އެޕާޓްމަންޓުގައި އަލިފާން ރޯވިތާ ފަސް ދުވަސް ފަހުން 74 އަހަރުގެ މީހަކު ސަލާމަތްކޮށްފި

އުމުރުން ދުވަސްވީ މީހުން ތިބޭ އިމާރާތުގައި އަލިފާން ރޯވި ސަބަބު ދަނީ ހޯދަމުން. --ފޮޓޯ:ވޮޝިންޓަން ޕޯސްޓްއުމުރުން ދުވަސްވީ މީހުން ތިބޭ އިމާރާތުގައި އަލިފާން ރޯވި ސަބަބު ދަނީ ހޯދަމުން. --ފޮޓޯ:ވޮޝިންޓަން ޕޯސްޓް

ހަސަން އާމިރު، މިހާރު

25 ސެޕްޓެމްބަރ 2018 - 22:12

ވޮޝިންޓަން (ސެޕްޓެމްބަރު 25) - އެމެރިކާގެ ވޮޝިންޓަނުގެ އިމާރާތެއްގައި އަލިފާން ރޯވިތާ ފަސް ދުވަސް ފަހުން 74 އަހަރުގެ މީހަކު ސަލާމަތްކޮށްފި އެވެ.

ރެސްކިއު ޓީމުތަކުން އެ މީހާ ހޯދީ އިއްޔެ އެވެ. އޭނާ އޮތް އެޕާޓްމަންޓުގައި އަލިފާން ރޯވީ މިދިޔަ ބުދަ ދުވަހު އެވެ. އި އިމާރާތުގައި އަލިފާން ރޯވުމާ ގުޅިގެން އުމުރުން ދުވަސްވީ 100 އަށް ވުރެ ގިނަ މީހުން ވަނީ ސަލާމަތް ކޮށްފަ އެވެ.

އެޕާޓްމަންޓުން ސަލާމަތް ކުރި މީހާ ހޮސްޕިޓަލަށް ގެންގޮސް ފަރުވާ ދިން ނަމަވެސް އޭނާ އަށް ސީރިއަސް ގެއްލުމެއް ލިބިފައެއް ނުވެ އެވެ.

އިމާރާތުގައި މިދިޔަ ހަފުތާގައި އަލިފާން ރޯވުމުން ވަރަށް ބޮޑަށް ދުން ބޯވި އެވެ. އަދި ފަސް މީހަކަށް ވަނީ އެކިވަރުގެ އަނިޔާތައް ވެފަ އެވެ. އިމާރާތުގައި އުޅުނު މީހުން ބުނެފައި ވަނީ އަލިފާން ރޯވި އިރު ފަޔާ އެލާމްގެ އަޑު އިވިފައި ނުވާ ކަމަށެވެ.

ކަމާ ބެހޭ އޮފިޝަލުން ބުނީ ފަޔާ ފައިޓަރުންނަށް 74 އަހަރުގެ މީހާ ނުފެނު މައްސަލަ ތަހުގީގު ކުރާނެ ކަމަށެވެ. ފަޔާ ފައިޓަރުން ވަނީ އަލިފާން ނިއްވުމަށް ފަހު ވެސް ބިލްޑިން ބަލާ ފާސްކޮށްފަ އެވެ. އިމާރާތުގެ ފަޔާ އެލާމް މަސައްކަތް ނުކުރި މައްސަލަ ވެސް މިހާރު ދަނީ ބަލަމުންނެވެ.