ރުގިއްޔާ ލަވަކިޔަނީ: ގިނަ ބައެއްގެ މަގުބޫލުކަން އޭނާ މިހާރު އަންނަނީ ހޯދަމުން
23 ސެޕްޓެމްބަރ 2017 - 08:28
ދިވެހިންގެ ތެރޭގައި ޖޭމުދޮންކަމަނަގެ އަޑެއް އަދިވެސް ނުކެނޑެ އެވެ. ޖަމީލާ ހަސަން އާއި ހޯރަފުށީ ފަރީދާ ވެސް މީހުން ދަންނަނީ ރީތި ލަވަތަކެއް ދޫކޮށްފައި ދިޔަ އަންހެނުންތަކެއްގެ ގޮތުގަ އެވެ. އެ މީހުންގެ ލަވަތައް ޖަހައި، އެ އަޑަށް އަދިވެސް މީހުން ތައުރީފް ކުރެ އެވެ.
މިއީ ވެސް ހަމަ ޖޭމުދޮންކަމަނަ އަދި ފަރީދާގެ އަޑު ކަހަލަ ތަފާތު އަޑެއްގެ ވެރި އެކެވެ.
ރުގިއްޔާ އަބްދުﷲ މިހާރު އަންނަނީ، އޭނާގެ އަޑުގެ ޖާދޫގައި ގިނަ ބަޔަކު ޖައްސައި، މަގްބޫލުކަން ހޯދަމުންނެވެ.
ރުގިއްޔާއޭ ބުނީމައި ފަހަރެއްގައި ބައެއް މީހުންނަށް ނޭނގިދާނެ އެވެ. އެކަމަކު މި ފަހުން އޭނާ ކިޔާފައިވާ "ފެހިފެހި އާޒާދީ"ގެ ވާހަކަ ބުނެފި ނަމަ މިހާރު އޭނާ ނުދަންނަ މީހަކު މަދުވާނެ އެވެ. އެ ލަވައާ އެކު ރުގިއްޔާ ވެސް ވަރަށް މަޝްހޫރުވެއްޖެ އެވެ.
މިހާރު 40 އަހަރުން މައްޗަށް ގޮސްފައިވާ ރުގިއްޔާ އުޅެބޮޑުވީ ބެރުޖެހުމާއި ނެށުމުގެ ތެރޭގަ އެވެ. އޭނާގެ ބައްޕައަކީ އުތުރަށް މަޝްހޫރު ބެރުވެރިއެކެވެ. ވަރަށް ޅައުމުރުގައި ބެރު ޖަހަން ދަސްކޮށް، ހައެއްކަ އަހަރުގައި ތިން ބެރު ޖަހަން ފަށައިފި އެވެ. އެކުއެކީގައި ތިން ބެރުގެ ހަކޮޅުގައި ޖެހުމުގެ މި ހުނަރުގެ ސަބަބުން އޭރުން ފެށިގެން މީހުން އޭނާ ދަންނަނީ ތިންބެރު ރުގިއްޔާގެ ގޮތުގަ އެވެ.
"އަޅުގަނޑަކީ ތިންބެރު ރުގިއްޔާ. ގިނަ މީހުން ކިޔާނީ އެހެން،" ތިން ކުދިންގެ މަންމަ އަމިއްލައަށް ތައާރަފްވީ ވެެސް އެހެންނެވެ.
"ލަވަކިޔައި ނަށަން ފެށުމުގެ މާ ކުރިން އަޅުގަނޑު ބެރު ޖަހަން ފަށައިފިން،"
ބައްޕަ ކައިރިން ބެރު ޖަހައި ލަވަކިޔަން ދަސްކޮށް، އާއިލާގެ ދެން ތިބި މީހުންނާއެކު އޭނާ އަބަދު ވެސް އުޅުނީ މިއުޒިކްގެ ތެރޭގަ އެވެ. ބައްޕަ އާއި ދައްތަ ނިޔާވުމުން، އެ މީހުންގެ އެ ރީތި ލަވަތައް ދެމެހެއްޓުމަށް، ހެދި ބޮޑުބެރު ގުރޫޕުގައި ވެސް ރުގިއްޔާގެ އެއްބަނޑު އެއްބަފާ ދައްތަ އައިމިނަތު ވަހީދާ އާއި ފައުޒިއްޔާ އަބްދުﷲ ހިމެނެ އެވެ.
މިދިޔަ ބޮޑު އީދުގައި ރުގިއްޔާ އާއި އޭނާގެ ބޭންޑު ށ. ފޯކައިދުއަށް ދިޔުމުން މަރުހަބާ ކިޔުމަށް އޭނާގެ ކަރުގައި މާފަތި އަޅުވާފައި-- ފޮޓޯ/ ވޭލާ ބޭންޑް ފޭސްބުކް
ހުސް އަންހެނުން ހިމެނޭ އެ ގުރޫޕުން މިވީ ދުވަސްތަކުގައި ވަނީ އިތުރުގެ ގިނަ ރަށްރަށުގެ އިތުރުން ބައެއް ރިސޯޓުތަކުގައި ވެސް ފޯރިގަދަ ޝޯތަކެއް ދީފަ އެވެ.
އެކަމަކު ރުގިއްޔާގެ ނަން މި ފަހުން މަޝްހޫރު ވެގެން މިއުޅެނީ، ސަގާފީ މިއުޒިކް ބޭންޑް، "ވޭލާ"އާ ގުޅި، ގެނެސްދިން ލަވަތަކެއް ބައެއް ޓީވީ ޗެނަލްތަކުން ދައްކަން ފެށުމާއެކު އެވެ. ހުރިހާ ލަވަތަކުގެ ތެރޭން ވެސް، ހޯރަފުށީ މަރުހޫމް އާދަމް ސަލީމް ހައްދާފައިވާ ފެހިފެހި އާޒާދީ ވަރަށް ރީތިވެފައި މަޝްހޫރެވެ.
ރުގިއްޔާ ވޭލާ ބޭންޑާ ގުޅުނީ މިދިޔަ އަހަރު އެވެ. އާމްދަނީ ހޯދުމަށް ހަވާދު ދެވުން ފަދަ މަސައްކަތް ރަށުގައި ކޮށް އުޅޭ ރުގިއްޔާ، ބޮޑު ބަންދަށް މާލެ އައިސް، އެންމެ ފުރަތަމަ އެ ބޭންޑުގެ ޕްރެކްޓިސް ސެޝަނެއްގައި ބައިވެރިވީ އެވެ. ދެން ބޭންޑުގެ އިސް މީހުންނާއެކު، އޮންނަ އެކުވެރިކަމުގައި އެ ބޭންޑާ އޭނާ ގުޅުނީ އެވެ.
މީގެ ވިއްސަކަށް އަހަރު ކުރިއްސުރެ މިއުޒިކް ކުޅެމުން އަންނަ ވޭލާ ބޭންޑުގައި ރުގިއްޔާގެ އިތުރުން އޭނާގެ ދައްތަ ފައުޒިއްޔާ ވެސް ހިމެނެ އެވެ. އޭނާއަކީ އެ ބޭންޑުގެ ނެށުންތެރިއާ އެވެ.
މިހާރު ބަންދު ދުވަސްތަކުގައި ރަަށުގައި ހުންނާކަށް ރުގިއްޔާއަކަށް ފުރުސަތެއް ނުލިބެ އެވެ. އީދު ބަންދު ފަދަ ޗުއްޓީތަކުގައި އޭނާ މުޅިން ވެސް އުޅެން ޖެހެނީ ބޭންޑާއެކު އެއް ރަށުން އަނެއް ރަށުގަ އެވެ. މިދިޔަ ބޮޑު އީދުގައި ވެސް އޭނާ ވަނީ ރ. ދުވާފަރާއި ޅ. ނައިފަރާއި ބ. ކަމަދޫ އާއި ށ. ފޯކައިދޫގެ އިތުރުން އަމިއްލަފުށި ރިސޯޓަށް ގޮސްފަ އެވެ.
މިދިޔަ ބޮޑު އީދުގައި ށ. ފޯކައިދުއަށް ދިޔުމުން އެ ރަށުން ވޭލާ ބޭންޑަށާއި ރުގިއްޔާއަށް މަރުހަބާ ކިޔައި މާފަތި އަޅުވާފައި-- ފޮޓޯ/ ވޭލާ ބޭންޑް ފޭސްބުކް
"ކޮންމެ ރަށަކުން ވެސް ވަރަށް ހޫނު މަރުހަބާއެއް ކިޔާ. ވޭލާ ބޭންޑާ ގުޅުނު ފަހުން އަޅުގަނޑަށް ލިބޭ ތަރުހީބު ވެސް ވަރަށް ބޮޑު،" އެންމެ ހަގަށް، 13 އަހަރުގެ އަންހެން ކުއްޖަކު ހުންނަ ރުގިއްޔާ ބުންޏެވެ.
ރުގިއްޔާ ބުނިގޮތުގައި ކޮންމެ ރަށަކުން ވެސް އެންމެ ބޮޑު ތަރުހީބެއް ލިބެނީ އޭނާގެ "ފެހިފެހި އާޒާދީ ލަވަ" އަށެވެ.
އޭނާގެ އަޑުގެ އިތުރުން ދެން އެންމެ ގިނަ ބަޔަކު ރުގިއްޔާ ފާހަގަ ކުރަނީ ލަވަ ކިޔާއިރު އޭނާ ގެންގުޅޭ ނެށުމުގެ ހަރަކާތްތަކަށެވެ. ހާއްސަކޮށް ދެ ކޮނޑު ތަޅުވާލާގޮތް ގިނަ ބަޔަކަށް ވަރަށް މަޖަލެވެ.
ރުގިއްޔާ ބުނިގޮތުގައި އޭނާއަށް ނަށަން ދަސްކޮށްދިނީ ދައްތަ ވަހީދާ އެވެ. އަރާ ފޯރީގައި ކޮނޑު އެހެން ތެޅުވުނު ނަމަވެސް އޭނާއަކީ ބޮޑުބެރަށް ރީތިކޮށް ނަށާ މީހެކެވެ.
ރަށުގައި އާދައިގެ ދިރިއުޅުމެއް އުޅެމުން އަންނަ ރުގިއްޔާގެ ފިިރިމީހާއަކީ މަސްވެރިއެކެވެ. ދޮށީ ދެ ފިރިހެން ދަރިން މާލޭގައި ވަޒީފާ އަދާކުރާއިރު ހަގު ދަރި ރަށު ސްކޫލުގައި ކިޔަވަނީ އެވެ. އެއިން އެއްވެސް ކުއްޖެއް މިއުޒިކްގެ ދާއިރާއަކަށް މާބޮޑު ޝައުގުވެރިކަމެއް ނުބަހައްޓަ އެވެ. އެކަމަކު ރުގިއްޔާ ބުނިގޮތުގައި މި ދާއިރާއިން އޭނާއަށް އެންމެ ބޮޑު އެއްބާރުލުމެއް ދެނީ ފިރިމީހާއާ ދަރިންނެވެ.
ނައިފަރު ދޮހޮއްކޮގެ ލަވައެއް ރުގިއްޔާ ކިޔަނީ: ގިނަ ބައެއްގެ ތަރުހީބު އޭނާ ވަނީ ހޯދާފައި
"އާއްމުކޮށް ވަރަށް އަންހެނުން ނުކުރާ ކަމެއް މިއީ. އެކަމަކު އަޅުގަނޑު ފިރިމީހާ މިކަމަށް ހިތްވަރު ދޭ." އޭނާ ބުންޏެވެ.
"އަޅުގަނޑާއެކު ޝޯދޭން އަދި ރަށަކަށް ނުދިޔަޔަސް މިކަން ނުކުރާށެކޭ ނުބުނޭ،"
އޭނާ ބުނީ މިއީ އެ އުމުރުގެ އަންހެނުން އާއްމުކޮށް ނުކުރާ ކަމެއް ނަމަވެސް، ބޭންޑާއެކު ރަށްރަށަށް ދަތުރުކުރާއިރު އެއްވެސް ކަހަލަ ނުރަނގަޅު ކޮމެންޓެއް މީހުންގެ ފަރާތުން ނުލިބޭ ކަމަށެވެ. އެކަމަކު އޭގެ ބަދަލުގައި ކޮންމެ ރަށަކުން ވެސް ހީނުކުރާވަރުގެ ރަނގަޅު މެހެމާންދާރީއެއް ލިބޭ ކަމަށް ބުންޏެވެ.
"ރަށްރަށުގެ މީހުން ވަރަށް ވަރަށް ރަނގަޅު. ގުޅާފައި ވެސް ގިނަ ބަޔަކު ބުނޭ ލަވަކިޔާ ގޮތް ވަރަށް ރީއްޗޭ. އެހެންވެ، ވަރަށް ހިތްހަމަ ޖެހޭ،" ރުގިއްޔާ ބުންޏެވެ.
މި މަސައްކަތުން އޭނާއަށް ރަނގަޅު އާމްދަނީއެއް ލިބެ އެވެ. އަދި ހިތްހަމަޖެހުމާއި ގިނަ ބައެއްގެ ލޯބި ލިބެ އެވެ. އެހެންވެ، ރުގިއްޔާ ހުރީ މި ދާއިރާއިން އެރުނު އެންމެ އުހަކަށް އަރާށެވެ.
Copyright © 2025 Mihaaru · Terms and Conditions · Privacy Policy
ކޮމެންޓްތައް
ޢަހްމަދު ޝަފީޤު
23 September 2017
ތިހެން ލަވަކުޅެން ދާން ރަނގަޅު ވާނީ މިހާރުގެ މިޒަމާނުގެ ފެސަން ހެދުން އަޅައިގެން އޭރުން މަޖާވާނީ
މެންޓަލިސްޓް
23 September 2017
ލަވަކިއުމާޢި ޕޮަޔަޓްރީއާޢި އާރޓް & ޑިޒައިން އަކީ ކުރިއަރުވަންޖެހޭ ކަންކަން ،، އެއީ ހިއުަމަން ކުރިއޭޓިވިޓީ އެއްދުވަހުން އަނެއްދުހަށް ކުރިއަށް ދާންޖެހޭ ،،، އަދި މި ފަންނުތަކުގެ ތެރޭން ވަރަށްބޭނުންތެރި ކަންކަން ދަސްވާނެ ،،، ލޯޔްބާޢި އިހްތިރާމްއާއި މިހެންގޮސް ހިއުމޭނިޓީއަށް ލޯބިކުރަންވެސް ދަސްވާނޭ ،،، އަޅުގަނޑުމެންގެ ތެރޭގައި މިހާރު މިކަންކަން ނެތިކޮއްލާންވެސް ބަޔަކުމީހުން މަސައްކަތްކުރަމުން އެބަގެންދޭ ،،، އެއީއެމީޙުން ގަބޫލްކުރާގޮތް ،، ކުޑައިރުއްސުރެން އާރޓް ޕްރޮމޯޓްކުރުވަންޖެހޭ ،،، ސިނކުޑީގެ 2 ފަޅީންއެއްފަޅި މަރާލާކަށް ނުވާނެތާ ،،،، ވަރަށްވެދުން
ދޮނޭ
23 September 2017
އަހަރެމެން ރަށަށް އެއްފަހަރަކު ހިތާނަކޮށްގެން އުޅޭ ގެއަކަށް ބެރުޖަހަން ތިންބެރު ރުގިއްޔާމެންގެ ގްރޫޕް ގެނައިން. އެރޭ ފުރަތަމަ ލަވަ ފެށުމުގެ ގޮތުން "އަލިރަސްގެފާނު، އަލިރަސްގެފާނު ޝަހީދުވި މަންޒަރޭ ފެނިގެން ދިޔައީ" އެހިސާބަށް ދިޔައިރު މުޅި ރެޔަށް ފުދޭނެކަމަށް ބަލައިގެން ގޭގައި ގިރި ތިން ބަނޑިޔާ ޖޫސް އެމީހުންނާއި އެއްކޮށް އައި ވަފްދު ބޯ ހުސްކޮށްލައިފި.
އާޒާދީ
23 September 2017
އާޒާދީގެ މާނަައަކީ ކޮބާތަ
އާޒާދީ
23 September 2017
މިނިވަންކަން އަމިއްލަވަންތަކަން
ކަލާ 123
23 September 2017
ރުގިއްޔާ އަށް އައްސަރިބަހާއި ސާބަސް! މިޔުޒިކާއި ލަވައިގެ ރޮނގުގައި އިތުރު ކުރިއެރުމާއި ކާމިޔާބީތަކަށް އެދެން. ރާއްޖޭގެ ކަންކޮޅުތަކުގައި ތިބި މިފަދަ ފަންނާނުންނަށް ލިބެން ޖެހޭ ރީތި ނަމާއި ހައްގު ގަދަރު ހޯއްދަވައިދެއްވުމަށް ހަވީރުގެ ވެރީންނާއި ލިޔުންތެރީން ކުރައްވަމުން ގެންދަވާ މަސައްކަތްޕުޅުތަކަށްޓަކައި ފަށްފަށުން ޝުކުރާއި ތަހުނިޔާ ދަންނަވަން!
މުހައްމަދު..
23 September 2017
ހަވީރޭ!!
ޗާލުނަޔާ
23 September 2017
ފެހި ފެހި އާޒާދީ އެއީ ރުޤިއްޔާގެ ލަވައެއްނޫން. އަސްލު އެލަވަ ކިޔާފައިވަނީ މަރުހޫމް ފަރީދާ. ރުޤިއްޔާ އެ ކިޔަނީ ހަމަ އެލަވަ. އާރޓިކަލް ކިޔާލީމަ ހީވީ ރުޤިއްޔާގެ ލަވައެއްހެން
ދިވެހިބަސް
23 September 2017
މަރްޙޫމާ
ހަބީބު
23 September 2017
ސަޅި މީހުން ގެހިތްތައް ހަމަޖެހި ފިނިކަމެއްލިބި ގުޅުން ބަދަހިވާކަމެއްމީ ދީނީ ވާޖިބުތައް ގަޑިންގަޑިޔައް އަދާކޮއް ތިގޮތުގަ ދެމިހުރޭ
ލައިން
23 September 2017
އާދަން ސަލީމުގެ ރީތި ޅެންތައްކަމަށްވާ ލޯބިންގުޅޭ ދެހިތެއްސަފުން، އިޝްޤު ނުވިނަމަ ދޭހުގާ، ޤައުމުން މިއަދު އަލިކޮށްލި ރީތި ނިޝާނާ މީގެ އިތުރުން ފެހިފެހިއާޒާދީއާ ޤައުމުދުށް އަދަކީތޯ ނަޔާ އަދި ހާދަ ލޯތްބެއްވެޔޭ އާޝިޤާ ފަދަ ޅެންތަކަށް ލަވަކިޔައިގެން ފަރީދާ ހޯދިފަދަ މަޤްބޫލުކަމާ ކާމިޔާބެއް ރުޤިއްޔާއަށް ހޯދޭނެކަމަކަށް ނުފެނޭ
ކުޑަދޮހޮއްކޮ
23 September 2017
ދެރަވެސްވޭ މިހެން ބުނަން. އެކަމަކު ދިވެހިން މިއީ އަންޒަމާނުއްސުރެ މީހުން ބެބޫ ހައްދަން ވެއްޖެ ނަމަ އެކަމަށް ފައިސާ ހަރަދުކޮށް ހުސާމަދުކޮށްގެން ވެސް އެކަން ކުރުވާ ބައެއް،. އެއީ ކޮންމެހެން ރީތިވެގެންނެއް ނޫން، ބޭބޫ ހައްދަން، ހީ ސަކަރާތް ޖަހަން. ސުނީތާ، ވޭލާ ބޭންޑު، ހާބުރި، މިއީ މިޒަމާނަށް މިހާރަށްވެސް ފެންނަ ހުރި މިސާލުތައް
ޒައިން
23 September 2017
ހިތުން ފަރީދާ ހެދިގެން ތިޔަ އުޅެނީ އެކަމު ގާތްވެސް ނުކުރެވޭ... އެހެންނެއް ނޫން ބެރުޖަހަން ވަރަށް މޮޅު މީނާގެ ހުނަރު ދުށިން