އެކްޓަރު ކެވިން ކޮނަލީގެ މައްޗަށް ކުރާ ޖިންސީ ގޯނާގެ ތުހުމަތަށް އިންކާރުކޮށްފި

ކެވިން.

އަހުމަދު އަދްޝަން، މިހާރު

16 ޖުލައި 2020 - 14:21

"ދަ ނޯޓްބުކް" އާއި "އެންޓަރޭޖް" ފަދަ ކާމިޔާބު ފިލްމުތަކުން ފެނިފައިވާ ހޮލީވުޑްގެ އެކްޓަރު/ޑައިރެކްޓަރު ކެވިން ކޮނަލީ ގެ މައްޗަށް ކުރާ ޖިންސީ ގޯނާގެ ތުހުމަތަށް އިންކާރުކޮށްފި އެވެ.

މީޑިއާތަކުން ބުނިގޮތުގައި 46 އަހަރުގެ އެކްޓަރަށް ޖިންސީ ގޯނާގެ ތުހުމަތުކޮށްފައި ވަނީ ކޮސްޓިއުމް ޑިޒައިނަރެއް ކަމަށްވާ ގްރޭޝީ ކޮކްސް އެވެ. އޭނާއާ ހަވާލާދީ ޑެއިލީ ބީސްޓުން ބުނި ގޮތުގައި ކެވިންގެ ފަރާތުން ޖިންސީ ގޯނާ ލިބުނީ 2005 ގައި ބައިވެރިވި ޕާޓީއެއްގެ ތެރެއިންނެވެ.

ގްރޭޝީ ކިޔައިދީފައިވާ ގޮތުގައި އެ ޕާޓީ އަކީ ކެވިން ޑައިރެކްޓްކޮށް 2007 ގައި ގެނެސްދިން ފިލްމު "ގާޑެނާ އޮފް އީޑެން" ގެ ޝޫޓިން ނިންމައިލުން ފާހަގަކުރަން ބޭއްވި ހަފުލާއެކެވެ. އެ ފިލްމުގެ އެސިސްޓަންޓް ކޮސްޓިއުމްގެ ޑިޒައިނަރަކީ ގްރޭޝީ އެވެ.

Costume designer Gracie Cox accuses 'Entourage' star Kevin Connolly of sexually assaulting her at a wrap party for a film prod. by his pal DiCaprio. Spoke with Cox, four friends she told at time, crew members, observed emails, and a letter from therapist: https://t.co/EspwVVIiNV
— Marlow Stern (@MarlowNYC) July 15, 2020

އޭނާ ކިޔައިދިން ގޮތުގައި ކެވިންގެ ފަރާތުން ޖިންސީ ގޯނާ ލިބުނީ ޕާޓީގެ ތެރެއިން ދިމާވުމުގެ ތެރޭގައި ހަފުލާ ބޭއްވި ތަނުގެ ވީއައިޕީ އޭރިއާ އަށް ގެންގޮސް އެތަނުގައި ގަދަކަމުންނެވެ. އަދި އެ ވާހަކަ އޭނާގެ ހަތަރު އެކުވެރިއަކަށް ވެސް އޭރު ކިޔައި ދީފައިވާ ކަމަށާއި 2017 ގައި އެ މައްސަލާގައި ދައުވާކުރަން ވަކީލަކާ ވެސް ވާހަކަ ދެއްކި ކަމަށް ގްރޭޝީ ބުނެފައިވެ އެވެ. އެކަމަކު އެ މައްސަލާގައި ގިނަ ދުވަސްތަކެއްވެފައިވާ ކަމަށް ބުނެ ގްލޯރިއާ ކޭސްއާ ހަވާލުވާން ވަކީލް ބޭނުން ނުވުމުން ފަހުން އެކަމާ ނޫޅެވުނީ ކަމަށް ވެސް ގްރޭސީ ބުންޏެވެ.

ކެވިންގެ ފަރާތުން ވަކާލާތުކުރާ މާޓިން ސިންގާ ނެރުނު ބަޔާނެއްގައި ގްރޭޝީގެ މި ތުހުމަތާ ގުޅިގެން ބުނީ އެކްޓަރުގެ މައްޗަށް ކުރަނީ އެއްވެސް އަސްލެއް ނެތް ދޮގު ތުހުމަތެއް ކަމަށެވެ. އަދި ކެވިން އަކީ އަބަދު ވެސް ފުރައްސާރަތަކާ ދެކޮޅު އަދި އެފަދަ އަނިޔާތައް ލިބޭ މީހުންގެ ހައްގުގައި އަޑު ވެސް އުފުލާ ފަންނާނެއް ކަމަށެވެ.

"ފިލްމީ ދާއިރާގައި މަސައްކަތްކުރާތާ ސާޅީސް އަހަރުވީ ފަންނާނެއްގެ ހައިސިއްޔަތުން ކެވިން އަކީ އަބަދު ވެސް އޭނާއާ އެކު މަސައްކަތްކުރާ މީހުންނަށް އިހުތިރާމްކުރާ އަދި ގަދަރު ހިފަހައްޓާ އެކްޓަރެއް،" މާޓިން ސިންގާ ނެރުނު ބަޔާނުގައި ބުންޏެވެ. "އެހެންވީމާ ގްރޭސީގެ ތުހުމަތަކީ ހަގީގަތަކަށް ބެލޭނެ އެއްވެސް ޖާގައެއް ނެތް. އެއީ ކަނޑައެޅިގެން ހަގީގަތާ ހިލާފު ދޮގު ތުހުމަތެއް."

ކެވިންގެ މައްޗަށް ޖިންސީ ގޯނާގެ ތުހުމަތުކުރި އިރު 2017 އިން ފެށިގެން ހޮލީވުޑްގައި އަންނަނީ މިފަދަ މައްސަލަތަކާ ދެކޮޅަށް #މީޓޫގެ ނަމުގައި ހަރަކާތްތަކެއް ހިންގަމުންނެވެ.