އެކި މުއްދަތުތަކުގެ ތެރޭގައި ރާއްޖޭގެ އެކި ރަށްރަށަށް އައިސްފައި ހުރި ބަދަލުތައް ފެންނާނެ ގޮތަށް އަލީ ޝަރީފް ބީސްލައިޑާ އަށް އަޕްލޯޑްކޮށްފައި ހުރި ބައެއް ފޮޓޯތައް
06 ޖެނުއަރީ 2017 - 08:28
22 comments
ޒަމާނާ އެކު ރާއްޖޭގެ އެކި ރަށްރަށަށް އައިސްފައިވާ ބަދަލުތައް ފޮޓޯ އިން ފެންނަ ލިންކުތަކެއް މި ދުވަސްކޮޅު ސޯޝަލް މީޑިއާ އިން ދެކެން ހެއްޔެވެ؟ އެއް ފޮޓޯ މަތިން އަނެއް ފޮޓޯ ސްލައިޑްކޮށްގެން އެހާރާއި މިހާރު އަޅާކިޔާލެވޭ ގޮތަށް ވެބްސައިޓެއްގައި ޝާއިއުކޮށްފައިވާ މި ފޮޓޯތަކަކީ ޓީޗަރަކު އޭނާގެ ބޮޑު ޗުއްޓީ ހޭދަކުރި ގޮތެވެ.
ޅ. ނައިފަރު ސްކޫލުގެ ސެކަންޑްރީ ގްރޭޑްތަކަށް އިސްލާމް ކިޔަވައިދޭ އަލީ ޝަރީފް ވަނީ މިފަދަ 55 ސްލައިޑެއް ވޭތުވެދިޔަ މަހެއްހާ ދުވަހުގެ ތެރޭގައި "ބީސްލައިޑާ"ގައި ޝެއާކޮށްފަ އެވެ. ރަށްރަށުގެ މަތިން އެހާރާއި މިހާރު އަޅާކިޔައިލެވޭ ގޮތަށް 1960ގެ އަހަރުތަކުގެ ފޮޓޯތައް ވެސް ހިމަނާފައިވާ އިރު، އާބާދުވުމާއި ތިމާވެއްޓާއި އުމްރާނީ ތަރައްގީގެ ގޮތުން އައިސްފައިވާ ބަދަލުތައް ފެނެ އެވެ.
މިކަން ކުރަން އުޅޭތާ ގިނަ ދުވަސްތަކެއް ފަހުން އަލީ ޝަރީފް، 33، އަށް ކާމިޔާބީ ލިބުނީ އޭނާގެ ސަމާލުކަމަށް ބީސްލައިޑާ އައި ހިސާބުންނެވެ.
"އަޅުގަނޑު ކުރިންސުރެ ޚިޔާލުކޮށްގެން ހުރި ކަމެއް މިއީ، ރަށްރަށް މި ގޮތަށް ދައްކާލުން. މި ގޮތަށް ސްލައިޑާ ބޭނުންކޮށްގެން ފޮޓޯ ހަދާނެ ވެބްސައިޓެއް ފެނޭތޯ ވަރަށް ބެލިން. އަމިއްލަ އަށް ވެސް އެކަހަލަ އެއްޗެއް ހެދިދާނެތޯ ވިސްނިން. އެކަމަކު އަޅުގަނޑުގެ އެފަދަ ގާބިލްކަމެއް ނެތީމާ ނުކުރެވި ހުއްޓާ މި ބްލޮގް ފެނުނީ،" އޭނާ ބުންޏެވެ.
ގއ. ވިލިނގިލި 1969ގައި އޮތް ގޮތާއި އޭގެ 47 އަހަރު ފަހުން އައިސްފައި ހުރި ބަދަލު ފެންނަ ދެ ފޮޓޯ އަލީ ޝަރީފް ބީސްލައިޑާގައި ދައްކައިދީފައި.
ސްލައިޑާއަކުން ފޮޓޯ ދައްކާލެވޭ ގޮތް ވިޔަސް، ރާއްޖޭގެ ރަށްރަށުގެ ކުރީގެ ފޮޓޯތައް ހޯދާކަށް ފަސޭހައެއް ނޫނެވެ. އަލީ ޝަރީފް ބުނިގޮތުގައި މިހާރުގެ ފޮޓޯތަކާއި 2002 އަދި 2005ގެ ފޮޓޯތައް ގޫގްލް އާތުން ފަސޭހަ އިން ލިބެން ހުއްޓަސް އެއަށް ވުރެ އިހުގެ ފޮޓޯތައް ހޯދަނީ އިންޓަނެޓް ވަރަށް ބޮޑަށް ބަލައި ހާވައިގެންނެވެ. އެކަމަކު މި ކަމަށް ޝައުގުވެރިކަން ހުރިލެއް ބޮޑުކަމުން އޭނާގެ މާ ބޮޑު ޝަކުވާއެއް ނެތެވެ.
"އަޅުގަނޑު ކުޑައިރުއްސުރެ ވެސް ރާއްޖޭގެ ޖިއޮފްރަފީ އަށް ވަރަށް ބޮޑަށް ޝައުގުވެރިކަން ހުރޭ. ރަށްތަކުގެ ޝޭޕާއި ރަށް ގިރާ ގޮތާއި ވޮޑޭ ގޮތާ އެއްޗެހި ބަލަން ވަރަށް ބޭނުންވޭ،" އަމިއްލަ ރަށް ނައިފަރުގެ އެކި ކަހަލަ ފޮޓޯތައް ވެސް މި ގޮތަށް ޝެއާކުރަމުން އަންނަ ޒުވާނާ ކިޔައިދިނެވެ.
"މީގައި އުނދަގޫ ވާނީ ދެ ފޮޓޯގެ އޭންގަލްތައް ދިމާ ނުވަންޏާ. އުނދަގޫ ފޮޓޯއެއް ވެއްޖެއްޔާ ވިއްސަކަށް މިނިޓް ނަގާނެ، ހަދާލަން. އެހެން ނޫނީ ފަސް ވަރަކަށް މިނިޓުން ރަށެއް ނިންމާލެވޭނެ."
އަލީ ޝަރީފްގެ ބޭނުމަކީ ރަށްރަށުގެ ތާރީޚުން ފެންނަން ހުރި ޝައުގުވެރި ކަންތައްތަކެއް އެންމެންނާ ހިއްސާކުރުމެވެ.
"ވޭތުވެދިޔަ ފަސްދޮޅަހަކަށް އަހަރުގެ ތެރޭގައި ވަރަށް ބޮޑެތި ބަދަލުތަކެއް ރަށްރަށަށް އައިސްފައި ހުރީ. ބައެއް ރަށްރަށް ވަރަށް ބޮޑަށް ގިރާފައި، އަނެއް ބައި ރަށްރަށް ވަރަށް ބޮޑަށް ވޮޑިފައި، އާބާދީ ބޮޑުވެ ބައެއް ރަށްރަށް ފުރިގެން ބަންޑުންވެފައި. މި ރަށްރަށުގެ މީހުންނަށް ވެސް މި ފޮޓޯތައް މި ގޮތަށް ފެނުން މުހިއްމުވާނެ،" އޭނާ ބުންޏެވެ.
އަންނަ ހަފްތާގައި ޗުއްޓީ ނިމުމަކަށް އަންނަ އިރު އޭނާގެ މި މަސައްކަތް ދާނީ މަޑުޖެހިގެންނެވެ. އެކަމަކު ހުއްޓައެއް ނުލާނެ އެވެ.
"މިދިޔަ މަހު ސްލައިޑާ އަށް އަޅަން ފެށީ. ޗުއްޓީ ތެރޭގައި ވީމާ މި މަސައްކަތް މި ކޮށްލެވުނީ. ސްކޫލް ހުޅުވުނީމާ ދެން އަނެއްކާވެސް ދާނީ މިކަން މަޑުޖެހިގެން. އެކަމަކު ފޮޓޯ ލިބުނު ވަރަކުން ހަމަ އިތުރުކުރަމުން ގެންދާނަން،" އަންހެނުންނާއި ދަރިފުޅާ އެކު ނައިފަރުގައި ދިރިއުޅޭ އަލީ ޝަރީފް ބުންޏެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
އަހްމަދު އިލްހާމް
07 January 2017
ޢަލީ ޝަރީފަށް 1960ގެ ފޮޓޯތަކާއި 2005ގެ ފޮޓޯތައް ލިބުނު ގޮތް ނޫސްވެރިޔާ ހޯދާލިނަމަ. މިހާރުގެ ފޮޓޯތައް ދެން އަމިއްލައަށް ވެސް ޑްރޯންގެ އެހީގައި ނެގިދާނެ. އެކަމަކު ކުރީގެ ފޮޓޯތައް ލިބިފައި ތިވަނީ ކޮންމެވެސް ނުހައްޤު ގޮތަކަށް ހެން ހާދަ ހީވޭ.
މޫސަ
08 January 2017
މި ފޮޓޯތައް ލިބޭނެ ގޫގުލް އާތުން. ގޫގުލް އާތު ޑައުންލޯޑް ކޮށްފަ އޭގަ އިންނާނެ ފީޗާއެއް ޓައިމްލައިން ކިޔާ.
މާލެ
07 January 2017
މާލެ އަތޮޅެއް ނޯންނާނެ އެވެ. މާލެ އޮންނާނީ ސަރަހައްދެކެވެ. އަތޮޅަކީ އެއީ ކާފު އަތޮޅު އެވެ. ރާއްޖެތެރޭގައި އަތޮޅު ތައް ހުންނާނީ. ކާކު ކިޔަނީ މާލެ އަތޮޅޭ. ދުވަހަކު ވެސް މަމެން އަޑު ނާހަން މާލެ އަތޮޅޭ ކިޔާ އަޑު ދޯ. ކައްޕިން ވެސް ކިޔަނީ މާލެ ސަރަހައްދޭ ދޯ.
ފޮޓޯ ހޯދަން އުޅޭ މީހާ
07 January 2017
ކޮން ވެބްސައިޓަކުން ތޯ ތިހުރިހާ ފޮޓޮ ތަކެއް ހޯއްދެވީ
ޕޮކަންޑި މޭން
06 January 2017
މިކަހަލަ މަސައްކަތެއް ކުރި އިރު ރައީސް ޔާމީން ވެރިކަމަށް 2013 ގައި ވަޑައިގެންނެވި އިރު މާލެ އޮތް ގޮތާއި 2016 ވަނަ އަހަރު ނިމުނު އިރު މާލެ އޮތް ގޮތް ދައްކުވާ ނުދިނުމަކީ އިހުމާލެއް ކަމުގައި ނޫނީ ނުވާނެ.
ޢަބްދުﷲނާފިޒު
06 January 2017
ޕޮކަންޑި މޭން، އޭރުން މާރީއްޗެއްނުވާނެ، ފުރަތަމަވެސް ފޮޓޯއިން ފެންނާނީ ރައްޔިތުންގެ ތިޖޫރި އަދި އެތިޖޫރީގަ ފައިސާ ހުރިގޮތް ދެން މިހާރު (2016) ގަ ހުރި ގޮތް ތިޖޫރިވެސް ފޮޓޯއިން ނުފެންނާނެ، ފެން ނާނީ ތިޖޫރި ހުރިތާ ވަޅުގަނޑެއް ހުއްޓާ، އޭރުން އެހެރީ ހަތަރެސްކަން ހަމަވެފަ، ދެއްތޮ.
ާަނާފިޒުގެ ބައްޕަ
07 January 2017
2013 އިންފެށިގެން 2016 އަށް އައިއްސަވާ ބަދަލު ފެނުނީމާ ރީނދޫ ކުދިންނަކަށް ހަޖަމެއް ނުވާނެ. ގެއްލުނު އެތީގެ ބޮޑުކަމުން އަދިވެސް އެކުދިން އެ ތިބެނީ ހިތް ހަލާކުވެފައި.
ލުގުމާން
06 January 2017
މިފޮޓޯތަކުން ހާދަ ހާ ވާ ތަފްސީލްކޮށް ތަފާތުތަށް އެބަ ދައްކުވައި ދެއޭ. މިފޮޓޯތަށް ތައްޔާރުކުރި ފަރާތަށް ވަރަށް ސަލާން.
އަލީ
06 January 2017
ހުރިހާ ރަށެއްގެ ތެރެއިން އެންމެ ބޮޑު ބަދަލެއް އައިސްސަ އޮތީ ގދ. ތިނަދޫއަށް. މާލެ އެއީ ރާއްޖެތެރޭ ރަށެއްނޫން. އެހެންވީމަ މާލޭމީހުން އެހެން ރައްރަށު މީހުންނާ ދިމާލައް ރާއްޖެތެރޭ މީހުންނޭ ކިޔަނީ. އެހެން ވީމަ މާލެ ލާނެކަމެއްނެތް
ޒީ
06 January 2017
ލިންކު ވެސް ހަބަރުގަ ހިމަނާލި ނަމަ... އަލުން ހިމަނުއްވައިދިނުމަށް ދަންނަވަން ވަރަށް ފުރިހަމަ ވާނެ
ލިންކު
06 January 2017
ރިޕޯޓް ނިމޭތަނުގަ އޭނީ ނޫންތަ ލިންކު؟!
އަލިފު
06 January 2017
2013 ވަނަ އަހަރު މާލެ އޮތް ގޮތާއި 2016ގެ ނިޔަލަށް މާލެ އޮތްގޮތް މިފަދަ ސްލައިޑަކުން ބަލާލުން ވަރަށް މުހިއްމު
ޢަބްދުﷲނާފިޒު
06 January 2017
އޭރުން ފެންނާނީ ތިޖޫރިއަކާ ، ތިޖޫރި ހުރިތާ ވަޅުގަނޑެއް ހުއްޓާ، ވަރަށް ތަފާތު ވާނެ ދެއްތޮ.
އުމަރު
06 January 2017
ރަށްރަށުގެ މައްސަލަ އެހާރާއި މިހާރަށް ބަލާއިރު ފޮޓޯއަކުން ހާމައެއް ނުކުރެވޭނެ، ހާމަކުރެވޭނީ އެތަނުގެ ވިޔަފާރިއާއި ދިރިއުޅުމުގެ މައްޗަށް ބިނާކޮށް
ނައިފަރު މީހެއް
06 January 2017
މިއީ ވަރަށް ރަނގަޅު ކަމެއް. އަލީއަށް ވަރަށް ބޮޑަށް ޝުކުރިއްޔާ. އެކަމަކު އެނގިލައްވާތޯ ޒަމާންވީ ދިވެހި ދިވެހި ރަށް ތަކުގެ ނަންތަށް މިހާރު އަމިއަލައަށް ބަދަލުކޮށްގެން މުޅިން އަމިއަލަ ނަންތަށް ކިޔައިގެން ރަށްތައް މިހާރުވަނީ ގެއްލުވާ ލާފަ. އަޅުގަނޑު މީގެ ދެދުވަސްކުރިން ބަލާލިން ބޭނުމަކު ނ. އަތޮޅު އެއްދުއްފަރު ކިޔާ ރަށަކާ ދިގުރަށް ލިޔާ ރަށެއް ޗާޓުން ފެނޭތޯ. ނުފެނުން. އެތާ ރަށްތަކެއްގެ ނަން އެބަހުރި އެކަމަކު އެނަން ކިޔާ ރަށެއް މިހާރަކު ނެތް. ރަށްރަށާ ބެހޭ މިމިސްޓްރީގައި އެނަން ކިޔާ ތަނެއް ނެތިއްޔާ މިހާރު އެރަށް ވަނީ ދުނިޔެއިންވެސް ފޮހެވިފައޮ ލަމަށް ވެ މިމުނީ
ނައިފަރު މީހާގެ ބައްޕަ
06 January 2017
ދަރިފުޅާ ތިޔަ ބުނާ ދެ ރަށް ވެސް ނޫނު އަތޮޅުގައި އެބަ އޮތް ދިގުރަށުގައި އެބަ ހަދާ ރިސޯޓެއް، އެއްދުއްފަރު އޮތީ ބުރިބުރި ވެފައި، އެކި ރަށަށް އެކި ނަން ކިޔަސް އެއްދުއްފަރު ވެސް އެބަ އޮތް.