ކޮމިޝަނާ އޮފް ރިފޯމްގެ މަގާމަށް މީހަކު ހޯދަނީ

ދައުލަތުގެ މާލީ ނިޒާމު ހަރުދަނާ ކުރުމަށް އުފެއްދި އިކޮނޮމިކް ރިފޯމް އޮފީހުގެ ކޮމިޝަނަރު އޮފް ރިފޯމުގެ މަގާމަށް މީހަކު ހޯދަން ފިނޭންސް މިނިސްޓްރީން އިއުލާން ކޮށްފި އެވެ.

އެ މިނިސްޓްރީން މިއަދު ބުނީ، އެ މަގާމަށް ޝައުގުވެރިވާ މީހުން މި މަހުގެ 8 ވަނަ ދުވަހުގެ ނިޔަަލަށް ޕްރޮޕޯސަލް ހުށަހަޅަން ޖެހޭ ކަމަށެވެ.

ދެ އަހަރު ދުވަހުގެ ކޮންޓްރެކްޓެއްގެ ދަށުން އެ މަގާމުގައި މަސައްކަތް ކުރަން ޖެހޭނީ ފިނޭންސް މިނިސްޓްރީގަ އެވެ.

ރިފޯމް ކޮމިޝަނަރުގެ މަގާމަށް އިއުލާނު ކުރި އިރު، މުސާރައެއް ހާމަކޮށްފަ އެއް ނުވެ އެވެ. އެ މަގާމަށް ކުރިމަތިލެވޭނީ އެކައުންޓިން އެންޑް ފައިނޭންސިން ދާއިރާއިން ޑިގްރީ ނުވަތަ އެ އަށް ވުރެ މަތީ ފާސް ހާސިލް ކޮށްފައިވާ މީހަކަށެވެ. ދާއިރާގެ 10 އަހަރުގެ ތަޖުރިބާ ހުންނަންވާނެ ކަމަށް ވެސް އިއުލާންގައި ވެ އެވެ.

އެ މަގާމުގެ މަސްއޫލިއްުޔަތުތަކުގެ ތެރޭގައި ރިފޯމު ސްޓްރެޓެޖީ އެކުލަވައިލުމާއި އިނޮކޮމިކް، އެސްއޯއީ އަދި ފިސްކަލް ރިފޯމުތަކާ ގުޅޭ ޕްރޮގްރެސް ރިޕޯޓުތައް އެކުލަވާލައި އެކަމާ ގުޅޭ ފްރޭމްވޯކްތައް އެކުލަވައިލައި ޕްލޭންތައް ރޭވުން ހިމެނެ އެވެ.

ސަރުކާރުގެ ހަރަދުތައް ކުޑަކުރުމަށްޓަކައި މުހިއްމު ފިޔަވަޅުތަކެއް އަޅަން އަންނަ އަހަރުގެ ބަޖެޓުގައި ޕްލޭންތައް ރާވާފައިވެ އެވެ. އޭގެ ތެރޭގައި ސަބްސިޑީ ޓާގެޓު ކުރުމާއި ކުންފުނިތަކުގެ ހަރަދުތައް ކުޑަކުރުމަށް އަޅާ ފިޔަވަޅުތައް ހިމެނެ އެވެ.