25 ޑިސެމްބަރ 2023 - 10:43
13 comments
އެ ބައެއްގެ މުސާރަ އެ ބަޔަކު އަމިއްލައަށް ކަނޑައެޅުން މަސްލަހަތު ފުށުއަރާ ކަމަށާއި ރައްޔިތުންގެ މަޖިލީހުގެ މެންބަރުންގެ މުސާރަ ވެސް އެ މެންބަރުން އަމިއްލައަށް ކަނޑަނޭޅޭ ގޮތް ހަދަން ޓްރާންސްޕޭރެންސީ މޯލްޑިވްސް އިން މިއަދު ގޮވާލައިފަ އެވެ.
މަޖިލީހުގެ މި ދައުރު ނިމެން ކައިރިވެފައި ވަނިކޮށް، މަޖިލިސް މެމްބަރުން ހިމެނޭހެން، ގިނަ ބައެއްގެ މުސާރަ ބޮޑުކުރަން ނިންމުމުން ޓްރާންސްޕޭރެންސީން ނެރުނު ބަޔާނުގައި ބުނީ، އެއްވެސް އަސާސަކަށް ބިނާކުރުމެއް އަދި މަޝްވަރާއެއް ނެތި މި ދަނޑިވަޅުގައި މުސާރަ ބޮޑުކުރުމުން މެމްބަރުންގެ ނަޒާހަތްތެރިކަމާއި ނިޔަތާއި މަގްސަދާ މެދު ވެސް ސުވާލު އުފެދޭ ކަމަށެވެ.
މި ކަންބޮޑުވުމާ އެކު ޓްރާންސްޕޭރެންސީން ވަނީ މެމްބަރުންގެ މުސާރަ އާއި އިނާޔަތްތައް އަމިއްލައަށް ކަނޑަނޭޅޭ ގޮތަށް މަޖިލީހުގެ ގަވައިދު އިސްލާހުކުރުމަށް ގޮވާލައިފަ އެވެ.
މަޖިލީހުގެ މާލިއްޔަތު ކޮމިޓީން މިިދިޔަ ހަފުތާގައި ނިންމާފައިވަނީ މެމްބަރުންނާ އެކު ރައީސް، ނައިބު ރައީސް އަދި ކެބިނެޓް ވަޒީރުންނާއި ކައުންސިލަރުންނާއި ޕީޖީ، އޮޑިޓާ ޖެނެރަލް އަދި އެމްއެމްއޭ ގަވަރުނަރުގެ މުސާރަ ބޮޑުކުރާށެވެ.
ރައީސްގެ މުސާރަ 120،000ރ. އަށް ބޮޑުކުރަން ވަނީ ނިންމައިފަ އެވެ. މީގެ ކުރިން އެ މަގާމުގެ މުސާރަ އަކީ 100،000ރ. އެވެ. ނައިބު ރައީސަކަށް 75،000ރ. ލިބިވަޑައިގެންނެވިޔަސް، މުސާރައަށް އަލަށް ގެނައި ބަދަލުތަކާ އެކު 93،000ރ. އަށް އަރާނެ އެވެ. މިނިސްޓަރުންނަށް މިހާރު ލިބިވަޑައިގަންނަވާ މުސާރައަކީ 66،000ރ. އެވެ. އެކަމަކު، އެ އަދަދު ބޮޑުކުރީ 72،000ރ. އަށެވެ.
ޓްރާންސްޕޭރެންސީން ބުނީ ރާއްޖޭގައި މަސައްކަތްތެރިންނަށް ދިރިއުޅުމުގެ ކަންކަން ހަމަޖައްސަން އެންމެ އެކަށީގެންވާ އުޖޫރައެއް ކަނޑައަޅާފައި ނުވާއިރު އަދި ހިދުމަތްތައް ހޯދުމަށް ހަމަހަމަ ފުރުސަތުތަކެއް އެންމެންނަށް ލިބިފައިނުވާ ކަމަށެވެ. އެހެންވެ، ރައްޔިތުން ތަމްސީލުކުރަން ތިބި މެމްބަރުން އެކަންކަން ރަނގަޅުކުރަން ގެންނަންޖެހޭ މުހިއްމު ގިނަ ބަދަލުތައް ނުގެނެސް، އެ މެމްބަރުންގެ މުސާރަ އަމިއްލައަށް ބޮޑުކުރުމަކީ ބަލައިގަނެވޭނެ ކަމެއް ނޫން ކަމަށް ބުންޏެވެ.
އެ ޖަމިއްޔާއިން ބުނި ގޮތުގައި މުސާރަ ކަނޑައެޅުމުގައި އެއްހަމަކުރުމުގެ އެޕްރޯޗެެއް ގެންގުޅެ، ގިންތީގެ ފަރަގު ކުޑަކޮށް ހަމަހަމަކަން ގާއިމްކުރުމުގެ މަސައްކަތް މިދިޔަ ސަރުކާރުން ފެށިކަމަށެވެ. ނަމަވެސް، މަތީ މަގާމުތަކުގެ މުސާރައަށް މިފަދަ ބަދަލެއް ގެނައުން ޕޭ ހާމަނައިޒޭޝަންގެ މަގުސަދާއި އެކަން ހާސިލްކުރަން ކުރެވިފައިވާ މަސައްކަތާއި މުޅިން ހިލާފު ކަމަށެވެ.
"މަޖިލީހުގެ ގަވައިދު އިސްލާހުކުރަން 2019 ވަނަ އަހަރު މަސައްކަތް ކުރެވެމުންދިޔައިރު ވެސް މި ޖަމިއްޔާއިން ވަނީ ކޮމިޓީ އެލަވަންސްތައް ކަނޑާލައި މަޖިލިސް މެމްބަރުން ކުރާ ހަރަދުތައް ބެލޭނެ ހަރުދަނާ ނިޒާމެއް ގާއިމްކުރުމަށް އިސްލާހުތަކެއް ހުށަހަޅާފައިވެ އެވެ. ކޮމިޓީ މަސައްކަތްތަކަކީ މަޖިލިސް މެމްބަރުންގެ މަސްއޫލިއްޔަތުތަކުގެ ތެރޭގައި ހިމެނޭ މަސައްކަތްތަކަށްވުމާއެކު މިކަމަށް އިތުރު އެލަވަންސެއް ދިނުމަކީ މި ޖަމިއްޔާއިން ބަލައިގަންނަ ކަމެއް ނޫނެވެ." ޓްރާންސްޕޭރެންސީން ބުންޏެވެ.
އެ ޖަމިއްޔާއިން ބުނީ މާލީ އަދި އެހެނިހެން މަސްލަހަތުތައް ހާމަކުރުމުގެ ބިލް ފާސްކުރަން ޖެހޭ ކަމަށެވެ. އެގޮތުން، އިސް މަގާމުތަކަށް ބޮޑު މުސާރައެއް ކަނޑައެޅުމުގެ އެއް މަގުސަދަކީ މަސްލަހަތު ފުށުއެރުމާއި ކޮރަޕްޝަން އަދި ނަހަމަގޮތުގައި މުދަލާއި ފައިސާ ހޯދުން ހުއްޓާލުން ކަމަށާއި މިދިޔަ އަހަރު މަޖިލީހަށް ހުށަހެޅި މާލީ އަދި އެހެނިހެން މަސްލަހަތުތައް ހާމަކުރުމުގެ ބިލް މިއަދާ ހަމައަށް ވެސް މަޖިލީހުގެ މާލީ ކޮމިޓީގައި އޮންނަކަން ފާހަގަކޮށްފައިވެ އެވެ. އޭގެ އިތުރުން، މެމްބަރުން ޖަވާބުދާރީކުރެވޭނެ ނިޒާމު ހަރުދަނާ ނުކޮށް، މެމްބަރުންގެ މުސާރަ ބޮޑުކުރުމަށް މި ދަނޑިވަޅުގައި މަސައްކަތްކުރުމަކީ އެކަމުގެ މަގުސަދު ގެއްލޭ އަދި ނިޔަތާ މެދު ސުވާލު އުފެދޭ ކަމެއް ކަމަށް ބުންޏެވެ.
ޓްރާންސްޕޭރެންސީން ވަނީ ޑިމޮކްރަސީ ކުރިއަރުވާ ހިންގުމުގެ ބާރުތަކަށް ރައްޔިތުން ކުރާ އިތުބާރު ހަރުދަނާކުރުމަށްޓަކައި، އެ ނިންމުން ބަލައިނުގަތުމަށް ރައްޔިތުންގެ މަޖިލީހުގެ ހުރިހާ މެމްބަރުންނަށް ގޮވާލައިފަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ދުލެއް،
25 December 2023
ދިވެހިރާއްޖޭގެ ރައްޔިތުންގެ މަޖިލީހުގެ އިއްޒައްތެރިމެމްބަރުން އުަޅެމުންދާދަތި އުދަގޫހާލައް ހަމްދަރުދީވެ އެހީތެރިވުމުގެގޮތުން ކޮންމެ މިސްކިތެއްގަ ފަންޑުފޮށި ބަހައްޓައިދިނުމައް ގޮވާލަން
ނ ޝ މ
25 December 2023
ފުލުހުންގެ އާއްމު މުވައްޒަފުންނަކީ މުޅި ރާއްޖޭގައި އެންމެ މުސާރަ ކުޑަކޮށް ގެންގުޅޭ މުވައްޒަފުން. އެ މުވައްޒަފުންނަށް ޝަރަފުވެރިކަމާއިއެކު ރިޓަޔާ ކުރެވޭނެ އުސޫލެއްވެސް ނޯވޭ. 25 އަހަރު ވަޒީފާގައި ހޭދަ ކުރާއިރުވެސް ރިޓަޔާކުރެވޭނެ އެއްވެސް އުސޫލެއް ނެތް. ރިޓަޔަމަންޓް ޕެކޭޖެއް ނޯވޭ. އުމުރުން 55 ވީމަ މުސްކުޅިކުރައްވަނީ. ޗުއްޓީ ބާކީ ފައިސާއެއް ނުލިބޭތާނގައި ޗުއްޓީ ނަގައިފިއްޔާ އަނެއް މަހު ލިބެނީ 6000 ވަރަކަށް ރުފިޔާ. އެކަމު މެމްބަރުންނަށް 100000 ރުފިޔާ.
ސައިޚް
25 December 2023
ސަރުކާރުގެ އެހެން މުއައްޒަފުންގެ މުސާރައިގެ އޮނިގަނޑު ތެރެއަށް ހުރިހާ އެއްމެން ވައްދަންވީ، ކޮން މެމްބަރެއް.؟ ކޮން މިނިސްޓަރެއް.؟ މުޅިގައުމުގެ މާލިއްޔަތު ބޮޑުން ނަގައިގެން ރައްޔިތުންނަށް ލިބޭ ފައިދާއެއް އެބައޮތްތަ.؟ އަދއިގެ މީހާގެ މުސާރައިގެ ވާހަކަ ދައްކަން ނުކެރޭ ބައެއް އަމިއްލައަށް މުސާރަބޮޑުކުރުމަކީ ގޮތެއް ނެތްކަން.
ސުވާލުއުފެދޭ
25 December 2023
ޓްރާންސްޕޭރެންސީގެ އިސްމީހުންނަށް މިސަރުކާރުން ވަޒީފާ ހަމަޖެއްސުމުން ތިތަނުގެ އިންޓިގްރިޓީއާއިމެދު ސުވާލު އުފެދޭ.
ބަރުލަމާނީ
25 December 2023
ޓްރާންސްޕޭރެންސީ މޯލްޑިވްސް އޭ ކިއާ ދެއުޅި އެއްނުވާ ބައިގަނޑު ރަނގަޅު ވާހަކައެއް ދެއްކި މިއީ ފުރަތަމަ ފަހަރު
ފޭރޭ މަޖިލިސް
25 December 2023
މާލަސްވެސް ވެއްޖެ. ތިކަން ފާސްކޮށްފަ ނިންމަންޖެހޭ. 5 އަހަރުން ޕެންޝަން ލިބޭ ބަޔެއްކަމަށްވެސް އަމިއްލައަށް ނިންމައިގެން އެތިބެނީ. ދައުލަތުގެ އެހެން މުއައްސަސާތަކުގަ ކުޑަ މުސާރައިގަ ތިރީސް ސާޅީސް އަހަރު އުޅުނަސް މިހާރު ޕްންޝަނެއް ނުލިބޭ. އެކަމަކު މިމީހުން 1 ދައުރު ނިމޭއިރަށް މުސާރައިގެ ދެބައިކުޅަ އެއްބައި، ބޭނުންގައުމަކަށް ހެލްތު އިންޝުއަރެންސާއެކު މުޅި އުމަރަށް ހުރިހާކަމެއް. މިކަންވެސް ނިންމަންޖެހޭ.
12345
25 December 2023
މަޖިލުހުގެ މެންބަރުންގެ ނޮހޮރުއްޕާނާ ހެދި ރައްޔިތުންނަށް ދިރިއުޅެވެން ނެތް. ރައްޔިތުން ވޯޓުން ހޮވާ ވެރިމީހާއަށް ވެރިކަން ކުރެވެން ނެތް. މަޖިލިހުގެ މެންބަރުން ވަކި ކުރެވޭނެ ގޮތެއް ފުރަތަމަ ހަމަޖައްސަންވީ. މިސާލަކަށް ވޯޓުލީ މީހުންގެ 50 އިން ސައްކަތައަށްވުރެ ގިނަ މީހުން އެ މެންބަރަކަށް ނޫނެކޭ ބުނެ ސޮއިކޮށްފައިވާ ލިޔުމެއް މަޖިލިހަށް ހުށަހަޅާ މަޖިލިހުގެ ރައީސްއަށް އެލިޔުން ލިބުމުން މެންބަރު ވަކިވީކަމަށް ގާނޫނު އަސާސީގައި ބުނަންވީ.
ކާސިމު
25 December 2023
މިއީ ރައްޔިތުންނަށް ހެޔޮ އެދޭ ގާސިމުބޭބެ މަޖިލީހުގެ ރައީސަކަށް އިދެގެން ކުރި ކަމެއް. ގާސިމުބޭބެ އޭރު ވިދާޅުވީ މަޖިލީހުގެ މެމްބަރުންގެ މުސާރަ ކުޑަކަމުން އެ މެމްބަރުންނަށް ނުފުދިގެން މީސްމީހުންގެ އަތުން ލާރިނަގަންޖެހޭތީ އެކަން ހުއްޓުވަން މުސާރަ ބޮޑުކުރަންޖެހޭ ކަމަށް. އޭގެ ފަހުންވެސް ދެ ފަހަރަކަށް މެމްބަރުންގެ މުސާރައާއި އިނާޔަތް ބޮޑުކުރެވިއްޖެ. އަދިވެސް އުޅެނީ ނިކަމެތި ފަގީރު ހާލުގައި ނުފުދިގެން.
އުނބުށޭމު
25 December 2023
ކުރިޔަށް އޮތް އިންތިޚާބުގައި ސަރުކާރު ފަޅިން ނުކުންނަ މީހުންގެ އެންމެ މުހިންމު ވައުދަކަށް އެއްވެސް ބަޔަކަށް އެބަޔެއްގެ މުސާރަ އަމިއްލައަށް ކަނޑަނޭޅޭގޮތަށް ޤާނޫނު އަސާސީ އިޞްލާޙުކުރުން ހައްދަވައި ދެއްވުމަށް ފަރުދީގޮތުން އެދެމުންދިޔަ އެދުމަށް ތިޔަ ޖަމްއިއްޔާއިން ވެސް ތާއީދުކުރާ ކަން ހާމަކުރެއްވީތީ އުފާކުރަމެވެ. އުންމީދަކީ ވީހާގިނަ ފަރާތްތަކުން މިކަމަށް ބާރުއަޅައި މަސައްކަތް ކުރުމެވެ. އިރާދަކުރައްވައިގެން 20 ވަނަ މަޖިލީހުން މިކަން ކުރޭތޯއެވެ.
ފގފގ
25 December 2023
މަޖިލިހުގެ މެންބަރުން ވަކި ކުރެވޭނެ ގޮތެއްވެސް ހިމަނަން ފެނޭ.
މަހާރަދުން
25 December 2023
ތި މަޖިލީސް އުވާލަން ޖެހޭ! އެއްމިލިޔަން މީހުން ހަމަ ނުވަ ގައުމެއްގަ އެއްވެސް ފުދުން ތެރި ސިނާޔަތެއް ނެތް އިރު ކޮންމެ ފަސް އަހަރަކުން ބައިތުރަމާލަށް ނުކުޅަދާނަ މުސާރަޔަކަށް އެއްވެސް ބޭނުމެް ނުކުރެވޭ ބަޔަކު މަހުޖަނުންނަށް ހަދަން ހއު ނަުވާނެ...ތި މަޖިލިހުން ކުރާކަންކަން މާ ހެއުލަފާކަން ކުރެވެން އބައޮތް..ދިވެހިން ނަށް ހަލާކު ހުރި!!!