ނަސީރު އެކަޑަމީގެ ޒުވާން ދުވުންތެރިން ޓްރޭނިން އަށް ލަންކާގައި ކޭމްޕްކޮށްފި

ނަސީރުގެ އެކަޑަމީގެ ޒުވާން ދުވުންތެރިން ލަންކާގެ ޓްރޭނިން ކޭމްޕަށް ފުރުމުގެ ކުރިން: އެއް މަސް ދުވަހު ޓްރޭނިންގައި އެ ދުވުންތެރިން ލަންކާގައި ހޭދަ ކުރާނެ

ހުސެއިން ހަބީބް، މިހާރު

03 ޖުލައި 2023 - 11:44

ކުރީގެ އެއްވަނަ ދުވުންތެރިޔާ ނަސީރު އިސްމާއީލްގެ އެކަޑަމީގެ ޒުވާން ދުވުންތެރިން ޓްރޭނިން އަށް ލަންކާގައި ކޭމްޕްކޮށްފި އެވެ.

ނަސީރު ބުނީ، ލަންކާގައި އެއް މަސް ދުވަސްވަންދެން ޓްރޭނިން ކޭމްޕް ކުރިއަށް ގެންދާނެ ކަމަށެވެ. ނަސީރުއާ އެކު ތަމްރީން ހަދަމުން އަންނަ 11 ދުވުންތެރިޔަކު ކޭމްޕްގައި ބައިވެރިވެ އެވެ.

އެ ދުވުންތެރިން މިހާރު ޓްރޭނިން ކުރިއަށް ގެންދަނީ، ލަންކާގެ ފަރުބަދަމަތީގެ ސިޓީ ނުވަރަ އެލިޔާގަ އެވެ. އާންމުގޮތެއްގައި ވެސް ފިނިމިން މަތި އެ ސިޓީގައި އެ ދުވުންތެރިން ކުރިއަށް ގެންދަނީ ހައި އެލްޓިޓިޔުޑް ޓްރޭނިންތަކެވެ.

ނަސީރް ސްޕޯޓްސް އެކަޑަމީގެ ޒުވާން ދުވުންތެރިން ނުވަރަ އެލިޔާގައި ކުރިއަށްގެންދާ ޓްރޭނިން ކޭމްޕްގެ ތެރެއިން

"ރާއްޖެ ކަހަލަ ތިރި ގައުމުގައި އުޅޭ އެތުލީޓުންނަށް ވަރަށް މުހިންމު ޓްރޭނިން އެއް ހައި އެލްޓިޓިޔުޑް ޓްރޭނިން. އެއީ ކޮންމެ ކުޅިވަރެއްގައި އުޅޭ އެތުލީޓަކަސް ރާއްޖޭގައި އުޅޭ އެތުލީޓުންނަށް ވަރަށް މުހިންމު ކޮމްޕޯނަންޓެއް،" ނަސީރު ބުންޏެވެ.

ނުވަރަ އެލިޔާގެ ޓްރޭނިންތަކަށް ފަހު އެކަޑަމީގެ ދުވުންތެރިން ތަމްރީނަށް ކޮލަމްބޯ އަށް ވެސް ދާނެ ކަމަށް ނަސީރު ބުންޏެވެ. އެ ސިޓީގައި ދުވުންތެރިންގެ ތަމްރީން ކުރިއަށް ގެންދާނީ ލަންކާގެ ލޯންގް ޑިސްޓެންސް ކޯޗު ރަތުނަ ކުމާރާގެ ބެލުމުގެ ދަށުންނެވެ.

މީގެ ކުރިން ވެސް ނަސީރު އެކަޑަމީގެ ދުވުންތެރިން ވަނީ ކޮލަމްބޯގައި ރަތުނަ ކުމާރާގެ ބެލުމުގެ ދަށުން ޓްރޭނިން ހަދައިފަ އެވެ.