ދިވެއްސެއްގެ ގައިގައި "ބަންގާޅީ" އަކު ޖެހުމުން ބައެއް ދިވެހިންގެ ލޭހޫނުވެއްޖެ. ގިނަ އަދަދެއްގެ ބަންގްލަދޭޝްްގެ މީހުން ވެސް އުޅޭ ހިސާބަކަށް ވާތީ ބަންގްލަދޭޝްގެ މީހުން ވެސް އޭގެ ތެރެއަށް ވަދެގެންފި
ހީނާމާގޭ ޕާކިން ޒޯންގައި ފުލުހުން ރޭ ހަރަކާތްތެރިވަނީ
05 ނޮވެމްބަރ 2021 - 14:24
ފެށެނީ ކުޑަކުޑަ ކަމަކުންނެވެ. އެކަމަކު ފަހުން އެކަން ވަރަށް ބޮޑުވެގެން ދެ އެވެ. އޭގެ ތެރެއިން ބައެއް ކަންކަން، ފަހުން ގައުމީ މަސްލަހަތާ ވެސް ގުޅިގެން ދެ އެވެ؛ މިއީ އޭގެ ތެރެއިން އެއް ކަންތަކެވެ.
މަޖީދީމަގު ހީނާމާގޭ ޕާކިން ސަރަހައްދުގައި ހުންނަ މަޝްހޫރު ދެބުރި މިސްކިތް ކައިރީގައި ރޭ ދެ މީހަކު ތަޅައިގަނެގެން މީހުން އެއްވި އެވެ. އޭގެ ތެރެއިން އެކަކީ ރާއްޖޭގައި އުޅޭ ބަންގްލަދޭޝްގެ ލޭބަރެކެވެ. އަނެކަކީ، މާލެ ތެރެއިން އާންމުކޮށް ފެންނަ، ފަހަތުން ދަބަހެއް އަޅުވައިގެން އުޅޭ ޒުވާނުންގެ ތެރެއިން އެކަކެވެ.
ބަންގްލަދޭޝްގެ މަސައްކަތު މީހާ ރޭ މަޣްރިބު ނަމާދުން ފޭބިއިރު އޭނާގެ ފައިވާން ވަގަށް ނެގީ އެވެ. ދިވެހި ޒުވާނާގެ މައްޗަށް އެ ތުހުމަތު ދިޔައީ އެވެ. އޭނާ ހިފަހައްޓައި، ބަންގްލަދޭޝްގެ ވަރަށް ގިނަ ބަޔަކު އުޅޭ ހީނާމާގޭ ޕާކިން ޒޯނު ތެރެއަށް ވެއްދީ އެވެ. އެތަނުން އެއް ބަންގްލަދޭޝް މީހާ "ކަލޭ ކޮންމެ ރެއަކު ފައިވާން ވަގަށް ނަގަނީ" އޭ ކިޔައިފައި އޭނާގެ ބުރަކަށީގައި ޖެހި އެވެ. ފިރިހެން މީހާ ތަންކޮޅަށް ދުރަށް ޖެހިލައިފައި ފޯނުން ކޮންމެވެސް މީހަކަށް ގުޅި އެވެ. ކުޑަ ވަގުތުކޮޅެއްގެ ތެރޭގައި އެތަނަށް "އޭނާގެ" އެހެން ތިން މީހަކު އައެވެ.
މައްސަލަ ބޮޑުވެ އެތަނަށް މީހުން އެއްވެއްޖެ އެވެ. ވީކިހިނެއްތޯ އަހަން ފަށައިފި އެވެ.
"މިހިރަ ބަންގާޅީ ގޮލާ މަގޭ ގައިގައި ލެޑީ،" ދިވެހި ޒުވާނާ ބުންޏެވެ.
އޭރު އޭނާގެ ވަށައިގެން ދިވެހިންތައް އެއްވެފައި އޮތެވެ. ދިވެއްސެއްގެ ގައިގައި "ބަންގާޅީ" އަކު ޖެހުމުން ބައެއް ދިވެހިންގެ ލޭހޫނުވެއްޖެ އެވެ. ގިނަ އަދަދެއްގެ ބަންގްލަދޭޝްްގެ މީހުން ވެސް އުޅޭ ހިސާބަކަށް ވާތީ ބަންގްލަދޭޝްގެ މީހުން ވެސް އޭގެ ތެރެއަށް ވަދެގެންފި އެވެ.
"އަހަރެމެން ކިތަންމެ ކަމެއް ކުރިޔަކަސް ކަލޭމެންނަކަށް އަހަރެމެންގެ ގަޔަކު އަތެއް ނުލެވޭނެ. ހަނދާން ކުރާތި،" އެތަނުގައި ހޫނުވެފައި ހުރި ދިވެއްސަކު އޭނާގެ ޝަހާދަތް އިނގިލި ބަންގްލަދޭޝްގެ މީހެއްގެ ލޮލާ ކައިރިކޮށްލަމުން އިންޒާރު ދިނެވެ.
އެ ޒުވާބުގަނޑު ހޫނުވެގެން ދިޔައިރު، ދިވެހި ޒުވާނާގެ ގައިގައި ޖެހި ކަމަށް ބުނާ ބަންގްލަދޭޝްގެ މީހާ ހުރީ ދިވެހިންގެ މެދުގައި ތާށިވެފަ އެވެ. އެ ވަގުތު ސައިކަލެއްގައި ދިޔަ ހަތަރު ވަރަކަށް ޒުވާނުން ކައިރިކޮށްލައިފައި "ކިހިނެއްހޭ ވެގެން މި އުޅެނީ" އަހައިފައި ސައިކަލުން ފައިބައިފި އެވެ. އަދި އޭގެ ތެރެއިން އެކަކު މަޑުމަޑުން ހިނގާފައި ގޮސް، ވަށައިގެން ތިބި މީހުން ބޭރުގައި ހުރެ އަތް ފޮޅާލައިފައި ބަންގްލަދޭޝް މީހާގެ މޫނުމަތީގައި ގޮށްމުށުން ޖަހައިފި އެވެ.
"ދިވެއްސެއްގެ ގައިގައި ޖެހީމަ އޭގެ ބަދަލުގައި މި ޖެހީ،" އޭނާ އެހެން ބުނެފައި ސައިކަލްގައި ނައްޓާލައިފި އެވެ.
ނިދާނެ ތަނެއް ވެސް ނެތް ބަޔަކު އާންމު ތަނެއްގައި ނިދަނީ: މާލޭގައި ބޮޑުވެފައިވާ މައްސަލައެއް -- ފައިލް ފޮޓޯ: މިހާރު
މައްސަލައަކީ ފައިވާން ވަގަށް ނެގުމެވެ. އެ މައުލޫއު އޮތީ އޮތްތާނގަ އެވެ. މިހާރު މައްސަލަ ހޫނުވެގެން މިއުޅެނީ ދިވެއްސެއްގެ ގައިގައި ބަންގްލަދޭޝްގެ މީހަކު ޖަހައިގެންނެވެ. ފަހުން އެތަނަށް ދިޔަ މީހަކު ބަންގްލަދޭޝްގެ މީހާގެ މޫނުމަތީގައި ވީއްލާލުމުން އެތާނގައި ތިބި ބަންގްލަދޭޝްގެ ބައެއް މީހުން ލޭ ކެކިގަތެވެ. އަވަގުރާނަ ގޮވަން ފެށި އެވެ.
"ކަލޭމެން ކުރީ ދުވަހަކު ވެސް އަހަރެމެންގެ މީހެއްގެ ވޮލެޓް ވަގަށް ނަގަނީ. އަނިޔާކޮށްފައި އަތުލީ ވެސް،" ބަންގްލަދޭޝްގެ މީހަކު ބުންޏެވެ.
އޭގެ ޖަވާބުގައި އެތާނގައި ހުރި އެހެން މީހަކު، "ހެވޭ... އެހެންވިޔަސް ކަލޭމެންނަކަށް މި ގައުމަކު އަހަރެމެންނަކަށް އަނިޔާއެއް ނުކުރެވޭނެއޭ،" ބުންޏެވެ.
އެއް ބަޔަކު އަނެއް ބައެއްގެ ގަޔަށް އަރައިފާނެތީ، އެ މީހުން ދުރުކުރަން ވެސް ބައެއް މީހުން މަސައްކަތް ކުރި އެވެ. މަގުމަތިން ދިޔަ ފުލުހަކު އެތަނަށް ދިޔަ އެވެ. އިރުކޮޅަކުން އެހެން ތިން ފުލުހަކު ވެސް އެތަނަށް ގޮސް، އެކަން މައިތިރިކޮށްފި އެވެ. އޭރު ފައިވާން ވަގަށް ނެގި ކަމަށް ބުނާ ޒުވާނާ ފިލައިފި އެވެ. ފުލުހުން ސުވާލުކުރީ އަނިޔާ ލިބުނު ބަންގްލަދޭޝްގެ މީހާއާ އެވެ.
"ދިވެއްސަކު ވިޔަސް ޖަހަންވީމަ ޖަހަންވީ. ނުޖަހާ ގޮތަކަށް ނޫނޭ އެ އުޅެނީ. މިތާނގައި ތިބޭ ބަންގްލަދޭޝްގެ މީހުންނަށް އެ މީހުން ހާދަ ދުއްތުރާއެއް ކޮންމެ ދުވަހަކު ކޮންމެ ދުވަހަކު އެބަ ކުރެއޭ،" ދުރުގައި ސައިކަލެއްގައި އިށީނދެލައިގެން އިން މީހަކު ބުންޏެވެ.
"މި މިސްކިތުން ކޮންމެ ދުވަހަކު ވެސް ފައިވާން ގެއްލޭ އަދަދެއް ނޭނގެ. އެ ގްރޫޕުގެ މީހުން އެ ވަގަށް ނަގައިގެން ގެންގޮސް ދަބަހަށް އަޅައިގެން ވިއްކަނީ."
ބައެއް މައްސަލަތައް އަހަރެމެންނަށް ކަމަކަށް ނުވިޔަސް، ބަންގްލަދޭޝްގެ ބައެއް މީހުން ބުނާ ގޮތުން، އެއީ ކުޑަކަމެއް ނޫނެވެ.
"ކޮންމެ ދުވަހަކު ފައިވާން ނަގާ މީހެއް އެއީ. އަހަރެމެންނަށް އޭނަ އެނގެނީ،" މައްސަލަ ފިނިވި ފަހުން އެތާނގައި ހުރި ބަންގްލަދޭޝްގެ މީހަކު ބުންޏެވެ.
"އަބަދު ފައިވާން ނުގަނެވެނީ ދޯ. މިކަން ނުވެސް ހުއްޓެނީ..."
ހަޅުތާލު ކުރި ބިދޭސީންތަކެއް ހައްޔަރުކޮށްފައި: ރާއްޖޭގައި ގިނަ އަދަދެއްގެ ބިދޭސީން އުޅޭ -- ފައިލް ފޮޓޯ: މިހާރު
ރާއްޖޭގައި ލައްކައެއްހާ ބިދޭސީން، ހާއްސަކޮށް ލޭބާ ކެޓަގަރީގެ އެތައް ބައިވަރު ބިދޭސީން އުޅޭއިރު އެ މީހުންގެ ވެސް ގުރޫޕުތައް އޮވެ އެވެ. އެކި ސަރަހައްދުން ބޮޑެތި ގުރޫޕުތައް އެބަ ފެނެ އެވެ. ބިދޭސީންގެ އަދަދު ފަތުއަޑު ކިޔާފައި މިދަނީ މައްޗަށެވެ. ގަަވައިދާހިލާފަށް އުޅޭ އެތައް ބައިވަރު ބިދޭސީންގެ ތެރޭގައި ކޮންމެ ފަދަ ކަމެއް ކުރަން ވެސް ޖެހިލުން ނުވާ ވަރުގެ މީހުން އެބަތިއްބެވެ. މީގެ ކުރިން ބަންގްލަދޭޝްގެ މަސައްކަތު މީހުން ތޫނު ހަތިޔާރާ އެކު ފުލުހުންނާ ވެސް ކުރިމަތިލައިފި އެވެ. ސަބަބަކީ، ސަރުކާރުގެ ސިޔާސަތު އޮތް ގޮތުން އެ މީހުން ކޮންމެ ކުށެއް ކުރިޔަސް ބޮޑުވަރަކަށް ކުރެވޭ ކަމަކީ ޑީޕޯޓްކޮށްލުން އެކަނި ކަމަށް ވާތީ އެވެ.
އަނެއްކޮޅުން މަސްތުވާތަކެތީގެ ވަބާގައި ޖެހި، އުޅޭނެ ގޮތެއް ނެތި އެތައް ބައިވަރު ޒުވާނުން މާލޭގެ މަގުގައި ލާހޫރެނީ އެވެ. އެ މީހުންގެ ފަރާތުން ކުރާ ވައްކަންތައް އިތުރުވަނީ އެވެ. ގޭގެ އަށް ވަދެ ވައްކަންކޮށްގެން އެ މީހުން ފަހާ އެހެން މީހުން މަގުތަކުގައި ދުވާތަން މިހާރު އެއީ އާންމު މަންޒަރެކެވެ.
ދަބަސް އެޅުވި ޒުވާނުންގެ ފަރާތުން ދިމާވާ މައްސަލަތައް މަދެއް ނޫނެވެ. ވައްކަންތައް އޮތީ އިންތިހާގަ އެވެ. އަޅާލާނެ ބަޔަކު ނެތެވެ. އަނެއްކާ ވެސް ހަމަ ބުނަން އޮތީ މިހެންނެވެ؛ ސަރުކާރުގެ ސިޔާސަތުތައް އޮތް ގޮތުން މި މީހުންނަށް ދެވޭ އަދަބެއް ވެސް ނޯވެ އެވެ.
ކަންކަން ފެށެނީ އާދައިގެ ގޮތަކަށެވެ. މިއީ ވިސްނަން ޖެހިފައިވާ ގައުމީ ބޮޑު މައްސަލައެކެވެ. ކަންކަން ބޮޑުވެ ހައްލު ނުވާ ހިސާބަށް ދިއުމުގެ ކުރިން މައްސަލަ ހައްލުކުރަން ޖެހެ އެވެ. މާދަމާ ފައިވާނެއް ވަގަށް ނަގައިގެން ދެން ނުކުންނާނީ އެއްކޮޅުން ނުކުންނާނީ އެންމެ ބަންގްލަދޭޝް މީހެއް ނޫނެވެ. އަނެއްކޮޅުން ނުކުންނާނީ އެންމެ ދިވެއްސެއް ވެސް ނޫނެވެ.
Copyright © 2024 Mihaaru · Terms and Conditions · Privacy Policy
ކޮމެންޓްތައް
އޯ ވަޒަން
07 November 2021
މުސްލިމަކީ އަނެއް މުސްލިމެއްގެ އަޚެއް. ދީނުގެ މައްޗަށް ޤައުމު އިހެއް ނުކުރެވޭނެ. ދީން ނެތި ޤައުމެއް ނޯންނާނެ. ބަންގާޅު ބޭފުޅަކަށްވެގެން ހާއިބުރީއަކަށްވެގެން ނުނީ ކުއްޔަށް އުޅޭ މީހަކަށްވެގެން އަތުލެވިގެންވާނެ ހައްގެއް ނޯންނާނެ. ނުހައްޤުން އަނިޔާ ލިބޭ މީހުންގެ ދުޢާ އިޖާބަކުރައްވާނެ. ހާދަ ދެރަޔޭ... މިސްރާބު ސީދާ ކުރެވޭތޯ ހިތްވަރާއެކު މަސައްކަތްކުރަންޖެހޭ އެބަ.
ކުލްސޫމް.
07 November 2021
ނޫނޭ ގޯސްވާހަކަ ނުދައްކާ. މުސްލިމުން އަބަދުވެސް ތިބެންވާނީ ވަކި ހަމަތަކެއްގެ މަތީގައި. އިމިޤްރޭޝަން ޤާނޫނާއި ޙިލާފަށް ވަގަށް އެތެރެވެ ހުރި މީހަކު ފޮރުވައި އޭނާއާއި ބައިވެރިވުމަކީ މުސްލިމް ރައްޔިތަކަށް ހުއްދަ ކަމެއްކަމަށް ނުބުނެވޭނެ. މިއީ އަދި ބަންގްލަދޭޝް އަކީވެސް މުސްލިމުންނަށް ރައްކާތެރި ތަނެއް. ތިދައްކަނީ ފީކަޅާ ވާހަކަ.
ހުސެން
06 November 2021
ފައިވާން ވަގަށްނެގިޔަސް ބަންގާޅީންނަކަށް ދިވެހިންގެ ގަޔަށް އަތްލެވިގެންނުވާނެ، ޕާޓޭއެއްގެ ގައިގާވެސް ޖަހައިގެންނުވާނެ، ގިނަ ބަންގާޅިންނަކީ މިތަނުގައި ގަވައިދާހިލާފަށް އުޅޭބައެއް، ފައިވާ ވަގަށްނުނެގޭގޮތަށް ގެންގުޅުނީމަ ނިމުނީނުން، ވަގުންވައްކަންކުރާނެދޯ! މިބުނަނީކީ ވައްކަންކުރުން އޯކޭއެކޭނޫން، ވައްކަންކުރުމަކީ އަލަކަށްވާކަމެއްނޫން، ދިވެހިރާއްޖޭގައި އެކަނިވާކަމެއްވެސްނޫން، ޖަހައިގެންނުވަނެ
ފަހުދު
06 November 2021
ވަގައް އުޅޭ ބަންގާޅީ އެއްގެ ފައިވާން ދިވެއްސަކު ވަގައް ނަގައިފި
ނަންނުގަތި112
06 November 2021
ބަންގާޅު މީހާއަށް ދިވެހިމީހާ ގައިގަ އެއް ނުޖެހޭނެ. އެއީ ކުށެއް. ވައްކަން ކުރިކަން ޔަޤީންވަންޏާ ހިފަހައްޓާފަ ފުލުހުންނާ ހަވާލުކުރަން ޖެހޭނީ. ތިހެން ވަގަށް އުޅޭ ކިތައް ބިދޭސީން މި ޤައުމުގަ އެބަތިބި..... ކާކު އެކަމާ އަޅާލަނީ؟
އިއްބެބެ
06 November 2021
ހައްލަކީ އުމަރު މިޤައުމުގެ ވެރިއަކަށް ގެނައުން. އެނޫން މީހަކަށް މީން އެއްވެސް ކަމެއް ހައްލެއް ނުވާނެ. އެންމެން އުމަރަށް މިފަހަރު ވޯޓްދީ.
77171891
06 November 2021
ތިކަމާ ވިސްނަން މަޖުބޫރު މިހާރު.
ސުމަން މިއާ
06 November 2021
މިމައްސަލަތައް ހައްލުކުރާނެ އުރައްޕެއް މިގައުމުގަނެތް.ބޮޑެތި ކުށްވެރިން ކޯޓްތަކުން ތަހުގީގު މަރުހަލާގައި ދޫވެގެންދަނީ އުންސަރު ނުވަތަ ކޮންމެވެސް އެހެންކަމެއް ވެގެން.ގައުމުގެ ވެރިން ގައުމުގަ ހަރެއް ނުލާ.ބަޔެއްމީހުން މިގައުމުގެ ބޮޑެތި މަގާމުގެ ބޮޑެތި މުސާރަ ނަގައިގެން ބޭރު ވަޒީފާ ތަކުގަ.ގައުމު އިނދަޖެހި އޮޔާދަނީ.ވިސްނާކަށް ނުވޭތޯ؟
ޙިނި
06 November 2021
ގައުމައް އިހުލާސްތެރި ސިޔާސީ މީހަކު އަދި ނުފެނޭ، މުޅިންވެސް ފައިސާފަހަތުން ދުވާ މީހުން މިއުޅެނީ. މަޖުލީހައް ވަދެތިބެ 10-12 ރިސޯޓު ހޯދި މީހުނެއް ވެސް މަދެއް ނޫން، ގައުމުދޫކޮއް ދިޔަ މީހުންގެ ނައްުން އެޔާ ޕޯޓު ނަން ބަލަލުކޮއް އެވެސް ގައުމިއްޔަތެއް ނެތް މިގައުމަކު.
ޟަސްތަ
06 November 2021
ބަންގާޅުން ވިސާނެތި ރާއްޖޭގައި އުޅެގެންނުވާނެ. ބޭރުކުރޭ. އަސްލު މައްސަލަޔަކީ ސަރުކާރުތަކުގެ ދޯހަޅިކަން
އިބްރާހީމ
06 November 2021
އެ ބަންގާޅި މީހާ ކަންކުރީ ހަމަ ރަނގަޅަށް. މިސްކިތުން ފަައިވާން ވަގަށް ނަގާ މީހުންގެ އުނދަގޫ ވަރަށް ބޮޑު ވެއްޖެ.
އެބްރަހަަމް
07 November 2021
އިބްރާހީމ ގެ ނަމުގައި ކޮމެންޓްކޮށްފައި މިއޮތީ ބަންގާޅީން އަތުން ނާޖާއިޒްފައިދާ ނަގައި ކައިބޮއި އުޅޭ މީހެއް. ޢެހެންނޫންނަމަ ދިވެއްސަކަސް ބަންގާޅީޔަކަސް އިންސާނެއްގެ ގައިގައި ޖަހާކަން ހިތްވަރެއް ނުދިނީސް. ފަހަރެއްގައި ވެދާނެ ބަންގާޅީޔަކާ ހިތާވެގެން އުޅޭ މީހެއްކަމަށްވެސް. އޭގެ ލައްކަ ގިނަބަޔަކު ދިވެހި ފިރިހެނުންގެ ތެރޭގަައިވެސް އުޅޭ.
އިންސާނިއްޔަތު
06 November 2021
ވަރަށް ދެރަ ކަމެއް. ދިވެއްސެއްތޯ ބަންގާޅިއެއްތޯ އެއް ނޫން ބަލަންވީ. އަނިޔާވެރިޔާ އަކީ ކާކުތޯ އަދި އަނިޔާ ލިބުނު ފަރާތަކީ ކާކުތޯ. މިއޮށްފަދަ ތަހުޒީބީ ޒަމާނުގައިވެސް ނަސްލީ ތަފާތުކުރުންތަކާ ދުރަށް ނުދެވިގެން މި އުޅެނީ.
ޤާނޫނިއްޔަތު.
06 November 2021
އިންސާނީއްޔަތުގެ ވާހަކަ ދައްކާއިރު އިންސާނުންގެ ސަލާމަތަށްޓަކާ ޤައުމުތަކުން ހަދާފައިވާ ޤާނޫނުގެ ވާހަކަ ވެސް ދައްކަބަލަ. ޤާނޫނާއި ޙިލާފަށް އެއްޤައުމުން އަނެއް ޤައުމަށް ވަގަށް އެތެރެވެ ތިބުމަކީވެސް އިންސާނީއްޔަތާއި ޙިލާފު އަމަލެއް.
Coronavirus
06 November 2021
ތިކަމުން ފެންނަނީ ދިވެހިންގެ ޖާހިލު ކަމާއި ނާތަހުޒީބު ކަން. ތިއީ އެހެން ބަޔަކު ކުރި ކަމެއް ނަމަ ދިވެހިން ބުނާނެ ބަންގުލާދޭޝް މުސްލިމު ނިކަމެތިންނަ ކުރާ އަނިޔާ ހުއްޓާލާށޭ. އަހަރެން މުޅި މިދުނިޔެއިންވެސް ނުދެކެން ދިވެހިން ހާ ގޮތެއް ފޮތެއް ނެއް ގަމާރު ޖާހިލު ބަޔެއް.
ޕެންޑެމިކް.
06 November 2021
ކޮރޯނާ ވައިރެސް އަށް ތިހިރީ ބަންގާޅު ވައިރަސްވެސް ޖެހިފަ. ބަލަ ކަލޭ ދިވެހިން ގޯސްކުރާއިރު ކަލެއަކަށްނޭގޭތަ ތިޔަބުނާބަންގާޅިންނަކީ ރާއްޖޭގެ އިމިޤްރޭޝަން ޤާނޫނާއި ހިލާފަށް ތިބިބައެއްކަން.
ޖުހާނާ
06 November 2021
ތިޔައީ ހަމަ ރަނގަޅު ވާހަކައެއް. ދިވެހިންގެ ގޮތެއްފޮތެއް ނެތްކަމުން، ގޮތެއްފޮތެއް ނެތް ބަޔަކަށް ގައުމުގެ ވެރިކަންވެސް ދީގެން އެ އުޅެނީ.
ގފހދ
05 November 2021
ކެފޭ އެއްގެ ވެއިޓަރު ކޮފީތަށި ހިފައިގެން އައީމާ އަހަރެން ބުނީމެވެ. ބަގްލާމީހުން މިހާރު ދިވެހިން މަރަނީއެވެ. އަހަރެމެން ދިވެހިން ނުކުމެ ބަގްލާ މީހުންގެ ކަންތަށް ނިއްމާނަމެވެ. އެސޮރު ވަގުތުން ޖަވާބު ދިނެވެ. ސޮރީ ބޭބެ. މިހާރު ތިކަން ނުވަނީ. ބަގްލާމީހުން މާގަދަވަނީ. ގިނަވަނީ. އެކަތި ދިވެހި މީހާ ކައިރީގައި ޑުއިޑާ ބަގްލާ މީހާ އަންނާނެ ފައިޓް ކުރަން.ގައުމީ ސަލާމަތަށްޓަކައި ވިސްނާލަން ވީ ކަމެއް ނޫންތޯ މީ.
ބޯގޯސް ދިވެހިން
06 November 2021
ތިއަށްވުރެ ދެރަ ކަމެއްތާ ކޮފީއެއް ބޯންގޮސް ކަމާ ނުބެހޭ މީހަކާ ދިމާއަށް ކަލޭމެން ދުވަސް ދުއްވާލާނަމޭ ކިޔާ އިންޒާރު ދިނުން. އަވަދި ވެދާނެ މީހަކު.