ކުޑަހުވަދޫ ގޯލްޑް ކަޕަށް، ފުޓްބޯޅަ ސަލާމަތް ކުރުމުގެ އަޒުމެއްގައި

ދިވެހިންގެ މެދުގައި ބޭރުގެ ފުޓްބޯޅަ އަށް ބޮޑު ބޮޑު މަގުބޫލުކަމެއް އޮތަސް ރާއްޖޭން ފުޓްބޯޅަ އުވިގެން ހިނގައިދާނެ ކަމުގެ ބިރު ކުޑަހުވަދޫ ޓީމުގެ މެނޭޖަރު އިސްމާއީލް ފާރިސް އަށް އެބައޮތެވެ. ހާއްސަކޮށް އަތޮޅުތެރެއިން އެކަން ނެތި ހިނގައިދާނެކަމުގެ ކަންބޮޑުވުން އޭނާ ފާޅު ކުރި އެވެ.

ޕާކިސްތާނުގެ ފުޓްބޯޅަ އަށް ވީ ގޮތް ރާއްޖޭގެ ފުޓްބޯޅަ އަށް ވެސް މިއޮތީ ވެފަ އެވެ.

ރަސްމީ ފުޓްބޯޅައިގެ ހުރިހާ މުބާރާތްތަކާއި އަދި ރަސްމީ ފުޓްބޯޅައިގެ ނިންމުންތަކަށް ބަސްބުނުމުގެ ބާރު ވެސް އެފްއޭއެމުން ދީފައި އޮތީ ހަމައެކަނި މާލެ އަށް ބަރޯސާވެފައިވާ ކްލަބް ތަކަށެވެ. އަތޮޅު ފުޓްބޯޅައާ މެދު އެފްއެއެމުން ވީ އިހުމާލުން ގިނަ ރަށްރަށުގައި ފުޓްބޯޅައިގެ ރޫހް އޮތީ ނެތިގެން ގޮސްފަ އެވެ.

ފާރިސް ބުނީ ރަށްރަށުގައި ވެސް ފުޓްބޯޅަ އަށް ވުރެ ބޮޑަށް ވައިގައި ހިފައި ގިނަ މުބާރާތްތަކެއް ވެސް އޮންނަނީ މިނީ ފުޓްބޯޅަ (ރާއްޖޭގައި ކިޔާ ގޮތުންނަމަ، ފުޓްސަލް) އަށް ހާއްސަ ކޮށްފައި ކަމަށެވެ.

ފުޓްބޯޅަ އަށް އިންވެސްޓް ކުރާނެ މީހުން މަދުވެ، އަމިއްލަ ޖަމިއްޔާތަކާއި ރަށްރަށުގެ ކައުންސިލުތަކުން ދީލާލީ މިނީ ފުޓްބޯޅަ ނުވަތަ ފުޓްސަލް މުބާރާތްތަކަށެވެ.

މިރޭ ފަށާ ގޯލްޑް ކަޕަށް ތައްޔާރުވި ކުޑަހުވަދޫ ޓީމަށް އެ މައްސަލަ ކުރިމަތިވި އެވެ. މިނިވަން ޗެމްޕިއަންޝިޕް ފުޓްބޯޅަ މުބާރާތް 2017 ގައި އެ ރަށުން ކާމިޔާބު ކުރި އިރު ބޮޑު ރޫހެއް އޮތެވެ. ތަޖުރިބާކާރު ކޯޗު މުހައްމަދު ޝިޔާޒު (މޯހަން) ކޯޗަކަށް ހަމަޖައްސައި މުބާރާތުގެ އެންމެ ވަރުގަދަ ޓީމަށް ކުޑަހުވަދޫ ވެގެން ދިޔަ އެވެ.

އެކަމަކު ފާރިސް ބުނި ގޮތުގައި އެ ވަރުގަދަ ޓީމެއް މިފަހަރު މުބާރާތާ ކުރިމަތިލިއިރު އެ ރަށުގައި ނެތެވެ. ޓީމަށް ހަރަދުކޮށް ދޭނެ މީހުން ވެސް މަދުވި އެވެ. މިނިވަން ޗެމްޕިއަންޝިޕް ކާމިޔާބު ކުރި ޓީމަށް ކުޅުނު ކުޅުންތެރިންނަށް ވެސް މިފަހަރު މުބާރާތުގައި ކުޅެވޭކަށް ނެތެވެ.

"އެހެންވެ އަޅުގަނޑުމެން ޓީމު އެކުލަވާލީ މާލޭގައި ދިރިއުޅޭ ރަށު ކުދިން ގިނައިން ހިމަނައިގެން،" ގޯލްޑް ކަޕަށް ކުޑަހުވަދޫން އެކުލަވާލި ޓީމާ ބެހޭގޮތުން ފާރިސް ބުންޏެވެ.

އެކަމަކު އަންނަ އަހަރު ބާއްވާ ފުޓްސަލް މުބާރާތަށް ކުޑަހުވަދޫން ވެސް ދުރާލާ ތައްޔާރުވާނެ ކަމަށް ފާރިސް ބުންޏެވެ.

"ގޯލްޑް ކަޕް އިއުލާން ކުރީ ވެސް އެ ދެމެދުގައި މާ ގިނަ ދުވަސްތަކެއް ނެތް. އެކަމަކު ބޮޑު ފުޓްބޯޅަ ނެތިގެން ހިނގައިދާނެތީ. އެހެން ވިޔަ ނުދޭން އަޅުގަނޑުމެން ބޭނުންވީ އާދައިގެ ގޮތަކަށް ވެސް މުބާރާތުގައި ބައިވެރިވާން،" އޭނާ ބުންޏެވެ.

"އަޅުގަނޑު އުއްމީދު ކުރަނީ ދުރާލައި ވަގުތު ލިބިގެން އަންނަ އަހަރުގެ މުބާރާތަށް ތައްޔާރުވާން ވަގުތު ލިބޭނެކަމަށް."

ބައެއް ރަށްރަށުގައި މިހާރު ބާއްވަނީ މިނީ ފުޓްބޯޅަ ނުވަތަ ރާއްޖޭގައި ކިޔާ ގޮތުންނަމަ ފުޓްސަލް މުބާރާތް އެކަންޏެވެ. ފުޓްބޯޅަ މުބާރާތް ކޮންމެ އަހަރަކު ބާއްވަނީ ނިސްބަތުން މަދު ރަށެއްގަ އެވެ. އެކަމަކު ކުޑަހުވަދޫ ކައުންސިލުން ވަރަށް ހިތްވަރުކޮށްފައި މިދިޔަ ތިން އަހަރު ވެސް ފުޓްބޯޅަ މުބާރާތް ބާއްވާފައިވާކަން އޭނާ ފާހަގަ ކުރި އެވެ.

ބޮޑު ފުޓްބޯޅަ ރަށުގައި ދެމެހެއްޓޭތޯ ކުޑަހުވަދޫ ކައުންސިލާއި އޭނާ ނިސްބަތްވާ ކްލަބް، ކުޑަހުވަދޫ ސްޕޯޓްސް ކްލަބުން މަސައްކަތް ކުރާ ކަމަށް ފާރިސް ބުންޏެވެ.

ވަޒީފާ އާއި އާމްދަނީ ހޯދުމުގެ އެހެން މަސައްކަތްތައް ހުރި ގޮތުން މި މުބާރާތުގައި ކުޑަހުވަދޫގެ އެންމެ މޮޅތި ކުޅުންތެރިން ނުފެންނާނެ އެވެ. އެކަމަކު ފާރިސް ބުނީ ރާއްޖޭގެ ފުރަތަމަ ޑިވިޝަނުގައި ވެސް ކުޅެވޭނެ ފެންވަރުގެ ހުނަރުވެރި ކުޅުންތެރިން ކުޑަހުވަދޫގައި އެބަތިބި ކަމަށެވެ. އެކަމަކު އެ ކުޅުންތެރިންގެ ކަންފަތާ ހަމަޔަށް ވެސް ފޯރާފައި އޮތީ ފުރަތަމަ ޑިވިޝަނުގެ ކުޅުންތެރިންނަށް ކްލަބްތަކުން ބަރާބަރަށް މުސާރަ ނުދޭ މައްސަލަ އެވެ.

"މިނިވަން ޗެމްޕިއަންޝިޕްގައި ވަރަށް މޮޅަށް ކުޅެ މާލެ އަށް ކުޅެން އައި އަޅުގަނޑުމެންގެ ރަށު ކުޅުންތެރިޔަކަށް އެހެން ދީމާވި. އެންމެ ފަހުން އެ ކުޅުންތެރިޔާ ވެސް ކުޅެން ފެށި ފުޓްސަލް މުބާރާތްތަކުގައި. އެއީ ފުޓްސަލް މުބާރާތްތަކުން ފައިސާ ލިބޭތީ. ކްލަބުން މުސާރަ ނުދެވެން ފެށީމަ ދެން މަޖުބޫރު ވަނީ ފުޓްސަލް އަށް ބަދަލުވާން،" ފާރިސް ބުންޏެވެ. ކުޑަހުވަދޫ ޓީމު އެންމެ މުހިންމު ކުޅުންތެރިޔަކީ ޓީސީގެ ކުރީގެ ކެޕްޓަން އަހްމަދު ރިލްވާން (ބެން) އެވެ. ދެވަނަ ޑިވިޝަންގައި އެންމެ ފަހުން ވިކްޓަރީ އަށް ކުޅުމަށް ފަހު މިރޭ ފުވައްމުލަކާ ދެކޮޅަށް ނުކުންނަ މެޗަކީ ގާތްގަނޑަކަށް އަހަރެއް ފަހުން ގަލޮޅު ދަނޑުގައި އޭނާ ކުޅޭނެ ފުރަތަމަ މެޗެވެ.

މެޗު ފަށާނީ މިރޭ ނުވައެއް ޖަހާ އިރު އެވެ. ޕީއެސްއެމުން މެޗު ވަގުތުން ދައްކާނެ އެވެ.