ޖާބިރުގެ އަމިއްލަ މަސްލަަހަތު އޮތް ގަރާރަށް މެމްބަރުންގެ ނުރުހުން

ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަަބްދުﷲ ޖާބިރު މިއަދު ހުށަހެޅުއްވީ އޭނާގެ އަމިއްލަ މަސްލަހަތު އޮތް ގަރާރެއް ކަމަށް ވިދާޅުވެ، ބައެއް މެމްބަރުން ނުހުރުން ފާޅުކުރައްވައިފި އެވެ.

އިންޝުއަރެންސް ކުންފުނިތަކުން ބަދަލު ދޭ ގޮތާ މެދު ކަންބޮޑުވުން ފާޅުކުރައްވައި ޖާބިރު އެ ގަރާރު ހުށަހެޅުއްވި އިރު އޭނާގެ ކުންފުނި ޔޮޓް ޓުއާސް އަށް 22 މިލިއަން ޑޮލަރުގެ ބަދަލެއް ދޭން އެލައިޑް އިންޝުއަރެންސަށް ސިވިލް ކޯޓުން ވަނީ ހުކުމްކޮށްފަ އެވެ. އެކަމަކު އެ ހުކުމް އެލައިޑުން ވަނީ ހައި ކޯޓުގައި އިސްތިއުނާފުކޮށްފަ އެވެ.

ޖާބިރު ހުށަހެޅުއްވި ގަރާރަށް ބަހުސްކުރަން މަޖިލީހުގައި ފުރުސަތު ދިނުމުން އެކަމާ ކަންބޮޑުވުން ފާޅުކުރެއްވީ މަރަދޫ ދާއިރާގެ މެމްބަރު އިބްރާހީމް ޝަރީފާއި ހެންވޭރު ހުޅަނގު ދާއިރާގެ މެމްބަރު ހުސައިން ޝަމީމް (އަނދުން ހުސައިން) އަދި މާފަންނު ދެކުނު ދާއިރާގެ މެމްބަރު މުހައްމަދު ފަލާހެވެ.

ޝަރީފް ވިދާޅުވީ ޖާބިރު ގަރާރު ހުށައެޅުއްވީ އޭނާގެ އަމިއްލަ މަސްލަހަތު ހިމާޔަތްކުރަން ކަމަށާއި އެއީ މަޖިލީހަށް ވެއްދިގެން ވާނެ ގަރާރެއް ވެސް ނޫން ކަމަށެވެ. މަޖިލީހުގެ އިދާރާއިން ބަލަން ވާވަރަށް އެކަން ނުބަލައި އޮތުމުން ހިތާމަކުރައްވާ ކަމަށް ވެސް އޭނާ ވިދާޅުވި އެވެ.

"ވަރަށް ހިތާމަކުރަން ޖެހޭ ތިމާމެންގެ އަމިއްލަ މަސްލަހަތު ހިމާތަތްކުރުމަށް ޓަކައި ސަރުކާރަށް ކަންކަން ލާޒިމުކުރުމަށް ޓަކައި މި މަޖިލީހަށް ގަރާރު ހުށަހެޅުމަކީ. އެއްގޮތަކަށް ވެސް ކޮށްގެންވާނެ ކަމެއް ނޫން އެއްވެސް އިއްޒަތްތެރި މެމްބަރަކު،" ޝަރީފް ވިދާޅުވި އެވެ.

އިންޝުއަަރެންސް ކުންފުނިތަކުން ދެމުން އަންނަނީ ގައުމަށް ވަރަށް މުހިއްމު ހިދުމަތެއް ކަމަށާއި އެ ކުންފުނިތަކަށް ބިރުދެއްކޭ ފަދަ ގޮތަކަށް މަޖިލީހުގައި ބަހުސެއް ކުރިއަށް ގެންދިއުމަކީ ކޮށްގެންވާނެ ކަމެއް ނޫން ކަމަށް ވެސް އޭނާ ވިދާޅުވި އެވެ.

ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހީމް ޝަރީފް

ނިޒާމާ ބެހޭ ނުކުތާއެއް ނަންގަވައިގެން ފަލާހު ވިދާޅުވީ އިންޝުއަރެންސްގެ ވާހަކަ ޖާބިރު ދައްކަވަނީ އޭނާގެ ރިސޯޓެއްގައި ހިނގި ކަމަކާ ގުޅިގެން 22 މިލިޔަން ޑޮލަރެއް ހޯއްދަވަން އުޅުއްވައި އެ ފައިސާ ނުލިބިގެން ކަމަށެވެ.

"އެެހެންވީމާ އެެއީ ނިޒާމީ މައްސަލައެއް. އަމިއްލަ މަސްލަހަތު ހިމެނޭ މައްސަލައެއް ހުށަހެޅުން އެއީ ވަރަށް ބޮޑު ނިޒާމީ މައްސަލައެއް،" އޭނާ ވިދާޅުވި އެވެ.

ފަލާހަށް ޖަވާބު ދެއްވަމުން ރިޔާސަތުން ވިލުފުށީ ދާއިރާގެ މެމްބަރު ހަަސަން އަފީފު ވިދާޅުވީ ފަލާހު އެވިދާޅުވި ފަދަ އެއްވެސް ވާހަކައެއް ގަރާރުގައި ނެތް ކަމަށާއި މަޖިލީހުގެ އިދާރާއިން އެ ގަރާރު ވަަރަށް ބޮޑަށް ބަލާފައިވާ ކަމަށެވެ.

ޖާބިރުގެ ގަރާރަށް ވޯޓަށް އެހުމުން އެއާ ދެކޮޅަށް 58 މެމްބަރަކު ވޯޓު ދެއްވައި އެ ގަރަރު ވަނީ ބޭރުކޮށްލައިފަ އެވެ. ބަލައިގަތުމަށް ފެންނަ ކަމަށް ވޯޓު ދެއްވީ އެންމެ ދެ މެމްބަރުންނެވެ.