަނޑަކަށް ނިމުނީ އެވެ. އެއާއެކު، ފަސިންޖަރުންގެ ޝަކުވާ ވެސް ހުއްޓުނީ އެވެ.

"އަޅުގަނޑު މި އެއާޕޯޓްގައި މަސައްކަތް ކުރާތާ 32 އަހަރު މި ވީ. އެހެންވީމާ ކަންކަން ހައްލު ކުރުމުގެ ތަޖުރިބާ ކޮންމެވެސް ވަރަކަށް ހުންނާނެތާ. މި ހުންނަނީ ކުޑަކުޑަ ކަމަކުން ވެސް ހައްލު ކުރެވިދާނެ ކަންކަން. ހަގީގަތުގައި މާ ބޮޑު ކަމެއް ނޫން އަޅުގަނޑުމެން މި ކޮށްލީ. ވަރަށް ކުޑަކުޑަ ކަމަކުން މައްސަލަ އެ ހައްލުވީ،" ތޯހާ ވިދާޅުވި އެވެ.

އޭނާ ވިދާޅުވިގޮތުގައި، އެކަން އެ ގޮތަށް ނިންމުމުގައި ސަލާމަތާއި ރައްކާތެރިކަމުގެ ގޮތުން ބަލަންޖެހޭ ކަންކަން ވަރަށް ރަނގަޅަށް ބެލި އެވެ.

"އެއާޕޯޓް ބޭނުންކުރާ ފަރާތްތަކުގެ ސަލާމަތާއި ރައްކާތެރިކަމަކީ އަޅުގަނޑުމެން ކޮމްޕްރޮމައިޒްޑް ކުރާނެ ކަންކަމެއް ނޫން."

ވައި ހުންނަ ގޮތުން ކޮންމެ ފްލައިޓެއް ވެސް ޖައްސަނީ ހުޅުލޭގެ ދެކުނު ކޮޅަށެވެ. އެންމެ ރަންވޭއެއް އޮތުމުން ކޮންމެ ފްލައިޓެއް ވެސް ހުޅުލޭގެ ދެކުނު ކޮޅަށް ޖެއްސުމަށް ފަހު އުތުރުކޮޅަށް ގޮސްފައި އަނެއްކާ އެނބުރި ދެކުނުކޮޅަށް ދާން ޖެހެ އެވެ. އެހެން ހަދަން ޖެހެނީ ފްލައިޓް ޕާކިން ވެސް އޮންނަނީ ހުޅުލޭގެ ދެކުނުކޮޅުގައި ކަމަށް ވާތީ އެވެ. ބޮޑު ފްލައިޓެއް ނަމަ އެ ހާލަތުގައި ރަންވޭ ހުސްކުރަން ހަތް މިނިޓް ނަގާއިރު ރަންވޭ އެއްކޮށް ހުސްނުކޮށް އެހެން ބޯޓަކަށް ޖާގައެއް ނުލިބޭނެ އެވެ.

"އެކަމަކު އާ ރަންވޭ ޓެކްސީވޭއެއްގެ ގޮތުގައި މިހާރު ބޭނުންކުރަން ފެށީމާ ވަރަށް އަވަހަށް ރަންވޭ އެބަ ހުސްވޭ. ހުސްވުމާ އެކު ޖައްސަން ބޭނުންވާ ބޯޓަށް ވަގުތުން ރަންވޭ އަށް އެބަޖެއްސޭ. އަދި ފުރަން ބޭނުންވާ ބޯޓުތަކަށް ގަޑިއަށް އެބަ ފުރޭ. ގަޑިއަށް އަންނަ ބޯޓުތަކަށް އެބަޖެއްސޭ،" ތޯހާ ވިދާޅުވި އެވެ.

އާ ރަންވޭ ރަސްމީކޮށް އޮކްޓޫބަރުގައި ބޭނުންކުރަން ފަށާނެ

އާ ރަންވޭ ރަސްމީކޮށް ބޭނުން ނުކުރެވި ލަސްވާ މައިގަނޑު ސަބަބަކީ އެ ތަނާ މާ ދުރު ނޫން ތަނެއްގައި މިހާރުގެ ޓީއެމްއޭގެ ސީ ޕްލޭން ޓާމިނަލް ހުންނާތީ އެވެ. ޓީއެމްއޭގެ ބައެއް ފެސިލިޓީތައް ގާއިމުކޮށްފައި ވަނީ އާ ރަންވޭއާ ވަރަށް ކައިރީގައި ކަމަށް ވާތީ ފްލައިޓްތައް ޖައްސަން ބޭނުންވާ ރައްކާތެރިކަމުގެ މިންގަނޑުތައް ހަމައެއް ނުވެ އެވެ. އެމްއޭސީއެލުން އޮޕަރޭޓް ކުރަން ފަށާ އާ ޓާމިނަލް އަންނަ މޭ މަހުގެ ނިޔަލަށް ބޭނުންކުރަން ފެށުމާ އެކު، ޓީއެމްއޭގެ އޮޕަރޭޝަންތައް ވެސް އެ ޓާމިނަލަށް ބަދަލުކުރާނެ އެވެ.

"އޭގެ ފަހުން އެ އިމާރާތް [ޓީއެމްއޭގެ ސީ ޕްލޭން ޓާމިނަލް] ތަޅައި ނިންމަން އަޅުގަނޑުމެންނަށް ބޭނުންވާނެ 2-3 މަސް. ކޮންމެވެސް ވަރަކަށް ހިއްކަން ވެސް ޖެހޭ. އެ ހުރިހާ ކަމެއް ނިންމާފައި އަޅުގަނޑުމެން މި ކިޔަނީ އަންނަ އޮކްޓޯބަރު ހިސާބުގައި އާ ރަންވޭ ހުޅުވަން،" ތޯހާ ވިދާޅުވި އެވެ.

މިއީ މުޅިން ތަފާތު އެއާޕޯޓެއް ފެންނާނެ ދެ އަހަރު

ރާއްޖެ އަންނަ އެތައް ލައްކަ ޓޫރިސްޓުންނާއި އެ ތަން ބޭނުންކުރާ ދިވެހިން ވެސް މިހާރު އެންމެ ބޮޑަށް ދެކެން ބޭނުންވަނީ އެންމެ ޒަމާނީ ފެންވަރުގެ ބޮޑު ޓާމިނަލެއް ލިބުމެވެ. އެ ހުވަފެން ހަގީގަތަށް ހެދުމުގެ މަސައްކަތް ހަލުވި ސްލީޑްގައި ކުރިއަށް ދާއިރު ތޯހާ ގަބޫލު ކުރައްވަނީ އަންނަ އަހަރަށް އެ ޓާމިނަލްގެ ކޮންސްޓްރަކްޝަން މަސައްކަތްތައް ނިންމައިލެވޭނެ ކަމަށެވެ.

"ފަންޑިން އެޖެންސީތަކުން ފައިސާ ހުރީ ހަމަޖެހިފައި. ފައިސާގެ އެއްވެސް މައްސަލައެއް ނެތް ޓާމިނަލްގެ މަސައްކަތް ނިންމާކަށް. އެކަމާ ގުޅޭ މީޓީންތައް ވެސް ބާއްވައި ނިންމައިފި. ވަރަށް ޕޮޒިޓިވްކޮށް އުޅެނީ. މިހާރު ވެސް އެ ތަނުގެ މަސައްކަތް ނުހުއްޓި ކުރިއަށް އެބަދޭ،" އޭނާ ވިދާޅުވި އެވެ.

"އަމާޒަކީ އާ ޓާމިނަލްގެ ކޮންސްޓްރަކްޝަން މަސައްކަތް އަންނަ އަހަރަށް ނިންމައިލުން."

މިހާރު ވެލާނާ އެއާޕޯޓްގައި އޮތީ ސާޅީހަކަށް އަހަރު ވެފައިވާ ރަންވޭއެކެވެ. އެކަމަކު، އެއީ ދުނިޔޭގެ އެންމެ މަތީ ފެންވަރުގެ އެއާލައިންތަކާއި އެންމެ ބޮޑެތި ބޯޓުތައް ޖައްސާ އެއާޕޯޓެކެވެ. އެހެންވެ، ޒަމާނީ ފެންވަރުގެ ރަނގަޅު ރަންވޭއެއްގެ ބޭނުންތެރިކަން އެ ހުރިހާ ގޮތަކަށް ވެސް ބޮޑެވެ. އެހެންވެ، ކުރީގެ ރައީސް އަބްދުﷲ ޔާމީންގެ ސަރުކާރުގެ ދުވަަސްވަރު ހެދި އާ ރަންވޭ ވީހާ ވެސް އަވަހަށް ބޭނުންކުރަން ފެށުމަކީ އެންމެ މުހިންމު އެއް ކަންތަކެވެ.

ތޯހާ ވިދާޅުވިގޮތުގައި މި އަހަރުގެ އޮކްޓޫބަރުގެ ނިޔަލަށް އާ ރަންވޭ އަށް ފްލައިޓްތައް ޖައްސަން ފަށާއިރު، އޭގެ ނަތީޖާއަކީ ފްލައިޓްތައް ޖައްސަން އިތުރު ސްލޮޓްތައް ލިބުމެވެ.

"އެރައިވަލް ޓާމިނަލާއި ޑިޕާޗާ ޓާމިނަލް ކުޑަވެފައި މި އޮތީ. މި އެއާޕޯޓް ޑިވެލޮޕް މި ކުރަނީ 7.5 މިލިއަން ފަސިންޖަރުން ގެންނަން އެމްއޭސީއެލް އާއި ސަރުކާރުން އަމާޒު ހިފާފައިވާތީ. މި ވަގުތަށް އެ ވަރަކަށް ކޭޓަ ނުކުރެވޭ،" އޭނާ ވިދާޅުވި އެވެ.

އާ ޓާމިނަލް ޕްރޮޖެކްޓްގެ ތެރެއިން އެއާޕޯޓުން ފެންނާނެ އެންމެ މުހިންމު އެއް ބަދަލަކީ ބައެއް މަގުތައް ފުޅާކުރުމެވެ. އެއާޕޯޓަށް އަރަން އޮންނަ މަގާއި އެތެރޭގެ ބައެއް މަގުތައް ފުޅާކުރާނެ އެވެ. ކައިރި ރިސޯޓަކަށް ދާ ދޯނިފަހަރާއި ލޯންޗުފަހަރަށް ފަސޭހައިން ހުޅުލެ އަށް ކައިރި ކުރެވޭނެ ގޮތް ވެސް ހަދާނެ އެވެ.

"ޓާމިނަލް ކައިރީގެ މަގުތައް ހާއްސަކޮށް އިންޓަނޭޝަނަލް ޓާމިނަލާ ދިމާއަށް އަރައިގެން އަންނަ މަގު ފުޅާވާނެ. އަދި ދެ ލޭނުގެ ދެ ސެޓް މަގު އަދި ހަދާނެ. ވާ ގޮތަކީ އެއާޕޯޓްގެ ކާގޯ ވެސް މި ހުންނަނީ އެއާޕޯޓްގެ ވަރަށް އުތުރުގައި. އެހެންވީމާ ކާގޯ އަށް ވެސް ފަސޭހައިން އެކްސެސް ވާންޖެހޭ. މަގުތައް ފުޅާކޮށް، ފަސޭހައިން އެތެރޭގެ ދަތުރުފަތުރު ކުރެވޭނެ ގޮތް ހަދަން ޖެހޭ. އެއީ ޓާމިނަލްގެ ޕްރޮޖެކްގެ ތެރޭގައި ހިމަނާފައިވާ ކަމެއް،" އޭނާ ވިދާޅުވި އެވެ.

ތޯހާ ވިދާޅުވީ، މަގުތައް ފުޅާކުރުމާއެކު ފުރަން އަންނަ މީހުންގެ ވެހިކަލްތައް ޕާކް ކުރުމަށް ހާއްސަ ޕާކިން ޒޯންތަކެއް ހަދާނެ ކަމަށެވެ.

"މިސާލަކަށް ބޭނުންވީ ބައްޕަ ދެކިލަން ރަށަށް ދާން. އެހެން ވެއްޖިއްޔާ ފުރަން އަންނަ ގޮތަށް އެފޯޑަބަލް ކާރު ޕާކިންއެއް ވެއްޖިއްޔާ އޭނާ ދާނީ ކާރު މި ތަނުގައި [އެއާޕޯޓްގައި] ބާއްވާލާފައި. އޭނާ އަންނަންދެން އޭތި އޮންނާނެ. އެ އަށް ޗާޖް ކުރާނެ. އެއީ ވެސް އެއާޕޯޓަށް ލިބޭނެ ވަރަށް ބޮޑު އާމްދަނީއަކަށް ވާނެ،" އޭނާ ވިދާޅުވި އެވެ.

އާ ސީ ޕްލޭން ޓާމިނަލް މޭގެ ނިޔަލަށް ބޭނުންކުރަނީ

އާ ޓާމިނަލަށް ވުރެ ކުރިން ބޭނުންކުރަން ފަށާނީ އެމްއޭސީއެލުން މުޅިން އަލަށް ހިންގަން ފަށާ ސީ ޕްލޭން ޓާމިނަލެވެ. އެމްއޭސީއެލުން 55 މިލިއަން ޑޮލަރު (848 މިލިއަން ރުފިޔާ) ހޭދަކޮށްގެން ހަދާފައިވާ ސީ ޕްލޭން ޓާމިނަލް އަންނަ ޖޫން މަހުގެ ކުރިން ބޭނުންކުރަން ފަށާއިރު، އެ ތަނުގެ މުޅި އޮޕަރޭޝަނަށް އެކަނިވެސް 200 އާ ގާތްކުރާ އަދަދަކަށް އަލަށް މުވައްޒަފުން ނަގަން ޖެހެ އެވެ.

"އެ ތަނަށް މުވައްޒަފުން ނަގާއިރު ވެސް އަޅުގަނޑުމެން އިސްކަންދޭނީ ދިވެހިންނަށް. އެމްއޭސީއެލުން ދަތުރު މި ކުރަނީ ވަރަށް ބޮޑަށް ހޮސްޕިޓަލިޓީ އިންޑަސްޓްރީއާ ދިމާ އަށް. އެހެންވީމާ ދިވެހިންނަށް އިސްކަންދޭންޖެހޭ،" ތޯހާ ވިދާޅުވި އެވެ.

އާ ސީ ޕްލޭން ޓާމިނަލް އެމްއޭސީއެލުން ހަދާފައި ވަނީ އެންމެ ޒަމާނީ ގޮތަށް އަދި ކަނޑަށް ޖައްސާ ބޯޓުފަހަރަށް ފަސޭހައިން ޕްލެޓްފޯމަށް އެކްސެސްވެވޭނެ ގޮތަކަށެވެ. ކަނޑަށް ޖައްސާ ބޯޓުފަހަރުގެ ހިދުމަތް ދޭ އެންމެންނަށް ސީ ޕްލޭން ޓާމިނަލް ޖާގަތައް ދޫކުރާނެ އެވެ. ރާއްޖެއަކީ ސީ ޕްލޭންގެ ވިޔަފާރީގައި ދުނިޔޭގައި ވެސް ގުނައިލެވޭ ތަނަކަށް ވުމުން އާ ސީ ޕްލޭން ޓާމިނަލް އެ ކުންފުނިން ހިންގަން ފެށުމަކީ އެމްއޭސީއެލްގެ ތާރީހުގައި ވެސް ފާހަގަކުރެވޭ ކާމިޔާބެއް ކަމަށް ތޯހާ ދެކެވަޑައިގަންނަވަ އެވެ.

ކުރިއަށް އޮތް މޭ މަހުގެ ނިޔަލަށް އާ ސީ ޕްލޭން ޓާމިނަލް އަދި އޮކްޓޫބަރު މަހު އާ ރަންވޭ ބޭނުންކުރަން ފެށުމަކީ އެއާޕޯޓް ތަރައްގީގައި ވަރަށް ބޮޑު ކުރިއެރުމެކެވެ. ޑިމާންޑާ އެއްވަރަށް ވަސީލަތްތައް ގާއިމުކޮށް، ޓޫރިސްޓުންނަށް ރާއްޖެ ތަޖުރިބާ ކޮށްލަން އިތުރު މަގުތަކެއް ފަހިވާނެ އެވެ.

"އާ ސީ ޕްލޭން ޓާމިނަލާއެކު، ސީ ޕްލޭންގައި ދަތުރުކުރާ މީހުންނަށް ފެންވަރު ރަނގަޅު ފެސިލިޓީއެއް އެ ލިބުނީ. އާ ރަންވޭއާއެކު އެފިޝަންސީގެ އިތުރުން ސޭފްޓީ އިތުރަށް ވަރުގަދަވީ. މިއީ ވަރަށް ބޮޑު ކުރިއެރުމެއް،" ތޯހާ ވިދާޅުވި އެވެ.

ވަގުތީ ބޭފުޅެއް ކަމަކު ވީ އެންމެ މައްޗަކަށް ނަތީޖާ ނެރެން ބޭނުންވޭ

ތޯހާގެ ލީޑަޝިޕްގައި އެއާޕޯޓަށް ގެންނާނެ ބަދަލުތަކާއި ކުރިމަގާ ގުޅޭ ގޮތުން ކުރާ ކޮންމެ ސުވާލަކާއެކު ހަނދާން ކޮށްދެއްވީ އޭނާއަކީ މަގާމަށް އަދި ވަގުތީ ބޭފުޅެއް ކަމެވެ. ނަމަވެސް ވީ އެންމެ މައްޗަކަށް ނަތީޖާ ނެރެދެއްވާނެ ކަމުގެ ޔަގީންކަން ދެއްވި އެވެ.

"މި ވަގުތުކޮޅު ވެސް އަޅުގަނޑުގެ މެކްސިމަމް ނެރެން ބޭނުން. އަޅުގަނޑު އެކަންޏެއް ނޫން. ރާއްޖޭގެ ނިސްބަތުން އެންމެ ކޮލިފައިޑް މީހުން މިތާނގައި އެބަތިބި. އެހެންވީމާ މި ފެންނަނީ އެ ބޭފުޅުންގެ ހިތްވަރު. މި ގަޑީގައި އަޅުގަނޑަށް ލިބެނީ ލީޑް ކުރުމުގެ ފުރުސަތު. ގާބިލް، ޝައުގުވެރި، މަސައްކަތް ކުރެވޭ ވަރުގެ ޓީމެއް އޮތުން ކުރިއެރުމަކީ،" ތޯހާ ވިދާޅުވި އެވެ.

އާ ޓާމިނަލާއި އާ ސީ ޕްލޭން ޓާމިނަލް އަދި އާ ރަންވޭ އެކަންޏެއް ނޫނެވެ. އެއާޕޯޓްގެ އާ ފަޔާ ސްޓޭޝަނަކާއި އާ ފިއުލް ފާމަކާއި އާ ކާގޯ ޓާމިނަލެއް ވެސް މި އަހަރުގެ ތެރޭގައި ހުޅުވާނެ އެވެ.

"ފިއުލް ފާމާއެކު މި އަންނަނީ ހައިޑްރަން ސިސްޓަމް. ކުރީގައި އަޅުގަނޑުމެން ބައުޒަރެއްގައި ތެޔޮ ހިފައިގެން ގޮސް ބޯޓަށް މި އަޅަނީ. އެކަމަކު ކުރިއަށް އޮތްތަނުގައި ހޮޅިތައް ހުންނާނީ ވަޅުލާފައި. މަތިންދާބޯޓު ކައިރި އަށް ހޮޅި ގުޅާފައި ތެޔޮ އެޅޭ ގޮތަށް ހައިޑްރަން ސިސްޓަމެއް ދެން ހުންނާނީ. ސޭފްޓީ އަށް ވެސް އެއީ އަޅުގަނޑުމެން އަޅާ ވަރަށް ބޮޑު ފިޔަވަޅެއް،" ތޯހާ ވިދާޅުވި އެވެ.

ރާއްޖޭގެ މައި އެއާޕޯޓް އަދި ހިންގަނީ ފުލް ކެޕެސިޓީއަކު ނޫނެވެ. މި ވަގުތު އެ ތަން ހިންގަނީ 18 ގަޑިއިރަށް ކަމަށް ވާއިރު އޮޕަރޭޝަންސް 24 ގަޑިއިރަށް ބަދަލުކުރުމަކީ އެމްއޭސީއެލްގެ މެނޭޖްމަންޓުން ބޭނުންވާ ކަމެކެވެ.

މި ދެ އަހަރު އަލަށް ހުޅުވާނެ ތަންތަން

• އާ ސީ ޕްލޭން ޓާމިނަލް މި އަހަރުގެ މޭ މަހުގެ ނިޔަލަށް.

• އާ ރަންވޭ އޮކްޓޫބަރު މި އަހަރުގެ އޮކްޓޫބަރު މަހު.

• އާ ފިއުލް ފާމް، އާ ކާގޯ ޓާމިނަލް، އާ ފަޔާ ސްޓޭޝަން (މި އަހަރު ބޭނުންކުރަން ފަށާނެ)

• އާ ޓާމިނަލް އަންނަ އަހަރުގެ ނިޔަލަށް ނިމޭނެ.

"އަޅުގަނޑުމެން އަތްނުލާ ހަ ގަޑިއިރު އެބައިން. ރޭގަނޑު 12 އިގެ ފަހުން މި އެއާޕޯޓް އޮންނަނީ ހުހަށް. ކުރީގައި ޗައިނީސް ކެރިއާތައް އުދުހުނީ ރޭގަނޑު. އެހެންވީމާ ރޭގަނޑުގެ ސްލޮޓްތައް އަދި އެބަހުރި ހުހަށް،" ތޯހާ ވިދާޅުވި އެވެ.

"އަޅުގަނޑުމެން ވާހަކަ ދައްކަމުން އެބަދަން އެއާލައިންތަކާ. އެކިއެކި ފޯރަމްތަކުގައި އެ ވާހަކަ ދައްކަމުން ދަނީ. ބޭނުމިއްޔާ ރޭގަނޑު 12 ގެ ފަހުން މި އެއާޕޯޓުން އަޅުގަނޑުމެންނަށް ހިދުމަތް ދެވޭނެ ކަމަށް."

މި ވަގުތު 3،400 އެއްހާ މުވައްޒަފުން އެއާޕޯޓްގައި މަސައްކަތް ކުރާއިރު، އެ ތަނަށް ދުވާލެއްގެ މައްޗަށް 4،000 އެއްހާ ޓޫރިސްޓުން އާދެ އެވެ. އެންމެ ޕީކް ދުވަސްވަރު އެ އަދަދު 6،000 އަށް އަރަ އެވެ. އެހެންވެ، ރާއްޖޭގެ ޓޫރިޒަމަށް 50 އަހަރު ފުރިފައިވާއިރު، ތޯހާ އަށް އޮތް ޔަގީން ކަމަކީ ޓޫރިސްޓުން ތަޖުރިބާ ކޮށްލަން މި ސަރަހައްދުން ވެސް އެންމެ ބޮޑަށް ބޭނުންވާ ފެންވަރުގެ އެއް އެއާޕޯޓެއްގެ ގޮތުގައި މި ދެ އަހަރުގެ ތެރޭގައި ފެންނާނެ ކަމެވެ.

"އަޅުގަނޑު ދެކޭގޮތުގައި ރާއްޖެ އަށް ދިމާވެފައި މި އޮތީ ރަނގަޅު ޕްރޮބްލަމެއް. އަބަދުވެސް ރާއްޖެ އަށް ޑިމާންޑް ބޮޑު. އެއާޕޯޓެއް ހުޅުވާފައި އެ ތަނަށް ޖައްސާނެ ބޯޓެއް ނެތިއްޔާ އެއީ ގޯހެއް. ބޯޓުތައް ގިނަވާން ޖެހޭނެ. އެއީ ނޫންތޯ އަޅުގަނޑުމެންގެ ބިޒްނަސްއަކީ،" ތޯހާ ވިދާޅުވި އެވެ.

"އަޅުގަނޑުމެންނަށް ފެނޭ ބައެއް ގައުމުތަކުގެ އެއާޕޯޓް ހުޅުވާފައި އެ ތަނަށް ޖައްސާނެ ބޯޓެއް ނުވޭ. އެއާ އިދިކޮޅަށް އަޅުގަނޑުމެން މި އުޅެނީ. ވެލާނާ އިންޓަނޭޝަނަލް އެއާޕޯޓަށް ޖައްސާނެ ބޯޓުތައް ވަރަށް ގިނަ."

އެއާޕޯޓްގެ އާ ޓާމިނަލާއި މުހިންމު އެހެން ބައެއް ތަންތަން ނިމުމުގެ ކުރިން ވެސް ތޯހާގެ އަމާޒަކީ މި ވަގުތަށް އިތުރު ކުރެވެން ހުރި ވަސީލަތްތައް ވެސް އިތުރުކޮށް، އެފިޝަންސީ އިތުރު ކުރެވޭނެ ގޮތްތަކެއް ހޯދުމެވެ. އޭގެ ބައެއް ކަންތައްތަކުގެ މިހާރު ވެސް ވަނީ ޕްލޭންކޮށް އަމަލީ މަސައްކަތް ފަށައިފަ އެވެ.