ކުންފުނިތަކުގެ ހިންގުން ހަރުދަނާކުރަން ޕީސީބީން އެކްޝަން ޕްލޭނެއް ތައާރަފްކޮށްފި

ކުންފުނިތަކުގެ ހިންގުން ހަރުދަނާކޮށް، ޖަވާބުދާރީކޮށް، ދެފުށް ފެންނަ އުސޫލުތަކެއް އެކުލަވައިލުމަށް ޕްރައިވަޓައިޒޭޝަން އެންޑް ކޯޕްރަޓައިޒޭޝަން ބޯޑު (ޕީސީބީ) އިން ސްޓްރެޓެޖިކް އެކްޝަން ޕްލޭނެއް އެކުލަވައިލައި، އެ ޕްލޭން ތައާރަފްކޮށްފި އެވެ.

މިއަދު ހ. މީރުމާގައި ބޭއްވި ރަސްމިއްޔާތުގައި ޕީސީބީގެ އެކްޝަން ޕްލޭން ލޯންޗުކޮށްދެއްވީ އޮޑިޓަ ޖެނެރަލް ހުސެއިން ނިޔާޒީ އެވެ.

ޕީސީބީގެ އެކްޝަން ޕްލޭން އެކުލަވާލީ 2024 އިން 2028 އަށް ހާސިލުކުރަން ބޭނުންވާ ކަންކަން ހިމަނައިގެންނެވެ. އެ ޕްލޭންގައި އެ ކުންފުނީގެ މިޝަން، ވިޝަން އަދި ކޯ ވެލިއުގައި ހިމެނޭ ކަންކަން ހާސިލުކުރަން ވަނީ ނިންމައިފަ އެވެ.

ސްޓްރެޓެޖިކް އެކްޝަން ޕްލޭންގެ ހިމެނޭ ލަނޑުދަނޑިތައް

- އެސްއޯއީތަކާ ގުޅޭ ގަވައިދުތައް ހަރުދަނާކުރުން

- ޕީސީބީގެ ކެޕޭސިޓީ އިތުރުކުރުން

- އެސްއޯއީތައް މިނިޓާކުރާނެ ރަނގަޅު ނިިޒާމެއް އެކުލަވައިލުން

- އެސްއޯއީތަކުގެ ނަޒާހަތްތެރިކަމާއި ޖަވާބުދާރީ ކުރެވޭނެ ނިޒާމެއް އެކުލަވައިލުން

- ޕީބީސީގެ މުޅި ޕްރޭމްވޯކް އެކުލަވައިލުން

އެ ރަސްމިއްޔާތުގައި އޮޑިޓާ ޖެނެރަލް ނިޔާޒީ ވިދާޅުވީ، އާ އެކްޝަން ޕްލޭންގެ ތެރެއިން ކުންފުނިތަކުގެ ހިންގުން ހަރުދަނާވާނެ ކަމަށް އުންމީދުކުރައްވާ ކަމަށެވެ. އޭނާ ވިދާޅުވީ، ސަރުކާރު ހިއްސާވާ ކުންފުނިތަކުގެ އެކްސްޓާނަލް އޮޑިޓް ނިޒާމު ހަރުދަނާކުރުމުގެ ގޮތުން އެކަމާ ގުޅޭ އާ އުސޫލެއް މިހާރު ވެސް އެކުލަވައިލާ، ކުންފުނިތަކުގެ އިންޓާނަލް ކޮންޓްރޯލް ހަރުދަނާކުރަން އޮޑިޓަރުންގެ ހިޔާލާއި މަޝްވަރާގެ ތެރެއިން ހިންގުމުގެ ކަންކަން ރޭވޭ ގޮތަށް ބަދަލު ގެނެސްފައިވާ ކަމަށެވެ.

"ގުޑް ގަވަނަންސް، ފައިނޭންޝަލް އާއި އޮޑިޓަކީ ލާމެހިފައިވާ ކަންކަން. އެހެން ކަމުން އޮޑިޓަރުންނާއި އެކައުންޓެންޓުން ގުޅިގެން ކުންފުނީގެ އިންޓާނަލް ކޮންޓްރޯލާއި ކޯޕަރޭޓް ގަވަނަންސް ހަރުދަނާ ކުރަން މަސައްކަތް ކުރެވިދާނެ. އެހެން ނަމަވެސް އަޅުގަނޑުމެން ގަބޫލު ކުރަން ކުންފުނީގެ ފަންނީ އެހެން ދާއިރާތަކުގެ މީހުން، ގުޅިގެން މަސައްކަތް ކޮށްފި ނަމަ ރަނގަޅު މިސްރާބަކަށް ކުންފުނިތައް ގެންދެވޭނެ،" އޭނާ ވިދާޅުވި އެވެ.

ޕީސީބީގެ ރައީސް އާސިމް މުހައްމަދު ވިދާޅުވީ، ސްޓްރެޓެޖިކް އެކްޝަން ޕްލޭންގެ ބޭނުމަކީ ޕީސީބީއަށް ގާނޫނީ ގޮތުން ލާޒިމުކޮށްފައިވާ ކަންކަން ހާސިލުކުރާނެ ރަނގަޅު ނިޒާމެއް އެކުލަވައިލުން ކަމަށެވެ.

މިއަދުގެ ރަސްމިއްޔާތުގައި ޕީބީސީގެ ވެބްސައިޓާއި އެސްއޯއީ ގޭޓްވޭ ވެސް ވަނީ ލޯންޗުކޮށްފަ އެވެ. އެސްއޯއީ ގޭޓްވޭ މެދުވެރިކޮށް، ކުންފުނިތަކުގެ މުވައްޒަފުންނަށް، އެކުންފުނީގެ މާލީ މައުލޫމާތުތައް ގޭޓްވޭއަށް ހިއްސާކުރެވޭނެ އެވެ. އަދި އާޓިފިޝަލް އިންޓެލިޖެންސްގެ އެހީގައި މާލީ ރިޕޯޓުތައް ތައްޔާރުކުރެވި، އެ މައުލޫމާތު އާންމު ކުރެވޭނެ އެވެ.