ހަނީމޫން ދަތުރުން ރާއްޖެ ޕްރޮމޯޓްކުރާ ދެމަފިރިން

އެރީނާ އާއި ޑެވޯން ހަނީމޫނަށް ރާއްޖެ އައި އިރު، އެނގެނީ ރިސޯޓްތަކުން ފެންނަ ރީތި ކަމެވެ. ރިސޯޓުން ބޭރަށް ދިވެހިން ދިރިއުޅޭ ރަށްތަކަށް ދެވޭ ކަމެއް ނޭނގެ އެވެ. އެހެންވެ، އެ މީހުންގެ ހަނީމޫން ވީ ރާއްޖެއަށް އަންނަ ގިނަ ޓޫރިސްޓުންނެކޭ އެއްގޮތަށް ރިސޯޓެއްގައި ހޭދަކުރި އަގު ބޮޑު ދަތުރަކަށެވެ.

އެކަމަކު "ޑްރީމް ޑެސްޓިނޭޝަން" އަށް ކުރި ފުރަތަމަ ދަތުރުގައި ދެމަފިރިން ކުރި ކަމަކީ ރާއްޖޭގެ ޓޫރިޒަމާ ގުޅޭ މައުލޫމާތު އެއްކުރުމެވެ. އެ މީހުން މިހާރު ކުރަމުން އަންނަ މަސައްކަތަކީ ރާއްޖެ އަންނަން ބޭނުންވާ މީހުންނަށް، އެ މީހުން ހެދި ގޯސްތައް ނުހަދައި އަގު ހެޔޮކޮށް އުޅެވޭނެ ގޮތްތައް ކިޔައިދިނުމެވެ.

މިދިޔަ ތިން މަސް ތެރޭގައި ވ. އަތޮޅާއި އއ. އަތޮޅާއި އދ.ގެ އިތުރުން ކ. އަތޮޅާއި ބ. އަތޮޅުގެ މީހުންގެ ދިރިއުޅޭ 30 އަށް ވުރެ ގިނަ ރަށުގައި އެ މީހުން ޗުއްޓީ ހޭދަކޮށްފި އެވެ. "ލިވިން ދަ ގްލޯބް" ގެ ނަމުގައި ވެބްސައިޓަކާއި ޔޫޓިއުބް ޗެނަލެއްގެ އިތުރުން ޓިކްޓޮކާއި އިންސްޓަގްރާމުގައި ވެސް ދަތުރުގެ ތަޖުރިބާ އަންނަނީ ހިއްސާކުރަމުންނެވެ.

މި ދެމަފިރިން "މިހާރު" އަށް ކިޔައިދިން ގޮތުގައި ރާއްޖެއަކީ އެ މީހުންގެ "ޑްރީމް ޑެސްޓިނޭޝަން" އެވެ. އެހެންވެ ދެ މީހުންގެ ހުރިހާ ސޭވިންއެއް ހޭދަ ކުރީ ރާއްޖޭގައި ކައިވެނިކުރުމާއި ހަނީމޫނަށް އައުމަށެވެ.

"އަހަރެމެން މިދިޔަ އަހަރު ރާއްޖެ އައީ ފުރަތަމަ. ރިސޯޓެއްގައި އަހަރެމެން ކައިވެނިކުރީ. އަހަރެމެން ހިތަށް އެރީ މިއީ އަހަރެމެން ރާއްޖެއަށް ކުރާނެ ފުރަތަމަ އަދި ފަހު ދަތުރޭ. ޑްރީމް ޑެސްޓިނޭޝަން ވީމަ ވަރަށް ފައިސާ އެއްކޮށްގެން ހަނީމޫނާއި ކައިވެންޏަށް އައީ،" އެރީނާ ކިޔައިދޭން ފެށި އެވެ.

ރާއްޖެއާ ބެހޭ ގިނަ ކަންކަން އެ ދަތުރުގައި ދެމަފިރިންނަށް އެނގުނެވެ. ރަށްރަށުގައި ވެސް ޓޫރިސްޓުންނަށް ޗުއްޓީ ހޭދަކުރެވޭ ކަމާއި އެ ތަންތަނުގައި ވެސް ގެސްޓްހައުސް އާއި ރެސްޓޯރަންޓު ހުންނަކަން މި ދެމަފިރިންނަށް އެނގުނީ ހަމަ އެ ރިސޯޓުގައި ޗުއްޓީ ހޭދަކުރަމުން އައި އެހެން ބައެއްގެ ފަރާތުންނެވެ.

"ރިސޯޓުގައި އެހެން އުޅުމުގެ ތެރޭގައި ގެސްޓުންނާ ވެސް ވާހަކަ ދެއްކީމަ އެ މީހުން ބުނީ މިއައީ ލޯކަލް އައިލެންޑަކުންނޭ ކައިރީގައި އޮތް. ދެން އަހަރެމެންނަށް ފުރަތަމަ ވެސް ސުވާލުކުރެވުނީ އެތަނުގައި ހޮޓެލާއި ރެސްޓޯރަންޓު ހުރޭތޯ،" ހިނިގަނޑެއް ޖަހާލާފައި އޭނާ ބުންޏެވެ.

އެހެންވެ، އެ ދަތުރުގައި އެ މީހުން އެންމެ ފުރަތަމަ ދިޔައީ ގެސްޓްހައުސްތައް ވެސް އޮންނަ އަދި ގުދުރަތީ ރީތި ބީޗެއް ލިބިފައިވާ އދ. ދިގުރަށަށެވެ.

"ރިސޯޓަށް ވުރެ އެތައް ގުނައެެއް އަގު ހެޔޮ. އަހަރެމެން ޝޮކްވި އަސްލުގައި. ރާއްޖެ އެހާ އަގު ހެޔޮކަމާއި އެ ތަންތަން ވެސް އެހާ ރީތިކަން އެނގުނީ އެހެން،" އޭނާ ބުންޏެވެ.

އޭނާ ބުނީ ގެސްޓްހައުސްތަކުގައި ހުރުމަށް ރެއަަކަށް ހޭދަވަނީ 50-150 އެއްހާ ޑޮލަރު ކަމަށެވެ. އަދި ދަތުރުގައި ދެ މީހުންގެ ކެއުމަށް ވެސް ދުވާލަކު ހޭދަވަނީ 50 އެއްހާ ޑޮލަރު ކަމަށް އޭނާ ބުންޏެވެ. އެއީ، ރާއްޖޭގެ ރިސޯޓުތަކާ އަޅާ ބަލާއިރު ވަރަށް ކުޑަ ހޭދައެކެވެ.

އޭނާ ބުނި ގޮތުގައި ގެސްޓްހައުސް ވެރިންނަށް ސީދާ ގުޅައިގެން އެތަން ބުކްކުރުމަކީ ވެސް އަގުހެޔޮކޮށް ކުރެވޭނެ ކަމެކެވެ. އަދި ގެސްޓްހައުސް ވެރިންނާ އެކު އެ މީހުން ހަދާފައިވާ ޓްރެވެލް ގައިޑުގައި ވެސް ޑިސްކައުންޓާއި އެޖެންޓުންގެ ރޭޓުތައް ބަޔާންކުރާ ކަމަށާއި އޭގެ ސަބަބުން ޓޫރިސްޓުން އަތުން ބޮޑު ހޭދައެއް ކުރުމުން ސަލާމަތްވާނެ ކަމަށް އެރީނާ ބުންޏެވެ.

"ބައެއް ރަށްރަށް ހުރޭ 150 ޑޮލަރަށް ރެއަކަށް. އެގޮތަށް ހުރިއްޔާ އަހަރެމެން ދެން ދާ ރަށެއްގައި ހުންނަނީ 50 ޑޮލަރަށް ދޭ ތަނެއްގައި. އެކަހަލަ ގޮތަކަށް ހަމަޖައްސާނީ،"

ބަޖެޓުކޮށް ދަތުރުކުރުމުގެ ބޭނުމުގައި އެ މީހުން އެއް ރަށުން އަނެއް ރަށަށް ދިޔައީ ފެރީގަ އެވެ.

"އަހަންނަށް ފެރީ ދަތުރުކުރާ ގޮތް އެނގެން ވެސް އެތައް ހަފުތާއެއް ނެގި. ފެރީ ރައުންޑު އޮންނަ ގޮތާއި ޝެޑިއުލް ބަލައިގެން ވެސް އެނގެން އުނދަގޫވި. ބައެއް ދުވަސްތަކުގައި ކެންސަލްވާ ކަމެއް ނޭނގެ. ބަނދަރުގައި ތިއްބާ ނައިސްގެން ގިނައިރުވީމަ އެހީމަ އެނގެނީ ކެންސަލްވާކަން ވެސް،" ދަތުރު ކުރުމުގައި ދިމާވި ގޮންޖެހުން ކިޔައިދެމުން އޭނާ ބުންޏެވެ.

ވިސާއަށް ބަލާއިރު 30 ދުވަހުގެ ވިސާ ހޯދަން އުނދަގުލެއް ނޫނެވެ. އެކަމަކު މުއްދަތު އިތުރުކުރާ ނަމަ ގޮންޖެހުންތަކެއް ހުންނަ ކަމަށާއި އެކަމަކު ރާއްޖެއިން އެ މީހުންނަށް ލިބުނު އެކި ރަހުމަތްތެރިންގެ ފަރާތުން ހަތަރު ފަސް ފަހަރަށް ވިސާގެ މުއްދަތު އިތުރު ކުރަން އެހީ ލިބުނު ކަމަށް ދެމަފިރިން ބުންޏެވެ.

ފުލިދޫ ހާއްސަ، ކީއްވެ؟

އެ ދެމަފިރިން މިހާތަނަށް ދަތުރުކުރި ރަށްތަކުގެ ތެރެއިން އެންމެ ކަމުދާ ރަށަކީ ކޮބައިތޯ އެހުމުން ވިސްނަން ވަގުތުކޮޅެއް ނެގި އެވެ. ރާއްޖެ އަލަށް އަންނަ މީހަކަށް އެންމެ ކަމުދާނެ މަންޒިލެއްގެ ގޮތުގައި މި ދެމަފިރިން ދެއްކީ ވ. ފުލިދު އެވެ.

ޑިވޯން ބުނި ގޮތުގައި އެ ރަށް ހާއްސަ ވަނީ އެ ރަށުގެ ގޮނޑުދޮށާއި މޫދުގެ ރީތިކަމާއި މިޔަރާއި ކޯމަސް ޕޮއިންޓެއް ވެސް ކައިރީގައި އޮތުމުންނެވެ. ވ. އަތޮޅަށް ޒިޔާރާތްކުރާ ގިނަ ބަޔަކަށް ޝިޕްރެކް އަށް ދެވުމާއި އެ ރަށުގެ އެކޮމޮޑޭޝަން ރަނގަޅުވުމަކީ ވެސް ފުލިދޫ ކަމުދާ އެއް ސަބަބު ކަމަށް އޭނާ ބުންޏެވެ.

"ކުރު ގޮތަކަށް ބުނާ ނަމަ، ރާއްޖެއަށް ފުރަތަމަ ފަހަރަށް ޒިޔާރާތްކުރާ ފަތުރުވެރިންގެ އެޓްރެކްޝަން ލިބޭނެ ހުރިހާ އެއްޗެއް މި ރަށުގެ ކައިރީގައި އެބަ ހުރި،" އޭނާ ބުންޏެވެ.

ޑެވޯން ބުނީ ރާއްޖެއަށް ޒިޔާރާތް ކުރާ ގިނަ އަދަދެއްގެ ޓޫރިސްޓުން މާފުއްޓަށް ދާއިރު އެ ރަށުގެ ޑޭ ޓުއާގެ ތެރޭގައި ވ. އަތޮޅުގެ ޝިޕްރެކަށް ގެންދާ ކަމަށެވެ. އެހެންވެ، ފުލިދޫއަކީ މި ހުރިހާ ކަމަކަށް ބަލާއިރު ޗުއްޓީ ހޭދަކުރަން ރަނގަޅު ތަނެއް ކަމަށް އޭނާ ދެކެ އެވެ.

އެކަމަކު ރާއްޖޭގެ ހުރިހާ ރަށަކީ ވެސް ޔުނިކް ރަށްތަކެއް ކަމަށް އެ މީހުން ދެކެ އެވެ. ކޮންމެ ރަށެއް ވެސް ހާއްސަ އެވެ.

ދިވެހި ކެއުން މީރު، ދިވެހިން ވެސް ރަނގަޅު

މިވަގުތު މެލޭޝިއާގައި ތިބި މި ދެމަފިރިން ބުނީ ހެނދުނު ހޭލާ ގޮތަށް މިހާރު ވެސް އެންމެ މިސް ވަނީ މަސްހުންޏާއި ރޮށި ކޮންމެ ދުވަހަކު ހެނދުނާ ކެއުން ކަމަށެވެ. ހެދިކާތަކުގެ ލިސްޓެއް ކިޔައި އެ ތަކެތި ވެސް ވަރަށް ކަމުދާ ކަމަށް ބުންޏެވެ.

ރާއްޖޭގެ ކެއުމަކީ ބައެެއް މީހުންނަށް އެހާ ކަމުދާ އެއްޗަކަށް ނުވިޔަސް މި ދެމަފިރިން ބުނީ ދިވެހި ކެއުންތައް ކާންވާ ގޮތަށް ކެވޭ ނަމަ ވަރަށް މީރު ކަމަށެވެ.

"ދިވެހި ކެއުން ކާ ގޮތާއި، އެ އެއްޗެއް ކަނީ ކޯޗަކާ އެކީގައި ކަން އެނގިއްޖެ ނަމަ ހަމަ ވަރަށް މީރު،"

އެ މީހުންގެ ރާއްޖެ ދަތުރުގައި މީހެއްގެ ގެއަށް ދިއުމަށް ދައުވަތު ލިބިގެން އެގެއަށް ވެސް ދިޔަ އެވެ. ވަރަށް ކޫލް ކަމެއްގެ ގޮތުގައި ސިފަކޮށް އެ ތަޖުރިބާ ވެސް ކިޔައިދިނެވެ.

"އަހަރެން ލައިވް ސްޓްރީމް ކުރަމުން މި ކިޔައިދެނީ ރާއްޖޭގެ ކާ އެއްޗެހީގެ ވާހަކަ. ދެން އެއްޗެއް ކިޔަންވާ ގޮތް ނޭނގިގެން އެ ތަނުގައި ހުރި މީހެއް ކައިރީ މި އަހާލީ. ކަން ދިމާކުރި ގޮތުން މި މީހާއަކީ އަހަރެމެން ސޯޝަލް މީޑިއާގައި ފޮލޯކޮށް ވީޑިއޯތައް ވެސް ބަލާ މީހެއް،" ޑެވޯން ބުންޏެވެ.

"އެގެއަށް އޭނާ ދައުވަތުދީގެން ދިޔައިރު އެގޭގައި ހަ މީހުން އުޅުން. އެމީހުން ތިބީ ކުޅި ރޮށި ހަދަން. މިއީ އެމީހުން ގޭގައި ތައްޔާރުކޮށްފައި މާލެއަށް ވިއްކަން ފޮނުވާ އެއްޗެއް. އެ އަހަރެމެންނަށް ކާންދީ، އެމީހުން އެ ތައްޔާރުކުރާ ގޮތް ބަލާލަން ލިބުނު. އެހެންވެ މީހުންގެ ގެއަށް ދިއުމަކީ ވަރަށް ކޫލް އެކްސްޕީރިއަންސަކަށްވީ،" އޭނާ ބުންޏެވެ.

އެ ވާހަކައާ އެކު އެމީހުން ދެން ފެށީ ދިވެހިންގެ ހިތްހެޔޮ ކަމާއި އޯގާތެރިކަމުގެ ވާހަކަ އެވެ. ބޭރު ބަޔަކަށް ވިޔަސް ކޮންމެ ރަށަަކުން ވެސް ބެހެއްޓި ގާތް ކަމެވެ. ހިނިތުންވުމާ އެކު ވާހަކަ ދެއްކުމެވެ.

އެރީނާ ބުނި ގޮތުގައި ބައެއް ރަށްރަށުގެ މީހުން ވަނީ އެ މީހުން ދިރިއުޅޭ ގެ ހުސްކޮށް ހުރި ކަމަށް ބުނެ ގޭގައި މަޑުކުރުމަށް ވެސް ދައުވަތު ދީފަ އެވެ. އަދި އެމީހުން ދިޔަ ބައެއް ރަށްތަކުގައި ޓޫރިސްޓުންނަށް ތިބި ހަމައެކަނި ބަޔަކީ އެމީހުން ކަމަށްވާތީ ލިބުނު މެހެމާންދާރީ ވެސް ފާހަގަކުރި އެވެ.

"ބައެއް ރަށްރަށުގައި އަހަރެމެން އެކަނި ތިބީ ޓޫރިސްޓުންނަށް. އެހެންވެ އެކަން ވެސް ވީ ވަރަށް ތަފާތު ތަޖުރިބާ އަކަށް،" އެރީނާ ބުންޏެވެ.

އެ މީހުން ތިބީ ރާއްޖެ ދޫކޮށްލާ ގޮތަކަށް ނޫނެވެ. ހިތާއި ސިކުނޑީގައި އަދިވެސް ވަނީ ރާއްޖެ އައުމުގެ ހުވަފެނެވެ.

"އަސްލު ރާއްޖޭގެ ލޯކަލް އައިލެންޑްތައް ޕްރޮމޯޓްކުރުމަށް މީހުން އަތުން ނަމްބަރު ހޯދައިގެން އަހަރެމެން ގުޅައި މެއިލް ކުރިން ޓޫރިޒަމް ބޯޑަށް ވެސް. އެކަމަކު ޖަވާބެއް ނުލިބޭ. އެހެންވެ، އެހާ ފަސޭހަ ކަމެއް ނޫން މިއީ ހުރިހާ ރަށަކަށް ގޮސް އެ ރަށެއްގެ ކަންކަން ކިޔައިދިނުމަކީ،" ޑޭވިޑް ބުންޏެވެ.

މި ދެމަފިރިން އަންނަނީ އެ މީހުން ދަތުރުކުރި ރަށްރަށުގެ ހާއްސަ ކަމާއި މާލެއިން އެރަށްތަކަށް ދިއުމަށް ހޭދަވާ ވަގުތާއި އެ ރަށްތަކުގައި ޓޫރިސްޓުންނަށް ކުރެވޭނެ ކަންކަން ވެސް ކިޔައިދެމުންނެވެ. އެމީހުން ބުނާ ގޮތުގައި ރާއްޖެ އަގުބޮޑުވެގެން ރާއްޖެ ކަހަލަ މާހައުލެއް ތަޖުރިބާކޮށްލަން މިއާމީ އާއި ހަވާއީ އާއި ބަހާމަސް ކަހަލަ އައިލެންޑްތަކަށް ދިއުމަށް ވުރެ ހަގީގަތުގައި ރާއްޖެ އައުން މާ އަގު ހެޔޮ ކަމަށެވެ.