އެޗްޑީސީގެ އާ އެމްޑީ މައުރޫފާއި ސީޕީ ޝުޖާއުގެ ބައްދަލުވުމެއް

އެޗްޑީސީ އަށް އިއްޔެ އައްޔަންކުރި މެނޭޖިން ޑިރެކްޓަރު މައުރޫފް ޖަމީލާއި ޕޮލިސް ކޮމިޝަނަރު އަލީ ޝުޖާއު މިއަދު ބައްދަލުކުރައްވައިފި އެވެ.

މިއީ މައުރޫފް ޖަމީލް މަގާމާ ހަވާލުވެވަޑައިގެންނެވި ފަހުން އެންމެ ފުރަތަމަ ބޭއްވެވި އެއް ބައްދަލުވުމެވެ.

ފުލުހުންގެ މައި އިދާރާގައި ބޭއްވި މި ބައްދަލުވުމުގައި އެޗްޑީސީގެ ޗެއާމަން އަހުމަދު ނާސިފް (ޑީޑީ) ވެސް ބައިވެރިވެވަޑައިގަތެވެ. ސީޕީ ޝުޖާއުގެ އަރިިހުގައި ދެ ޑެޕިއުޓީ ކޮމިޝަނަރުން ކަމަށް ފަރުހާދު ފިކުރީ އާއި އިސްމާއިލް ނަވީން އަދި މިހާރު ކުރިއަށް ގެންދާ އެޗްޑީސީގެ އެކިއެކި މައްސަލަތަކުގެ ތަހުގީގުގައި އެންމެ އިސްކޮށް ހަރަކާތްތެރިވެވަޑައިގަންނަވާ އެސިސްޓެންޓް ކޮމިޝަނަރު އަބްދުﷲ ޝަރީފް ބައިވެރިވެވަޑައިގަތެވެ.

"މި ބައްދަލުވުމުގައި މިހާރު ކުރިއަށްދާ، ގެދޮރުވެރިޔާ އަދި ބިންވެރިޔާ ސްކީމާ ގުޅޭގޮތުން ހިނގަމުންދާ ތަހުގީގާ ބެހޭގޮތުން ވެސް މަޝްވަރާ ކުރެއްވި،" ފުލުހުން އެކްސްގައި ބުންޏެވެ.

ކުރީގެ ކޮންސްޓްރަކްޝަން މިނިސްޓަރު އަދި ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގައި ހުޅުމާލެ ހިއްކަން ފެށި ހިސާބުން ފެށިގެން ހުޅުމާލެ ތަރައްގީ ކުރުމުގައި އެންމެ އިސްކޮށް އުޅުއްވި ބޭފުޅުންގެ ތެރޭގައި ހިމެނިވަޑައިގަންނަވާ މައުރޫފް އެޗްޑީސީގެ އެމްޑީ ކަމަށް އައްުޔަން ކުރެއްވީ އެ ކުންފުނީގެ ބައެއް ކަންކަން މިސްރާބުން ގޯސްވެ، ކޮރަޕްޝަންގެ ތުހުމަތު އެޅިފައިވާ ދަނޑިވަޅެއްގަ އެވެ.

އެޗްޑީސީގެ ކުރީގެ އެމްޑީ އިބްރާހިމް ފަޒުލް ރަޝީދު ވެސް މަގާމުން ސަސްޕެންޑްކޮށް، އަދި އެންމެ ފަހުން މިދިޔަ ހޮނިހިރު ދުވަހުގެ ރޭ އޭނާ މަގާމުން އިސްތިއުފާ ދެއްވީ ވެސް އެ ހޫނުކަންމަތީގަ އެވެ. ފަޒުލްގެ މެނޭޖުމަންޓުގައި އިސްކޮށް ތިބި 15 މުވައްޒަފަކު ވެސް އިއްޔެ ވަނީ މަގާމުތަކުން ވަކިކޮށްފަ އެވެ. އަދި ކުންފުނީގެ ބޯޑު ވެސް އޮތީ ސަސްޕެންޝަންގަ އެވެ.

މައްސަލަަތައް ފެންމަތިވީ، ބިންވެރިޔާ ސްކީމަށް ޝަރުތު ހަމަނުވާ ލިސްޓުގައި، ފަޒުލްގެ ބޭބެ އަދި އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދުގެ ނަން އޮއްވައި އޭނާއަށް ގޯތީގެ ރަޖިސްޓްރީއެއް ހަދައިދީފައި އޮތްކަން ފަޅާއެރުމުންނެވެ. އޭނާގެ އިތުރުން އަދި އެހެން ބަޔަކަށް ވެސް އެގޮތަށް ރަޖިސްޓްރީ ހަދާފައިވާކަން ފަޅާއެރި އެވެ.

Binveriyaa/Gedhoruveriya scheme ge thahugeegah mauloomaathu hoadhan fuluhunge haassa portal eh

The most trusted news source in the Maldives

Mihaaru

އެހެންވެ، ޕީޖީ އައްބާސް ޝަރީފުގެ އަމުރަކަށް ފުލުހުންނާއި އޭސީސީން މިހާރު ވަނީ ގެދޮރުވެރިޔާ/ބިންވެރިޔާ ސްކީމްގެ ޖިނާއީ ތަހުގީގެއް ފަށައިފަ އެވެ. އަދި އެ ތަހުގީގަށް މައުލޫމާތާއި ހެކި ހުށަހަޅަން ބޭނުންވާ މީހުންނަށް ފުލުހުން ވަނީ ޕޯޓަލް ވެސް ގާއިމްކޮށްފަ އެވެ.