ވިއެޓްނާމްގެ ލޮކްޑައުންގެ ސަބަބުން ކޮފީ ލިބުން ދަތިވަނީ

ވިއެޓްނާމްގެ ދަނޑިވެރިޔަކު ކޮފީ ދަނޑެއްގައި.

އަހުމަދު އަދްޝަން، މިހާރު

31 އޯގަސްޓް 2021 - 06:36

ކޮވިޑާ ހެދި ވިއެޓްނާމްގައި އަޅާފައިވާ ފިޔަވަޅުތަކާ ހެދި ދުނިޔޭގެ ކޮފީ ސަޕްލައި އަށް ބުރޫ އަރާފައިވާ ކަމަށް ރިޕޯޓްތައް ބުނެފި އެވެ.

ވިއެޓްނާމަކީ ކޮފީގެ އެންމެ މަގުބޫލު އެއް ވައްތަރު ކަމަށްވާ ރޮބަސްޓާ ކޮފީ އެންމެ ގިނައިން އުފައްދައި، ސަޕްލައިކުރާ ގައުމެވެ. މިއީ އިންސްޓަންޓް ކޮފީ އާއި އެސްޕްރެސޯ ކަހަލަ ކޮފީ ތައްޔާރުކުރަން ބޭނުންކުރާ ވައްތަރުގެ ކޮފީ އެވެ.

މީޑިއާތަކުން ބުނި ގޮތުގައި ވިއެޓްނާމުން މުދާ ބޭރުކުރާ އެ ގައުމުގެ މައި ހަބް ކަމަށްވާ ހޯ ޗިން މިން ސިޓީގެ ދަތުރުފަތުރު ކޮވިޑާ ހެދި ހުއްޓުމަކަށް އައިސްފައި އޮތުމުން އޮފީ އެކްސްޕޯޓްކުރެވޭނެ ގޮތެއް ނެތެވެ. މިއާ އެކު ކޮފީ ނުލިބުމުގެ މައްސަލަ ވަރަށް ގިނަ ގައުމުތަކަށް ދިމާވެފައިވެ އެވެ.

އަނެއްކޮޅުން ދަތުރުފަތުރަށް އަރާފައި އޮތް ބުރުލާ ހެދި ރޮބަސްޓާ ކޮފީގެ އަގަށް ވެސް މި އަހަރުގެ މިހާތަނަށް އައި އިރު 50 ޕަސެންޓްގެ ބޮޑުވުމެއް އައިސްފައިވެ އެވެ.

ވިއެޓްނާމްގެ ލޮކްޑައުންއާ ހެދި ދުނިޔޭގެ ކޮފީ ސަޕްލައި އަށް ބުރޫ އަރާފައިވާތީ އެ ގައުމުގެ ކޮފީ-ކޮކޯ އެސޯސިއޭޝަނާއި ވިޔަފާރިއާ ގުޅުން ހުރި އެހެން ގިނަ ޖަމިއްޔާތަކުން ވެސް ވަނީ ލޮކްޑައުން އަށް ލުއި ދޭން ގޮވާލައިފަ އެވެ. އަދި މިދިޔަ ހަފުތާގައި ޓްރާންސްޕޯޓް މިނިސްޓަރު ވަނީ ހޯ ޗިން މިން ސިޓީ ހިމެނޭ ވިއެޓްނާމްގެ ދެކުނު އިރުމަތީ ސަރަހައްދުގައި ކޮވިޑާ ހެދި އަޅާފައިވާ ފިޔަވަޅުތަކަށް ލުއި ދިނުމަށް ކަމާބެހޭ އިދާރާތަކުގައި އެދިވަޑައިގެންފަ އެވެ.