ރާއްޖެ އިން ބޭރުކުރަން އުޅުނު މިލިއަނަކަށް ވުރެ ގިނަ ރުފިޔާ ހިފަހައްޓައިފި

ރާއްޖެއިން ގަވައިދާ ހިލާފަށް ބޭރުކުރަން އުޅުނު މިލިއަނަކަށް ވުރެ ގިނަ ރުފިޔާ ކަސްޓަމްސް އިން އަތުލައިގެންފި އެވެ.

އެ އިދާރާ އިން ރޭ ބުނީ، މިދިޔަ ހުކުރު ދުވަހުގެ ހެނދުނު 7:30 ގައި މޯލްޑިވިއަންގެ ފްލައިޓެއްގައި ބަންގްލަދޭޝް އަށް ފުރަން ދިޔަ އެ ގައުމުގެ، އުމުރުން 34 އަހަރުގެ ފިރިހެނެއްގެ އަތުން ތަފާތު އެކި ގައުމުތަކުގެ ގިނަ އަދަދެއްގެ ފައިސާ ފެނިފައިވާ ކަމަށެވެ. އޭގެ ތެރޭގައި ޑޮލަރާއި ޔޫރޯ ހިމެނެ އެވެ.

އޭނާގެ އަތުން އަތުލައިގެން ފައިސާގެ އަދަދު ރުފިޔާ އިން ބަލާ ނަމަ 1.1 މިލިއަނަށް ވުރެ ގިނަ ކަމަށް ކަސްޓަމްސް އިން ބުނެ އެވެ. އެއީ އެ އިދާރާ އިން ޑިކްލެއާ ނުކޮށް ބޭރުކުރަން އުޅުނު ފައިސާތަކެއް ކަމަށް ކަސްޓަމްސް އިން ބުންޏެވެ.

ބަންގްލަދޭޝްގެ މީހާގެ ކޭސް އަށް ފަހު، އޭވިއޭޝަން ސެކިއުރިޓީ ކޮމާންޑުން މިއަދު ކުރި ޓްވީޓެއްގައި ބުނީ ދުބާއީ އަށް ދަތުކުރަން ދިޔަ ދިވެއްސެއްގެ އަތުން ގިނަ އަދަދެއްގެ ޔޫރޯ ފެނިފައިވާ ކަމަށެވެ. އެއީ ޑިކްލެއާ ނުކޮށް ހުރި ފައިސާ ކަމަށް ވެސް ޓްވީޓުގައި ބުންޏެވެ.

އެކަމަކު، ފަހުން އަތުލައިގަތް ފައިސާގެ އަދަދެއް އަަދި ސާފެއް ނުވެ އެވެ.

މަނީ ލޯންޑަރިން އަދި ޓެރަރިޒަމަށް ފައިނޭންސް ކުރުން ހުއްޓުވުމުގެ ގާނޫނުގެ ދަށުން، 10،000 އަށް ވުރެ ގިނަ ޑޮލަރު ނުވަތަ އެ އަށް ވާ ދިވެހި ފައިސާ ނުވަތަ އެހެން ގައުމެއްގެ ފައިސާއަކަށް ވިޔަސް ރާއްޖެ އިން އެތެރެކޮށް ބޭރުކުރާ ނަމަ ކަސްޓަމްސް އިން ޑިކްލެއާ ކުރަންޖެހެ އެވެ.