ބައްސާމްގެ ދެ ޕެންޓްހައުސްގެ މައްސަލަ ހައި ކޯޓުގެ ފަނޑިޔާރުންގެ މަޖިލީހުގެ ރިވިއުއަށް ހުށަހަޅައިފި

އެފްއޭއެމްގެ ފައިސާ ބޭނުންކޮށްގެން އެ އެސޯސިއޭޝަންގެ ކުރީގެ ރައީސް ބައްސާމް އަދީލް ޖަލީލް ގަނެފައިވާ ދެ ޕެންޓްހައުސް ފުލުހުންނާ ހަވާލުކުރަން ހުޅުމާލޭ މެޖިސްޓްރޭޓް ކޯޓުން ނެރުނު އަމުރު އިސްތިއުނާފުކުރަން ބައްސާމް ހުށަހެޅި ހުށަހެޅުން ބަލައިނުގަތް މައްސަލަ ފަނޑިޔާރުންގެ މަޖިލީހަށް ހުށަހަޅައިފި އެވެ.

ހައި ކޯޓުން ބުނީ މައްސަލަ ބަލައިނުގަތުމަށް މިދިޔަ ބުރާސްފަތި ދުވަހު ރަޖިސްޓްރާ ނިންމެވި ނިންމުން ރިވިއު ކުރަން ފަނޑިޔާރުންގެ މަޖިލީހަށް ބައްސާމްގެ ފަރާތުން ހުށަހަޅާފައިވާ ކަމަށެވެ.

ހުޅުމާލޭ މެޖިސްޓްރޭޓް ކޯޓުގެ އަމުރުގެ ދަށުން ބައްސާމުގެ ދެ ޕެންޓްހައުސް ހަ ދުވަހުގެ ތެރޭގައި ހުސްކުރަން މިދިޔަ މަހުގެ 28 ވަނަ ދުވަހު އޭނާ އަށް އެންގި އެވެ. ނަމަވެސް އެ މުއްދަތު މި މަހުގެ ނިޔަލަށް އިތުރު ކޮށްދޭން ޖެހިގެން އައި ދުވަހު ބައްސާމްގެ ފުލުހުންގެ އިދާރާގައި އެދުނެވެ. އެގޮތަށް މުއްދަތު އިތުރު ކޮށްދޭން ފުރަތަމަ ނިންމި ނަމަވެސް ފަހުން އެ ނިންމުން ބަދަލުކޮށް އެންގީ އެތަން ހުސްކޮށް ހަވާލުކުރާށެވެ.

އެ އެންގުމާ އެއްގޮތަށް ބައްސާމް ވަނީ ހުޅުމާލެ ލޮޓް ނަމްބަރު އެން2-25 ގެ ބްލޮކް އޭ ގެ ދެ އެޕާޓްމަންޓެއް ފުލުހުންނާ ހަވާލުކޮށްފަ އެވެ. ނަމަވެސް ބައްސާމްގެ ފަރާތުން ހުޅުމާލޭ މެޖިސްޓްރޭޓް ކޯޓުން ނެރުނު އަމުރު ހައި ކޯޓުގައި އިސްތިއުނާފު ކުރީ އެވެ.

އެ ދެ ޕެންޓްހައުސް އޭނާ ގަނެފައި ވަނީ ކޮވިޑުގެ ދުވަސްވަރު، ފުޓްބޯޅަ ކްލަބްތަކަށް ދިމާވި މާލީ ހާލަތުން އަރައިގަތުމަށް ފީފާ އިން އެފްއޭއެމަށް ދޫކުރި ލޯނު ފައިސާ އިންނެވެ.

Bassam ge 2 penthouse ge massala High court ah

The most trusted news source in the Maldives

Mihaaru

އެ މައްސަލާގައި ކުރިން ފުލުހުން ބުނެފައިވާ ގޮތުގައި ދެ ޕެންޓްހައުސް ގަތުމަށް ބައްސާމް ވަނީ އެފްއޭއެމްގެ ފައިސާ އިން އެއް މިލިއަން އެމެރިކާ ޑޮލަރު އަމިން ކޮންސްޓްރަކްޝަނަށް ދައްކައިފަ އެވެ. ނަމަވެސް އެ ޑޮލަރަށްވާ ދިވެހި ރުފިޔާ އަމިން އިން އެފްއޭއެމަށް ދައްކާފައިނުވާ ކަމަށާއި ފައިސާ ދެއްކި ކަމަށް ހެދުމަށް ލިޔެކިޔުން ތައްޔާރު ކޮށްފައިވާ ކަމަށް ފުލުހުން ބުނެފައި ވެ އެވެ.

ފުލުހުން ބުނީ އެ ފައިސާ ލިބުނު ކަމަށް ހެދުމަށް އެފްއޭއެމުން އެހެން ކުންފުންޏަކުން ލޯނެއް ނަގާފައިވާ ކަމަށާއި އެ އަދަދާއި އަމިން އިން އެފްއޭއެމަށް ފައިސާ ދެއްކި ކަމަށް ބުނެ ތައްޔާރު ކޮށްފައިވާ ރިސިޕްޓްތަކުގެ އަދަދާ ދިމާވާ ކަމަށެވެ. އެހެންވެ، ބެލެވެނީ އެފްއޭއެމުން މަސައްކަތް ކޮށްފައި ވަނީ ބައްސާމް އެޕާޓްމަންޓް ގަތުމަށް އަމިން އަށް ޑޮލަރުން ދެއްކި ފައިސާއަކީ ޑޮލަރު މާރުކުރަން ދިން ފައިސާއެއް ކަން ދެއްކުމަށް ފުލުހުން ބުނެފައި ވެ އެވެ.

އެ މައްސަލައާ ގުޅިގެން ބައްސާމްގެ މައްޗަށް ދައުވާ ކޮށްދޭން އެދި މިދިޔަ މަހު ފުލުހުން ވަނީ ޕީޖީ އޮފީހަށް ފޮނުވައިފަ އެވެ.