ރޮޑްރީގެ މައްޗަށް މި ފަހަރު ކުރި ހޯދީ ވިނީ

ބެލޮންޑިއޯ އެވޯޑްސްގައި މެންޗެސްޓާ ސިޓީގެ ރޮޑްރީއާ ވާދަކޮށް ނާކާމިޔާބުވި ރެއާލް މެޑްރިޑްގެ ވިނީ ޖޫނިއާ ފީފާ ބެސްޓް އެވޯޑްސް ހޯދައިފި އެވެ.

ފީފާއިން ހޮވާ ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާގެ އެވޯޑް، ވިނީ ހޯދީ ރޮޑްރީ އަށް ވުރެ އިތުރަށް ފަސް ޕޮއިންޓް ހޯދައިގެންނެވެ.

ގިނަ ބަޔަކު ހީކޮށްގެން ތިބީ ބެލޮންޑިއޯ އެވޯޑް ވެސް ހޯދާނީ ވިނީ ކަމަށެވެ. ރެއާލުން ވެސް އުއްމީދުކޮށްގެން ތިބީ އެގޮތަށެވެ. އެކަމަކު އޭނާ އަށް އެވޯޑް ނުލިބޭކަން ކުރިން އެނގުމުން ރެއާލުން އެ ހަފުލާ ބޮއިކޮޓްކުރި އެވެ. ނަމަވެސް ވިނީ އާއި ރެއާލުގެ އިސް އޮފިޝަލުން ރޭ އޮތް ފީފާ އެވޯޑްސް އަށް ދިޔަ އެވެ.

ފީފާގެ މެންބަރު ކޮންމެ ގައުމަކުން ގައުމީ ޓީމުގެ ކެޕްޓަނާއި ކޯޗު އަދި ފުޓްބޯޅަ ޖާނަލިސްޓުން އަދި ފީފާގެ ޖަޖުން ވޯޓް ދީގެން ހޮވާ މޮޅު ކުޅުންތެރިޔާގެ އެވޯޑްގައި ވިނީ ވަނީ 48 ޕޮއިންޓް ހޯދައިފަ އެވެ. ރޮޑްރީއަށް ލިބުނީ 43 އެވެ. ތިން ވަނަ އަށް ދިޔަ ރެއާލްގެ ޖޫޑެ ބެލިންހަމް އަށް ލިބުނީ 37 ޕޮއިންޓެވެ.

އެންމެ މޮޅު ގޯލް ޖެހި ކުޅުންތެރިޔާ އަށް ދޭ ޕުސްކަސް އެވޯޑް ހޯދީ މެންޗެސްޓާ ޔުނައިޓެޑްގެ އަލްހެންޑްރޯ ގަނާޗޯ އެވެ. އެއީ މިދިޔަ ނޮވެމްބަރު މަހު އެވަޓަން ކޮޅަށް ބައިސްކަލް ކިކަކުން އޭނާ ޖެހި ގޯލަށެވެ.

އެންމެ މޮޅު ކޯޗުގެ އެވޯޑް ހޯދީ ރެއާލްގެ ކާލޯ އަންޗެލޮޓީ އެވެ. އޭނާ ވަނީ އެ ޓީމަށް މި އަހަރު ޗެމްޕިއަންސް ލީގު ކާމިޔާބުކޮށްދީފަ އެވެ.

އެންމެ މޮޅު އަންހެން ކުޅުންތެރިޔާގެ އެވޯޑް ހޯދީ ބާސެލޯނާގެ އައިޓާނާ ބޮންމަތީ އެވެ. އެންމެ މޮޅު އަންހެން ކޯޗުގެ އެވޯޑް ހޯދީ ޗެލްސީގެ ކުރީގެ ކޯޗު އަދި މިހާރު އެމެރިކާގެ ގައުމީ ޓީމުގެ ކޯޗު އެމާ ހޭސް އެވެ.