ރާއްޖޭގެ އެރީނާ ޕްރޮޖެކްޓުން މިލިއަނެއްހާ ޑޮލަރު ވަނީ ގެއްލިފައި: ފީފާ

މާފަންނު ސްޓޭޑިއަމްގައި އެފްއޭއެމުން ތަރައްގީކުރަން ފެށި ސްޕޯޓްސް އެރީނާ ޕްރޮޖެކްޓަށް ފީފާއިން ދިން ފައިސާގެ ތެރެއިން އެއް މިލިއަން ޑޮލަރަށް ވީގޮތް ފެންނާން ނެތް ކަމުގެ ކަންބޮޑުވުން ފީފާގެ ގާނޫނީ ޓީމުން ފާހަގަކޮށްފި އެވެ.

އެކަން ފީފާ އިން ފާހަގަކުރީ، ބައްސާމްގެ މައްޗަށް ފީފާއިން ކުރިމަތި ކުރި ނުވަ މަސް ދުވަހުގެ ސަސްޕެންޝަން އިސްތިއުނާފު ކުރުމަށް އޭނާގެ ފަރާތުން ބައިނަލްއަގްވާމީ ކުޅިވަރު އާބިޓްރޭޝަން ކޯޓް (ކާސް) އަށް ހުށަހެޅި މައްސަލައިގެ އަޑުއެހުމުގަ އެވެ.

ޝަރީއަތުގައި ފީފާގެ ވަކީލުން ވަނީ އެ އިދާރާގެ މިނިވަން އެތިކްސް ކޮމިޓީން ބައްސާމަށް ކުރިމަތި ކުރި ސަސްޕެންޝަންގެ ފިޔަވަޅު އަޅާފައި ވަނީ ރަނގަޅަށްކަން ސާބިތު ކުރުމަށް އެފްއޭއެމްގެ ފައިސާ އޭނާ ނަމަހަމަގޮތުގައި ބޭނުންކޮށްފައިވާ ކަމަށް ވަކާލާތުކޮށްފަ އެވެ.

ފީފާގެ ގާނޫނީ ޓީމުން ފެންމަތި ކުރި އެއް މައްސަލަކީ މާފަންނު ސްޓޭޑިއަމްގައި އިމާރާތް ކުރަން ފެށި ފުޓްބޯޅަ އެރީނާގެ ޕްރޮޖެކްޓްގެ ފައިސާއާ ގުޅޭ މައްސަލަ އެވެ.

ފީފާގެ ސްޓޭންޑަޑަށް ފެތޭ ގޮތަށް އިންޖަރީ ރިހެބިލިޓޭޝަން ސެންޓަރެއް ވެސް ގާއިމުކުރާ އެފްއޭއެމްގެ އޮފީސް އިމާރާތާއި ޓާފް ދަނޑު ހިމެނޭ ފުޓްބޯޅަ އެރީނާ ހަދަން ފީފާގެ ފޯވާޑް ޕްރޮގްރާމްގެ ދަށުން 1.480 ޑޮލަރު (ގާތްގަނޑަކަށް 22 މިލިއަން ރުފިޔާ) ހަރަދު ކުރަން ނިންމި އެވެ. އެ ޕްރޮޖެކްޓްގެ ބިންގާ އޮކްޓޯބަރު 2019 ގައި އަޅުއްވައި ދެއްވީ އޭރުގެ ސްޕޯޓްސް މިނިސްޓަރު އަހްމަދު މަހްލޫފާއި ބައްސާމެވެ.

އެ މަސައްކަތް އެފްއޭއެމުން ހަވާލު ކުރި ޓިބޯރާ ޕްރައިވެޓް ލިމިޓެޑަށް އެ މަސައްކަތް ހަވާލު ކުރީ 1,555,038 ޑޮލަރަށެވެ.

ފީފާއިން ފަންޑު ކުރާ އަދަދަށް ވުރެ އިތުރަށް، ކޮންޓްރެކްޓަރަށް ދޭން ޖެހޭ 75،000 ޑޮލަރު އެފްއޭއެމުން އަމިއްލަ އަށް، އެ ކުންފުންޏަށް ދޭނެ ކަމަށް އެ އެސޯސިއޭޝަނުން އޮކްޓޯބަރު 2019 ގައި ފީފާ އަށް އެންގި އެވެ.

ކަނޑައެޅިފައިވާ ގޮތަށް، ޓިބޯރާ އަށް އެ މަސައްކަތް ނިންމޭ ގޮތެއް ނުވި އެވެ. އެންމެ ފަހުން އެ މަސައްކަތް ސަބް ކޮންޓްރެކްޓް އުސޫލުން ކުރަން މާޗް 2020 ގައި އެޕޯލޯ ހޯލްޑިންގްސްއާ ހަވާލު ކުރި އެވެ. އަދި އެ މަސައްކަތަށް ވާ ފައިސާ ސީދާ އެފްއޭއެމުން އެޕޯލޯ އަށް ދޭން އެއްބަސްވި އެވެ.

ޓިބޯރާ އަށް 444,000 ޑޮލަރު

އެ ޕްރޮޖެކްޓްގެ އެއްވެސް ފައިސާއެއް އެޕޯލޯ އަށް ދީފައެއް ނުވެ އެވެ. އެ ކުންފުންޏަށް ފައިސާ ނުދެވުމުން ބަދަލުގެ ގޮތުގައި އެފްއޭއެމުން އެޕޯލޯ އަށް ދިނީ ހުޅުމާލޭ ފުޓްބޯޅަ ސްކޫލް ހަދަން އެ އެސޯސިއޭޝަނަށް ދޫކޮށްފައިވާ ބިމުން ބައެކެވެ.

ނަމަވެސް ބައްސާމްގެ ގާތް އެކުވެރިޔާ އަދި ސުޕަ ޔުނައިޓެޑް ސްޕޯޓްސް (ސަސް) ގެ ރައީސް އަހްމަދު އަފްރާދު (އަފޭ) ގެ ހިއްސާ އޮންނަ ޓިބޯރާ އަށް، އެ ޕްރޮޖެކްޓްގެ ދަށުން 444,000 ޑޮލަރު (6،846،480ރ.) 28 ޖެނުއަރީ 2021 ގައި ދީފައިވާކަން އެފްއޭއެމްގެ ބޭންކް ސްޓޭޓްމެންޓުން އެނގެން އެބައޮތް ކަމަށް ފީފާގެ ވަކީލުން ކޯޓުގައި ބުނެފައި ވެ އެވެ.

އެކި ފިޔަވަހިތަކަށް ބަހާލައިގެން ފީފާއިން ދިން 1.4 މިލިއަން ޑޮލަރުގެ ތެރެއިން ނޭނގެނީ 1،036 މިލިއަން ޑޮލަރަށް ވީ ގޮތެވެ.

ފީފާގެ ވަކިލުން ބުނީ އެ ފައިސާ ހަރަދު ކުރި ގޮތް ފެންނާނެ އެއްވެސް ލިޔެކިޔުމެއް ހޯދިފައި ނުވާ ކަމަށެވެ.

ކޯޓުގައި ބައްސާމްގެ ފަރާތުން ބުނެފައި ވަނީ "ޓިބާރޯއަށް ފައިސާ ދައްކާފައިވާ" ކަމަށެވެ. ނަމަވެސް އެކަމަށް ބާރުދޭ އެއްވެސް ލިޔެކިޔުމެއް ނުވަތަ ހެއްކެއް އޭނާ ހުށަހަޅުއްވާފައި ނުވާ ކަމަށް ޝަރީއަތް ނިންމި ގޮތުގެ ރިޕޯޓްގައި ވެ އެވެ.

ފައިސާ ދެއްކިކަމުގެ ހެކި ހުށަހަޅާފައި ނުވަނީ އެފްއޭއެމްގެ ދެ އޮފީހެއް ފުލުހުން ރެއިޑް ކުރި އިރު އެ ލިޔުންތައް ވެސް ފުލުހުން ގެންދިއުމުން ކަމަށް ކޯޓުގައި ބައްސާމްގެ ފަރާތުން ބުނެފައިވެ އެވެ.

މިދިޔަ ފެބްރުއަރީ މަހު ކާސްއިން ހުކުމް ކުރި ބައްސާމާ ދެކޮޅަށެވެ. އެ ކޯޓުން ހުކުމް ކުރީ އޭނާގެ މައްޗަށް ނުވަ މަސްދުވަހު ސަސްޕެންޝަން ކުރިމަތިކޮށްފައި ވަނީ ރަނގަޅަށް ކަމަށެވެ. މިދިޔަ އަހަރު ޖޫން މަހު ކުރިމަތި ކުރި އެ ސަސްޕެންޝަންގެ މުއްދަތު މިދިޔަ މާޗް މަހު ވަނީ ނިމިފަ އެވެ.

ފީފާއިން ހުއްދަ ދީގެން ހަދަން ފެށި އެރީނާގެ ގްރައުންޑް ފްލޯގައި މިހާރު ހުރީ ގުދަންތަކެއް ހަދާފަ އެވެ. އެކަމަކު އެއީ އެ އިމާރާތް ބޭނުން ކުރަން ފީފާއިން ހުއްދަ ދިން ގޮތާ ހިލާފަށް ކޮށްފައި އޮތް ކަމެއް ކަމަށް ޝަރީއަތުގައި ފީފާގެ ވަކީލުން ބުނެފައިވެ އެވެ.