ކުޑަ ދެ ކުއްޖަކު ރުކެއް އިންދަނީ: ސައުދުގެ މަސައްކަތަށް ތިނަދޫ އާންމުންގެ ތަރުހީބު ބޮޑު
14 އޯގަސްޓް 2019 - 08:48
ފޭސްބުކުން މިފަހުން އަޅައިގަތީ އަމިއްލަ މީހަކު ނުކުމެ ކުރާ ވަރަށް މުހިއްމު މަސައްކަތަކަށެވެ. ގދ. ތިނަދުއަށް އުފަން ސައުދު އަލީގެ ކަމަކީ ރަށުގެ އެކި ސަރަހައްދުގައި ކޮންމެ ދުވަހަކު ހެން ރުކެއް ނުވަތަ ގަހެއް އިންދުމެވެ. މިދިޔަ އޮކްޓޯބަރު މަހު ފެށި މި މަސައްކަތުގައި މިހާތަނަށް 500 އެއްހާ ރުކާއި ގަސް އިންދާފައިވެ އެވެ.
ރަށުތެރެ ހޫނުވެގެން އެންމެން ވެސް އެ ވާހަކަ ދައްކަ އެވެ. އެހެންވެ ތަފާތު ގޮތްގޮތަށް ވިސްނުމަށް ފަހު ސައުދު ވަނީ "ޑެއިލީ ވަން" ނަމުގައި ޕްރޮގްރާމެއް ފަށައިފަ އެވެ. ރަށަށް ޒިޔާރަތްކުރާ މެހެމާނުންނާއި ތިނަދޫގެ ކުދިބޮޑު ގިނަ ބަޔަކު މިހާރު ވަނީ ރުކެއް ނޫނީ ގަހެއް އިންދައިފަ އެވެ. ޑެއިލީ ވަން ޕްރޮގްރާމަށް އިތުރު ފުރިހަމަކަމެއް ލިބުނީ ރައީސް އިބްރާހިމް މުހައްމަދު ސޯލިހު ވެސް މިދިޔަ މަހު ތިނަދުއަށް ވަޑައިގެން ރުކެއް އިންދެވުމުންނެވެ.
ރައީސް އިބްރާހިމް މުހައްމަދު ސޯލިހު ތިނަދުއަށް ކުރެއްވި ދަތުރުފުޅެއްގައި، ސައުދުގެ ޑެއިލީ ވަން ޕްރޮގްރާމްގައި ބައިވެރިވެވަޑައިގަންނަވަނީ -- ފޮޓޯ: ރައީސް އޮފީސް
ކުރިން ތިނަދޫގެ ކައުންސިލަރެއްގެ މަގާމު ވެސް އަދާކުރި ސައުދު ބުނިގޮތުގައި ރަށުގެ ހުޅަނގު ފަރާތުގައި ގަސް މަދުވުމުގެ ސަބަބުން ވަރަށް ހޫނު ގަދަ އެވެ. ފުއްޓަރު ފަރާތާ ވެސް ކައިރިވުމުން އެ ސަރަހައްދުގައި އުޅޭ މީހުންނަށް އެއްވެސް ރައްކާތެރިކަމެއް ނޯންނަ ކަމަށް އޭނާ ބުންޏެވެ.
"ލޮނުގެ އަސަރު ހުރޭ އެ ސަރަހައްދުގެ އިތުރުން ރަށުގެ މެދާ ހަމައަށް. އެންމެ ކައިރީގައި އުޅޭ މީހުންނަށް ލޮނާ ހެދި ގަސް ފަދަ އެއްޗެހި ނުހެއްދޭ. ގޭގެ ފުރާޅު ބާވާތީ މީހުން ޝަކުވާ ކުރޭ. އެހެންވެ ބެލީ އެކަން ކުރާނީ ކިހިނެއްތޯ،" ރަށުގައި އަމިއްލަ ވިޔަފާރިކުރަމުން އަންނަ ސައުދު ބުންޏެވެ.
ޑެއިލީ ވަން ޕްރޮގްރާމްގައި ރުކެއް އިންދުމަށް ފަހު، އުމުރުން ދުވަސްވީ މީހަކު ސައުދާ އެކު
އޭނާ ކުރާ މަސައްކަތުގައި ކުޑަކުދިން ބައިވެރިވަނީ ޝައުގުވެރިކަމާ އެކުގަ އެވެ. ގަސްތައް ރަނގަޅަށް ބެލެހެއްޓުމުގައި އުމުރުން 11 ވަރަކަށް އަހަރުގެ ކުދިން އިސްނަގަ އެވެ. އެގޮތުން ރުއްތައް އިންދާފައިވާ އަތިރިމައްޗަށް، ކޮންމެ ދުވަހަކު ހެން، ހަވީރު 5:00-5:30 އާ ދެމެދު އެ ކުދިން އެއްވެ އެވެ.
ޑެއިލީ ވަން ޕްރޮގްރާމާ އެކު މުޅި ތިނަދޫ ފެހިކުރުމުގެ މަސައްކަތުގައި މިހާރު ވަނީ ނުވަ މިނިސްޓަރަކު ރުއް އިންދަވައިފަ އެވެ. ގަސް އިންދުމަށް ކޮންމެ މީހަކަށް ވެސް ލިބޭނީ އެންމެ ފުރުސަތެކެވެ.
ޕޮލިސް ކޮމިޝަނަރު ހަމީދު ތިނަދުއަށް ކުރެއްވި ދަތުރެއްގައި ސައުދުގެ ޑެއިލީ ވަން ޕްރޮގްރާމުގައި ބައިވެރިވެވަޑައިގެން ރުކެއް އިންދަވަނީ.
ސައުދު މިކަން ކުރަން ފެށީ، ގޭގައި 100 ކުދި ރުއް އިންދުމަށް ފަހު އެވެ. ރުއްތައް ބޮޑުވާން ފެށުމުން ރަށުގެ އެކި ސަރަހައްދާއި އަތިރިމަތީގައި ވަނީ އެ އެއްޗެހި އަލުން އިންދައިފަ އެވެ. އެއަށް ފަހު އެކި ގޭގައި ވެސް ރުއް އިންދާފައިވެ އެެވެ.
މި ހާއްސަ ޕްރޮގްރާމަށް ރަށުގެ އާއްމުންގެ ފަރާތުން ބޮޑު ތަރުހީބެއް ލިބޭކަން އޭނާ ފާހަގަކުރި އެވެ.
ޑެއިލީ ވަން ޕްރޮގްރާމްގައި ރުކެއް އިންދުމަށް ފަހު، އުމުރުން ދުވަސްވީ މީހަކު ސައުދާ އެކު
"ކުރިން އިންދާފައި ހުރި ގަސްތަކުން ހިޔާވަހިކަން ލިބެން ވަނީ ފަށާފައި. ބިމުގައި އެއްޗެއް އިންދައިގެން ގެއްލުމެއްނުވާނެ. އެކަމުން ދިރި ތިބީންނަށް ފައިދާ ލިބޭނީ. އެ ގަސްތަކާއި ރުއްތައް ވާނީ ވެސް ދައުލަތުގެ ބެލުމުގެ ދަށުގައި ހުރި އެއްޗިއްސަށް،" ސައުދު ބުންޏެވެ.
ސައުދު ކަހަލަ މީހުން ރާއްޖޭގައި ގިނަ ނަމަ، ގުދުރަތީ ފެހިކަމުން ރަށްރަށް ނަލަވުމުގެ ފުރުސަތު ވަރަށް ބޮޑުވާނެ އެވެ.
Copyright © 2025 Mihaaru · Terms and Conditions · Privacy Policy
ކޮމެންޓްތައް
ރިކާޑޯ
17 August 2019
ހަމަ ހަގީގަތުގަވެސް ސައުދު އެކުރަނީ ވަރަށްވެސް ބުރަ އަދި އެހާމެ ފައިދާ ހުރި މަސައްކަތެއް. ބޭކާރު އަނގަ ނުތަޅާ ސައުދު އެ ކުރާ ގޮތަށް ރަށް ފެހި ކުރަން އެންމެން މަސައްކަތް ކުރަންވީ
ވަޖީހް
16 August 2019
ހާދަ ޒާތީ ކޮމެންޓް ތައް ގިނައޭ.. ކިހިނެއް ހިގާ ކަމެއް
ޔާސިރު
16 August 2019
ތި ކޮމެންޓްތަށް ކިޔާލުމުން ދޭހަވަނީ ތިއީ އެކި ނަންނަމުގަ އެކަކު ލިޔެފަ ހުރި ކޮމެންތަކެއްކަމެވެ.
ބޭޑާ
16 August 2019
ބަޔަކު ހަސަދަވެރިވިޔަސް ސައުދު އަކީ ތިނަދޫގެ ކުރިމަގަށްޓަކާ މަސައްކަތް ކުރާ މީހެއްކަން ނުދަންނަ މީހަކު ތިނަދޫގައި ނުހުންނާނެ. ޒާތީވާމީހުންން ޒާތީވާއިރު ސައުދު ގެ މަސައްކަތަށް ކުޑަވެސް ހުއްޓުމެއް ނާދޭ.
އަލިކުލަ
16 August 2019
ވަރަށް ރަނގަޅު ކަމެއް ތީ ރަށް ފެހި ކުރުން އަދި ބަންޑަރ ބިމުގަްި ތި އިންދާ ރުއްގަސް ވެގެން ދައްނީ ރައްޔިތުންގެ ފިރަބަންޑަރަ ރުއްގަހަށް އެކަމަކު އެރުއްގަހުން އެލިބޭ ފިނިކަމާ ހިޔަލަކީ ރުން އިންދި ފަރާތުން މީސްތަކުންނަށް ކުރާ ޞަދަގާތަކަށް ވާނެ
ފުރުސަތު
15 August 2019
ކުރީގެ ތިނަދޫ މަޖިލިސް މެމްބަރަކު މިސްކތްކައިރީ ހުރެ އޭނާގެ ގްރޫޕް މީހުން ކައިރީ މިބުނަނީ ގަސް އިންދުމަކީ ރަނގަޅުކަމެކޭ. ނަމަވެސް ސައުދު ގަވާއިދަ ޚިލާފަށް އިންދި ރުއްގަސް އެހެންރަނަކަށް ބަދަލުކުރަން ޖެހޭނެ ކަމަށާއި އަދި އެކަމަށްދާ ޚަރަދުވެސް ސައުދު އަތުން ކައުންސިލަށް ނަގަންޖެހޭ ވާހަކަ ބުނީ. ވަކި ފަރދަކު ކުރި އެހާ މުހިއްމުކަމެއް ހަސަދަވެރިވެގެން ފުނޑާލުމަކީ ރަނގަޅުކަމެއްނޫން.
ހާސިރު
15 August 2019
ކުރީގެ މެމްބަރު ތިބުނަނީ ނާޒިމް ތޯ ނޫނީ ގަސަމް ތޯ؟ ނޫނީ މިހާރުގެ މެމްބަރު ތޯ ؟
އެކުވެރި
15 August 2019
ސައުދު އަލީ އަކީ ވަރަށް ގާތް ރައްޓެއްްސެއް. އޭނަގެ ވިސްނުން ތިނަދޫއާއި ދޭތެރޭ ދެކެނީ ވަރަށްވެސް އުޖާލާކޮށް. އޭނަގެ ވިސްނުން އަބަދުވެސް ހުންނަނީ ތިނަދޫ މީހުންނަށް މަންފާވާގޮތަށް. އުފާވޭ އޭނަގެ ރައްޓެއްސްކަށްވީމަ
އައްޑަ
15 August 2019
ސައުދު އަލީ އެ ކުރަނީ ހަގީގަތުގަވެސް ރަށަށް ވަރަށް ފައިދާ ހުރި މަސައްކަތެއް. ހަސަދަ ވެރިވާ މީހުންނާއި ޒާތީވާ މީހުންނަށް ކަންތަކެއް ނުވާއިރު ކަން ކުރާ މީހާ ހުއްޓުވަން މަސައްކަތް ކުރުން ރަނގަޅެއް ނޫން
މުހައިމިން
15 August 2019
ސައުދު އަލީގެ ޕްރޮގްރާމްގައި ބައިވެރި ވުމަށް އެދުނީމަ ވެއިޓިންގ ލިސްޓް ދިގުކަމުން އަދި ފުރުސަތު ނުލިބޭ.. އެކަމަކު އިންތިޒާރުގަ މިހުރީ.
ޖާބިރު
16 August 2019
ކޮންމެހެން ނުޖެހޭ ވެއިޓް ލިސްޓްގަ ޖެހޭކަށް މަޑަވެލިން ރުކެއް ގެނެސް ތިނަދޫ ހިއްކިބިމުގަ ހަމަ އިންދަންވީއެވެ
މާހިދު
15 August 2019
ސައުދު އަލީ ގެ މަސައްކަތަށް އައްސަރިބަހާ ސާބަސް ދެން. މިހާތަނަށް ނުދެކެން މިފަދަ ޕްރޮގްރާމެއް މި ރާއްޖޭގެ އެއްވެސް މީހަކު ކުރިޔައަށް ގެންދިޔަ ތަނެއް.