މިކަން އަވަހަށް ހުއްޓުވާ! ދެން އޮތީ ކާކު ކަމެއް ނޭނގެ؟

އަހަރުތަކެއް ކުރިން، ވަރަށް ސިއްރުން ހަރުކަށި ފިކުރުގައި ބައެއް ދިވެހިން އުޅެމުން ދިޔަ ނަމަވެސް، މީގެ 25-30 އަހަރު ކުރިން ރާއްޖޭގައި ހަރުކަށި ފިޔަވަޅުތައް ވަނީ އާންމުވާން ފަށައިފަ އެވެ. މާ ބޮޑެތި ދިރާސާތަކެއް ހެދިފައި ނެތަސް، އެކަން އެންމެ ފުރަތަމަ ފެންނަން ފެށީ ބައެއް މީހުންގެ އަމަލުތަކުންނެވެ. އޭރު ދިވެހި އާންމު ރައްޔިތުން ދެކެމުންް އައީ އެއީ މަޖާ ކަމެއްގެ ގޮތުގަ އެވެ. ބުނާ އަޑު އިވެނީ، އެވެނި ގެއެއްގެ މުޅި ގޭގައި އެއްކޮށް ހުންނަނީ ކަޅު ފަރުދާ ކަމަށެވެ. މިވެނި ގެއެއްގެ މީހުން، ދަތް އުނގުޅާ ބުރުހަކުން ދަތެއް ނޫނގުޅަ އެވެ. އެ މީހުން ދަތް އުނގުޅަމުން ދަނީ ފިހިކޮޅަކުންނެވެ. -- އެ ވާހަކަތައް ދެކެވެމުން ދިޔައީ އާ ކަމަކަށް ވެގެންނެވެ. ސިއްރުސިއްރުންނެވެ. މަޖަލަކަށް ވެގެންނެވެ.

އެކަމަކު އާންމުންނަށް ވެސް ނޭނގުނު ކަމަކީ، އެ ކަޅު ފަރުދާގެ ނިވަލުގައި ތިބެގެން އެހެން ކަންތައްތަކެއް ރާއްޖޭގައި ހިނގަމުން ދިޔަ ކަމެވެ. މިސްކިތްތަކާއި ސްކޫލުތަކަށް ހަރުކަށި ފިޔަވަޅުތައް މަޑުމަޑުން ވަންނަމުން ދިޔަ ކަމެވެ. ބައެއް ސްކޫލުތަަކުގައި ކުޑަކުދިން ހަރުކަށި ފިޔަވަޅުތައް ފޮލޯ ކުރަމުން ދިޔަ ތަން އާންމުންނަށް ފެންނަމުން ދިޔަ އިރު، ވަރަށް ގިނަ މީހުން ބުނަމުން އޭރު ދިޔައީ "އެއޮއް ނުލަފާކޮށް އުޅުނު ސޮރު މިވެނި މީހަކާ ޖެހިގެން މިހާރު އިސްލާހު ވެއްޖެ" ކަމަށެވެ. އެކަމަކު އެ އިސްލާހުގެ އަޑީގައި މުޅިން އެހެން ކަންކަން ހިނގަމުން ދިޔަ އެވެ. ނުލަފާ ސޮރު "އިސްލާހު"ވެ، އޭގެ މައްޗަށް ވެސް "އިސްލާހު"ގެ ފިލާވަޅުތައް އައީ ނަގައިދެމުންނެވެ. އެއީ ދެން ތިބި މީހުންނާ ދޭތެރޭ ނަފްރަތާއި ރުޅިވެރި ކަމުގެ ފިކުރެވެ. އެ މީހުން ނޫން އެންމެން ކާފަރު ކުރުމުގެ ފިކުރެވެ. އެ އެންމެން އެއީ މަރަން ޖެހޭ ކަމުގެ ފިކުރެވެ. ހަނގުރާމަތަކަށް ގޮސް "ޖިހާދު" ކުރަންވީ ފިކުރެވެ.

އެ މަޖާގަނޑުން މީހުން ހޭލައްވާލީ، ސެޕްޓެމްބަރު 29، 2007 ވަނަ ދުވަހު އެވެ. އެ ދުވަހު ސަލްޓަން ޕާކުގައި ގޮއްވާލި ބޮމާ އެކު އެވެ. ތަހުގީގުތައް ހިންގާލި އިރު ހަރުކަށި ފިޔަވަޅު އޮތީ މައިތިރި ކުރެވޭ ހިސާބެއްގައެއް ނޫނެވެ. ބައެއް ރަށްރަށް އެއްކޮށްހެން ވަނީ ހަރުކަށި ފިކުރުން ސިކުނޑި ދޮވެލައިފަ އެވެ. އޭގެ ހަފުތާއެއްހާ ދުވަސް ފަހުންް، އޮކްޓޫބަރު 7 ގައި އއ. ހިމަންދޫގައި ސަލާމަތީ ބާރުތަކާ ދެކޮޅަށް އެ ރަށުގެ ހަރުކަށި ފިކުރުގެ ބޮޑު ގުރޫޕަކުންް ނުކުމެ ހަމަލާ ދިން ހިސާބުން މިކަމުގެ ސީރިއަސްކަން މުޅި ދައުލަތަށް ވަރަށް ބޮޑުވެގެން ދިޔަ އެވެ.

ހިމަންދޫގެ އެންމެ އަޑިއަށް ފީނާލި އިރު، އެ ރަށުގެ ދެ އަވަށުގެ ތެރެއިން އެއް އަވަށަށް އޮތީ، ހަރުކަށި ފިކުރުގެ ދާދާއިން ރަސްކަން ފަތުރާލައިފަ އެވެ. އެ ރަށުގައި އުމުރުން އެންމެ ފަސް، ހަ އަހަރުގެ އަންހެން ކުދިން ވެސް މޫނު ނިވާކޮށް، އެ އުމުރުގެ ކުޑަ ފިރިހެން ކުދިންގެ ވެސް ވިސްނުން ވަނީ ބަދަލުކޮށްލައިފަ އެވެ. ކުރިން ހަރަކާތްތެރި ގެތަކަށް ވަދެލާ އިރު ފެންނަމުން ދިޔައީ މަޑުމައިތިރި ކަމާއި، އަންހެންވެރިން ކަންކަނަށް ވަދެ ފިލައި ތިބި މަންޒަރެވެ. އޭރުގެ ސަރުކާރަށް އެކަން ރޭކާލި އިރު ދެން އޮތީ ވާނެ ހައެތި ވެ ނިމިފަ އެވެ. ދެން ކުރެވޭނެ މާ ބޮޑު ކަމެއް ނެތެވެ. އޭގެ ފަހުން މުޅި ރާއްޖެ ކޮނެ ހާވާލި އިރު، އެކި ރަށްރަށުގައި ވެސް ހަރުކަށި ފިކުރުގެ ބޮޑެތި އައްޑާތައް ހިންގަމުން ދިޔަ އެވެ. ބައެއް ރަށްރަށުގައި އެކަން އޮތީ ސަލާމަތް ނުވާ ހިސާބުގަ އެވެ.

ސަލްޓަން ޕާކުގެ ބޮމުގެ ހަމަލާ އަށް 15 އަހަރު ވަނީ އެވެ. ހަރުކަށި ފިކުރުގެ އަސަރުތައް ރާއްޖޭގައި އަދިވެސް އެގޮތުގައި އޮތީ އެވެ. ސަރުކާރުތަކަށް އެކަމެއް ނުވެއް ހުއްޓުނެވެ. ދީނީ ނަސޭހަތް ދޭ މީހުންނަކަށް ވެސް އެކަމެއް ނުއެއް ހުއްޓުވުނެވެ. އެ މީހުންްގެ ޕްލޭންތަކާއި އެ މީހުންްގެ ޖާސޫސީ މައުލޫމާތުތައް މާ ވަރުގަދަ ކަމަށް ފެނެ އެވެ. އޭގެ ނަތީޖާ އަކީ، ދައުލަތުގެ އެއްވެސް އިންޓެލިޖެންސަކަށް ފަހުމް ވެސް ނުވާ ގޮތަށް ބޭނުންއިރަކު ބޭނުން ކަމެއް ކޮށްލުމުގެ ގާބިލްކަން ލިބުމެވެ. ބޭނުން މީހަކަށް ހަމަލާ ދެވުމެވެ. ސަލްޓަން ޕާކުގެ ބޮމުގެ ހަމަލާ އަށް ފަހު، ރާއްޖޭގައި މިގޮތަށް ހިންގާފައިވާ ޓެރަރިޒަމްގެ ހުރިހާ އަމަލެއްގައިހެން އެ މީހުންގެ ބައިވެރިވުން އޮތް ކަމަށް އެކި ރިޕޯޓްތަކުންް ދައްކަ އެވެ.

މިއީ އޭގެ ކަޅު ސޮފުހާތަކެވެ.

ސަޕްޓަން ޕާކުގެ ބޮމުގެ ހަމަލަ

ރާއްޖޭގައި ޓެރަރިޒަމްގެ ހަމަލާތަކުގެ ފެށުން އައީ މި ހިސާބުންނެވެ. ތަހުގީގުތަކުން މިހާތަނަށް އެނގިފައިވާ ގޮތުގައި، ޓޫރިސްޓުންނަށް އަމާޒުކޮށް، ބާރުގަދަ އައިއީޑީއެއް ގޮއްވާލަން ރާވައި، އަދި ކުދި މޮހޮރު އަޅައިގެން އެ ހަދާފައި ވަނީ ވެސް ހަރުކަށި ފިކުރަށް ގޮސް ހުސްވެފައިވާ ޒުވާނުންތަނެއް ގުޅިގެންނެވެ.

ސަލްޓަން ޕާކުގެ މައި ދޮރާ ވަރަށް ކައިރިން، ސެޕްޓެމްބަރު 29، 2007ގެ މެންދުރު ފަހު 2:30 ހާއިރު ދިން ހަމަލާގައި، 12 ޓޫރިސްޓަކާއި އާންމުންގެ ތެރެއިން އެކަކު ޒަހަމްވި އެވެ. ކާފަރުން މެރުމަކީ ޖިހާދެއް ކަމަށް ބުނެ، ދިން ހަމަލަ އާ ގުޅިގެން 14 މީހަކު ފުލުހުން ހައްޔަރުކޮށް އޭގެ ތެރެއިން ބައެއް މީހުންގެ މައްޗަށް ޝަރީއަތް ކުރި އެވެ. އެކަމަކު، ކުށް ސާބިތުވީ އޭގެ ތެރެއިން ބައެއް މީހުންގެ މައްޗަށެވެ.

މީގެ ތެރެއިން ބައެއް މީހުން ފިލައިގެން އުޅުމަށް ފަހު، އަހަރުތަކެއް ފެނި، އެ މީހުންގެ ޝަރީއަތް މިހާރު ވެސް ދަނީ ކުރިއަށެވެ.

ހިމަންދޫގައި ހިނގި ބޮޑު ހަމަނުޖެހުން

ސަލްޓަން ޕާކުގެ ބޮމުގެ ހަމަލާ އަށް ފަހު، އެ ހަމަލާގައި ހިމެނޭ ބައެއް މީހުން ހޯދަން އަތްފުނާ އެޅި އެއް ރަށަކީ އއ. ހިމަންދޫ އެވެ. އެކަމަކު އެ ރަށުން ކުރިމަތިވީ އެއަށް ވުރެ މާ ނުރައްކާތެރި ހަމަލާއެކެވެ. ފުލުހުންނަށް ނުކިޔަމަންތެރިވެ، އޭގެ ތެރެއިން ބައެއް މީހުން ފުލުހުންނާ ކުރިމަތިލީ އެވެ. ދެން އެ ރަށުގައި ފަޅައިގެން ދިޔަ ހުޅުގަނޑު ވަރަށް ސީރިއަސް އެވެ.

ހިމަންދޫގައި އޭރު، ގެއެއްގެ ބައެއް މިސްކިތަކަށް ހަދައިގެން އާންމު ޖަމާއަތާ ވަކިން ނަމާދުކުރާތާ ދެ އަހަރުވެއްޖެ އެވެ. ބޮޑު ހަމަނުޖެހުމުގެ އަހަރެއްހާ ދުވަސްކުރިން، އެ ރަށުގައި ވަކިން ޖަމާއަތް ހަދައިގެން ނަމާދުކުރަމުން ދިޔަ ތަނެއް ފުލުހުން ބިމާހަމަކޮށްލައި 25 މީހަކު ހައްޔަރު ވެސް ކުރި އެވެ. އެކަމަކު އެ ފިކުރު އެ ރަށުން ފޮހެވިގެނެއް ނުދެ އެވެ.

ހިމަންދޫ "ބަދަލުކޮށްލީ" އެ ރަށަށް ދިޔަ ހަރުކަށި ފިކުރުގެ ބަޔަކު އިސްކޮށް ތިބެގެންނެވެ. އަދި ރަށު ސްކޫލަށް ފޮނުވުމާއި ރަށުގައި ހިނގަމުން ދިޔަ އެހެން ހަރަކާތްތަކުން އެ މީހުން ދުރުވި އެވެ.

ފުލުހުން، އޮކްޓޫބަރު 6، 2007 ގައި އެ ރަށަށް އަރައި، ބައެއް މީހުން ހައްޔަރު ކުރަން ފެށުމާ އެކު ދެން ކުރިމަތިލީ ވަރަށް ބޮޑު ހަމަނުޖެހުމަކަށެވެ. ފުލުހުންނަށް ކޮންޓްރޯލް ނުވެގެން، އެންމެ ފަހުން ހަތިޔާރާ އެކު ސިފައިން ގޮސްގެން ދަންވަރު ތިނެެއް ޖަހާކަން ހާއިރު ރަށް މައިތިރިކުރި އިރު ކަމުދާކަށް ނެތެވެ. ސިފައިންގެ ތިން މީހަކަށް އަނިޔާވެ، އެކަކަށް ވަނީ ވަރަށް ސީރިއަސް ޒަހަމްތައް ލިބިފަ އެވެ. ހެލްްމެޓް އަޅައިގެން، 150އެއްހާ މީހުން ނުކުމެ ތޫނު ދަގަނޑާއި ލަކުޑިބުރިންް ވެސް ހަމަލާތައް ދިނެވެ. އޮއްގާ އުކާފައި ވެ އެވެ. ސަފައިންގެ އެކަކު ރަހީނު ވެސް ކުރި އެވެ.

މި މައްސަލާގައި އެތައް ބަޔަކު ހައްޔަރުކޮށްގެން ގެނެސް، 90 ވަރަކަށް މީހުންނަށް ހުކުމް ކުރި އެވެ. އޭގެ ތެރޭގައި 10 އަހަރުގެ ހުކުމްތައް ވެސް ހިމެނެ އެވެ. އެކަމަކު، މި މައްސަލާގައި އެންމެ ބޮޑެތި ތުހުމަތު ކުރެވުނު ބައެއް މީސްމީހުންް އަތުލައެއް ނުގަނެވެ އެވެ. ޖަލަށް ލީ މީހުން ސިޔާސީ ނުފޫޒުތަކުގެ ތެރެއިންނާއި އެކި ގޮތްގޮތުން މިނިވަންވެ، މިހާރު އެކަކު ވެސް ޖަލަކު ނެތެވެ. އެކަމަކު ހިމަންދޫގެ މީހުންގެ ތެރެއިން ބައެއް މީހުން ޖަލުން ނުކުތީ، ޖަލު ތެރޭގައި ވެސް އެ ފިކުރު ވަރަށް ގަދައަށް ފަތުރައިފަ އެވެ. އަދި ޖަލުން ނުކުމެ އެކި ނަންނަމުގައި ޖަމިއްޔާތަށް ހަދައިގެން އެ މީހުންގެ ފިކުރު އެހެން ގޮތްގޮތުން ފަތުރަން ފެށި އެވެ.

ހިލްއަތު ރަޝީދަށް ދިން ހަމަލަ

ނޫސްވެރިޔާ އަދި ބްލޮގާ ހިލްއަތު ރަޝީދަށް ޖޫން 4، 2012 ގައި ދިން ހަމަލާ އަކީ ވަރަށް ރަހުމް ކުޑަ ހަމަލާއެކެވެ. އޭނާ އަށް ދިން ހަމަލާ ވެސް މިހާތަނަށް ހިމެނިފައި ވަނީ ދީނީ ގޮތުން ހައްދުފަހަނައަޅާފައިވާ މީހުން ދިން ހަމަލާއެއްގެ ގޮތުގަ އެވެ.

އަމިއްލަ ގޭ ކުރިމަތީގައި ހުއްޓާ ބަޔަކު ގޮސް އޭނާގެ ކަރުގެ ނޭވާ ހޮޅީގައި ވަޅި އަޅައި، އޭނާ އެރޭ "ކަތިލާލި" އެވެ. އޭނާގެ ފުރާނަ ސަލާމަތްކުރަން ޑޮކްޓަރުން ތިން ގަޑިއިރުގެ އޮޕަރޭޝަނެއް ކުރުމަށް ފަހު ބުނެފައި ވަނީ ހިލްއަތުގެ ފުރާނަ ސަލާމަތްވީ ލޭހޮޅިއެއް ބުރިވެފައި ނުވާތީ ކަމަށެވެ. ހަގީގަތަކީ، ހަމަލާ ދިން މީހުން ހީކޮށްގެން ތިބީ އެ މީހުންގެ ހަމަލާއިން ހިލްއަތު މަރުވާނެ ކަމަށެވެ.

މި މައްސަލާގައި މިހާތަނަށް އައިއިރު ވެސް އެއްވެސް މީހަކު ހައްޔަރުކޮށް ތަހުގީގެއް ހިންގައިފައެއް ނުވެ އެވެ. ހިލްއަތަށް ހަމަލާ ދީފައިވަނީ، ޑިސެމްބަރު 2011ގައި އޭނާ ނުކުމެ ދީނީ މިނިވަންކަމަށް ގޮވާލައި، މަރުގެ އިންޒާރުތަކެއް ލިބިފައި އޮއްވަ އެވެ.

ޑރ. އަފްރާޝީމް އަލީ އަވަހާރަކޮށްލުން

ދީނީ އެކި މައްސަލަތަކުގައި ފުރައްސާރަ އާއި ތަފާތު ހަމަލާތައް އައުމަށް ފަހު، އުނގޫފާރު ދާއިރާގެ މެމްބަރު އަދި އިސްލާމީ ތައުލީމު ހާސިލް ކުރައްވައިގެން ހުންްނެވި ޑރ. އަފްރާޝީމް އަލީ އަވަހާރަކޮށްލުން ވެގެން ދިޔައީ ރާއްޖޭގައި މިހާތަނަށް ހިނގި މިފަދަ އެންމެ ނުރައްކާތެރި ހާދިސާ އަށެވެ.

ޑރ. އަފްރާޝީމް އަވަހާރަކޮށްލީ އޮކްޓޫބަރު 1، 2012 ގަަ އެވެ. އޭނާ ޓީވީ ޕްރޮގްރާމެއްގައި ބައިވެރިވެ ވަޑައިގަތުމަށްފަހު ގެއަށް ވަޑައިގެން ގޭ ދޮރުހުޅުވާލިތަނާ ބަޔަކު ހަމަލާދިނީ އެވެ. ކަރުގައި ވަޅި އަޅާފައި ހުރުމުގެ އިތުރުން ބޮލުގެ ފުއްކިބައިގައި އެއްޗަކުންް ޖަހާފައި ވެ އެވެ. ލޭތައް ބުރައިގެން ގޮސް އެކި ތަންތަނުގައި ހުއްޓެވެ. އަފްރާޝީމް އަވަހާރަވީ ހަމަ އެ ވަގުތު އެތަނަށެވެ.

މި މައްސަލާގައި މެއިން ސަސްޕެކްޓުންގެ ގޮތުގައި ތިން މީހަކު ހައްޔަރުކުރި އެވެ. އެކަމަކު އޭގެ ތެރެއިން ދެ މީހަކު ސަލާމަތްވެ، އެކަކު އަދިވެސް ހުރީ ޖަލުގަ އެވެ. އަފްރާޝީމް އަވަހާރަކޮށްލި ކަމަށް އޭނާ އިންކާރު ކުރެ އެވެ. މި މައްސަލައިގެ ތަހުގީގަކީ، މި ސަރުކާރު ވެރިކަމަށް އައުމަށް ފަހު އެކުލަވާލި ރިޔާސީ ކޮމިޝަނުން އެންމެ އިސްކަން ދީގެން ކުރަމުން އަންނަ އެއް ތަހުގީގެވެ.

އެ ކޮމިޝަނުން މިހާތަނަށް ހޯދި ހޯދުންތަކުން ބުނެފައި ވަނީ ޑރ. އަފްރާޝީމް އަވަހާރަކޮށްލުމުގެ އަޑީގައި އޮތީ ދީނީ ހިލާފުވުންތައް ކަމަށެވެ.

ރިލްވާން ގެއްލުވާލުން

ނޫސްވެރިޔާ އަދި ސޯޝަލް މީޑިއާ އެކްޓިވިސްޓް އަހުމަދު ރިލްވާން ވީނުވީއެއް ނޭނގި ގެއްލުނީ އޮގަސްޓް 8، 2014 ގަ އެވެ.

މި މައްސަލައިގެ ތަހުގީގު ވެސް އަދި ނުނިމެ އެވެ. މި މައްސަލަ އަކީ ވެސް ރިޔާސީ ކޮމިޝަނުން އެންމެ އިސްކަންދީފައިވާ އެއް މައްސަލަ އެވެ. އެ ކޮމިޝަންގެ ހޯދުންތަކަށް ބަލާއިރު ރިލްވާން "މަރާލުމަށް ފަހު ކަނޑު ފެއްތީ" އެވެ. އަދި އޭނާ ކިޑްނެޕް ކުރުމާއި ގެއްލުވާލުން/ މަރާލުން ގުޅިފައި ވަނީ ވެސް އޭނާ ފާޅުކުރަމުން ދިޔަ ދީނީ ހިޔާލުތަކަކާ ގުޅިގެން ކަމަށް ތަހުގީގުތަކަށް ވަނީ އެނގިފަ އެވެ.

ރިލްވާން އެންމެ ފަހުން ހަބަރެއްވީ، އޮގަސްޓް 8 ވަނަ ދުވަހުގެ ރެ އެވެ. އޭނާ ގެއްލުނީ އޭނާ ދިރިއުޅޭ އެޕާޓްމެންޓަށް ދިޔަ ފަހުންނެވެ.

ރިލްވާން ގެއްލުނު މައްސަލާގައި ދެ މީހެއްގެ މައްޗަށް ދައުވާކުރި އެވެ. އެކަމަކު ދެ މީހުންްގެ މައްޗަށް ވެސް ކުށް ސާބިތެއް ނުވެ އެވެ.

ފިނިފެންމާ ލޯންޗުގެ ބޮމުގެ ހަމަލަ

ރައީސް އަބްދުﷲ ޔާމީނާއި އެމަނިކުފާނުގެ އަނބިކަނބަލުން ފާތިމަތު އިބްރާހިމް ހުޅުލެ އިން މާލެ އަށް ވަޑައިގެންނެވި ތަނުން، އެ ބޭފުޅުން ތިއްބެވި ރިޔާސީ ލޯންޗުކޮޅު "ފިނިފެންމާ"ގައި، ސެޕްޓެމްބަރު 28، 2015ގައި ބޮމެއް ގޮއްވާލި އެވެ. މިއީ ރާއްޖޭގައި ބަޔަކަށް އަމާޒުކޮށްް ދިން ދެވަނަ ބޮމުގެ ހަމަލާ އެވެ.

މިފަދަ އެހެން ހާދިސާތަކުގެ ބޭނުމާ ހިލާފަށް މިއީ ސިޔާސީ ބާރުވެރިކަން ހޯދުމުގެ ތެރެއިން ހިންގާފައިވާ ޓެރަރިޒަމްް އަމަލެއް ކަމަށް ބެލެވެ އެވެ. ސަބަބަކީ، މި މައްސަލާގައި ހައްޔަރުކޮށް ތަހުގީގު މުޅިން ހިންގާފައި ވަނީ ސިފައިންނާ ކަމަށް ވާތީ އެވެ. އަދި ބޮން ގޮއްވާލި ކަމުގެ އެންމެ ބޮޑު ތުހުމަތެއް އެޅިފައި އޮތީ ވެސް، އޭރުގެ ނައިބު ރައީސް އަހުމަދު އަދީބުގެ ބޮލުގައި ކަމަށް ވާތީ އެވެ.

"ފިނިފެންމާ" ލޯންޗު މާލޭ ފަޅަށް ވަނުމާ އެކު، އޭގައި ގޮއްވާލި އައިއީޑީގެ ސަބަބުން ރައީސް ޔާމީންގެ އަނބިކަނބަލުން ވަރަށް ބޮޑަށް ޒަހަމްވި އެވެ.

ޔާމީން ރަޝީދު މަރާލުން

ބްލޮގާ ޔާމީން ރަޝީދުގެ ނަން، ހައްދުފަހަނައަޅާފައިވާ ދީނީ ބައެއް ގްރޫޕްތަކުގެ ލިސްޓަށް އަރާފައިވާ އޮންނަތާ އޭރު ލައްކަ ދުވަސް ވެއްޖެ ކަމަށް ވެ އެވެ. އޭނާ ޓްވިޓާގައި ފާޅުކުރަމުން ދިޔަ ހިޔާލުތަކާއި، ހާއްސަކޮށް އޭނާގެ އެކުވެރިޔާ އަދި ގެއްލުވާލައިފައިވާ އަހުމަދު ރިލްވާންގެ މަރާ ގުޅިގެން ދެއްކި ވާހަކަތަކާ ގުޅިގެން އޭނާގެ ނަން ހަރުކަށި ފިކުރުގެ ބައެއް މީހުންގެ މެދުގައި އޮތްް އޮންނަނީ "ކަޅު" ވެފަ އެވެ.

ޔާމީން ރަޝީދަށް މަރުގެ އެތައް އިންޒާރުތަކެއް ލިބެމުން ދިޔުމަށް ފަހު، ރަހުމެއް ނެތި ކަތިލައިލީ، އެޕްރީލް 23، 2017 ވަނަ ދުވަހުގެ ރެ އެވެ. އޭނާ ގެއަށް ވަން ތަނުން، ފިލައި ތިބި ދެ މީހަކު ވެގެން ހަށިގަނޑުގެ އެތައް ތަނަކަށް ވަޅި ހަރައި މަރާލީ އެވެ. އޭނާ އަށް އެކި ސަރަހައްދުން އެރޭ ބަޔަކު ފާރަލި ވީޑިއޯތައް ވެސް ފުލުހުން ދެއްކި އެވެ. އޭނާ މަރާލުމުގެ މަޝްވަރާތައް ފަށާފައި ވަނީ ފުރުގާން މިސްކިތް ތެރޭގަ އެވެ.

މި މައްސަލައިގައި ހަތް މީހެއްގެ މައްޗަށް ހިންގާ ޝަރީއަތް ވެސް ކްރިމިނަލް ކޯޓުގައި މިހާރު އަންނަނީ ހިނގަމުންނެވެ. މިފަދަ އެހެން ހާދިސާތަކެކޭ އެއްގޮތަށް މި ޝަރީއަތް ވެސް ދަނީ ފިނިހަކަ ދުވެެލީގަ އެވެ.

ރައީސް ނަޝީދު އަވަހާރަކޮށްލަން ބޮން ގޮއްވާލުން

ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހަންމަދު ނަޝީދު އަމިއްލަ ގެކޮޅު، ގ. ކެނެރީގެ އިން ނުކުމެ ވަޑައިގެން ކާރުކޮޅަށް އަރާ ވަޑައިގަންނަވަނިކޮށް ހަމަ ވަރަށް ކައިރިން މީހަކު މި މަހުގެ ހަ ވަނަ ދުވަހުގެ ރޭ ބޮމެއް ގޮއްވާލުމާ އެކު އެމަނިކުފާނު ވަނީ ވަރަށް ބޮޑަށް ޒަހަމްވެފަ އެވެ.

ސެކިއުރިޓީއާ ވެސް އެއްކޮށް ވަޑައިގަންނަވަނިކޮށް އެމަނިކުފާނަށް ދިންް ހަމަލާގައި އެމަނިކުފާނުގެ ފުރާނަފުޅު ސަލާމަތްވީ ކިރިޔާ އެވެ. ބައެއް ޑޮކްޓަރުންް ސިފަކުރި ގޮތުގައި، މި ހަމަލާއިން އެމަނިކުފާނު ސަލާމަތްވީ ނަސީބު ރަނގަޅުކަމުންނެވެ. އެހެން ނޫނީ، މިއަދު އެމަނިކުފާނު ދުނިޔޭގައި ނުހުންނެވީހެވެ.

ނަޝީދަށް ދިން ހަމަލާ އަކީ ރާއްޖޭގެ އެންމެ މަތީ ފެންވަރުގެ ބޭފުޅަކަށް އަމާޒުކޮށް ދިން ޓެރަރިޒަމްގެ ފުރަތަމަ ހަމަލާ އެވެ. މި ހަމަލާގެ ތަހުގީގުތައް މިހާރު ކުރިއަށް ދިޔަޔަސް، މިހާތަނަށް ބެލެވޭ ގޮތުގައި މި ހާދިސާ ވެސް ގޮސް ގުޅެނީ ދީނީ ހަރުކަށި ފިކުރާ އެވެ. ސަބަބަކީ، މި ހަމަލައާ ގުޅިގެން ހައްޔަރު ކުރި ތިންް މީހުންނަކީ ވެސް އެ ފިކުރުގެ މީހުންނަށް ކަމަށް ވާތީ އެވެ.

ޓެރަރިޒަމްގެ ހާއްޔަކަށް ރާއްޖެ މުޅިން ބަދަލުވެއްޖެ އެވެ. އެންމެ އާދައިގެ ގޮތަކަށް ރާވަމުންް އައި މިފަދަ ހަމަލާތައް މިހާރު ދައުލަތުގެ އެންމެ އިސްވެރިންނާ ހަމައަށް ދިޔައީ އެވެ. އަނެއްކޮޅުން ވޭތުވެދިޔަ 15 ވަރަކަށް އަހަރުގެ ތެރޭގައި މި ހުރިހާ ހަމަލާތަކެއް ވެސް ދީ، މީހުންގެ ފުރާނަ ދުއްވާލި އިރު އޭގެ ބައެއް ހާދިސާތަކުގެ މައުލޫމާތާއި އިންޒާރު ހުރީ ލިބި ފިޔަވަޅު ނޭޅި އެވެ.

ހަރުކަށި ފިކުރު އަދިވެސް ދަނީ ބޫން ލާފައި ފެތުރެމުންނެވެ. ކަމާ ބެހޭ ފަރާތްތަކަށް އެ މީހުން ހޭލުންތެރިއެއް ނުކުރެވެ އެވެ. މުޅި މުޖުތަމައު އޮތީ ވަރަށް ބޮޑު ބިރެއްގެ ތެރޭގަ އެވެ. ޓެރަރިޒަމްގެ އަމަލުތަކާ އެކު، އެތައް ބަޔަކު ދުނިޔެ އިން ނައްތާލައިފި އެވެ. އެތައް ބޮމެއް ގޮވައިފި އެވެ. މިހާރު ދެން އޮތް ސުވާލަކީ އެންމެ ސުވާލެކެވެ. -- މި މީހުންގެ ޝިކާރައަކަށް މާދަމާ ވާނީ ކާކު ހެއްޔޭ އެވެ؟