އެތުލީޓުންގެ ކާމިޔާބީ ފާހަގަކުރަން ދިރާގުގެ ހާއްސަ އިނާމެއް

އައިޝަތު ޖަޒްލީ، މިހާރު

11 ސެޕްޓެމްބަރ 2023 - 15:04

މި އަހަރުގެ އިންޑިއަން އޯޝަން އައިލަންޑް ގޭމްސްގައި އެކި ވަނަތައް ހޯދައި މެޑަލް ހާސިލްކުރި އެތުލީޓުންނަށް ދިރާގުން ހާއްސަ އިނާމެއް ދީފި އެވެ.

އެތުލީޓުންނަށް އިނާމު ދިނުމަށް ދިރާގުގެ ހެޑް އޮފީހުގައި ބޭއްވި ރަސްމިއްޔާތުގައި އެތުލީޓުންނަށް ވަނީ ރަތް ދޫލައިގެ މަރުހަބާއެއް ކިޔައިފަ އެވެ. މި ރަސްމިއްޔާތުގައި ކުޅިވަރުގެ އެކި އެސޯސިއޭޝަންތަކުންނާއި މޯލްޑިވްސް އޮލިމްޕިކް ކޮމިޓީގެ މެމްބަރުން ވެސް ވަނީ ބައިވެރިވެފަ އެވެ.

މި ރަސްމިއްޔާތުގައި ދިރާގުގެ ސީއީއޯ އަދި މެނޭޖިން ޑިރެކްޓަރު، އިސްމާއިލް ރަޝީދު ވަނީ އެތުލީޓުންނަށް މަރުހަބާ ދަންނަވައި އެ ކުންފުނިން ރާއްޖޭގައި ކުޅިވަރު ތަރައްގީކުރުމަށް މަސައްކަތްކުރަމުން އަންނަ ކަމަށް ވިދާޅުވެފަ އެވެ. އަދި ކުޅިވަރު ކުރިއެރުވުމަށް އެކި އެސޯސިއޭޝަންތަކާ އެކު ކުރަމުން އަންނަ މަސައްކަތްތައް ވެސް ފާހަގަކުރެއްވި އެވެ.

މިއަހަރުގެ އައިއޯޖީގައި ރާއްޖޭއިން ވަނީ 28 މެޑަލް ހޯދައިފަ އެވެ. އެއީ ފަސް ރަން މެޑަލާއި ނުވަ ރިހި މެޑަލާއި 14 ލޯ މެޑަލް އެވެ.

މެޑަލް ލިބުނު ކުޅިވަރުތަކަކީ ޓޭބަލް ޓެނިސް، ބެޑްމިންޓަން، ބާސްކެޓްބޯޅަ، އެތުލެޓިކްސް، ޕަރަ އެތުލެޓިކްސް އަދި ޓައިކްވޮންޑޯ އެވެ.