ވާރޭ ފެން ރައްކާކުރެވޭނެ ނިޒާމް ގާއިމްކޮށްފައި ވަނީ ގއ. އަތޮޅުގެ ކޮންޑޭ އާއި މާމެންދޫ އާއި ނިލަންދޫގެ އިތުރުން ގދ. އަތޮޅުގެ ހޯންޑެއްދޫ އާއި ނަޑެއްލާ އާއި ރަތަފަންދޫ އާއި ފިޔޯރީ އަދި ފަރެސްމާތޮޑާގައި.
ގދ. ހޯޑެއްދޫގައި ގާއިމްކުރި ވާރޭ ފެން ރައްކާކުރެވޭނެ ސިސްޓަމް އިފްތިތާހުކުރުމުގެ ރަސްމިއްޔާތުގައި އެންވަޔަރަމެންޓް މިނިސްޓަރު ޑރ. ހުސެއިން ރަޝީދު ހަސަން ވާހަކަދައްކަވަނީ -- ފޮޓޯ: އެންވަޔަރަމެންޓް މިނިސްޓްރީ
11 މާޗް 2021 - 21:47
2 comments
ގއ. އަދި ގދ. ގައި ހިމެނޭ އަށް ރަށެއްގައި ގާއިމުކުރި ވާރޭ ފެން ރައްކާކުރެވޭނެ ނިޒާމު، ފެނަކަ ކޯޕަރޭޝަނާ، އެންވަޔަރުމެންޓް މިނިސްޓްރީން ހަވާލުކޮށްފި އެވެ.
މިއީ ހޫނު މޫސުމުގައި ގިނަ ދުވަހު ވާރޭ ނުވެހުމުން ފެނުގެ ދަތިކަމަށް ދިމާވާތީ، އެ މައްސަލަ އަށް ހައްލެއް ހޯދަން ކުރި މަސައްކަތެކެވެ. މި މަޝްރޫއުގެ ބޮޑު ބަޔަކަށް ފަންޑުކުރީ ގްރީން ކްލައިމެޓް ފަންޑުންނެވެ. އެންވަޔަރުމެންޓް މިނިސްޓްރީ އާއި ޔޫއެންޑީޕީ ވެސް މި މަޝްރޫއުގެ ބަޔަކަށް ފަންޑު ކުރި އެވެ. މުޅި މަޝްރޫއަށް ޖުމްލަ 28 މިލިއަން ޑޮލަރު ހޭދަކޮށްފައި ވެ އެވެ.
ވާރޭ ފެން ހާވެސްޓުކޮށް، ރައްކާކުރެވޭނެ ނިޒާމު ގާއިމްކޮށްފައި ވަނީ ގއ. އަތޮޅުގެ ކޮނޑޭ އާއި މާމެންދު އާއި ނިލަންދޫގަ އެވެ. ގދ. އަތޮޅުގައި އެ ނިޒާމު ގާއިމުކުރީ ހޯނޑެއްދު އާއި ނަޑެއްލާ އާއި ރަތަފަންދު އާއި ފިޔޯރީގެ އިތުރުން ފަރެސްމާތޮޑާގަ އެވެ.
ދިވެހި ސަރުކާރުން ހުވަދުއަތޮޅުދެކުނުބުރީ (ނަޑެއްލާ) ގައި ޤާއިމުކޮށްފައިވާ ވާރޭފެނުގެ ނިޒާމުތައް @TeamFenaka އާ ހަވާލުކުރުމުގެ ރަސްމިއްޔާތުގައި މަޑަވެލި ދާއިރާގެ މަޖިލިސް މެމްބަރު @husnfirey ވާހަކަފުޅުދައްކަވަނީ @UNDPMaldives #GCF pic.twitter.com/Gc0uGPWTlY
— Ministry of Environment (@MoEnvmv) March 11, 2021
އެންވަޔަރަމެންޓް މިނިސްޓްރީން މިއަދު ކުރި ޓްވީޓެއް
މި ސިސްޓަމްތައް ހަވާލުކުރަން ބޭއްވި ރަސްމިއްޔާތުތަކުގައި އެންވަޔަރުމެންޓް މިނިސްޓަރު ޑރ. ހުސައިން ރަޝީދު ހަސަނާއި ޔޫއެންޑީޕީން ރާއްޖެ އަށް ކަނޑައަޅާފައިވާ ސަފީރު އަކީކޯ ފުޖީ އާއި އެ ރަށްރަށުގެ ކައުންސިލްތަކުންނާއި ފެނަކައިގެ އިސްވެރިން ބައިވެރިވަޑައިގަތެވެ.
މި މަޝްރޫއުގެ ދަށުން ރާއްޖޭގެ 25 ރަށެއްގައި މި ފަދަ ސިސްޓަމް ގާއިމްކުރަން ނިންމާފައި ވެ އެވެ. އެއިން ކޮންމެ ސިސްޓަމަކުން 150 ޓަނުގެ ފެން ރައްކާކުރެވޭނެ އެވެ. މި ސިސްޓަމްތައް ހަވާލުކުރަން ބޭއްވި ރަސްމިއްޔާތުގައި ޔޫއެންޑީޕީގެ މަންދޫބު އަކީކޯ ފުޖީ ވިދާޅުވީ މިދިޔަ އަހަރު ދުނިޔެއަށް ކުރިމަތިވި ކޮވިޑް-19ގެ ހާލަތާ އެކު ސާފު ބޯފެނުގެ މުހިއްމުކަން އެނގުނު ކަމަށެވެ.
"ލާމަރުކަޒީ ނިޒާމެއްގައި، މުޖުތަމައަށް ސާފު ފެނާއި ފެނުގެ ރައްކާތެރިކަން ކަށަވަރުކޮށްދިނުމަށްޓަކައި ކައުންސިލްތަކާއި ރައްޔިތުން ނަގަން ޖެހޭ ޒިންމާ ވަރަށް ބޮޑު،" އޭނާ ވިދާޅުވި އެވެ.
ވާރޭ ފެން ރައްކާކުރުމަކީ ދިވެހިންގެ ސަގާފަތުގައި ވެސް އޮތް ކަމެއް ކަން ފާހަގަކުރައްވަމުން ޒަމާނީ ޓެކްނޮލޮޖީއާ އެކު މި މަސައްކަތް ކުރިއެރުވޭތީ އުފާކުރައްވާ ކަމަށް ވެސް ވިދާޅުވި އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ބޭކާރު
12 March 2021
ތިއީ މިގައުމުގެ ރައްޔިތުން ބާރުވެރިވިޔަ ނުދޭން ހިންގާ ކަންކަން. ރައްޔިތުން ބާރުވެރިވާނީ އެއްފަސްވެގެން. އެކަން ވިޔަނުދޭނެ ކަލޭމެންނަށް ވާން އޮތިއްޔާ.
އިލާ
12 March 2021
ވަރަށް ރަގަޅު ކަމެއް ތިއީ. އިހުގައި ރައްޔިތުން އަމިއްލައަށްވެސް ކޮށް އުޅުނު ކަމެއް. އެކަމު ފަހުން ވިސްނުންތައް އެނބުރުނު ގޮތުން ރައްޔިތުން ކެއީމަ ތުންފުހެދޭންޖެހެނީވެސް ސަރުކާރުން ކަމަށް ބަޔަކު ވިސްނަދިނީތީ ތިކަން އަމިއްލައަށް މީހުން ކުރުން ހުއްޓާލީ.