ހަ މިލިއަން ޑޮލަރަށް ގަތް ކެޔޮވައް ކާލައިފި

ޑަކްޓް ޓޭޕުން ފާރުގައި ހަރުކުުރި ކެޔޮވައް 6.2 މިލިއަން ޑޮލަރަށް ގަތް ކްރިޕްޓޯ ވިޔަފާރިވެރިޔާ ޖަސްޓިން ސަން އޭނާ ވައުދުވި ގޮތަށް، އިއްޔެ އެ ކާލައިފި އެވެ.

ހޮންގްކޮންގްގެ އެންމެ އަގުބޮޑު އެއް ހޮޓަލުގައި ސަން ބޭއްވި އިވެންޓުގައި ބައެއް ނޫސްވެރިންނާއި އިންފްލުއެންސަރުން ކުރިމަތީގައި އޭނާ ކެޔޮވައް ކާލުމަށް ފަހު ބުނީ އޭނާ ގަތް ކޮންސެޕްޝަނަލް އާޓާއި ކްރިޕްޓޯކަރަންސީއާ ދެމެދު އެއްގޮތް ކަންތައްތަކެއް އެބަހުރި ކަމަށެވެ.

"އެހެން ކެޔޮތަކަށް ވުރެ މި ކެޔޮ މާ މީރު،" ކެޔޮވަކުގެ ރަހަ ބަލައިލުމަށް ފަހު ސަން ބުންޏެވެ.

"ހަމަ ހަގީގަތުގައި ވެސް މީރު."

އިޓަލީގެ އާޓިސްޓެއް ކަމަށްވާ މައުރީޒިއޯ ކެޓެލަން "ކޮމެޑިއަން" ގެ ނަމުގައި ދައްކާލި މި އާޓްވޯކް ނިއު ޔޯކްގެ ސޮތަބީސް އޮކްޝަންގައި ސަން އަށް ލިބުނީ ބިޑް ކުރި އެހެން ހަ މީހަކާ ވާދަކޮށެވެ.

ސަން ބުނީ ބިޑް ކާމިޔާބުވިތާ ފުރަތަމަ ދިހަ ވަރަކަށް ސިކުންތުގައި އޭނާއަށް އެކަން ގަބޫލު ވެސް ނުކުރެވުނު ކަމަށެވެ. އޭނާ ބުނީ މިއީ "ވަރަށް ބޮޑު ކަމަކަށް ވެދާނެ ކަމެއް" ކަން ވިސްނުނީ އިރުކޮޅަކުން ކަމަށެވެ.

އޭނާ ބުނީ ކެޔޮވައް ކާލަން ނިންމީ ދެން ޖެހިގެން އައި 10 ސިކުންތެ ތެރޭގައި ކަމަށެވެ.

"ޕްރެސް ކޮންފަރެންސެއްގައި މި ކެއުމަކީ ވެސް އާޓްވޯކްގެ ތާރީހުގައި ހިމެނިގެން ދާނެ ކަމަކަށް ވެދާނެ،" ކްރިޕްޓޮމޯނީ އެކްސްޗޭންޖެއް ކަމަށްވާ "ޓްރޯން" އުފެއްދި ސަން ބުންޏެވެ.

ދޮންކޭލުގެ "ޝެލްފް ލައިފް" ނުވަތަ ހަލާކުވެގެންދާ މުއްދަތަށް ބަަލައި، ނީލަމުގައި ގަނެފައި ވަނީ އެއީ ކެޓެލަން އަސްލު އުފެއްދުމެއް ކަމުގެ ސެޓްފިކެޓާއި ދޮންކެޔޮވައް ފީވުމުން އެ ބަދަލުކުރާނެ ގޮތުގެ އިރުޝާދުތަކެވެ. އަދި އެއާ އެކު، ކެޔޮވައް ހަރުކުރި ޑަކްޓް ޓޭޕްގަނޑު ވެސް ދެ އެވެ.

މިއާމީ ބީޗުގައި 2019 ވަނަ އަހަރު ކާބޯތަކެތީގެ އާޓަށް ހާއްސަކޮށްގެން ބޭއްވި އާޓް ބާސެލް ޝޯގައި އެންމެ ފުރަތަމަ ދައްކާލި މި ކެޔޮވަކަކީ އާޓްގެ ގޮތުގައި ބެލެވޭނެތޯ ބޮޑު ބަހުސެއް އުފެދުނެވެ. ކެޔޮވައް އަލުން މިގޮތަށް ހަރުކުރި މިއީ ތިން ވަނަ ފަހަރަށެވެ. އެންމެ ފުރަތަމަ އެގޮތަށް ދައްކާލަން ބެހެއްޓި ފަހަރު ޕާފޯމަންސް އާޓިސްޓެއް ކަމަށްވާ ޑޭވިޑް ޑަޓޫނާ އެ ކެޔޮވައް ބަލަން ގޮސް "ބަނޑުހައިވެގެން" ކަމަށް ބުނެ އެ ކާލީ އެވެ.