ކުރު ވާހަކަ: އަލަތު ލޯބި

މީހުން ކިޔާ އުޅޭތީ އަހަމެވެ. އަލަތު ލޯބި ކާމިޔާބުވާނީ ހަމައެކަނި ނަސީބުވެރިންނަށެވެ. އަދި އެލިސްޓްގައި ހިމެނިގެން ދަނީ ނިސްބަތުން މަދު ބައެކެވެ. ޚުދު އަހަރެންގެ ނަސީބު ހުރި ގޮތާ މެދު ހިޔާލު ކުރެވެން ފެށީ ހިތް އެދޭ މީހަކާ އަލަށް ބައްދަލުވުމާ އެކުގައެވެ. ޝާފީ ފުރަތަމަ ފެނުނީ ކަންމަތީ ފިހާރައިގައި ސޭޓަކަށް އިންދައެވެ. އެންމެ ފެނިލުމަކުން ވެސް އަހަރެންނަށް އޭނަ ރީތި ވެއްޖެއެވެ. ދެތިން ދުވަސްވީއިރު ދެކެފަރިތަވެ ކުދިކުދި ވާހަކަ ބުނެލާ އުޅެން ފެށިއެވެ. އަހަރެން އެހުމުން ޝާފީ ކިޔައިދިނެވެ. އޭނަ އޭލެވެލް ނިންމީ ނިމުނު އަހަރެވެ. އަހަރެން އޭރު ކިޔަވަމުން ދިޔައީ ގްރޭޑް ނުވައެއްގައެވެ.

އާ ދުވަހަކަށް އިރު އަރައިގެން ގޮސް އޮއްސޭއިރު އެތަކެއް ފަހަރު އަހަރެންނަށް ޝާފީ ފެނެއެވެ. އެވަރުވެސް އަހަރެންނަށް އޮންނަނީ މަދުވެފައެވެ. ހިތް އެދެނީ އަބަދާއި އަބަދު އެސޫރަ ފެންނަ ހިސާބުގައި ވުމަށެވެ. ފަހުން ފަހުން މަންމަ ނުބުންޏަސް ކޮންމެވެސް އެއްޗެއް ގަތުމުގެ ބަހަނާގައި ފިހާރައަށް ދަމެވެ. ހަރުގަނޑުތައް ކައިރީގައި ހިނގަ ހިނގާފައި ހުސް އަތާ ގެއަށް އަންނަ ފަހަރު މަދެއް ނުވާނެއެވެ. އެކަމަކު ލޯބި ފައުޅު ކުރާނެ ހިތްވަރެއް އެކެއް ނުކުރެވުނެވެ. ބިރުގަތީ ހިތް ހަލާކު ވެދާނެތީއެވެ. ޝާފީ އަހަރެންގެ ލޯބި ޤަބޫލު ނުކޮށްފި ނަމަ އެހިސާބުން އެކުވެރިކަން ވެސް ނިމުމަކަށް އައީއެވެ. އެއީ އަހަރެން ބޭނުންވާ ގޮތެއް ނޫނެވެ. މަލެއްގެ ފޮނިކޮޅު ނުލިބުނަސް ވަޔާއެކު އަންނަ މީރުވަހަކީ ވެސް ހާދަ ބޮޑު ނަސީބެކެވެ.

ދެ އަހަރެއްހާ ދުވަސް ވަންދެން ޝާފީ ފިހާރައިގައި މަސައްކަތް ކުރިއެވެ. އެއަށްފަހު ކުއްލިއަކަށް ގެއްލުނީއެވެ. އެތާ މަސައްކަތް ކުރާ އިތުރު ކުއްޖަކު ކުރެން އަހަރެން ސުވާލު ކުރީމެވެ. އެހިސާބުން އެނގުނީ ޝާފީއަށް ސަރުކާރު ވަޒީފާއެއް ލިބިގެން ފިހާރައިން ވަކިވިކަމެވެ. އަހަރެއް ފަހުން އަހަރެންނަށް ލިބުނީ ޝާފީގެ ކައިވެނީގެ ޚަބަރެވެ. ހިތް ހަލާކުވި ނަމަވެސް ލޯބި ފުހެއެއް ނުލެވުނެވެ. ވޭތުވެގެން ދާ ކޮންމެ ދުވަހަކާ އެކު ހިތުގައި އޮތް ލޯބި ދިޔައީ ފުންވެގެންނެވެ. ހާސިލް ނުވާނެކަން އެނގުނަސް އުންމީދުގެ ހުޅުކޮޅެއް ނުނިވެއެވެ. އެކަމަކު އެކަން ދެމިގެން ދިޔައީ މަދު ދުވަސްކޮޅަކަށެވެ. ޝާފީއަށް އަަލަތު ދަރިފުޅު ލިބެންދެނެވެ. އެހިސާބުން އަހަރެންނަށް ޤަބޫލު ކުރެވުނެވެ. އަހަރެންގެ ނަން އޮތީ ނަސީބުވެރިންގެ ލިސްޓުން އުނިވެފައެވެ. ޝާފީ މަތިން ހަނދާން ނައްތާލަން ނިންމީ ދެނެވެ.

ލޯބި ނުލިބުނަސް ދިރިއުޅުން އަދި ހުއްޓުނީއެއް ނޫނެވެ. ދިރި ހުރީތީ ދިރިއުޅެން ޖެހެއެވެ. އަހަރެންގެ އަމާޒު ހުރީ ކިޔަވައިގެން އަމިއްލަ ފައިމައްޗަށް ތެދުވުމަށެވެ. އޯލެވެލް ނިމުނުއިރު ކުރިއަށް ދާނެ ދާއިރާ އޮތީ ކަނޑައަޅައިފައެވެ. އަހަރެން ބޭނުންވީ ވިޔަފާރީގެ ރޮނގުން މަތީ ތައުލީމު ހާސިލް ކުރާށެވެ.

ކޮލެޖަށް ފުރަތަމަ ދާން އޮތް ދުވަހު ބޯކޮށް ވާރޭ ވެހެމުން ދިޔައެވެ. ޓެކްސީއެއްގެ އިންތިޒާރުގައި ހުރެގެން ފެން ފުރުނީ ފޫނެއް ފަޔަކަށެވެ. އެންމެފަހުން ތެމުނަސް ހެޔޮކަމަށް ހަދާފައި ކުޑައެއް ހޯދައިގެން ހިނގައިގަތީއެވެ. ޖެހޭ ވަޔާއެކު ދެފަހަރެއްގެ މަތިން ކުޑަ ފުށުން ޖަހައިލިއެވެ. ކުލާސް ހޯދައިގެން ގޮސް ވަދެވުނުއިރު ގިނަ ކުދިން ތިބީ ގޮނޑި ތަކުގައި އިށީނދެއެވެ. ޓިޝޫއަކުން މޫނު ހިއްކަމުން ގޮސް އެންމެ ކައިރިން ފެނުނު ހުސް ގޮނޑީގައި އިށީނދެއްޖައީމެވެ. އެވަގުތު ޖެހިގެން އިން ގޮނޑީގައި އިން މީހާ އަހަރެންގެ ނަން ކިޔާލައިފިއެވެ. ވަގުތު މޭގަނޑު ފިނިވެގެން ދިޔައެވެ. ބަލާލިއިރު ކަމަކު ދާކަށް ނެތެވެ. ކައިރީގައި އިނީ ޝާފީއެވެ. ހިތުގެ ފުނުގައި ގައިދުކޮށްފައި ވި އިހްސާސްތައް ހިލިހިލާތައް ކޮށާލުމަށް ފަހު އުތުރި އަރައިގެން ދިޔައީ މިހެންނަކުން ނޫނެވެ. ދެވަނަ ފަހަރަށް އެސޫރަ ފެނުމުން އެލޯބި ތާޒާވެގެން އައީ ކުރިއަށްވުރެވެސް މާބޮޑަށެވެ. އެހިސާބުން ސިކުނޑީގައި ވީ އެންމެ ސުވާލެކެވެ. ކުރިއަށް އޮތް ދޮޅު އަހަރު ދުވަސް އަހަރެން ހޭދަ ކުރާނީ ކިހިނެއް ހެއްޔެވެ؟

ކޮންމެ ދުވަހަކު އަހަންނަށް ޝާފީ ފެނެއެވެ. ކޮންމެދުވަހަކު ޝާފީ އައިސް އިންނަނީ އަހަރެންގެ ކުރިމަތީގައެވެ. އަހަރެން ވާހަކަ ނުދައްކަން އިނަސް އޭނައަށް ޖަވާބު ނުދީއެއް ނީނދެވެއެވެ. ކައިރީގައި އިނދެގެން ވާހަކަދައްކަންޏާ ތައްބައްދައިގެން އިނދެވޭނީ ކާކަށް ހެއްޔެވެ؟ ހީލާއިރު އެކޯތާފަތަށް އެޅޭ އަޑިކޮޅަކީ އަހަރެންގެ ހިތެވެ. އެއަޑިކޮޅުގައި ބޮސްދިނުމަކީ އަހަރު ދުވަސްވީ ހުވަފެނެކެވެ. އެކަމަކު އޭރާއި މިހާރު ތަފާތެވެ. އޭރު ޝާފީއަކީ ކުލަ ރީތި ހުވަފެނެކެވެ. މިއަދު އެއީ ހިތި ހަޤީޤަތެެވެ. އެހެން މީހެއްގެ ހައްޤެކެވެ. ކުޑަ ފިރިހެންކުއްޖެއްގެ ބައްޕައެކެވެ. އަމިއްލަ ނަފްސް ކޮންޓްރޯލްގެ ދަށުގައި ބެހެއްޓުމަށް ތަކުރާރުކޮށް އެކަންކަން ހަނދާން ކޮށްދޭން ޖެހެއެވެ.

ވިޔަފާރި ކިޔަވަމުންދިޔަ ދަރިވަރުންގެ ތެރެއިން ދެކުއްޖަކަށް ބައިވެރި ވެވޭ ގޮތަށް ލަންކާގައި އޮތް ވޯކްޝޮޕްގައި ބައިވެރިވުމުގެ ފުރުސަތު އަހަރެންނާ ޝާފީއަށް ލިބުނެވެ. މުއްދަތަކީ އެއް މަހެވެ. އަހަރެމެން ތިބީ ޖެހި ޖެހިގެން ހުރި ދެކޮޓަރީގައެވެ. ވޯކްޝޮޕް އޮންނަ ތަނަށް ދަނީ އެއް ބަހެއްގައެވެ. އެކުވެރިކަން އިތުރަށް ބަދަހިވެގެން ދިޔައީ މިމުއްދަތުގައެވެ. ޝާފީގެ ދިރިއުޅުމުގެ ޒާތީ ވާހަކަތައް ވެސް އަހަރެންނާ ހިއްސާ ކުރިއެވެ.

ރީނާއާ ޝާފީ ކައިވެނި ކުރީ ރައްޓެހިވެގެން ގިނަ ދުވަހެއް ނުވެއެވެ. އޭރު ހާލަތު ހުރި ގޮތުން ދިރިއުޅެވެން އޮތީ ރީނާގެ މަންމަ ގޭގައެވެ. ޝާފީގެ އުންމީދަކީ ގިނަ ދުވަހެއް ނުވެ އަމިއްލަ ތަނަކަށް ދެމީހުން ބަދަލުވުމެވެ. މައިދައިތަ އާއި ގޭގައި އުޅޭ އެހެން މީހުންގެ ސަބަބުން ޝާފީއަށް އަބަދުވެސް އުދަނގޫވެއެވެ. ރީނާގެ ކުރިމަތީގައި އޭނައަށްވުރެ އެމީހުންގެ ބަސް ވިކެއެވެ. ދެމީހުންގެ މެދުގައި ޖެހޭ މައްސަލަތަކުގެ ސަބަބަކަށް އެމީހުން ވެފައި އެބަހުއްޓެވެ. ރީނާއަށް ކުށްވެރިވަނީ ޝާފީއެވެ. އެންމެފަހުން ޝާފީ އެމީހުން އުޅެން އެޕާޓްމެންޓެއް ހޯދިއެވެ. އެކަމަކު ރީނާގެ ހިޔާލު ތަފާތެވެ. ކުޑަ ކުއްޖަކު ގޮވައިގެން އެކަނި އެޕާޓްމެންޓެއްގައި ނޫޅެވޭނެކަމަށް ބުންޏެވެ. އާއިލާ މީހުންގެ ފަރާތުން ލިބޭ އެހީތެރިކަން ހުއްޓުމުން ދިރިއުޅުމަށް ދަތިވާނެ ކަމަށް ބުނެ ގެއަކުން ނުނިކުތެވެ. ދެމީހުން ދެބަސްވެ ކައިވެނީގެ ގުޅުން ހީނަރުވިއެވެ. ވަކިވާން ޝާފީ ބޭނުން ނުވީ ދަރިއަކު ހުރީތީއެވެ.

އެއްމަސް ފަހުން އަހަރުމެން އެނބުރި އައިއިރު އަހަރެންނާ ޝާފީއަކީ އެންމެ ގާތް އެކުވެރިންނެވެ. އަހަރެންގެ އަޑު އަހާނުލައި ޝާފީއަށް ރޭގަނޑު ނިދޭ ކަމަކަށް ވެސް ނުވެއެވެ. ފިލާވަޅު ދަސްކުރުމާއި އެސައިމެންޓްތައް ނިންމުމުގައި ޝާފީގެ ފަރާތުން ލިބޭ އެހީތައް ގިނަ ގުނައެވެ. އެއަށްފަހު ކުލާހުގައި އަނެއްކާވެސް އަހަރެމެން ތިބެނީ ޖެހިޖެހިގެން ހުންނަ ދެގޮނޑީގައެވެ. ހުސް ވަގުތުގައި ކޮފީތަކަށް ދަމެވެ. ބައެއް ރޭރޭ އެކީގައި ކެއުމަށް ދިއުމާއި ގާޑިޔާތަކަށް މަޖާ ކާން ދިއުން އޮވެއެވެ. ގޭގައި މައްސަލައެއް ޖެހުނަސް ޝާފީ އަންނަނީ އަހަރެން ކައިރިއަށެވެ. އޭނައަށް ހިތްހަމަޖެހުން ލިބެނީ އަހަރެންނާ ހިއްސާ ކޮށްލެވުނީމައެވެ.

އެސައިމެންޓެއް ނިންމަން ދެމީހުން އަހަރެންގެ ކޮޓަރީގައި ތިބި ރެއެކެވެ. ކުއްލިއަކަށް ވާރޭ ވެހެން ފެށުމުން އަހަރެން ތެދުވީ ކޮފީ ބޯހިތްވެއްޖެއޭ ބުނެފައެވެ. ވާރޭ ވެހެން ފަށާއިރަށް ފުރަތަމަ ވެސް ހިތަށް އަންނަނީ ކޮފީއެވެ. ޝާފީ އިނީ ލެޕްޓޮޕަށް ނަޒަރު ހުއްޓާލައިގެންނެވެ. އަހަރެން ބަދިގޭގައި އުޅެފައި އައިއިރު އޭނަ ތެދުވެގެން ގޮސް ހުރީ ކުޑަދޮރުން ބޭރު ބަލާށެވެ. ކޮފީ ޖޯޑުތައް ބަހައްޓާފައި ގޮވާލީމަ ވެސް ހުރި ގޮތަށް ހުރީއެވެ. އަހަރެން ގޮސް ކައިރިވުމުން އަހަރެން މޫނަށް ބަލައިލީ ތަފާތު ނަޒަރަކުންނެވެ. ހަމަ އެފިޔަވަޅު މަތީ ހުރެފައި ފަސް ޖެހުމެއްނެތި ޝާފީ އަހަރެންނަށް ލޯބި ހުށައެޅިއެވެ. އެކުގައި ހޭދަ ކުރި އެއްމަސް ތެރޭ އަހަރެންގެ ފުށުން ފެނިފައިވާ ރަނގަޅު ސިފަތަކުގެ ސަބަބުން އޭނަގެ ހިތުން އަހަރެންނަށް މަޤާމެއް ހުސްވެފައިވާ ވާހަކަ ކިޔައިދިނެވެ. އެވާހަކަތައް އަހާފައި އިސްޖެހުނު ގޮތަށް އަހަރެންނަށް ރޮވުނީއެވެ. ޝާފީ ވަރަށް ކަންބޮޑުވެގެން އަހަރެންގެ ކަރުނަތައް ފުހެދިނެވެ. ޖަވާބު ދޭން ދަތިއްޔާ ފަހުން އަންނާނެ ވާހަކަ ބުނެފައި ދާން އުޅުމުން ހުއްޓުވީ އަހަންނެވެ. އަހަރެން ވިސްނާކަށް ބޭނުމެއް ނޫނެވެ. އަހަރެންގެ ޖަވާބު އަހަރެންނަށް އަބަދުވެސް އެނގެއެވެ.

ފުރަތަމަ ފިހާރައިން ފެނުނީއްސުރެ ޝާފީއަށް ހިތް ދެވިފައިވާ ވާހަކަ އެރޭ ކިޔައިދިނީމެވެ. ޝާފީ އަންތަރީސްވިއެވެ. އެރޭ އަހަރެން ދިނީ ޝާފީ އެންމެ ބޭނުންވެފައި ހުރި ޖަވާބެވެ. ޖެހިގެން އައި ދުވަހަށް އަހަރެން ލޯ ހުޅުވައިލީ ހަޔާތަށް އައިސްފައިވާ ބަހާރު މޫސުމާ ކުރިމަތި ލުމަށެވެ. އަހަރެމެންގެ ލޯބީގެ ބަގީޗާގައި ހުރިހާ ކުލައެއްގެ އެންމެ މީރުވަސް ދުވާ މާމެލާމެލި ފަރިވޭވޭ ހުއްޓެވެ. ތިން އަހަރުގެ ހަނަފަސްކަން ދިޔަ ތަނެއް ވެސް ނޭނގެއެވެ. އަހަންނަށް ނުވިސްނުނީ އެއީ ވަގުތީ އުފާވެރިކަމެއް ކަމެވެ. އަހަރެން އަމިއްލަ ގަނޑުވަރު ބިނާކޮށްގެން އުޅުނީ އެހެން މީހެއްގެ ބިމެއްގައެވެ.

އެއްރެއަކު އަހަރެން ނިދަން އޮތްވާ ޝާފީ ގުޅާފައި ދިނީ ރީނާ ދެވަނަ ދަރިއަކަށް ބަލިވެއިން ޚަބަރެވެ. ހީވީ ވަޅިއެއް އޭގެ ފުންމިނަށް ހިތަށް ހަރައިލި ހެނެވެ. އިސާހިތަކު ލޭތައް އޮހިގަތެވެ. އަހަރެން ވަގުތުން ފޯން ކަނޑައިލީމެވެ. ޖެހިފައި ހުރި އަވާމެންދުރުގެ އަވައިން ސަލާމަތް ވެވުނީ އެހިނދެވެ. ހަމަ އެފިޔަވަޅުމަތީ ހުރެ އަހަރެން އަމިއްލަ ނަފްސަށް ވަޢުދުވީމެވެ. އަހަރެން ޝާފީގެ ލޯބި ހިތުން ފުހެލާނަމެވެ. ހަނދާން ނައްތައިލާނަމެވެ. އަަހަރެންގެ އަލަތު ލޯތްބަކީ އެއްއިރަކުވެސް އަހަރެންގެ ނަސީބުގައި ލިޔެވިފައިވި އެއްޗެއް ނޫނެވެ. އަހަރެން ޖެހޭނީ އެހަޤީޤަތް ޤަބޫލު ކުރާށެވެ. -- ނިމުނީ --

* މިއީ ހަގީގީ ހާދިސާއެއްގެ މައްޗަށް ބިނާކޮށްފައިވާ ވާހަކައެކެވެ.