އިމްޕޯޓް ގާނޫނުގެ އިސްލާހާއި ތަފާސްހިސާބުގެ ބިލް ބަލައިގެންފި

އިމްޕޯޓު އެކްސްޕޯޓު ގާނޫނަށް ބަދަލު ގެނައުމަށް ސަރުކާރުގެ ފަރާތުން ހުށަހެޅި ބިލާއި ތަފާސްހިސާބާ ބެހޭ ބިލް މަޖިލީހަށް ބަލައިގަތުމަށް މިއަދު ފާސްކޮށްފި އެވެ.

އިމްޕޯޓު އެކްސްޕޯޓު ގާނޫނަށް ބަދަލު ގެނައުމަށް ސަރުކާރު ފަރާތުން ގަމު ދާއިރާގެ މެންބަރު މުހައްމަދު ވިސާމް ހުށަހެޅުއްވި ބިލް މަޖިލީހަށް ބަލައިގަތީ ވޯޓްގައި ބައިވެރިވެ ވަޑައިގެންނެވި 62 މެމްބަރުންގެ އިއްތިފާގުންނެވެ. އެއީ ޓެކްސްއާ ގުޅުން ހުރި ބިލަކަށް ވާތީ މުޅި މަޖިލީހުގެ ކޮމެޓީއަށް އެ ބިލް ވަނީ ފޮނުވައިފަ އެވެ.

އެ ބިލް ބަލައިގަތުމަށް ފާސް ކުރުމުން މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވީ މާދަމާ އާއި ބުދަ ދުވަހު ބާއްވާ މަޖިލީހުގެ ޖަލްސާގައި އެ ބިލްގެ ކަންކަން ނިންމާލެވޭނެ ކަމަށް އުންމީދު ކުރައްވާ ކަމަށެވެ.

ސަރުކާރުގެ ފަރާތުން ދިއްގަރު ދާއިރާގެ އެމްޑީޕީގެ މެމްބަރު އިކްރާމް ހަސަން ހުށަހެޅުއްވި ތަފާސްހިސާބާ ބެހޭ ބިލް ބަލައިގަންނަން ވެސް ފާސް ކުރީ ވޯޓްގައި ބައިވެރިވި 62 މެމްބަރުންގެ އިއްތިފާގުންނެވެ. އެ ބިލް ދިރާސާ ކުރުމަށް ގައުމީ ތަރައްގީ އާއި ތަރިކައިގެ ކޮމެޓީއަށް ވަނީ ފޮނުވައިފަ އެވެ.

އިމްޕޯޓު، އެކްސްޕޯޓު ގާނޫނަށް އިސްލާހު ގެނައުމަށް ރައްޔިތުންގެ މަޖލީހަށް ހުށަހަޅާފައިވާ މި ބިލުގައި އެކި ސިނާއަތްތައް ފަށައި ތަރައްގީކުރުމަށް ބޭނުންވާ ތަކެއްޗާއި އާއްމު ދިރިއުޅުމުގައި ބޭނުންކުރާ ތަފާތު ތަކެތިން ނަގާ ޑިއުޓީ ކަނޑާލުމަށް ވަނީ އިސްކަން ދީފަ އެވެ. އަދި ތިމާވެއްޓަށް ގެއްލުންވާ ތަކެތި ބޭނުންކުރުން ހުއްޓާލުމަށް ބާރު އެޅުމުގެ ގޮތުން ބައެއް ތަކެތިން ޑިއުޓި ނެގުމަށް ވެސް ވަނީ ހުށަހަޅައިފަ އެވެ.

އެ ބިލުގައި ބުނެފައިވާގޮތުގައި އިމްޕޯޓުކުރާ ތަކެތީގެ ތެރެއިން ޕްލާސްޓިކް ހޮޅި އާއި ޑިސްޕޯސެބަލް ފިލްމާއި ޝީޓާއި ތަށި ފަދަ އެއްފަހަރާ ބޭނުންކޮށްފައި އުކާލާ ތަކެތިން މި އަހަރު ތެރޭގައި ޑިއުޓީ ނަގާނެ އެވެ. އަދި އަންނަ އަހަރުން ފެށިގެން އެފަދަ ތަކެތި އެތެރެކުރުން އެއްކޮށް މަނާ ކުރުމަށް ވަނީ ހުށަހަޅައިފަ އެވެ.

ޕްލާސްޓިކްގެ އިތުރުން ސިނގިރޭޓާއި ބިޑި، އަދި ބަނގުރާ ފަދަ ތަކެތިން ނަގާ ޑިއުޓީ ވެސް ބޮޑު ކުރުމަށް ވަނީ މިއަދު ހުށަހެޅި ބިލުގައި ހިމަނައިފަ އެެވެ.

އެ ބިލް މަޖިލީހަށް ބަލައިގަތުމުގެ ކުރިން ބަހުސް ކުރެއްވި މެމްބަރުން ވަނީ ގިނަ ހިޔާލުތަކެއް ހުށަހަޅުއްވައިފަ އެވެ. އަދި ސަރުކާރުން ހުށަހެޅުއްވި ގޮތަށް ގިނަ މެމްބަރުން ތާއީދު ކުރެއްވި އެވެ.

ތަފާސްހިސާބުގެ ބިލްގައި ހިމަނާފައިވަނީ ތަފާސްހިސާބުގެ ކަންކަން ބެލެހެއްޓުމަށް ވަކި ޑިޓާޕްޓްމަންޓެއްގެ ގޮތުގައި އުފައްދައިފައިވާ "މޯލްޑިވްސް ބިއުރޯ އޮފް ސްޓެކްޓިސް" އަކީ މިނިވަން އިދާރާއަކަށް ހެދުމަށާއި އެ ތަނަށް އިތުރު ބާރުތަކެއް ދިނުމަށެވެ.

ތަފާސްހިސާބު އެއްކުރުމަށް ހާއްސަ ޑިޕާޓްމަންޓެއް ރާއްޖޭގައި ހިންގާތާ 40 އަހަރު ވެފައިވާއިރު، "މޯލްޑިވްސް ބިއުރޯ އޮފް ސްޓެކްޓިސް މިހާރު ހިންގަނީ ޕްލޭނިން މިނިސްޓްރީގެ ދަށުންނެވެ.