ނިޒާމީ ވޯޓަށް ތައްޔާރު، އެކަމަކު ރައްޔިތުން ކައިރީ އަހަންވީ ސުވާލެއް ސާފެއް ނޫން: އީސީ

ރައްޔިތުންގެ ހިލާޔު ހޯދުމުގެ ވޯޓެއް ނެގުމަށް ރައްޔިތުންގެ މަޖިލީހުން އަންގާފައިވާ އެންގުމާ އެއްގޮތަށް އަންނަ މަހުގެ 29 ވަނަ ދުވަހު އިންތިހާބު ބާއްވަން ތައްޔާރަށް ތިބި ކަމަށާއި ނަމަވެސް ރައްޔިތުންގެ ކައިރީ އަހަންވީ ކޮން ސުވާލެއް ކަމެއް ސާފު ނުވާ ކަމަށް އިލެކްޝަން ކޮމިޝަން (އީސީ) އިން މިއަދު ބުނެފި އެވެ.

ރައްޔިތުންގެ މަޖިލީހުން ފާސްކުރި ގަރާރަކުން އިލެކްޝަން ކޮމިޝަނަށް އަންގާފައި ވަނީ އަންނަ އޮކްޓޯބަރު މަހުގެ 30 ވަނަ ދުވަހުން ކުރިން ނިޒާމީ ވޯޓު ނެގުމަށެވެ.

އެ ގަރާރާ ގުޅިގެން އެ ކޮމިޝަނުން ގާނޫނީ ލަފާ ހޯދުމަށް ފަހު، ވޯޓު ކުރިއަށް ގެންދަން ވަނީ ނިންމައިފަ އެވެ. އެކަމަކު އޭގެ ކުރިން ބައެއް ކަންކަން ސާފުކުރުމަށް ކޮމިޝަނުން ވަނީ މަޖިލީހަށް ހުށަހަޅައިފަ އެވެ.

އިލެކްޝަން ކޮމިޝަނުން މިއަދު ބޭއްވި ނޫސްވެރިންގެ ބައްދަލުވުމެއްގައި، ކޮމިޝަންގެ ރައީސް ފުއާދު ތައުފީގު ވިދާޅުވީ ކޮމިޝަނުން ނިންމާފައިވަނީ އަންނަ މަހުގެ 29 ދުވަހު އިންތިހާބު ބާއްވަން ކަމަށާއި އެކަމަށް ބަޖެޓް ލިބުނުހާ އަވަހަކަށް ރައްޔިތުން ހޭލުންތެރިކުރުމުގެ މަސައްކަތް ފަށާނެ ކަމަށެވެ.

"އަޅުގަނޑުމެންނަށް މަޖިލީހުން ނުވަތަ ރައީސުލްޖުމްހޫރިއްޔާ ހަވާލުކޮށްފިއްޔާ އެކަމެއް ކުރާނަން. ވަގުތު އޮތް މިންވަރަކުން އެކަން ކުރުން އަޅުގަނޑުމެންނަށް އޮތީ،" ފުއާދު ވިދާޅުވި އެވެ.

ކޮމިޝަންގެ ނައިބު ރައީސް އިސްމާއިލް ހަބީބް ވިދާޅުވީ ރައްޔިތުންގެ ހިޔާލު ހޯދަން ވޯޓު ނަގާއިރު، އެ ނަގަނީ ކޮން މައުލޫއަކަށް ކަން އަދި ކުރަން ޖެހެނީ ކޮން ސުވާލެއްކަން ސާފުވާން ޖެހޭ ކަމަށެވެ. ނަމަވެސް، މަޖިލީހުން އެކަން ކޮމިޝަނާ ހިއްސާ ކޮށްފައި ނެތް ކަމަށް ހަބީބް ވިދާޅުވި އެވެ.

"މިހާރު އަޅުގަނޑުމެން ދަންނަވާފައިވާނެ މަޖިލީހުގައި ރައްޔިތުންގެ ގާތު އަޅުގަނޑުމެން އިލެކްޝަން ކޮމިޝަނުން އަހަންވީ ކޮން ސުވާލެއްތޯ؟ އެ ސުވާލު ކޮބައިތޯ؟ އެ ސުވާލު ރައްޔިތުންގެ މަޖިލީހުން ފާސްކޮށްފައި ފޮނުއްވައި ދެއްވާށޭ،" ހަބީބް ވިދާޅުވި އެވެ.

"އެ ސުވާލާ އެކު އެބަ ބޭނުންވޭ އެހެން މައުލޫމާތު، އެ ސުވާލާ ގުޅިގެން ހުރި ހުއްޖަތްތައް ހުރެދާނެ ވަކި ކޮޅެއްގައި، އޭގައި ހުރި ފައިދާތަކާއި ގެއްލުންތައް، ވޯޓުލާން ދާއިރު އެބަ އެނގެން ޖެހޭ ވޯޓުލާން މި ޖެހެނީ ކީއްވެކަން، އެ މައުލޫމާތު އެނގެން އެބަ ޖެހޭ، އަޅުގަނޑުމެން އެބަ ޖެހޭ އެ މައުލޫމާތު އާންމުކުރަން."

ހަބީބު ވިދާޅުވި ގޮތުގައި، ވޯޓެއް ނަގާ ނަމަ، ވޯޓާސް ރަޖިސްޓަރީއެއް އޮންނަން ޖެހެ އެވެ. އެ ލިސްޓަށް ޝަކުވާ ހުށަހެޅޭނެ ގޮތްތަކާއި ތައްޔާރުވާން ގިނަ ކަންކަން ހުންނާނެ ކަމަށް ވިދާޅުވި އެވެ. އެ ކަންކަމަށް ކޮމިޝަނުން އޮތީ ތައްޔާރަށް ކަމަށާއި ނަަމަވެސް، މިހާރު އުފެދިފައި އޮތް ގާނޫނީ ސުވާލުތަކަށް ޖަވާބު ލިބިގެން ނޫނީ ކުރިއަށް ނުދެވޭނެ ކަމަށް އޭނާ ވިދާޅުވި އެވެ.

މިހާރު އަޅުގަނޑުމެން ދަންނަވާފައިވާނެ މަޖިލީހުގައި ރައްޔިތުންގެ ގާތު އަޅުގަނޑުމެން އިލެކްޝަން ކޮމިޝަނުން އަހަންވީ ކޮން ސުވާލެއްތޯ؟ އެ ސުވާލު ކޮބައިތޯ؟ އެ ސުވާލު ރައްޔިތުންގެ މަޖިލީހުން ފާސްކޮށްފައި ފޮނުއްވައި ދެއްވާށޭ،"--- ހަބީބް

ނިޒާމީ ވޯޓާ ގުޅޭ ކަންކަމަށް ބޭނުންވާ ބަޖެޓް ހޯދުމަށް ވެސް މަޖިލީހުގައި ދަންނަވާފައިވާނެ ކަމަށް ހަބީބް ވިދާޅުވި އެވެ. އެ ބަޖެޓް ނުލިބިއްޖެ ނަމަ، ވޯޓު ކުރިއަށް ނުގެންދެވޭނެ ކަމަށް ވިދާޅުވި އެވެ.

އީސީން ކުރިން ބުނެފައިވާ ގޮތުގައި ނިޒާމީ ވޯޓާ ގުޅޭ ކަންކަމަށް 40 މިލިއަން ރުފިޔާ ބޭނުންވާނެ އެވެ.

ހަބީބް މިއަދު ވިދާޅުވީ ނިޒާމީ ވޯޓަކަށް ދާން މަޖިލީހުން އެންގިއިރު، މިފަދަ ވޯޓުތަކުގައި އަމަލުކުރާނެ ގޮތެއް ގާނޫނެއްގައި ލިޔެފައި ނެތުމަކީ ވެސް ކަންބޮޑުވުމެއް ކަމަށެވެ.

"ހިޔާލު ހޯދުމުގެ އާންމު ވޯޓެއް ނަގާއިރު، މި ބާރު ރައީސުލްޖުމްހޫރިއްޔާ އަށް ވެސް އަދި ރައްޔިތުންގެ މަޖިލީހަށް ވެސް ދެވިފައި އޮންނައިރު މި ކަމުގައި އަމަލު ކުރާނެ ގޮތެއް މި ވޭތުވެދިޔަ 15 އަހަރު ތެރޭ ގާނޫނީ ސިފައެއްގައި މަޖިލީހުން އައިސްފައެއް ނެތް،" ހަބީބް ވިދާޅުވި އެވެ.

އޭނާ ވިދާޅުވި ގޮތުގައި އިލެކްޝަން ކޮމިޝަންގެ 32 ވަނަ މާއްދާގެ ދަށުން ރައްޔިތުންގެ ހިޔާލު ހޯދުމުގެ ވޯޓު ނެގުމަކީ ކޮމިޝަންގެ ޒިންމާއެކެވެ. އެހެންކަމުން، މިފަދަ ވޯޓެއް ނަގާއިރު ކޮމިޝަނުން އަމަލުކުރާނެ ގޮތްތައް ބަޔާންކުރާ ގަވައިދެއް އެކުލަވާލުމުގެ މަސައްކަތް ފަށާފައިވާ ކަމަށް ވިދާޅުވި އެވެ.

"ކުރިއަށް އޮތް ދެ ދުވަހުގެ ތެރޭގައި އެ ގަވައިދު ގެޒެޓްކުރަން ފޮނުވޭނެ. މިހާރު ވަނީ ފުރަތަމަ ޑްރާފްޓް އެކުލަވާލެވިފައި،" ހަބީބް ވިދާޅުވި އެވެ.