ޚަބަރު / ހުސައިން ފަހުމީ (އެމްޑީ، ސްޓެލްކޯ)

ސްޓެލްކޯ އީވީ ޗާޖިން ސްޓޭޝަން: އެއްފަހަރާ 8 އުޅަނދު ޗާޖު ކުރެވޭނެ

ސްޓެލްކޯގެ އީވީ ޗާޖިން ސްޓޭޝަންގެ މަސައްކަތް ކުރިއަށް ދަނީ: އެތަނުން އެއްފަހަރާ އަށް ވެހިކަލް ޗާޖް ކުރެވޭނެ --- ފޮޓޯ/ސްޓެލްކޯ

ފާތިމަތު އަޖްފާން، މިހާރު

07 އޮކްޓޯބަރ 2024 - 15:10

2 comments

އިލެކްޓްރިކް ވެހިކަލްތައް ޗާޖު ކުރެވޭ ގޮތަށް ސްޓެލްކޯއިން ހަދާ ޗާޖިން ސްޓޭޝަނުން އެއްފަހަރާ އަށް ވެހިކަލް ޗާޖު ކުރެވޭނެ ކަމަށް އެ ކުންފުނިން ބުނެފި އެވެ.

ސްޓެލްކޯގެ ހެޑް އޮފީހާ އިންވެގެން އޮންނަ ދޮންއަދަރާދަ މަގުގައި ގާއިމްކުރާ އެ ސްޓޭޝަން ހެދުމުގެ އަމަލީ މަސައްކަތް އިއްޔެ ވަނީ ފަށައިފަ އެވެ.

ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ މިއަދު "މިހާރު" އަށް ދެއްވި އިންޓަވިއުއެއްގައި ވިދާޅުވީ ރާއްޖޭގައި މިހާރު ބޭނުންކުރާ އީވީ ޗާޖިން ވެހިކަލްތައް ވަރަށް މަދު ކަމަށެވެ.

ފަހުމީ ވިދާޅުވީ އެ ސްޓޭޝަންގެ މަސައްކަތަކީ ރައީސް ޑރ. މުހައްމަދު މުއިއްޒު ގެންގުޅުއްވާ ތިމާވެށީގެ ސިޔާސަތުގެ ތެރެއިން "ކާބަން ފުޓް ޕްރިންޓް" ކުޑަކުރުމަށާއި އިލެކްޓްރިކް އުޅަނދުތައް ގެންގުޅެން ބޭނުންވާ މީހުންނަށާއި މިހާރު ވެސް ގެންގުޅޭ މީހުންނަށް ލުއި ފަސޭހަތައް ހޯދައިދިނުމުގެ އިތުރުން އިލެކްޓްރިކް ވެހިކަލް ގެންގުޅުމަށް ހިތްވަރު ދިނުމުގެ ގޮތުން ގާއިމުކުރާ ސްޓޭޝަންތަކެއް ކަމަށެވެ.

ސްޓެލްކޯގެ މެނޭޖިން ޑިރެކްޓަރު ހުސެއިން ފަހުމީ "މިހާރު" އަށް އިންޓަވިއުދެއްވަނީ.-- ފޮޓޯ: ނިޝާން އަލީ | މިހާރު

އެ ކުންފުނިން މިހާރު ގާއިމްކުރާ ސްޓޭޝަނުން އަށް އުޅަނދު އެއްފަހަރާ ޗާޖުކޮށްލެވޭނެ ކަމަށް ވެސް އޭނާ ވިދާޅުވި އެވެ.

ސްޓެލްކޯއިން މިހާރު ހަދަމުންދާ ޗާޖިން ސިސްޓަމް ރާއްޖެއަށް ގެނެވޭނީ ހަމައެކަނި އެ ކުންފުންޏަށް ކަން ފާހަގަ ކުރައްވައި، ފަހުމީ ވިދާޅުވީ އޭގެ ސަބަބަކީ ކަރަންޓާ ގުޅުންހުރި ހިދުމަތަކަށް ވާތީ ކަމަށެވެ.

"އަޅުގަނޑުމެން މި ތަން ހަދަނީ އިޔާދަކުރަނިވި ހަކަތަ ބޭނުންކޮށްގެން. މިތަނަށް ބޭނުންވާ ހުރިހާ ކަރަންޓެއް ވެސް އުފައްދާނީ ސޯލާއިން. ސޯލާއިން ކަރަންޓު އުފައްދައިގެން ރައްޔިތުންނަށް ހިދުމަތްދޭނީ. އަޅުގަނޑުމެން މިކަން ފަށައިގަތުމުން ނޫންތޯ ގިނަ މީހުން ކާރު ގެނެސް އެ ބޭނުން ކުރަން ފަށާނީ،" އޭނާ ވިދާޅުވި އެވެ.

ސްޓެލްކޯއިން ޗާޖިންގް ސްޓޭޝަނެއްގެ ހިދުމަތް ފެށުމަށް ކުރަހާފައިވާ މޮޑެލްތައް.-- ފޮޓޯ: ސްޓެލްކޯ

ފަހުމީ ކުރިން ވިދާޅުވެފައި ވަނީ އެ ޗާޖިން ސްޓޭޝަން ގާއިމުކުރަނީ އެންމެ ގިނަ ޕަބްލިކް ޗާޖިން ސްޓޭޝަންތައް ގެންގުޅޭ ގައުމު ކަމަށްވާ ދެކުނު ކޮރެއާގައި ހުންނަ މޮޑެލްއަށް ކަމަށެވެ. އެ މޮޑެލްއާ އެކު، ކޮންމެ ތިން ކާރަކަށް ޗާޖިން ސްޓޭޝަނެއް ގާއިމް ކުރާނެ ކަމަށް ވެސް އޭނާ އޭރު ވިދާޅުވެފައިވެ އެވެ.

ރައީސް މުއިއްޒު މާލޭގެ މޭޔަރު ކަމުގެ މަގާމުގައި ހުންނެވިއިރު ވެސް އިލެކްޓްރިކް އުޅަނދު ޗާޖު ކުރެވޭ ސްޓޭޝަންތަކެއް ހެދުމަށް ނިންމައި މާލެ ސިޓީ ކައުންސިލްގެ ޓްރާންސްޕޯޓް ކޮމިޓީން އެކަމާ ގުޅޭ ދިރާސާތަކާއި ޕްލޭންތަކެއް ވެސް ހެދި އެވެ.