ފިޗް ރޭޓިން ދަށްކޮށްފި، ދެން ވެސް ކުރީގެ ގޮތަށް ބާ؟

މި އަހަރުގެ ކުރީ ކޮޅު އިނގިރޭސި ވިލާތާއި ހޮންކޮން ވެސް ހިމެނޭ ގޮތުން ދުނިޔޭގެ 33 ގައުމެއްގެ ފިޗް ރޭޓިންގްސް ދަށްކުރި އެވެ. މީގެ އިތުރުން 40 ގައުމެއްގެ 'އައުޓްލުކް':- ކުރިމަގު ފެންނަ ގޮތް، ނެގަޓިވް ކުރި އެވެ. ރާއްޖެ ހިމެނުނީ ރޭޓިން ދަށްކޮށް، ނެގެޓިވް ލިސްޓަށް ބަދަލުކުރި ގައުމުތަކުގެ ތެރޭގަ އެވެ. މިގޮތުން، މާޗް މަހު ރާއްޖޭގެ ރޭޓިންގްސް B+ އިން B އަށް ބަދަލުކުރުމަށް ފަހު ނޮވެމްބަރު 5 ގައި މިވަނީ CCC އަށް ބަދަލުކޮށްފަ އެވެ.

ކޮވިޑް-19 އާ ގުޅިގެން މުޅި ދުނިޔެއަށް ކުރިމަތިވެފައިވާ އިގްތިސާދީ ވިލާގަނޑުގެ ވައި އައިސް، ކަނޑު ގަދަވެ، ރާޅު ބޮޑުވެފައިވާ މި މޫސުމުގައި ގައުުމުތަކުގެ ރޭޓިންގްސް ދަށްވުމަކީ، އަދި ރާއްޖެ ފަދައިން ފަތުރުވެރިކަމުގެ ސިނާއަތަށް މުޅި އިގްތިސާދު ބަރޯސާވެ، ލިބޭ މިންވަރަށް ވުރެ ހަރަދު ބޮޑުކުރުމުގެ ސަގާފަތެއް ދަމަހައްޓާ ގައުމެއްގެ ރޭޓިންގްސް ދަށްކުރި ވާހަކަ އިވުމަކީ ހައިރާން ކުރުވަނިވި ކަމަކަށް ވެގެން ނުވާނެ އެވެ.

އެމީހުން މި ފިޔަވަޅު އެޅި މައިގަނޑު ތިން ސަބަބުގެ ގޮތުގައި ފިޗްއިން ބުނެފައިވަނީ ބޭރު ފައިސާގެ މިންވަރު ހީކުރި ވަރަށް ވުރެ ގިނަ ދުވަހަށް، އަދި އަންދާޒާކުރި އަދަށް ވުރެ ފުންކޮށް ދަށަށް ދާނޭ ކަމަށް ގަބޫލުކުރެވުމާއި، ކޮރޯނާ ވައިރަސްގެ ސަބަބުން ދައުލަތުގެ ދަރަނި ވަރަށް ބާރަށް އިތުރުވުމާއި ލޯނު ނަގައިގެން ބޮޑެތި އިންފްރާސްޓްރަކްޗަ ޕްރޮޖެކްޓްތައް ހިންގަމުން ގެންދިޔުމެވެ.

ފިޗްގެ ބައެއް ވާހަކަތައް އަޅުގަނޑަކަށް ވެސް ގަބޫލެއް ނުކުރެވެ އެވެ. އަޅުގަނޑުގެ ވިސްނުމުގައި 2021 ނިމުމާ ހަމައަށް، ދިވެހި ފަތުރުވެރިކަމުގެ ސިނާއަތް ކޮޅަށް ތެދުވެ ހިންދެމިލާނެ އެވެ. ފަތުރުވެރިކަމުގެ ސިނާއަތް ހިނގައިގަތުމުން އެހެން ސިނާއަތްތަކަށް ދިރުން ލިބި، އިގްތިސާދީ އިންޖީނު އެނބުރެން ފަށާނެ އެވެ.

މިއީ ހަމަޔަގީނުން ވެސް އަޅުގަނޑުމެން އެންމެން ވެސް އުއްމީދު ކުރާނޭ ގޮތެވެ. ސުވާލަކީ، ދެންވެސް އުޅޭނީ ކުރީގައި އުޅުނު ގޮތަށް ބާވަ އެވެ؟ މާދަމާ ކުރިމަތިވެދާނޭ ކާރިސާއަކަށް ރައްކާކުރާނެ ރިޒާވެއް ނުބަހައްޓައި، ނުފުއްދޭހާ ނަދުރު ބުނަމުން، ނުލިބޭ މިންވަރުން ހަރަދު ކުރަމުން ބާވަ އެވެ؟

ކުރިޔަށް އޮތް 2021 އަށް ސަރުކާރުން ހުށަހަޅަނީ 35 ބިލިއަން ރުފިޔާގެ ބަޖެޓެެއް ކަމަށް ވަނީ އިއުލާންކޮށްފަ އެވެ. މި އަހަރުގެ ބަޖެޓް ހުށަހެޅިއިރު، އަޅުގަނޑުމެންގެ އިގްތިސާދީ އޮޑި ދަތުރު ކުރަމުން ދިޔައީ މިހާރަށް ވުރެ އަމާން ކަނޑެއްގަ އެވެ. އަދި 2019ގައި ރާއްޖެއަށް ދަތުރުކުރި ފަތުރުވެރިންގެ އަދަދު 1.7 މިލިއަނަށް އަރައި، ގައުމީ އިގްތިސާދީ ދުވެލި 7.5 ޕަސެންޓްގައި ހިފެހެއްޓޭނެ ކަމަށް ހިސާބު ޖަހައިގެންނެވެ. އޭރު ގައުމީ އުފެއްދުންތެރިކަމުގެ ނިސްބަތުން ދައުލަތުގެ ދަރަނި ހުރީ 62 ޕަސެންޓްގަ އެވެ.

އަންނަ އަހަރުގެ ބަޖެޓުގެ ތަފްސީލު އަދި އަޅުގަނޑުމެންނާ ހަމައަށް ތިލަވާ ގޮތެއް ނުވެ އެވެ. އެހެންކަމުން ބަޖެޓުގެ ތަފްސީލުތަކާ މެދު އެއްޗެއް ބުނަން ނޭނގުނު ކަމަށް ވިޔަސް، 2021ގެ ބަޖެޓުގެ އަދަދަކީ 30 ބިލިއަން ރުފިޔާކަން ވަނީ އެނގިފައެވެ. އަދި މި އަހަރުގެ ބަޖެޓުން މަދުކުރެވުނު ކަމަށް މިވަނީ އެންމެ 2.5 ބިލިއަން ރުފިޔާ އެވެ. އަމިއްލަ ފައިމައްޗަށް ތެދުވުމަށްޓަކައި ދައުލަތުގެ ވުޒާރާތައް މަދުކޮށް، ކުންފުނިތައް މާޖްކޮށް، ސިޔާސީ މަގާމުތައް އުނިކޮށް، ހަރަދު ކުޑަ ސަރުކާރެއް ފަރުމާ ކުރުމުގެ ވިސްނުމެއް އަދިއެއް ނުފެނެ އެވެ.

ފިޗް ރޭޓިންގްސްގައި ރާއްޖޭގެ ދަރަޖަ ދަށް ކުރުމަކުން ހައިރާން ވާކަށް ނުޖެހެ އެވެ. އަޅުގަނޑު ކަންބޮޑުވަނީ މި ހާލާތުގައި ވެސް، ކުރީގައި ހިނގި މަގުން އަލުން ވެސް ހިނގައިފާނެ ކަމަށް ހީކުރެވޭތީ އެވެ.

އެޑިޓަރުގެ ނޯޓު

އާތިފަކީ މިފްކޯ އާއި ސަރުކާރުގެ ބައެއް އެހެން ކުންފުނިތަކުގެ އިސް މަގާމުތައް އަދާކުރެއްވި އަދި އިގުތިސާދީ އެކި މައުލޫއުތަކުގައި ލިއުއްވަމުން ގެންދަވާ ބޭފުޅެކެވެ. އޭނާ އަކީ އިނގިރޭސި ބަހުން ނެރޭ މޯލްޑިވްސް އިކޮނޮމިކް ރިވިއުގެ އެއް ބާނީ އެވެ. ދިވެހި އިގުތިސާދު ދިރާސާކުރައްވަން އޭނާ ހާއްސަ ސަމާލުކަމެއް ދެއްވަ އެވެ.