ސްޕެއިން އާއި ޕޯޗްގަލް އިން ކަރަންޓު ކެނޑިގެން ހާސްކަމުގައި

ސްޕެއިން އާއި ޕޯޗުގަލްގެ ބޮޑު ސަރަހައްދަކުން ހޯމަ ދުވަހު ކަރަންޓު ކެނޑުމާ އެކު ރޭލު ދަތުރުތައް ހުއްޓި، ފޯނާއި އިންޓަނެޓުގެ ހިދުމަތަށް ބުރޫއަރައި މަގުތައް ބަންދުވެ ލިފްޓުތަކުގައި މީހުން ތާށިވުން ފަދަ އެތައް ހާދިސާއެއްގައި ހާސްކަމުގެ ތެރެއަށް ހިނގައްޖެ އެވެ.

ބިރުވެރިކަމެއްގެ ތެރެއަށް މި ދެ ގައުމު ވެއްޓުނު ހާދިސާއަށް ގަޑިއިރުތަކެއް ފަހުން ބައެއް ސަރަހައްދުތަކަށް ކަރަންޓު ދޭން މިހާރު ފަށާފައި ވިޔަސް އުފެދިފައިވާ ހާސްކަން އަދިވެސް ފިލައިގެން ނުދެ އެވެ.

ހާލަތާ ގުޅޭ ގޮތުން ސަރުކާރުގެ ކުއްލި ބައްދަލުވުމަކަށް ފަހު ސްޕެއިންގެ ބޮޑުވަޒީރު ޕެޑްރޯ ސަންޗޭޒް ވިދާޅުވީ، "ކަރަންޓު ކެނޑުނު ސަބަބާ ބެހޭ ގޮތުން ވަކި މައުލޫމާތެއް ލިބިފައި ނުވާ" ކަމަށެވެ.

އޭނާ ވިދާޅުވީ މި ވަގުތު މިއީ ވަކި ކަމެއްގެ ސަބަބުން ނޫން ކަމަށް ވެސް ބުނެވެން ނެތް ކަމަށެވެ. އެކަމަކު ނުރަނގަޅު މައުލޫމާތެއް ފެތުރިދާނެތީ ތޯތޯ ވާހަކަ ދެއްކުމާ ދުރުހެލިވުމަށް އާންމުންނަށް ވަނީ އިލްތިމާސްކުރައްވައިފަ އެވެ.

"މީހުން މި ތިބީ ހުއްޓުން އަރައި ހާސްވެފައި. އެއީ މިކަހަލަ ކަމެއް ދުވަހަކު ވެސް ދިމާނުވާތީ،" މެޑްރިޑްގެ ހުއްޓިފައިވާ މެޓްރޯ ސިސްޓަމުން ނުކުތް އުމުރުން 19 އަހަރުގެ ކޮންސްޓްރަކްޝަން މަސައްކަތްތެރިއެއް ކަމަށްވާ ކާލޯސް ކެންޑޯރީ އޭއެފްޕީ އަށް ބުންޏެވެ.

"ފޯން ކަވަރޭޖެއް ނުލިބޭ. އާއިލާގެ މީހަކަށް މައިންބަފައިންނަކަށް ވެސް ނުގުޅޭ. އެއްވެސް ކަމެއް ވާކަށް ނެތް. ވަޒީފާ އަދާކުރާ ތަނަށް ވެސް ދެވޭނެ ގޮތެއް ނެތް،" އޭނާ ބުންޏެވެ.

މެޑްރިޑާއި އެހެނިހެން ތަންތަނުގައި ވެސް ބޭންކުތަކުން ނަގުދު ފައިސާ ނަގަން އެތައް ބަޔަކު އަވަސްވެގަތެވެ. މޮބައިލް ފޯނަށް ސިގްނަލް ނުލިބިގެން އެތައް ބަޔަކު މަގުތަކަށް ނުކުމެ އުޅުނެވެ. ޓެކްސީ އާއި ބަސްތަކަށް ދިގު ކިއޫތަކުގައި މީހުން ތިބި އިރު ބައެއް މީހުން ތިބީ ލިފްޓުތަކުގައި ނުވަތަ ގަރާޖުތަކުގައި ތާށިވެފަ އެވެ.

މަގުމަތީގެ ޓްރެފިކް ލައިޓްތައް ވެސް ނިވުމާ އެކު ޓްރެފިކް ތޮއްޖެހި މަގުތައް ހަމަޔަކަށް އަޅުވަން ފުލުހުން ނުކުންނަން ވެސް ވަނީ ޖެހިފަ އެވެ. އެއްގަމު އުޅަނދުތަކުގައި މަގުމައްޗަށް ނުނިކުންނަން ކަމާބެހޭ އިދާރާތަކުން އިލްތިމާސްކުރަމުން ދިޔަ ނަމަވެސް މުއާސަލާތީ ހިދުމަތްތަކަށް އަރާފައިވާ ބުރުލާ އެކު އެ މެސެޖުތައް ގިނަ މީހުންނާ ހަމަޔަކަށް ނުވެސް ފޯރަ އެވެ.

ސްޕެއިންގެ ނިއުކްލިއާ ސޭފްޓީ ކައުންސިލް (ސީއެސްއެން) އިން ނެރުނު ބަޔާނެއްގައި ބުނީ، ރައްކާތެރިކަމުގެ ފިޔަވަޅެއްގެ ގޮތުން ސްޕެއިންގެ ނިއުކްލިއާ އިންޖީނުގެތައް ވެސް އޮޓަމެޓިކުން އޮފްލައިންވެފައިވާ ކަމަށާއި ޑީސަލް ޖަނަރޭޓަރުތަކުން އެ ތަންތަން ރައްކާތެރި ހާލަތެއްގައި ބަލަހައްޓަމުން އަންނަ ކަމަށެވެ.

ބޮޑުވަޒީރު ވިދާޅުވި ގޮތުގައި ކަރަންޓު ކެނޑުނީ މެންދުރު ފަހު 12:30 (ޖީއެމްޓީ ގަޑިން ހެނދުނު 10:30) ގައި ކަމަށެވެ. އޭނާ ވިދާޅުވީ މިކަމުގެ އުނދަގޫ އެތައް މިލިއަން ބަޔަކަށް ކުރިމަތިވެފައި ވާއިރު ވިޔަފާރިތަކަށް ވެސް ބޮޑެތި ގެއްލުންތަކާ ކުރިމަތިވެފައިވާ ކަމަށެވެ.

އޭނާ ވިދާޅުވީ ގްރިޑް ޓެކްނީޝަނުން މަސައްކަތް އަންނަނީ "ވީހާ ވެސް އަވަހަކަށް މައްސަލަ ހައްލުކުރުމަށް" ކަމަށާއި ފްރާންސާއި މޮރޮކޯގެ އިންޓަކަނެކްޝަންތަކުގެ ސަބަބުން ސްޕެއިންގެ އުތުރާއި ދެކުނުގެ ބައެއް ސަރަހައްދުތަކަށް މިހާރުވެސް ކަރަންޓު ލިބިފައިވާ ކަމަށެވެ.

ޔޫރަޕިއަން ކޮމިޝަނުން ބުނީ ސްޕެއިނާއި ޕޯޗުގަލްގެ ހާލަތު ބަލަމުން އަންނަ ކަމަށެވެ. ޔޫރަޕިއަން ކައުންސިލްގެ ރައީސް އެންޓޯނިއޯ ކޮސްޓާ އެކްސްގައި ވިދާޅުވި ގޮތުގައި މިއީ ސައިބަ އެޓޭކެއް ފަދަ ކަމެއްގެ ސަބަބުން ދިމާވި ކަމެއްގެ ގޮތުގައި ބެލެވޭ އެއްވެސް ކަމެއް އަދި ފާހަަގަނުވާ ކަމަށެވެ.

ސްޕެއިންގެ ގްރިޑް އޮޕަރޭޓަރު ރެޑް އިލެކްޓްރިކާގެ ހެޑް އޮފް އޮޕަރޭޝަންސް އެޑުއާޑޯ ޕްރިއޭޓޯ ވިދާޅުވީ މަރާމާތު ކުރުމުގެ މަސައްކަތް ކުރަމުން އަންނަ ކަމަށާއި "ހުރިހާ ކަމެއް ރަނގަޅަށް ހިނގައްޖެ ނަމަ" އަލުން ކަރަންޓު ދޭން ހަ ގަޑިއިރާއި 10 ގަޑިއިރާ ދެމެދުގެ ވަގުތެއް ނަގާނެ ކަމަށެވެ.

ފްރާންސްގެ ހުޅަނގު ދެކުނުގެ ސަރަހައްދަށް ވެސް ކުޑަ ވަގުތުކޮޅަކަށް ކަރަންޓު ކެނޑުނެވެ. ނަމަވެސް ވަރަށް އަވަހަށް މައްސަލަ ހައްލުވެފައިވާ ކަމަށް ފްރާންސްގެ ހައި ވޯލްޓޭޖް ގްރިޑް އޮޕަރޭޓަރު، އާރްޓީއީ އިން ބުންޏެވެ. -- އޭއެފްޕީ