އެސްޓީއޯ މިނިވަން ޗެމްޕިއަންޝިޕްގެ ޗެމްޕިއަންކަން ހޯދި އޭދަފުށި ޓީމުގެ ސަޕޯޓަރުން އުފާފާޅުކުރަނީ: ދަނޑަށް މީހުން ވެއްދުން އިތުރުކުރުމަކީ އެފްއޭއެމްގެ އެންމެ ބޮޑު އެއް އަމާޒު. -- ފޮޓޯ: ނިޝާން އަލީ/ މިހާރު
01 މާޗް 2017 - 11:55
12 comments
ދިވެހި ފުޓްބޯޅަ މާކެޓްކުރުމަށްޓަކައި އެފްއޭއެމުން ތިން މިލިއަން ރުފިޔާގެ ބަޖެޓެއް ކަނޑައަޅައި ވަރުގަދަ މާކެޓިން ޑިޕާޓްމަންޓެއް ގާއިމްކުރުމުގެ މަސައްކަތް ފަށައިފި އެވެ.
މިދިޔަ ހޮނިހިރު ދުވަހު އެފްއޭއެމުން ފާސްކުރި ބަޖެޓުގައި މާކެޓިން އަށް ތިން މިލިއަން ރުފިޔާ ކަނޑައެޅުމުގެ އިތުރުން ވަނީ އެފްއޭއެމަށް ޓިކެޓް ވިއްކައިގެން 2.6 މިލިއަން ރުފިޔާ ލިބޭނެ ކަމަށް ޖަހައިފަ އެވެ. އެފްއޭއެމުން އަންޒާދާކޮށްފައިވާ ގޮތުން އޭޝިއަން ކަޕް ކޮލިފައިންގައި މާލޭގައި ފަލަސްތީނާއި އޮމާނާ ދެކޮޅަށް ރާއްޖެ ކުޅޭ މެޗުން އެއް މިލިއަން ރުފިޔާ ލިބޭނެ އެވެ. އަދި ދިވެހި ޕްރިމިއާ ލީގުގެ ގޭޓް ފައިސާގެ ގޮތުގައި 1.6 މިލިއަން ރުފިޔާ ލިބޭނެ ކަމަށް ބަޖެޓުގައި ޖަހާފައިވެ އެވެ.
އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވީ މާކެޓިންގެ މަސައްކަތް ފަށައިގަނެވުމާ އެކު ދަނޑަށް މީހުން ވަންނަ މިންވަރު އިތުރުކުރެވޭނެ ކަމަށެވެ. އޭނާ ވިދާޅުވީ ސީޒަން ފެށިގެން މިހާތަނަށް އައިއިރު އެ މަސައްކަތް ނުފެށި އޮތީ ނަމެއްގައި އެކަން ކުރަން ބޭނުންނުވާތީ ކަމަށެވެ. ބޭނުންވަނީ ވަރުގަދަ ބަޔަކު ހިމަނައިގެން ފުރިހަމަކޮށް އެ މަސައްކަތް ކުރިއަށް ގެންދަން ކަމަށާއި އެގޮތުން ރާއްޖޭގެ ބޮޑު ކުންފުންޏެއްގެ މާކެޓިންގައި އެންމެ އިސްކޮށް ހަރަކާތްތެރިވާ އެއް ބޭފުޅަކު އެފްއޭއެމްގެ މާކެޓިން ޓީމް ހެޑްކުރަން އެއްބަސްވެފައިވާ ކަމަށް ބައްސާމް ވިދާޅުވި އެވެ.
"އަޅުގަނޑުމެން ބޭނުންވަނީ ވަރުގަދަ ބަޔަކު އޭގެ ތެރޭގައި ހިމެނިގެން މިކަން ކުރަން. ކޮންމެ ގޮތެއް ވިޔަސް ދިވެހިރާއްޖޭގެ އެއް ނަމްބަރު ކުޅިވަރަކީ ފުޓްބޯޅަ. ފުޓްބޯޅައިގެ މާކެޓިން އުޅެން ޖެހޭނީ މިދާއިރާއިން ހޮވާލެވޭ ބަޔަކު. އަޅުގަނޑު އުއްމީދުކުރަނީ އެއް މަސް ތެރޭ ޑިޕާޓްމަންޓް ފުލީ ފަންކްޝަން ވާނެ ކަމަށް،" ބައްސާމް ވިދާޅުވި އެވެ. "މާކެޓިން ޓީމު އުފެދި ދިވެހި ފުޓްބޯޅައިގެ ތެރެއަށް އެ ޓީމު ފައްކާވެލުމާ އެކު ދަނޑަށް މީހުން ވެއްދޭނެ ކަމާ މެދު އެއްވެސް ޝައްކެއް ނެތް."
ބައްސާމް ވިދާޅުވީ މާލޭ ލީގުގެ މެޗުތަކަށް މިވަގުތު ޓިކެޓް ނުވިއްކި ނަމަވެސް ގައުމީ ޓީމުގެ މެޗުތަކާއި ދިވެހި ޕްރިމިއާ ލީގުގެ މެޗުތަކުގައި ޓިކެޓް ވިއްކާނެ ކަމަށެވެ. ބައްސާމް ވިދާޅުވީ ޕްރިމިއާ ލީގުގައި އަތޮޅުތެރޭގެ ޓީމުތައް ހިމެނޭތީ އެ މުބާރާތުގައި ސަޕޯޓަރުންގެ އަދަދު އިތުރުވާނެ ކަމަށް ވަރަށް ބޮޑަށް އުއްމީދުކުރާ ކަމަށެވެ.
"ޕްރިމިއާ ލީގުގެ ހަތަރު ޓީމަކީ އަތޮޅުތެރެއިން އަންނަ ޓީމުތައް. ވަރަށް ބައިވަރު ސަޕޯޓަރުން ތިބޭނެ އެ ޓީމުތަކުގައި. މިފަހަކަށް އައިސް ފަސްޓް ޑިވިޝަނުން ވެސް ނުފެނޭ އެ ޓީމުތަކަށް އޮތްވަރުގެ ސަޕޯޓެއް. އެކަށީގެންވާ އަދަދަކަށް މީހުން ވަދެގެންދާތަން ފެންނާނެ ކަމަށް އުއްމީދުކުރަނީ،" ބައްސާމް ވިދާޅުވި އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ޒީނާ
02 March 2017
ކޮބާހޭ ދަނޑުގަ ޖަހަން ބުނި ގޮނޑި ބަރި. އެއް ފޮނި ކަނޑާފަ އަނެއް ފޮނި ކަނޑަން ވާނީ ކުރިން ކެނޑި ފޮނި ފުރިހަމަ ކޮއްފަ. މިމީހުން ނުވާވަރުން ވެސް މޮޅުވާހަކަ ދައްކަން ހަމަ އެކައްޗެއްވެސް ހިތައް ނާރައޭ. ލަދެއް ވެސް ނުގަނެއޭ އަނެއްކާ މީޑިއާ ކުރިމައްޗައް އަރާކައް. ބޭރު ގައުމެއްގަ ނަމަ ނޫސް ވެރިން ގެ ސުވާލައް ކެއް ނުވެގެންވެސް އިސްތިއުފާ ދޭނެ.
ޔަގީން
02 March 2017
އަޗާ ކެޑުންނޫން ކަމެއް އަދި ނުވެދޯ... ދަނޑައް ވަދެ ބެލިއިރު މުޅިތާ އޮތީ ގޮނޑި. އިށީންނާނެ ތަނެއްނޭގިގެން އެންމެފަހުން އައީ ގެޔައް. އަނެއްކާ ތިބުނީ އަނެއްވާހަކަ، ރާއްޖެތެރޭ ނިކަމެތިން ކުޅޭތީ ޓިކެޓް ވިއްކަނީ... ވިއްކަންޔާ ވިއްކާ ހުރިހާ މުބާރަތަކައްވެސް. ވަކި ބަޔަކައް ވަކި ޓީމް ތަކެއްކުޅޭތީ އެހެން ނަހަދާ. މާކަންތައް ބޮޑުވަންޔާ އަހަރުމެން ދަޑަވެސް ނުވަދެފާނަން. ކުރާނެ ކަންތައް މަދުވެގެންނެއް ނޫން މި އުޅެނީ.
މާހިރު
01 March 2017
މީހުން ދަނޑަށް ވައްދަން ބޭނުންނަމަ ދަނޑުގެ ފެންވަރު މިހާރަށްވުރެ ރަނގަޅުވާންޖެހޭކަމަށް ފެނެއެވެ. ދަނޑުގައި ތިބެގެންވެސް ބޮޑު ސްކްރީނުން ރީޕްލޭ ބަލާލެވެން ޖެހޭނެކަމަށް ފެނެއެވެ. މެޗުބަލަން ތިބެން އިށީންދެލާނެ ރަނގަޅު ގޮނޑިތަކެއް ހުންނަންޖެހެއެވެ. ދަނޑުގެ އަރިމަތީގައި ހުންނަ އިސްތިހާރު ބޯޑުތައްވެސް ޑިޖިޓަލް ކޮށްލެވިއްޖެނަމަ ވަރަށް ފުރިހަމަވާނެއެވެ. އަދި ގޭޓުފައިސާއިން ކްލަބްތަކަށް ރަނގަޅު އެއްޗެއް ލިބޭނެފަދަ ނިޒާމެއް ޤާއިމްކޮށް ކްލަބްތަކުން ސަޕޯޓަރުން ދަނޑަށް ވައްދަން މަސައްކަތްތަކެއް ކުރެވިއްޖެނަމަ އެކަމަށް ޙައްލެއް ލިބިދާނެކަމަށް ފެނެއެވެ.
މުޙައްމަދު
01 March 2017
ފުރަތަމަ އެފްއޭއެމްގެ ވެބަސައިތް ރަނގަޅުކޮށްލަދީބަލަ. އެންމެ ކުޑަވެގެން މުބާރާތުގެ ޝެޑިއުލްވެސް ފެންނަވަރު ކޮށްލައިގެން ދޯ މީހަކަށް އެނގޭނީވެސް މެޗް އޮންނަ ދުވަހެއް. ޓީމެއް ކުޅޭ ދުވަހެއް. ޖުލައި 26 ގައި އަޕްޑޭޓްވީ ގޮތަށްވިއްޔަ..
ފާފު
01 March 2017
ތި ދަނޑަކަށް ވަންނާނެ މީހަކު ނުވާނެ ހިލޭ ވެެއްދިޔަސް.
މަ
01 March 2017
ޓިކެޓް ވިއްކައިގެން ނިކަން ފަސޭހައިން 3 މިލިޔަން ރުފިޔާ ހޯދިދާނެ އަހަރެއްގެ ތެރޭގައި. 9000 ވަރަކަށް މީހުންނަށް ދަނޑަށް ވަދެވޭ ނަމަ، އަދި ޓިކެޓެއް 50 ރުފިޔާއަށް ވިއްކިޔަސް އެލިބުނީ ބައި މިލިޔަން. ބޭނުންވަނީ ފުޓްބޯޅަ ފޯރި ހިއްޕާލާފަ، ގައުމީޓީމުގެ 6 ވަރަކަށް މެޗް ގަލޮޅުދަނޑުގައި ކުޅެލަން. ޓިކެޓް އަގު ބޮޑުވެގެން މަށަށްނުވަދެވުނަސް މަބުނާނީ ފޯރި ހިފައިފިއްޔާ 100 އަށްވެސް ގަނެގެން ވަންނާނެ 9000 މީހުން ލިބޭނޭ މި މާލެއިން.
ސިވިލް
01 March 2017
މާކެޓް ކުރަނީ ކޯްޗެއް ހާސިލް ކުރަން ކަން އެގިލަން ބޭނުން
ޣަމީރާ
01 March 2017
ބަޖެޓުގައި މޮޅު ކޮށްލަން ވަރުވަރުން ހިސާބު އަދަދު ޖެހިދާނެ. މީހުން ވަންނާނީ ތަނަވަސްކަމާއި ހުސްވަގުތު އޮތްވަރަކުން. ޑިސްޕޯސަބަލް އިންކަމު ޑޭފިސިޓުގަ އުޅޭއިރު ބޮޑު އަގުގަ ބަލަން ނުވަދެވޭނެ ކޮއްމެބަޔަކު މާަކެޓު ކުރިއަސް
ނައުޝާން
01 March 2017
އަތޮޅުތެރޭ ޓީމްތައް ކުޅޭއިރު ޓިކެޓް ވިއްކަން ހަމަޖެއްސުމަކީ ހަމަ ސީދާ އަތޮޅުތެރޭ މީހުން ފެލާލުން. އެމީހުން ވަންނާނެކަން ގައިމު ވިއްޔަ!! ދެން ތިޔަ ބުނާ މާކެޓިންގ ބިޔަ ބޮޑު ކުންފުނި އައިސް މީހުން ވައްދާވަރެއް ބަލަމާ.. މަގޭ އަންދާޒާ އަކީ 26 ރުފިޔާ ވަރު ލިބޭނެ ކަން. ނޮޓް 2.6 މިލިއަން.
މުހައްމަދު
01 March 2017
އަހަރުންބޭނުން މެޗްތައް ބަލަން ދާން، އެކަމަކު އަހަރުން ސަރުކާރު މުވައްޒަފުނަށް ނުވާތީ މަސައްކަށް ކުރަން ޖެހެނީ ހެނދުނު 8:00 އިން ރޭގަނޑު 22:00 އަށް، އެވަރުންވެސް ލިބެނީ 8000 ރުފިޔާ، މެޗް ބަލަން ދާނެ ވަގުތެއް ނުވޭ. ގައުމީ ކަންކަމުގައި އުޅޭނެ ވަގުތެއް ނުވޭ..