ހައްޔަރުގައި ތިބި އިޒްރޭލްގެ ސިފައިން މިނިވަންކުރުމާ ބެހޭ އެއްވެސް ވާހަކައެއް ނުދައްކާނަން: ހަމާސް

ހަމާސްގެ ހައްޔަރުގައި މިހާރު ތިބި އިޒްރޭލުގެ ސިފައިން މިނިވަން ކުރުމާ ބެހޭ އެއްވެސް މަޝްވަރާއެއް ނުކުރާނެ ކަމަށް ހަމާސް ޖަމާއަތުން މިއަދު ބުނެފި އެވެ.

ހަމާސް ޖަމާއަތުގެ ސިޔާސީ ގޮފީގެ ނައިބު ރައީސް ސާލިހް އަލްއާރޫރީ ވިދާޅުވި ގޮތުގައި އެ ޖަމާއަތުގެ ހަނގުރާމަވެރިންގެ ބެލުމުގެ ދަށުގައި މިހާރު ތިބި އެންމެންނަކީ ވެސް އިޒްރޭލުގެ ސިފައިންނާއި އިޒްރޭލުގެ ސިފައިންގެ ތެރޭގައި ޚިދުމަތް ކުރުމަށް ފަހު ރިޓަޔާވެފައިވާ މީހުންނެވެ. އެހެންކަމުން، މިހާރު އިޒްރޭލުން ޣައްޒާގެ ރައްޔިތުންނާ ދެކޮޅަށް ކުރަމުންދާ ހަނގުރާމަ ހުއްޓައިލުމުގެ ކުރިން، އެއިން އެއްވެސް ރަހީނަކު މިނިވަންކުރުމާ ބެހޭ ގޮތުން އެއްވެސް މަޝްވަރާއެއް ނުކުރެވޭނެ އެވެ.

އޭނާ ވިދާޅުވި ގޮތުގައި ރަހީނުން މިނިވަން ކުރުމާ ބެހޭ ގޮތުން، ހަމާސް އާއި އިޒްރޭލާ ދެމެދު މިހާރު އެއްވެސް މަޝްވަރާއެއް ނުކުރެވެ އެވެ. އަދި މިހާރު ހަމާސްގެ ބެލުމުގެ ދަށުގައި ތިބި ރަހީނުންގެ ތެރޭގައި އެއްވެސް އަންހެނެއް އަދި ކުޑަކުއްޖަކު ނެތް ކަމަށް އޭނާ ވިދާޅުވި އެވެ.

"އެންމެ ފުރަތަމަ ވެސް އަހަރެމެން ބުނަމުން އައީ، އެއްވެސް ބަދަލަކާ ނުލައި ވެސް، ހަމާސްގެ ބެލުމުގެ ދަށުގައި ތިބި ބިދޭސީ ރަހީނުން މިނިވަން ކުރާނެ ކަމަށް. އަންހެނުންނާއި ކުޑަކުދިންނަކީ އަހަރެމެންގެ އަމާޒެއް ނޫން ކަމަށާއި ކުޑަކުދިންނާއި އަންހެނުން ވެސް މިނިވަންކުރާނެ ކަމަށް އަހަރެމެން މިއައީ ބުނަމުން،" އެކްސްގައި އާންމު ކުރި ބަޔާނެއްގައި ހަމާސް އިން ބުންޏެވެ.

އެ ނޫން އެއްވެސް މީހަކު، އިޒްރޭލުގެ ޒަޔަނިސްޓު ޓެރަރިސްޓުން ފަށާފައިވާ އުދުވާނީ ހަމަލާތައް ހުއްޓައިލުމުގެ ކުރިން މިނިވަން ކުރުމެއް ނޯންނާނެ ކަމަށް ވެސް އެ ބަޔާނުގައި ބުނެފައިވެ އެވެ. ހަމާސް އިން މިހެން ބުނި އިރު، އެ ޖަމާއަތުން ރަހީނު ކޮށްފައި ތިބި ފަލަސްތީނުގެ ހުރިހާ އަންހެނުންނާއި ކުޑަކުދިން މިނިވަންކޮށް ނިމުމާއެކު އިޒްރޭލުން ވަނީ، ހަމަލާތައް މެދުކަނޑައިލުމުގެ އެއްބަސްވުން އުވާލައި އަނެއްކާ ވެސް ޣައްޒާ އަށް ހަމަލާ ދޭން ފަށައިފަ އެވެ.

ހަމާސް އިން ބުނި ގޮތުގައި އޮކްޓޫބަރު 7 ވަނަ ދުވަހު ހިނގި ކުރިމަތިލުމުގައި މަރުވި އިޒްރޭލު ސިފައިންގެ ހަށިގަނޑުތަކާ ހަވާލުވުމަށް އިޒްރޭލަށް ދައުވަތު ދިނުމުން އިޒްރޭލުން ވަނީ އެ ހަށިގަނޑުތަކާ ހަވާލުވުމަށް ދެކޮޅު ހަދައިފަ އެވެ. ހަމާސް އިން ހުށަހެޅީ އެ ދުވަހު މަރުވި އިޒްރޭލު ސިފައިންގެ ހަށިގަނޑުތަކުގެ ބަދަލުގައި، އިޒްރޭލުގެ ޖަލުތަކުގައި ޝަހީދުވެފައިވާ ފަލަސްތީނު މީހުންނާއި އޮކްޓޫބަރު 7 ވަނަ ދުވަހު އިޒްރޭލުގެ ހަމަލާތަކުގައި ޝަހީދުވި މީހުންގެ ހަށިގަނޑުތައް ފަލަސްތީނާ ހަވާލު ކުރުމަށެވެ.

ނަމަވެސް އިޒްރޭލުން ބުނެފައިވަނީ، މިހާރު މިއީ މަރުވެފައިވާ މީހުންގެ ވާހަކަ ދައްކަން އެންމެ މުނާސަބު ވަގުތު ނޫން ކަމަށެވެ.

ހަމާސް އިން ބުނާ ގޮތުގައި ރަހީނުންގެ ތެރޭގައި ތިބި ދޮށީ އުމުރުގެ މީހުން މިނިވަން ކުރުމަށް އިޒްރޭލުން މިހާރު ދައްކަމުން ދާ ވާހަކައަކީ، ހަމަލާތައް ބަދަލުކުރުން މެދުކަނޑައިލުމުގެ އެއްބަސްވުމުގައި ނުހިމެނޭ ޝަރުތެކެވެ. އަދި އިޒްރޭލުން އެ ބުނާ ދޮށީ އުމުރުގެ މީހުންނަކީ، އިޒްރޭލުގެ ސިފައިންގެ ތެރޭގައި ޚިދުމަތް ކުރުމަށް ފަހު ރިޓާޔާ ކޮށްފައިވާ މީހުން ކަމަށް ވެސް ހަމާސް އިން ބުންޏެވެ.

"ދޮށީ އުމުރުގެ މީހުންނޭ އިޒްރޭލުން އެކިޔާ އެންމެންނަކީ ވެސް ސިފައިންގެ ޚިދުމަތުގައި އުޅެފައިވާ މީހުން. އަދި އޭގެ ތެރެއިން ބައެއް މީހުންނަކީ، މިހާރު ވެސް ރިޒާވް ލަޝްކަރުގައި ނަން ނޯޓުކޮށްފައި ތިބި މީހުން. އެމީހުން މިނިވަންކުރުމުގެ ވާހަކަ ފެންމަތިކޮށް އިޒްރޭލުން ވަނީ، އިޒްރޭލުގެ ޖަލުތަކުގައި ތިބި ފަލަސްތީނުގެ އަސީރުން މިނިވަންކުރުމުގެ ވާހަކަތައް ހުއްޓާލާފައި،" ހަމާސްގެ ބަޔާނުގައިވެ އެވެ.

އެބަޔާނުގައިވާ ގޮތުން، އިޒްރޭލުން ގަބޫލުކުރަނީ މަޝްވަރާތައް ހުއްޓާލައި އަލުން ހަމަލާތައް ދޭން ފެށުމުން، ހަމާސްގެ ނިންމުން ބަދަލުކުރަން ހަމާސް އަށް މަޖުބޫރުވާނެ ކަމަށެވެ. ނަމަވެސް ހަމާސްގެ ރަސްމީ ނިންމުމަކީ މިހާރު ކުރިއަށް ދާ ހަނގުރާމަ ހުއްޓައިލުމުން ނޫނީ، މިހާރު ތިބި ރަހީނުން މިނިވަން ކުރުމުގެ އެއްވެސް ވާހަކައް ނުދެއްކުމެވެ.

އޮކްޓޫބަރު 7 ގައި ފެށި ހަމަލާތައް މެދުކަނޑައިލުމަށް އިޒްރޭލާއި ހަމާސްއާ ދެމެދު ވެފައިވާ އެއްބަސްވުން ތަންފީޒު ކުރަން ފެށީ، ނޮވެމްބަރު 24 ވަނަ ދުވަހު އެވެ. އޭގެ ހަތް ދުވަސް ފަހުން، ޑިސެމްބަރު 1 ވަނަ ދުވަހު އެއްބަސްވުން އެއްފަރާތްކޮށް އިޒްރޭލުން ވަނީ ޣައްޒާ އަށް ހަމަލާ ދޭން ފަށައިފަ އެވެ.

ހަމަލާ ބަދަލުކުރުން މެދުކަނޑާލާފައި އޮތް ދުވަސްތަކުގައި، ހަމާސް އިން ވަނީ 105 ރަހީނުން މިނިވަންކޮށްފަ އެވެ. އޭގެ ތެރޭގައި ހިމެނެނީ އިޒްރޭލުގެ އާންމުންގެ 81 މީހަކާއި ތައިލޭންޑްގެ 23 މީހަކާއި ފިލިޕީންސް މީހެކެވެ.

އެ މުއްދަތުގައި އިޒްރޭލުން ވަނީ، އިޒްރޭލުގެ ޖަލުތަކުގައި ހައްޔަރުކޮށްފައި ތިބި ގައިދީންގެ ތެރެއިން 240 މީހަކު މިނިވަންކޮށްފަ އެވެ. އޭގެ ތެރޭގައި ހިމެނެނީ 18 އަހަރުން ދަށުގެ 169 ކުޑަކުދިންނާއި 71 އަންހެނުންނެވެ.

މިދިޔަ އޮކްޓޫބަރު މަހުގެ 7 ވަނަ ދުވަހުން ފެށިގެން އިޒްރޭލު ސިފައިން ޣައްޒާ އަށް ދެމުންދާ ވަރުގަދަ ހަމަލާތަކުގައި ޣައްޒާގެ ބޮޑު ސަރަހައްދެއް ވަނީ ސުންނާފަތި ކޮށްލައިފަ އެވެ. އިޒްރޭލުގެ ހަމަލާތަކުގައި ޣައްޒާ އިން ޝަހީދުވި މީހުންގެ އަދަދު 15300 އަށް ވުރެ މައްޗަށް ގޮސްފައިވާ އިރު، އޭގެ ތެރެއިން 10200 އަށް ވުރެ ގިނައީ އަންހެނުންނާއި ކުޑަކުދިންނެވެ. އިޒްރޭލުގެ ހަމަލާތަކުގައި ވެއްޓިފައިވާ އިމާރާތްތަކުގެ ދަށުވުމުގެ ސަބަބުން ނުވަތަ އެ ހަމަލާތަކުގައި ހަށިގަނޑު ކުދިކުދިވުމުގެ ސަބަބުން، ވީނުވީއެއް ނޭނގި ގެއްލިފައިވާ މީހުންގެ އަދަދު ވެސް މިހާރު ވަނީ 7500 އަށް ވުރެ މަތިވެފަ އެވެ.