އަންބަރާ އާއި ހުޅިދޫ މައްސަލާގައި ވ. އަތޮޅު ރައްޔިތުން ކުރި އިހުތިޖާޖު ހުއްޓުވަން ފުލުހުން ގޮސް މައްސަލަ ހައްލުކުރަން އަތޮޅު ކައުންސިލްގެ ރައީސް ޝުޖާއުއާ ވާހަކަދައްކަނީ -- ފައިލް ފޮޓޯ: ވ. އަތޮޅު ކައުންސިލް
08 މާޗް 2023 - 12:40
1 comments
ރިސޯޓު ހިންގަން ދޫކޮށްފައިވާ ވ. އަންބަރާގެ ތިމާވެއްޓަށް ދީފައިވާ ގެއްލުންތަކާ ގުޅޭ މައްސަލަ އަލުން ބަލައިދިނުމަށް ވ. އަތޮޅު ކައުންސިލުން ސަރުކާރުގެ ކަމާބެހޭ އިދާރާތަކުގައި އިއްޔެ އެދިއްޖެ އެވެ.
ވ. އަތޮޅު ކައުންސިލުން އެ މައްސަލަ އަލުން ބަލައިދޭން އެދުނީ، އަންބަރާގެ ތިމާވެއްޓަށް ގެއްލުން ދީފައި ވިޔަސް، އެ ގެއްލުންތަކަށް އެ ރަށް ކުއްޔަށް ހިފާފައިވާ ފަރާތުން ޒިންމާވާން ނުޖެހޭ ކަމަށް އެންވަޔަރަމެންޓަލް ޕްރޮޓެކްޝަން އެޖެންސީ (އީޕީއޭ) އިން ކުރި ތަހުގީގަށް ފަހު ނިންމާފައި ވާތީ އެވެ.
އަތޮޅު ކައުންސިލުން ރައީސް އޮފީހަށާއި ތިމާވެއްޓާ ބެހޭ މިނިސްޓްރީ އަދި ރައްޔިތުންގެ މަޖިލީހަށް ފޮނުވި ސިޓީގައި ބުނީ، އީޕީއޭގެ ނިންމުމަކީ ރާއްޖޭގައި ތިމާވެށި ހިމާޔަތްކުރުމުގެ ގާނޫނާއި ގަވާއިދުތަކާ ހިލާފު ނިންމުމެއް ކަމަށެވެ. އެހެންވެ އެކަމުގެ ކަންބޮޑުވުން އެބައޮތް ކަމަށް އެ ކައުންސިލުން ބުންޏެވެ.
ވ. އަންބަރާ ކަނޑޫފާ މިހާރު އޮތް ގޮތް: އެތަނަށް ވަނީ ފަސް އަޅައި ފޮރުވައިފައި.-- ފޮޓޯ: ވ. އަތޮޅު ކައުންސިލް
އަންބަރާގައި އުފެދިފައި އޮތް ގުދުރަތީ ކަނޑޫފަލާއި ކުޅިއަށް ފަސް އަޅައި ފޮރުވާލުމަކީ ވ. އަތޮޅު ރައްޔިތުންގެ ވަރަށް ބޮޑު ކަންބޮޑުވުމަކަށް ވާތީ މި މައްސަލަ އިސްތިއުނާފުކޮށްދީ، މައްސަލަ އަލުން ބެލުމަށް، އަތޮޅު ކައުންސިލުގެ ސިޓީގައި އެދިފައިވެ އެވެ.
އެ ސިޓީގައި ވަނީ އީޕީއޭގެ ނިންމުމާ ގުޅިގެން، އަތޮޅު ކައުންސިލުން ސާފުކުރަން ބޭނުންވާ ބައެއް ކަންކަން ވެސް ހިމަނައިފަ އެވެ. އޭގެ ތެރޭގައި ހިމެނެނީ؛
• ކަނޑޫފަލާއި ކުޅިއަށް ވެލި އެޅީ ސަރުކާރުގެ އިދާރާތަކުގެ ހުއްދަ ލިބިގެންތޯ؟
• އެ މައްސަލަ ސަރުކާރުގެ ކަމާބެހޭ އިދާރާތަކުގެ ސަމާލުކަމަށް އައިސްފައިވޭތޯ؟
• ކަނޑޫފަލާއި ކުޅިއަށް ވެލި އެޅުމުން ލިބޭ ގެއްލުން ކުޑަކުރުމަށް ރަށް ކުއްޔަށް ހިފާފައިވާ ފަރާތުން އެއްވެސް މަސައްކަތެއް ކުރިތޯ؟
• އަންބަރާގެ ތިމާވެއްޓަށް ލިބިފައިވާ ގެއްލުމަށް ރަށް ކުއްޔަށް ހިފާފައިވާ ފަރާތުން ޒިންމާވާން ނުޖެހޭ ކަމަށް އީޕީއޭއިން ސާބިތުކުރީ ކިހިނެއްތޯ؟
• އަދަބު ކަނޑައަޅާފައިވާ ކުށެއް ކުރުމުން އަދަބު ނުދީ ދޫކޮށްލީ ކީއްވެގެން ކަމާއި ލިބުނު ގެއްލުމުގެ ބަދަލު ހޯދަން ދައުލަތުން ކުރަނީ ކީއްތޯ؟
އީޕީއޭގެ ޑިރެކްޓަ ޖެނެރަލް އިބްރާހިމް ނައީމް ސޮއިކުރައްވައި ވ. އަތޮޅު ކައުންސިލަށް މިދިޔަ މަހު ފޮނުއްވި ސިޓީއެއްގައި ބުނީ، އީޕީއޭއިން އަންބާރާގައި ކުރި ސާވޭއިން، އެ ރަށުގައި ތިމާވެށީގެ ހާލަތު ބަޔާންކުރާ ރިޕޯޓް (އީއައިއޭ) އާ ހިލާފަށް މަސައްކަތް ކޮށްފައިވާކަން އެނގިފައިވާ ކަމަށެވެ. ނަމަވެސް، އެއީ އެ ރަށް ކުއްޔަށް ހިފާފައިވާ ފަރާތުން ކޮށްފައިވާ ކަންތައްތަކެއް ނޫން ކަން އީޕީއޭގެ ތަހުގީގަށް ސާބިތު ކުރެވިފައިވާ ކަމަށް ނައީމް ވިދާޅުވި އެވެ.
ރިސޯޓް ހަދަން 50 އަހަރަށް އެ ރަށް ކުއްޔަށް ދީފައި ވަނީ ހަނދުވަރު އޯޝަން ޕްރައިވެޓް ލިމިޓެޑަށެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ބޮލި މުލައް
08 March 2023
ހެޔޮނުވާނެ ތިޔަ އީޕީއޭ ވާހަކަ ދައްކަންވެސް ރުފިޔާއަށް ވިކި ހުސްވެފައި މ. މުލަކު ގޮނޑުދަށުން ވެލި ނަގައިގެން ރަށުގެ ގިރާ ސަރަޙައްދު ހިމާޔަތްކުރަނީ މ. މުލަކު ގޮނޑުދަށުން ވެލި ނަގައިގެން މަސްބަނދަރު ހަދަނީ މި މައްސަލަ ހުށަހަޅާނެ ދައުލަތުގެ އިދާރާއެއް ނެތް