ލަންކާ ސިފައިން މަސްބޯޓަކުން 245 ކިލޯ ޑްރަގްސް އަތުލައިގެންފި

ސްރީ ލަންކާ ސިފައިން ކަނޑުމަތީގައި ހިންގި ހާއްސަ އޮޕަރޭޝަނެއްގައި މަސްބޯޓަކުން 245 ކިލޯގެ މަސްތުވާތަކެތި އިއްޔެ އަތުލައިގެންފި އެވެ.

ކަނޑުގެ ސިފައިންގެ ތަރުޖަމާނަކު ވިދާޅުވީ މި ތަކެތި އަތުލައިގަތީ ލަންކާގެ މަސްބޯޓަކުން ކަމަށާއި އެ ތަކެއްޗާ އެކު ހަ މީހަކު ހައްޔަރުކޮށްފައިވާ ކަމަށެވެ. ސިފައިންނާއި ފުލުހުން ގުޅިގެން ހިންގި މި އޮޕަރޭޝަންގައި، މަސްތުވާތަކެތި ބަންދުކޮށްފައި ހުރި 278 ޕާރުސަލް ފެނުނު ކަމަށް ބުންޏެވެ.

އިއްޔެ ހެނދުނުގެ ވަގުތެއްގައި ލަންކާގެ ހިއްކަޑުވާގެ ހުޅަނގުން 28 ނޯޓިކަލް މޭލު ބޭރުން އަތުލައިގެން ބޯޓުގައި ކްރިސްޓަލް މެތަމްފެޓަމިން (އައިސް) އާއި ހެރޮއިން ހުއްޓެވެ. މި ތަކެތީގެ އަގު 3،190 މިލިއަން ރުޕީސް (9.8 މިލިއަން ޑޮލަރު، 152 މިލިއަން ރުފިޔާ) އަށް އަރާނެ ކަމަށް ލަންކާ ކަނޑުގެ ސިފައިންގެ ވެބްސައިޓުގައި ބުނެފައިވެ އެވެ.

އަތުލައިގަތް ބޯޓާއި މީހުން އިއްޔެ ވަނީ ލަންކާގެ ގޯލްގެ ބަނދަރަށް ގެންގޮސްފަ އެވެ. ބޯޓުގައި ތިބީ އުމުރުން 28 އަހަރާއި 66 އަހަރާ ދެމެދުގެ ލަންކާ މީހުން ކަމަށް ވެސް ސިފައިން ބުނެފައިވެ އެވެ.

ރާއްޖެ އާއި ސްރީ ލަންކާއާ ދެމެދު އޮންނަ ކަނޑުގެ ސަރަހައްދުގައި މަސްތުވާތަކެތީގެ ވިޔަފާރި ފުޅާވަމުންދާ ކަމުގެ ކަންބޮޑުވުމާ އެކު އެ ސަރަހައްދު ބެލެހެއްޓުމަށް ސަރަހައްދީ ގައުމުތައް ގުޅިގެން އަންނަނީ އެކި މަސައްކަތްތައް ކުރަމުންނެވެ. ލަންކާގެ އިތުރުން އިންޑިއާ އިން ވެސް ވަނީ މި ސަރަހައްދުގެ ކަނޑުގެ ސަރަހައްދުން ގިނަ އަދަދެއްގެ މަސްތުވާތަކެތި މި ފަހުން އަތުލައިގެންފަ އެވެ.

މަސްތުވާތަކެއްޗާ ދެކޮޅަށް ލަންކާގައި މި ދުވަސްވަރު އަންނަނީ ބޮޑު އޮޕަރޭޝަނެއް ފުލުހުންނާއި ސިފައިން ގުޅިގެން ހިންގަމުންނެވެ. މި އޮޕަރޭޝަންގައި މިހާތަނަށް 20،000 އަށް ވުރެ ގިނަ މިހުން ހައްޔަރުކޮށް ގިނަ އަދަދެއްގެ މަސްތުވާތަކެތި ވަނީ އަތުލައިގެންފަ އެވެ. މަސްތުވާތަކެތީގެ ވިޔަފާރިކުރާ މީހުންގެ މައްސަލަތައް ތަހުގީގުކުރުމާއި މަސްތުވާތަކެތި ބޭނުންކުރާ މީހުން ރިހެބިލިޓޭޝަނަށް ފޮނުވުން ވެސް މި އޮޕަރޭޝަންގައި ހިމެނެ އެވެ.