ޓާސްޓެގަންއާ ދެކޮޅަށް ފިޔަވަޅު އަޅަން ބާސާއިން މައްސަލަ ބަލަނީ

ބާސެލޯނާގެ ކެޕްޓަން މާކް-އެންޑްރޭ ޓާސްޓެގަންއާ ދެކޮޅަށް ފިޔަވަޅު އަޅަން އެ ކްލަބުން މައްސަލަ ދިރާސާކުރަން ފަށައިފި އެވެ.

މިދިޔަ އަހަރު ލިބުނު ބޮޑު އަނިޔާއަކާ ގުޅިގެން ބާސާއިން ވަނީ ކީޕަރުގެ މަގާމު ފޫބެއްދުމަށް ޕޮލެންޑްގެ ކުރީގެ ގައުމީ ކީޕަރު ވޮއިޒެޗް ޝެޒްނީ ސޮއި ކުރުވާފަ އެވެ. ބާސާގައި އޭނާ ދެއްކި ކުޅުމާ އެކު އޭނާގެ އިތުބާރު ކްލަބްގައި ވަނީ ބޮޑުވެފަ އެވެ.

ބާސާ އަށް ކުރިމަތިވެފައިވާ މާލީ ގޮންޖެހުންތަކާ ހެދި އާ ކުޅުންތެރިން ސޮއި ކުރުވުމުގައި އެ ޓީމަށް ވަނީ ހުރަސްތައް ކުރިމަތިވެފަ އެވެ.

ސްޕެއިންގެ މުންޑޯ ޑިޕޯޓިވޯއިން ބުނީ ޓާސްޓެގަންގެ މައްސަލަ ބަލަން ބާސާއިން އެ ކްލަބްގެ ގާނޫނީ ޓީމާ ހަވާލު ކުރީ އޭނާގެ އިންޖަރީ ރިޕޯޓްގައި ސޮއި ކުރަން ޓާސްޓެގަން ދެކޮޅު ހެދުމުން ކަމަށެވެ.

މިދިޔަ އަހަރު ކުރިމަތިވި އަނިޔާއާ ގުޅިގެން ސީޒަން އެއްކޮށް ގެއްލުނު ކުޅުންތެރިޔާގެ މެޑިކަލް ރިޕޯޓް ލަލީގާގެ ކަމާބެހޭ ކޮމިޓީ އަށް ފޮނުވަން ޖެހެ އެވެ. އެ ރިޕޯޓް ފުރިހަމަ ވާނީ ކުޅުންތެރިޔާ ވެސް ސޮއި ކުރުމުންނެވެ. ކުޅުންތެރިޔާގެ ހުއްދަ ނެތި ރިޕޮޓް ނުފޮނުވޭނެ އެވެ.

މެޑިކަލް ރިޕޯޓްގައި ކުޅުންތެރިޔާ އަނިޔާއިން ރަނގަޅުވާން ފަސް މަސް ދުވަސް ހޭދަވާނެ ކަމަށް ބެލެވޭނަމަ، އޭނާގެ މުސާރައިގެ 80 ޕަސަންޓުން ބައެއް އިންސާފުވެރިކަމާ އެކު ކްލަބް ބޭނުންވާ ގޮތަކަށް ކަނޑައެޅިދާނެ އެވެ. ޓާސްޓެގަންގެ މުސާރައިން ބައެއް ނުދީ ހިފެހެއްޓިޖެނަމަ ބާސާ އަށް އަލަށް ބަދަލުވި ކީޕަރު ޔޮއާން ގާސިއާ ރަޖިސްޓަރީ ކުރުމަށް މާލީ ގޮތުން ހުސް ޖާގައެއް ހޯދޭނެ އެވެ.

މިދިޔަ ސީޒަނުގެ ފުރަތަމަ ހާފުގައި ޑެނީ އޮލްމޯ ރަޖިސްޓަރީ ކުރުމުގައި ބާސާ އަށް ހުރަސްތައް ކުރިމަތިވީ، މާލީ ގޮތުން ހުސްޖާގައެއް ނެތުމުންނެވެ. އެކަމަކު އަންޑްރެސް ކްރިސްޓިއަންސެން އަށް ކުރިމަތިވި އަނިޔާ ރަނގަޅުވާން ހަތަރު މަހަށް ވުރެ ދިގު މުއްދަތެއް ހޭދަވާނެކަމަށް މެޑިކަލް ރިޕޮޓުން ދެއްކި އެވެ. އޭނާގެ ސޮއި ކުރުވައި ލަލީގާގެ މެޑިކަލް ކޮމިޓީ އަށް ރިޕޯޓް ހުށަހެޅި އެވެ.

އޭނާގެ މުސާރައިން ބައެއް ބާސާއިން ނުދޭ ގޮތަށް ކަނޑައަޅުމުން މާލީ ގޮތުން ޖާގައެއް ހުސްކުރެވުނެވެ. އޮލްމޯ ރަޖިސްޓަރީ ކުރީ އެ ޖާގަ ލިބުމުން ފިނި މޫސުމުގެ ޓްރާންސްފާ ޕީރިއަޑްގަ އެވެ.

އުމުރުން 33 އަހަރުގެ ޓާސްޓެގަންގެ ނެތަސް ޝެޒްނީއާ އެކު ބާސާއިން ކާމިޔާބު ހޯދުމުން ޓާސްޓަގަން ދޫކޮށްލަން ބާސާއިން އޮތީ ތައްޔާރަށެވެ. ޔޮއާން ގާސިއާ އަކީ ބަދަލު ކީޕަރުގެ މަގާމަށް އެސްޕެނިޔޯލުން ގެނައި ކީޕަރެވެ.

މެންޗެސްޓާ ޔުނައިޓެޑްގެ ފޯވާޑް މާކޮސް ރަޝްފޯޑް ލޯނު އެއްބަސްވުމުގެދަށުން ބާސާއިން ވަނީ ސޮއި ކުރުވާފަ އެވެ. އެކަމަކު އަދި ވެސް އޭނާ ރަޖިސްޓަރީ ކުރެވޭނެ ގޮތެއް އެ ކްލަބަކަށް ނުހޯދެ އެވެ.