ސައޫދީގައި ސިފައިންގެ ތިން މީހަކަށް މަރުގެ އަދަބު ދީފި

ދަން ޖައްސައި މެރުމަށް މަޅިތަކެއް ތައްޔާރުކޮށްފައި.

12 އެޕްރީލް 2021 - 12:15

ގައުމަށް ޣައްދާރުވުމުގެ ކުށް ސާބިތުވި ސިފައިންގެ ތިން މީހެއްގެ މައްޗަށް މަރުގެ ހުކުމް ތަންފީޒުކޮށްފައިވާ ކަމަށް ސައޫދީ އަރަބިއްޔާ އިން ބުނެފި އެވެ.

ނަމަވެސް ސިފައިންގެ މައްޗަށް މަރުގެ ހުކުމް އައި ސަބަބަކާ ބެހޭ އެއްވެސް ތަފްސީލެއް ސައޫދީން ހާމައެއް ނުކުރެ އެވެ.

ސައޫދީގެ ރަސްމީ މީޑިއާ އިން ބުނީ މަރާލި ސިފައިންގެ ތިން މީހުންނަކީ ވެސް ޑިފެންސް މިނިސްޓްރީގައި މަސައްކަތްކުރާ މީހުން ކަމަށެވެ. ނަމަވެސް އެ މީހުން ކުރި ކުށެއްގެ އެއްވެސް ވާހަކައެއް ހާމަކޮށްފައެއް ނުވެ އެވެ.

ސައޫދީން ބުނީ ތިން މީހުންގެ މައްޗަށް ވެސް ކުށް ސާބިތުވީ ކޯޓުގައި ކަމަށެވެ. އަދި މަރުގެ ހުކުމް ތަންފީޒުކުރީ ރަސްގެފާނުގެ ހުއްދަ އެކަމަށް ލިބުމުން ކަމަށް ވެސް ބުނެފައިވެ އެވެ.

ޔަމަންގައި އީރާންގެ މަދަދު ލިބޭ ހަނގުރާމަވެރިންނާ ދެކޮޅަށް ސައޫދީން އަންނަނީ އަސްކަރީ ވަރުގަދަ ހަމަލާތަކެއް ދެމުންނެވެ. އަދި އީރާނަކީ ސަރަހައްދުގައި އޮތް ސައޫދީގެ އެންމެ ބޮޑު ދުޝްމަނުގެ ގޮތުގައި ސައޫދީން ގަބޫލުކުރެ އެވެ.

އެމްނެސްޓީ އިންޓަނޭޝަނަލްގެ އެންމެ ފަހުގެ ހިސާބުތަކަށް ބަލާއިރު ސައޫދީ އަކީ 2019 ވަނަ އަހަރު ތިން ވަނަ އަށް އެންމެ ގިނަ މީހުންނަށް މަރުގެ ހުކުމް ތަންފީޒުކުރި ގައުމެވެ. އެއީ 184 މީހުންނެވެ. އެންމެ ގިނަ މީހުންނަށް މަރުގެ އަދަބު ދީފައިވަނީ ޗައިނާ އާއި އީރާނުގަ އެވެ.