ގޯތި ދޫކުރި ބިންވެރިޔާ ސްކީމްގެ ތަހުގީގު ހުއްޓުވި ކަމުގެ ތުހުމަތު ސަލާމަށް!

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި މާލޭ މީހުންނަށް ގޯތި ދިނުމަށް ކުރިއަށް ގެންދިޔަ ބިންވެރިޔާ ސްކީމްއާ ގުޅޭ މައްސަލަތައް ތަހުގީގުކުރުން އޭސީސީގެ ނައިބު ރައީސް އަބްދުއްސަލާމް ހުއްޓުވި ކަމަށް ތުހުމަތުކޮށްފި އެވެ.

ސަލާމާއި އޭސީސީގެ މެމްބަރު ތޯހާ މުހައްމަދު އެ ކޮމިޝަންގެ މެމްބަރުކަމުން ވަކިކުރަން ނިންމި ގޮތުގެ ރިޕޯޓް ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން މިއަދު ވަނީ އާންމުކޮށްފަ އެވެ.

އެ ރިޕޯޓުގައި ބުނެފައިވާ ގޮތުގައި، ގޯތި ދޭން ކުރިއަށް ގެންދިޔަ ބިންވެރިޔާ ސްކީމްގެ މައްސަލަ އިތުރަށް ތަހުގީގުކުރުމަށް އޭސީސީގެ ޕްރިލިމިނަރީ އިންވެސްޓިގޭޝަނުން އިރުޝާދު ދީފައި ވަނިކޮށް، އެ ތަހުގީގުގެ ކަންކަން ބެލުމާ ހަވާލުވެ ހުންނެވި އިސްބޭފުޅެއްގެ ހައިސިއްޔަތުން ސަލާމް އެ މައްސަލަ އިތުރަށް ތަހުގީގުކުރުމަށް ފުރުސަތު ނުދީ، މައްސަލަ ހުއްޓުވާފައިވާ ކަމަށެވެ.

އެ މައްސަލައިގެ ޕްރިލިމިނަރީ އިންވެސްޓިގޭޝަން ނިންމައި، މިދިޔަ އަހަރުގެ ސެޕްޓެމްބަރު ހިސާބުގައި މެންބަރުންނަށް ހުށަހަޅާފައިވީ ނަމަވެސް، އެ މައްސަލަ ހުއްޓުވީ ރިޔާސީ އިންތިހާބާ ގުޅިގެން އެކަމުގެ ސަބަބުން ވަކި ސިޔާސީ ޕާޓީއަކަށް ގެއްލުންތަކެއް ކުރިމަތިވެދާނެތީކަން ފާހަގަކުރެވިފައިވާ ކަމަށް އެ ރިޕޯޓުގައި ބުންޏެވެ.

އެކަމަކު، އެ ރިޕޯޓުގައި ބުނި ގޮތުގައި، ރިޔާސީ އިންތިހާބާއި މަޖިލިސް އިންތިހާބު ވެސް ނިމުނު ފަހުން، މި އަހަރުގެ އެޕްރީލް މަހުގައި އެ މައްސަލަ އަލުން ތަހުގީގުކުރަން ނިންމި އެވެ. ރައްޔިތުންގެ މަސްލަހަތު މިހާ ބޮޑު މައްސަލައެއް ހުއްޓުވާފައި ބާއްވަންވީ އެއްވެސް ސަބަބެއް ނެތް ކަމަށާއި އެކަމުގައި އަމިއްލަ މަސްލަހަތު އިސްކޮށްފައިވާ ކަމަށް ވެސް ސަލާމަށް ވަނީ ތުހުމަތުކޮށްފަ އެވެ.

މި މައްސަލާގައި އެކަމުގައި ޝާމިލުވާ ބޭފުޅުންގެ ފޯނު ހިފަހައްޓައ،ި ބަލައި ފާސްކުރުމަށް ހޯދުމަށް އުޅުނު ކޯޓު އަމުރުތައް ހޯދުން ލަސްކޮށް އަދި ހެކި ނައްތާލުމުގެ ފުރުސަތު ފަހިކޮށްދިނުމަށް ސަލާމް މަސައްކަތް ކޮށްފައިވާ ކަމަށް ވެސް ވަނީ ތުހުމަތުކޮށްފަ އެވެ.

ސަލާމަށް ކުރާ އިތުރު ތުހުމަތުތައް

• އަމިއްލަ ނުފޫޒު ބޭނުންކުރައްވައިގެން ކޮމިޝަނުގެ އޮނިގަނޑު އިސްލާހުކޮށް ފޮރެންސިކް ސެކްޝަނެއް ހަދައި އެތަނުގެ ހެޑްއަކަށް ކުރިން އެ ކޮމިޝަނުގައި މަސައްކަތްކުރ،ި ނައިބު ރައީސް އާއި އެ ކޮމިޝަނުގެ އެހެން މެންބަރަކާ ގާތް ގުޅުމެއް އޮންނަ ފަރާތެއްގެ ގާތް މުވައްޒަފެއް ނަގާފައިވުން.

• ސަލާމް ބޭނުންވާ ގޮތަށް މައްސަލަތައް ނިންމުމަށް އެ ކޮމިޝަނުގެ އެހެން މެންބަރުންނަށް ބާރުއެޅުން.

• މައްސަލަތައް އެޖެންޑާކުރުމުގައި ވެސް އިސްކަންދެނީ އަމިއްލަ މަސްލަހަތަށް ކަމާއި މައްސަލަތައް އެޖެންޑާކުރަމުން ގޮސްފައި ވަނީ އެއްވެސް ތަރުތީބަކަށް ބެލުމެއް ނެތިކަން.

• ކުރީގެ ބަންޑާރަނައިބެއްގެ މައްޗަށް ތުހުމަތުކުރެވުނު މައްސަލައެއްގައި ދަޢުވާކުރެވޭ ވަރަށް ހެކި ހުރިނަމަވެސ،ް އެފަރާތުގެ މައްޗަށް ދައުވާ ނުކުރެވޭނެކަމަށް ކަނޑައަޅައި އެ މައްސަލަ ފައިލްކުރުމުގައި އިސް ދައުރެއް އަދާކޮށްފައިވުން.

އޭސީސީގެ މެމްބަރު ކަމުން ސަލާމް ވަކިކުރަން މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން ނިންމުން އޭނާ ވަނީ މިއަދު މަގާމުން އިސްތިއުފާ ދެއްވައިފަ އެވެ.

ބިންވެރިޔާ ސްކީމްގެ ދަށުން ހުޅުމާލެ އާއި ގުޅިފަޅު އަދި ގިރާވަރުފަޅުން މާލޭ މީހުންނަށް 9،000 އަށް ވުރެ ގިނަ ގޯތި ދޭން ވަނީ ނިންމައިފަ އެވެ. ހުޅުމާލެ 3 އާއި ގުޅިފަޅާއި ގިރާވަރުފަޅުން ގޯތި ދިނުމަށް ބޭނުންވާ ބިން ހިއްކާ އަދިވެސް ނުނިމެ އެވެ. ހުޅުމާލެ 2 އިން ދޭން ނިންމި ހުރިހާ ގޯއްޗެއް ވަނީ މިހާރު ހަވާލުކޮށްފަ އެވެ.

މާލޭ މީހުންނަށް ދޭން ނިންމި ގޯތިތަކުގެ މައްސަލަ އޭސީސީން ހުއްޓުވި ކަމަށް ތުހުމަތުކުރި ނަމަވެސް، ކުރީގެ ސަރުކާރުން ގެދޮރުވެރިޔާ ސްކީމްގެ ނަމުގައި މާލޭގައި ދިރިއުޅޭތާ 15 އަހަރުވެފައިވާ މީހުންނަށް ދޭން ނިންމި ފްލެޓްތައް ދިނުން ހުއްޓުވައި، އެ ކޮމިޝަނުން ވަނީ އެ މައްސަލަ ތަހުގީގުކޮށްފަ އެވެ. އަދި މިހާރުގެ ސަރުކާރުން ވަނީ އޭސީސީގެ ތަހުގީގަށް ބަލައި، އެ 4،000 ފްލެޓަށް ކުރިމަތިލީ އެންމެންގެ ފޯމުތައް ރިވިއު ކުރުމުގެ މަސައްކަތް ފަށައިފަ އެވެ.