މިދިޔަ އަހަރު ނިމުނު އިރު ރިޒާވްގައި 177 މިލިއަން ޑޮލަރު

މަރުކަޒީ ބޭންކް އެމްއެމްއޭ: މިދިޔަ އަހަރު ނިމުނު އިރު ރިޒާވްގައި ހުރީ 177 މިލިއަން ޑޮލަރު. -- ފޮޓޯ | މިހާރު

ފާތިމަތު ޝަނާ މުހައްމަދު، މިހާރު

30 ޖެނުއަރީ 2024 - 15:25

މިދިޔަ އަހަރު ނިމުނު އިރު ޔޫޒަބަލް ރިޒާވް ހުރީ 177 މިލިއަން ޑޮލަރުގައި ކަމަށް އެމްއެމްއޭގެ ތަފާސްހިސާބުތަކުން ދައްކައިފި އެވެ.

މަރުކަޒީ ބޭންކްގެ ތަފާސްހިސާބުތައް ދައްކާ ގޮތުން ރަސްމީ ރިޒާވުގައި މިވަގުތު ހުރީ 589 މިލިއަން ޑޮލަރެވެ.

ރިޒާވްގައި 2022 ވަނަ އަހަރު ނިމުނު އިރު ހުރީ 832 މިލިއަން ޑޮލަރެވެ. އަދި ބޭނުން ކުރެވޭ ރިޒާވުގައި ހުރީ 268 މިލިއަން ޑޮލަރެވެ. އެހެންވެ 2023 ވަނަ އަހަރު ރަސްމީ ރިޒާވު ވަނީ އޭގެ ކުރީ އަހަރަށް ވުރެ 243 މިލިއަން ޑޮލަރު މަދުވެފަ އެވެ. ޔޫޒަބަލް ރިޒާވުން ވަނީ 90 މިލިއަން ޑޮލަރު މަދުވެފަ އެވެ.

މިދިޔަ އަހަރު ރިޒާވް އެންމެ ބޮޑަށް ދަށްވެފައިވަނީ އޮކްޓޫބަރު މަހު އެވެ. އެ މަހު ޔޫޒަބަލް ރިޒާވް ވަނީ 91 މިލިއަން ޑޮލަރަށް ދަށްވެފަ އެވެ. އެ މަހު ރަސްމީ ރިޒާވް ހުރީ 552 މިލިއަން ޑޮލަރުގަ އެވެ. އަދި ނޮވެމްބަރު މަހު ޔޫޒަބަލް ރިޒާވް ހުރީ 98 މިލިއަން ޑޮލަރުގަ އެވެ.

ވޭތުވެދިޔަ ދެ އަހަރު ތެރޭގައި ދައުލަތުގެ ރިޒާވު އެއްވަރެއްގައި ނުހިފެހެއްޓި، ބޮޑެތި ބަދަލުތައް ދަނީ އަންނަމުންނެވެ. ރިޒާވްގެ އަދަދު 50 ޕަސެންޓާ ހަމައަށް ވެސް ދަށްވެފައި އެބަހުއްޓެވެ.

ޔޫޒަބްލް ރިޒާވަކީ ރަސްމީ ރިޒާވުން ކުރު މުއްދަތުގެ ބޭރުގެ ލައިބިލިޓީތައް އުނިކުރުމުން ބާކީ އޮންނަ އަދަދެވެ. ޔޫޒަބަލް ރިޒާވުން ދައްކައިދެނީ ބޭރު ފައިސާގެ އެކި މުއާމަލާތްތަކަށް ވަގުތުން ވަގުތަށް ބޭނުންކުރުމަށް ހުރި ފައިސާގެ އަދަދެވެ.

ރިޒާވް އެހާ ބޮޑަށް ދަށްވީ، ތެލުގެ ހަރަދު ހަމަޖެއްސުމަށް ބޮޑު އަދަދެއް ހޭދަކުރަން ޖެހުމުން ކަމަށް ކުރީ ސަރުކާރުން އޭރު މައުލޫމާތު ދީފައިވެ އެވެ.

މިދިޔަ ޑިސެމްބަރު މަހު އިކޮނޮމިކް މިނިސްޓަރު މުހައްމަދު ސައީދު "މިހާރު" އަށް ވިދާޅުވީ، ރިޒާވު ރަނގަޅު ކުރަން ކުރީގެ ސަރުކާރުން އެކަށީގެންވާ މަސައްކަތްތަކެއް ނުކުރާ ކަމަށެވެ. ރިޒާވް މައްސަލަ ހައްލު ކުރުމަށް ވެސް މަސައްކަތްތައް ކުރަމުން އަންނަ ކަމަށް އޭނާ ވިދާޅުވި އެވެ.