ސެޓެލައިޓް މެދުވެރިކޮށް ރާއްޖޭގެ ކަނޑުގެ ސަރަހައްދު ބަލަހައްޓަން ފަށާނެ: ޣައްސާން

ރާއްޖޭގެ ކަނޑުގެ ސަރަހައްދު ބެލެހެއްޓުމަށް ސެޓެލައިޓް ބޭނުން ކުރަން ތައްޔާރުވަމުންދާ ކަމަށް ޑިފެންސް މިނިސްޓަރު މުހައްމަދު ޣައްސާން މައުމޫން ވިދާޅުވެއްޖެ އެވެ.

ދައުލަތުގެ މީޑިއާގެ ޕްރޮގްރާމެއްގައި ރޭ ވާހަކަ ދައްކަވަމުން ޣައްސާން ވިދާޅުވީ ބައިނަލްއަގްވާމީ ފެންވަރުގައި ރޭވިގެން ހިންގާ ބޮޑެތި ކުށްތައް ރާއްޖޭގެ ކަނޑުގެ ސަރަހައްދުގައި ކުރަމުން ދަނީ މި ސަރަހައްދަކީ ދުނިޔޭގެ ވިޔަފާރިއަށް ބޭނުންކުރާ މައި މަގެއް ކަމަށްވާތީ ކަމަށެވެ.

އެހެންވެ މި ސަރަަހައްދުގެ ކަނޑުގެ ސަލާމަތާއި ރައްކާތެރިކަން ރާއްޖެއިން އަމިއްލައަށް ބެލެހެއްޓުމަކީ ރައީސް ޑރ. މުހައްމަދު މުއިއްޒުގެ ވިސްނުންފުޅު ކަމަށް ޣައްސާން ވިދާޅުވި އެވެ.

"ރައީސްގެ ވިސްނުންފުޅު ހުރީ ދިވެހި ރާއްޖޭގެ ބައިނަލްއަގްވާމީ މަސްއޫލިއްޔަތު ދިވެހިރާއްޖެއިން އަދާކުރުން. މާނައަކީ އަޅުގަނޑުމެންގެ ޓެރިޓަރީ، އަޅުގަނޑުމެންގެ މަސްއޫލިއްޔަތުގެ ތެރެއިން އަންނަ ސަރަހައްދު އަމިއްލައަށް ބެލެހެއްޓުން،" ޣައްސާން ވިދާޅުވި އެވެ.

އެކަން ހާސިލުކުރުމަށް ރާއްޖެ އިން ވެސް ފިޔަވަޅުތަކެއް އަޅަމުން އަންނަ ކަމަށް ޣައްސާން ވިދާޅުވި އެވެ.

ޣައްސާން ވިދާޅުވީ އަމިއްލަ ޖަމްއިއްޔާއެއް ކަމަށްވާ މޯލްޑިވްސް ސްޕޭސް ރިސާޗު އޯގަނައިޒޭޝަނާ އެކު ކުރަމުންދާ މަސައްކަތުގެ ދަށުން، ޖައްވީ ސެޓެލައިޓް މެދުވެރިކޮށް ރާއްޖޭގެ ކަނޑުގެ ސަރަހައްދު ބެލެހެއްޓުމުގެ ނިޒާމެއް ވަރަށް އަވަހަށް ގާއިމް ކުރެވޭނެ ކަމަށެވެ.

"މޯލްޑިވްސް ސްޕޭސް ރިސާޗު އޯގަނައިޒޭޝަން ކިޔައިގެން މަސައްކަތް ކުރާ، ނާސާގައި ވެސް މަސައްކަތް ކުރާ ވަރަށް ގިނަ ފަރާތްތަކާ ވަރަށް ގާތް ގުޅުމެއް ހުރި ކުދިންތަކެއް އަޅުގަނޑުމެންގެ މިނިސްޓްރީއާ އެކު ރައީސް ލަފާފުޅާ އެކު މަސައްކަތް ކުރަމުން އެބަ ގެންދޭ،" މިނިސްޓަރު ވިދާޅުވި އެވެ.

މީގެ ކުރިން ރާއްޖޭގެ ކަނޑުގެ ސަރަހައްދު ބެލެހެއްޓީ އިންޑިއާ އިން ރާއްޖެއަށް ހަދިޔާކުރި ހެލިކޮޕްޓަރުގެ އެހީގަ އެވެ. އެކަމަކު އިންޑިއާ ސިފައިން އެ އުޅަނދުތައް ދުއްވުމުގައި ހަރަކާތްތެރިވުމުން، ރައީސްގެ އެންމެ ބޮޑު ރިޔާސީ ވައުދުފުޅަކަށްވީ އިންޑިއާ ސިފައިން ރާއްޖެއިން ބޭލުމެވެ.

Dhivehi askariyyaa: Bayakah baroasaa nuve kuriyah

The most trusted news source in the Maldives

Mihaaru

އެހެންވެ، ދިވެހި ސަރުކާރާއި އިންޑިއާ ސަރުކާރާ ދެމެދު ކުރި މަޝްވަރާތަކަށްފަހު، ރާއްޖޭގައި ތިބި އިންޑިއާގެ ހުރިހާ ސިފައިން މިދިޔަ މެއި މަހު ވަނީ ރާއްޖެއިން ފައިބައިފަ އެވެ.

ރާއްޖޭގެ ކަނޑުގެ ސަރަަހައްދު ބެލެހެއްޓުމަށް ތުރުކީން އަސްކަރީ ތިން ޑްރޯން ގެނެސް، މިދިޔަ މާޗު މަހުން ފެށިގެން ޑްރޯންތައް ވެސް ވަނީ ބޭނުން ކުރަން ފަށައިފަ އެވެ. އަދި އެ ޑްރޯންތައް ދުއްވަން ދިވެހި ސިފައިން ވެސް ވަނީ ތަމްރީންކޮށްފަ އެވެ.

ޣައްސާން ވިދާޅުވި ގޮތުގައި ޑްރޯންތަކުގެ ސަބަބުން ވެސް ރާއްޖޭގެ ކަނޑުގެ ސަރަހައްދު ބެލެހެއްޓުން ވަނީ ފުޅާ ކުރެވިފަ އެވެ. ނަމަވެސް ޕްރޯ މޯލްޑިވްސް ސިޔާސަތުގެ ދަށުން ރާއްޖެއާ ގުޅިގެން މަަސައްކަތްކުރާ ކޮންމެ ގައުމަކާ އެކު ވެސް ރާއްޖެއިން އަސްކަރީ ގުޅުން ގާއިމް ކުރާނެ ކަމަށް އޭނާ ވިދާޅުވި އެވެ.