ޗައިނާގެ ބޮޑު ވަޒީރު ލީ (މ) މިއަދު ވޫހާން ސިޓީ އަށް ވަޑައިގެން ހާލަތު ބައްލަވަނީ. --ފޮޓޯ:ގަވް.ސީއެން
27 ޖެނުއަރީ 2020 - 12:08
ވޫހާން (ޖެނުއަރީ 27) - ވޫހާންގައި ފެތުރެމުންދާ ކޮރޯނާވަައިރަސް ޖެހޭ މީހުންނާއި މަރުވާ މީހުން އިތުރުވެ މިހާތާނަށް 80 މީހުން މަރުވެފައިވާ އިރު އެ ބަލި ވަނީ ގާތްގަނޑަކަށް 3،000 މީހުންނަށް ޖެހިފަ އެވެ.
ޗައިނާގެ އާ އަހަރުގެ ޗުއްޓީ އަށް މިހާރު ވަނީ ތިން ދުވަސް އިތުރުކޮށްފަ އެވެ.
ވައިރަސް އެންމެ ބޮޑަށް ފެތުރޭ ހުބެއި ޕްރޮވިންސްގެ ވެރިރަށް ވޫހާން ސިޓީ އަށް ޗައިނާގެ ބޮޑު ވަޒީރު ލި ކެގިއަން މިއަދު ވަނީ ވަޑައިގެންފަ އެވެ. ލީ ވަނީ ބައެއް ބަލި މީހުންނާއި މެޑިކަލް ސްޓާފުންނާ ބައްދަލު ކުރައްވައި މައުލޫމާތު އޮޅުން ފިލުއްވައިފަ އެވެ.
ބަލިޖެހިގެން ހުބެއި ޕްރޮވިންސް އިން މަރުވި މީހުންގެ އަދަދު ވަނީ 76 އަށް އަރައިފަ އެވެ. ޗައިނާގެ އެހެން ހިސާބުތަކުން ވަނީ ހަތަރު މީހަކު މަރުވެފަ އެވެ.
ޗައިނާ އިން ބޭރުން ކޮރޯނާވައިރަސް ޖެހިފައި ވަނީ 44 މީހަކަށެވެ. އެކަމަކު އެ ވައިރަސް ޖެހިގެން ޗައިނާ ފިޔަވައި އެހެން ގައުމަކުން އަދި މީހަކު މަރުވެފައެއް ނުވެ އެވެ.
ވުހާން އާއި ބަލި ފެތުރޭ އެހެން ސިޓީތައް ވަނީ ކަރަންޓީންކޮށްފަ އެވެ.
ވޫހާން ސިޓީގައި ބަލި މީހުންގެ ކިޔޫ ދަނީ ދިގުވަމުން. --ފޮޓޯ:އޭއެފްޕީ
ގާތްގަނޑަކަށް 11 މިލިއަން މީހުންގެ އާބާދީއެއް އޮންނަ ވޫހާން ސިޓީގެ މޭޔަރު ޒޫ ޒިއާންވަންގް ވިދާޅުވީ ވައިރަސް ޖެހޭ މީހުން އަދި ވެސް އިތުރުވާނެ ކަމަށެވެ. އަދި ވޫހާން ކަރަންޓީނު ކުރުމުގެ ކުރިން އާ އަހަރުގެ ޗުއްޓީ އަށް އެ ސިޓީން ގާތްގަނޑަކަށް ފަސް މިލިއަން މީހުން ދިޔަ ކަމަށް އޭނާ ވިދާޅުވި އެވެ.
ކޮރޯނާވައިރަސް މިހާތަނަށް ޖެހިފައި ވަނީ 2،744 މީހުންނަށެވެ. އޭގެ ތެރޭން 461 މީހެއްގެ ހާލު ސީރަސް ކަމަށް ޗައިނާގެ ނޭޝަނަލް ހެލްތު ކޮމިޝަނުން ބުނެ އެވެ. ފަރުވާ ދިނުމަށް ފަހު ވަނީ 51 މީހުން ދޫކޮށްލައިފަ އެވެ.
ވޫހާން ސިޓީގެ ލޯކަލް ކައުންސިލުން ބުނީ ވޭތުވެދިޔަ ހަތަރު ދުވަސްތެރޭ އެ ސިޓީން އެކަކު ވެސް ބޭރަށް ގޮސްފައި ނުވާ ކަމަށެވެ. ވޫހާންގެ 4،096 ޓޫރިސްޓުން މިހާރު ތިބީ ޗައިނާ އިން ބޭރުގަ އެވެ.
ހުބެއި ޕޮވިންސްގައި ބަލި ކޮންޓްރޯލް ކުރުމުގެ އެކި މަސައްކަތްތަކުގައި ދަނީ ބައި މިލިއަނަށް ވުރެ ގިނަ މެޑިކަލް ސްޓާފުން ހަރަކާތްތެރިވަމުންނެވެ. މާސްކް ހުސްވާތީ ފެކްޓަރީތަކުން މިހާރު ދަނީ މާސްކް އިތުރަށް އުފައްދަމުންނެވެ. ވޫހާންގައި ދަނީ ވަގުތީ ދެ ހޮސްޕިޓަލް އިމާރާތް ކުރުމުގެ މަސައްކަތް ކުރަމުންނެވެ. އޭގެ ތެރޭން 1،000 އެނދުގެ އެއް ހޮސްޕިޓަލް ހަ ދުވަސް ތެރޭ ނިންމަން ރެއާއި ދުވާލު ދަނީ މަސައްކަތް ކުރަމުންނެވެ.
Copyright © 2025 Mihaaru · Terms and Conditions · Privacy Policy
ކޮމެންޓްތައް
ޓްރަންޕް.
27 January 2020
ދަރިން ހޯދަން އިތުރަށް ޗައިނާއިން ހުއްދަ ދީފަ، ދެން ބައްޔެއް ފަތުރައިގެން ގިނަ ބަޔަކު މަރަނީތަ؟ ކިހިނެތް މި ހަދަނީ؟
ޑީސީ
27 January 2020
ޗައިނާ ސަރުކާރުން މުސްލިމުން ހިފާ ހައްޔަރުކޮށް އެމީހުން ކަރަންޓީން ކޮއްގެން ގެންގުޅޭތާ އެތައް ދުވަހެއް ވެއްޖެއެވެ..އެކަން ފެންނާނެ އެއްވެސް ލޮލެއް ދުނިޔެއަކު ނެތެވެ، މިހަާރު ޗައިނާގެ ގިނަ މީހުން އެތިބީ އަމިއްލަ ގައުމުގަ ކަރަންޓީން ކުރެވިފައެވެ، މިކަން ގިނަ ލޯ ތަކަށް އެބަފެނެއެވެ.. ބޭއިންސާފުން އަނިޔާ ލިބޭ މީހުން ކުރާ ދުއާ އިޖާބަ ކުރެއްވުމުގައި އެއްވެސް ހުރަހެއް ނެތެވެ.
ތުއްތުނާ
27 January 2020
ބަލި ޖެހިފައިވާ މީހަކު ފެންނަންދެން ހަމަ ޗައިނާގެ ފަތުރުވެރިން ގެންނަންވީ .....ބަލި ފެތުރެމުންދާ ސްޕީޑަށް ބަލާއިރު އެއީ ވަރަށް ގާތްކަމެއް ..... ހަމަ މިހާރު ޗައިނާ އިން ފަތުރުވެރިން ގެނައުން ވަގުތީގޮތުން ހުއްޓާލާ ........ ފައިސާ އަށްވުރެ އިންސާނުންގެ ފުރާނަ ސަލާމަތް ކުރުމަކީ މުހިއްމުކަމެއް....... ތޮއްޖެހިފައިވާ މާލޭގައި މި ބަލި ފެތުރިގެން ގޮސްފިނަމަ ކޮންޓްރޯލް ކުރުމަކީ ކުރެވޭނެ ކަމެއްނޫން.......
ބަސް ކޮށާޅު
27 January 2020
"ހަތަރު މީހުން" ކިޔާނީ.."ހަތަރު މީހަކު" ކިއުމަކީ ބަހުގެ ކުށެއް.
ބިސްބޮންގޮންގް
27 January 2020
ކަލޭ އަދިވެސް ލިޔުމުގެ ކުށް ހޯދަން ތިޔަ އުޅެނީ؟ ބޮޑު މުސީބާތެއް ކުރިމަތިވަމުން އަންނަ އިރު ކަލެއަށް މުހިންމީ ލިޔުމުގެ ކުށް އުތަ؟ ބަލިފެތުރިގަތީމަވެސް ތިގޮތުގަ ހިފަހައްޓާތި !!!