ރާއްޖޭގެ ކަނޑު އަޑީގެ ތަފާތު މަންޒަރުތަކެއް

ދިވެހިރާއްޖެ ދުނިޔެއަށް މަޝްހޫރުވެފައި އޮންނަނީ ގުދުރަތީ ގޮތުން އުފެދިފައިވާ ރީތި ރަށްތަކުގެ ސަބަބުންނެވެ. ޗުއްޓީ ހޭދަކުރުމަށް، ހުދު ގޮޑުދޮށްތަކާއި ކަނޑު އަޑީގެ ރީތިކަމަކީ ފަތުރުވެރިންގެ ހިތް ފަތަހަކޮށްފައިވާ ތަންތަނެވެ. ކަނޑު އަޑީގެ ރީތިކަން، ފޮޓޯގެ ޒަރީއާއިން މުޅި ދުނިޔެއަށް އަންނަނީ ކޮންމެ ދުވަހަކުހެން ފެންނަމުންނެވެ. ނަމަވެސް ރާއްޖެ ފަދަ ގައުމުތަކަށް ފަތުރުވެރިން އަންނަނީ އެ މަންޒަރުތައް ވީހާވެސް ކައިރިން ތަޖުރިބާ ކޮށްލަން ބޭނުންވާތީ އެވެ.

ކަނޑު އަޑީގެ ފޮޓޯތަކަކީ އެއިން ފެންނަ ރީތި މަންޒަރުތަކުގެ އިތުރުން ގިނަ މައުލޫމާތުތަކެއް ފޯރުކޮށްދޭ އެއްޗެކެވެ. ދަތުރުފަތުރުކުރުމާއި ތަރައްގީގެ ސިނާއަތްތަކަށް ބޭނުންވާ މައުލޫމާތު، ފޮޓޯގެ ޒަރީއާއިން ވަރަށް ފަސޭހައިން ލިބިގަނެވެ އެވެ.

ނަމަވެސް މިފަދަ ފޮޓޯތަކުން ފެންނަން ހުންނަނީ ވަރަށް "ކުޑަ މަންޒަރެ"ކެވެ. ކަނޑު އަޑި އުފެދިފައި އޮންނަގޮތް އެންމެ ފުރިހަމަކޮށް ބެލުމުގެ ގާބިލުކަން، އެންމެ އަގުބޮޑު ކެމެރާތަކަށް ވެސް ލިބިގެނެއް ނުވެ އެވެ. ނަމަވެސް މިފަދަ ތަސްވީރުތައް ކުރަހައިދޭ ފެންވަރުގެ ޓެކްނޮލޮޖީ މިހާރު ލިބެން އެބަހުއްޓެވެ. އަދި މިފަދަ ސާވޭތައް ކުރުމުގެ ގާބިލްކަން ވަނީ، 100 ޕަސެންޓް ދިވެހި ކުންފުންޏެއް ކަމަށްވާ ވޯޓާ ސޮލިއުޝަންސް އިން ހޯދާފަ އެވެ.

އެ ކުންފުނިން މިދިޔަ އަހަރު ވަނީ މަލްޓި ބީމް ސާރވޭ ކުރަން ފަށައި، އެ ހިދުމަތް ރަސްމީކޮށް އިފްތިތާހު ކޮށްފަ އެވެ. އެގޮތުން ކަނޑު އަޑީގެ 200 މީޓަރު ފުންމިނުގައި ހުންނަ ހުރިހާ އެއްޗެއް ބަލައި، ދެނެގަތުމުގެ ގާބިލް ކަން މިހާރު އެ ކުންފުންޏަށް ވަނީ ލިބިފަ އެވެ.

މަލްޓި ބީމް ސާވޭ އަކީ ކޮބާ؟

މަލްޓި ބީމް ސާވޭތަކުން ކަނޑު އަޑީގެ ތަސްވީރުތައް މުޅިން ބަދަލުކޮށްލަ އެވެ. މިފަދަ ސާވޭތަކުގެ ނަތީޖާ އަކީ ކަނޑު އަޑީގެ ބައްޓަން އޮންނަ ގޮތް ދައްކުވައިދޭ ފޮޓޯއެއް ނުވަތަ ޗާޓެއް ކުރަހައި ދިނުމެވެ. މިކަމަކީ ފޮޓޯ ނަގައިގެން ނުވަތަ ޑައިވްކޮށްގެން ކުރެވޭނެކަމެއް ނޫނެވެ. މީގެ ކުރިން ރާއްޖޭގައި މިފަދަ ސާވޭތައް ހެދިފައި ވަނީ ވަރަށް މަދު ކަނޑުތަކާއި ފަރުތަކުގަ އެވެ.

މިފަދަ މަދު ސާވޭތަކުން ކުރެހިފައިވާ ޗާޓުތަކަކީ، ކޮންމެވެސް ބޭރުގެ ކުންފުންޏަކުން ކުރާ ތަހުލީލަކަށް ނުވަތަ މަސަތްކަތެއް ކުރުމަށް ތައްޔާރުކުރެވޭ އެއްޗެކެވެ. އަދި މިޗާޓުތަކަކީ އާންމުކޮށް އެއްވެސް ބަޔަކަށް ލިބެން ހުންނަ ޗާޓްތަކެއް ނޫނެވެ. ނަމަވެސް ވޯޓާ ސޮލިއުޝަންސް އިން މިހާރު ވަނީ ރާއްޖޭގައި އާންމުކޮށް ހުޅުވާލެވިގެން، ސާވޭކުރަން ފަށައިފަ އެވެ. އެހެންކަމުން، ސަރުކާރާއި އަމިއްލަ ކުންފުނިތަކުގެ އިތުރުން އަމިއްލަ ފަރުދުންގެ އެކިއެކި މަޝްރޫއުތައް ފުރިހަމަކުރުމަށްޓަކައި، ވޯޓާ ސޮލިއުޝަންސް އިން ތައާރަފް ކުރި މި އާ ޚިދުމަތާ އެކު މި ވަނީ މުޅިން އާ މަގެއް ކޮށައިދީފަ އެވެ.

ވޯޓާ ސޮލިއުޝަންސްގެ ޗީފް ސާވޭޔާ ފަރުހަތު ޖަމީލު ވިދާޅުވީ، މިކަމަކީ ވަރަށް ގިނަ ދުވަހުގެ މަސައްކަތުން ހާސިލުކުރެވުނު ކަމެއް ކަމަށެވެ. ސަބަބަކީ މިފަދަ ސާވޭތައް ކުރުމަށް ބޭނުންވާ އާލާތްތަކަކީ އަގު ބޮޑު އަދި އޮޕަރޭޓް ކުރުމަށް ހާއްސަ އިލްމު އުގެނިގެން، ބޭނުންކުރެވޭ ތަކެއްޗަށް ވުމެވެ. މީގެ އިތުރުން މި ބާވަތުގެ ސާވޭ ކުރުމަށް ބޭނުންވާ ހުރިހާ ވަސީލަތްތަަކާ އެކު، ވަރަށް ހާއްސަ އުޅަނދެއް ވެސް އޮންނަން ޖެހެ އެވެ.

މިސާލަކަށް ހާއްސަ ސެޓްލައިޓް ޕޮޒިޝަނިން ސިސްޓަމްސް، ކަރަންޓް އުފައްދާ ޖަނަރޭޓަރު، ބާރުގަދަ ކޮމްޕިއުޓަރުތަކާއި ހާއްސަ ސޮފްޓްވެއާގެ އިތުރުން، އުޅަނދުގެ ހަލް ވެސް ހުންނަން ޖެހޭނީ ވަކި ގޮތަކަށް ފަރުމާކުރެވިގެން ބަނދެވިފަ އެވެ. ފަރުހަތު ވިދާޅުވި ގޮތުގައި މި ކަންތައްތަކާ އެކު، މިއީ އާދައިގެ އުޅަނދެއް ބަނުމަށް ވުރެ ދެގުނަ ހަރަދުބޮޑު ކަމެކެވެ. ނަމަވެސް ވަރަށް ގިނަ ދުވަސް ތަކަކަށް ފަހު، ވޯޓާ ސޮލިއުޝަންސް އިން މިކަން ވެސް މިހާރު ވަނީ ކާމިޔާބު ކޮށްފަ އެވެ.

ވަރަށް އަވަހަށް މި އުޅަނދަށް އައިއެސްއޯ ސެޓްފިކެޓް ލިބޭނޭ ކަމަށް އުއްމީދު ކުރާ ކަމަށް ވެސް ފަރުހަތު ވިދާޅުވި އެވެ. އަދި މިފަދަ އުޅަނދެއްގައި މަސައްކަތް ކުރުމަށް އެކަށީގެންވާ ތަމްރީނުތައް ވެސް، އޭގައި މަސައްކަތް ކުރާ މީހުންނަށް ލިބެން ޖެހެ އެވެ. އެގޮތުން ވޯޓާ ސޮލިއުޝަންސްގެ ސާވޭޔަރުންނަކީ އިނގެރޭސިވިލާތުން މަތީ ތައުލީމު ހާސިލްކޮށްފައިވާ، މިދާއިރާގައި ގާބިލް ފަންނީ މާހިރުންނެވެ. މީގެ އިތުރުން ސިންގަޕޫރާއި، ރާއްޖޭގައި ވެސް ވޯޓާ ސޮލިއުޝަންސްގެ ސާވޭ މުވައްޒަފުންނަށް ތަމްރީން ދީފައިވެ އެވެ.

ވޯޓާ ސޮލިއުޝަންސްގެ ސާވޭ އުޅަނދުގެ ބައެއް ބައިތައް ފަރުމާކޮށްފައިވަނީ، އެ ކުންފުނީގައި އިންހައުސްކޮށް ފަރުހަތުގެ ބެލުމުގެ ދަށުން ސީދާ ރާއްޖޭގަ އެވެ. އަދި ބައެއް ބައިތައް އުފައްދާ ތައްޔާރުކޮށްފައި ވަނީ ސިންގަޕޫރުން ނެވެ.

އެހެންކަމުން މި ހުރިހާ ކަމެއް ފުރިހަމަ ކުރެވިގެން ނޫނީ ފުރިހަމަ މަލްޓި ބީމް ސާވޭއެއް ނުކުރެވޭނެ އެވެ. މި ސަބަބުތަކާ އެކު، ދުނިޔޭގެ އެކި ގައުމުތަކުގައި ވެސް މިފަދަ ސާވޭ އަކީ ވަރަށް ޚާއްސަ ކުންފުނިތަކުން ނޫނީ ނުކުރާކަމެކެވެ.

މަލްޓި ބީމް ސާވޭގެ މުހިންމުކަން

މަލްޓި ބީމް ސާވޭ އަކީ ކަނޑު އަޑީގެ ބައްޓަން އޮންނަ ގޮތް ބެލުމަށް ކުރެވޭ ސާވޭ އެކެވެ. އެހެން ސާވޭތަކާ ހިލާފަށް މިވައްތަރު ސާވޭ ގައި ކަނޑު އަޑި އަސްލު އޮންނަ ގޮތް ދައްކުވާދޭނެ އެވެ. އެހެން ގޮތަކަށް ބުނާނަމަ މިސާވޭ އިން ކަނޑު އަޑީގެ ތްރީޑީ ފޮޓޯއެއް ކުރަހައިދޭނެ އެވެ. އޭގެ ސަބަބުން، އެތަނެއްގައި ކުރަންޖެހޭ މަސަތްކަތެއް ކުރުމަށް އިންޖިނިއަރުންނާ ޕްލޭނަރުންނަށް ވަރަށް ފަސޭހަ ވެގެން ދެއެވެ.

މިސާލަކަށް ފަރުގެ ވަކި ސަރަހައްދެއްގައި ބަނދަރެއް ހަދަން ބޭނުން ވެއްޖެނަމަ މިފަދަ ސާވޭއެއް ކުރުމުން ކަނޑު އަޑި އޮންނަ ގޮތް، އެކި ސަރަހައްދު ތަކުގެ ފުންމިނާއި އެކު، އިންޖިނިއަރުންނަށް ފެނުމުން ބަނދަރު ޑިޒައިން ކުރުމަށް ބޭނުންވާ މައުލޫމާތު ވަރަށް ފަސޭހައިން ލިބިގެން ދާނެ އެވެ.

ދިވެހިރާއްޖެ އަކީ ވަށައިގެން ކަނޑު އޮންނަ ގައުމެއްކަމުން، ކަނޑާއި ފަޅުތަކަކީ ވަރަށް މުހިންމު ތަންނަނެވެ. މިފަދަ މުހިންމު ތަނެއްގެ ފުރިހަމަ ތަސްވީރު ކުރިޔާލައި ފެނިފައި އޮތުމަކީ މަޝްރޫއުތަކަށް ގިނަ ގުނަ ފައިދާތަކެއް ކުރާނެކަމެ ކެވެ.

މަލްޓި ބީމް ސާވޭގެ މުހިންމު ކަން – ކަނޑު ދަތުރުފަތުރުކުރުމުގެ ރައްކާތެރިކަން

މަލްޓިބީމް ސާވޭގެ މުހިންމުކަން ކޮންމެދިމާލަކަށް ބެލިކަމުގައި ވިޔަސް ފެންނަން އޮންނާނެއެވެ. މިސާލަކަށް، ދަތުރުފަތުރުކުރުން، ޑައިވިން، ރިސޯޓް، ބަނދަރު، ކަނޑުތޮށިލުން، ކަނޑުތަކާއި ފަރުތައް ދިރާސާކުރުން، ބިން ހިއްކުމާއި ފަޅު ފުންކުރުމުގެ މަސައްކަތްތަކަކީ، މިފަދަ ސާވޭއެއްގެ މުހިންމުކަން އެންމެ ބޮޑަށް ބޭނުންވެފައިވާ ދާއިރާ ތަކެވެ.

ދަތުރުފަތުރަށް ބެލިކަމުގައި ވީނަމަ ވެސް، ރާއްޖޭގެ އަތޮޅުތަކުގެ ނެވިގޭޝަން ޗާޓްތަކަކީ 19 ވަނަ ގަރުނުގައި ހަދާފައިވާ ޗާޓްތަކެއް ކަމުން، މި ޗާޓްތަކަކީ މިހާރު އެންމެ އެކަށީގެންވާ ގޮތެއްގައި ބޭނުން ކުރެވޭނެ ޗާޓުތަކެއް ނޫނެވެ. އެގޮތުން ރާއްޖޭގެ ކަނޑުތަކާއި ފަރުފަރުގެ ފުރިހަމަ ޗާޓެއް ނެތުމުގެ ދަތިކަން ދަތުރުވެރިންނަށާއި ސަރުކާރުގެ އިތުރުން ކުންފުނިތަކަށް ވެސް ވަނީ ކުރިމަތިވެފަ އެވެ.

ވޯޓާ ސޮލިއުޝަންސް އިން މިހާރު ކުރަމުން އަންނަ އެންމެ މުހިންމު މަސަތްކަތަކީ މިފަދަ ޗާޓްތަކެއް ހެދުމުގެ މަސަތްކަތެވެ. އެގޮތުން މިހާރު ވެސް މާލެ އަތޮޅުގެ މުހިންމު ބައެއް ކަނޑުއޮޅިތަކުގެ އަސްލު އޮންނަ ގޮތް ވަނީ ސާވޭކޮށް ބަލާފަ އެވެ. ރާއްޖޭގައި ކުރެވޭ މިފަދަ ސާވޭތަކުން ލިބިދޭ މައުލޫމާތުތައް އާންމުކޮށް ލިބެން ނެތް ނަމަވެސް މިއީ ވަރަށް މުހިންމު މައުލޫމާތުތަކެވެ. މިގޮތުން ކަނޑުއޮޅިތަކުގެ ސާވޭއިން ބޯޓުފަހަރަށް ރައްކާތެރި ގޮތެއްގައި ދަތުރުކުރުމަށް މަގުފަހިކޮށްދެ އެވެ. އަދި ބޮޑެތި ބޯޓުފަހަރުގެ ކެޕްޓަނުންނަށް އެއްވެސް ބިރެއް ނެތި ކަނޑުއޮޅިތަކުން ވަދެ ނިކުންނަށް ވަރަށް ފަސޭހަވާނެ އެވެ.

ކަނޑުއޮޅީގެ ފުންމިނާއި ދިގުމިން އަދި އަޑީގައި އެއްވެސް ބާވަތެއްގެ ގިރި، ތިލަ، ނުވަތަ އެހެން އެއްޗެއް އޮތަސް، އެއެއްޗެއްގެ އަސްލު އޮންނަ ބޮޑުމިނާއި އުސްމިން އަދި ފުޅާމިން ފޮޓޯއެއްގެ ޒަރީއާއިން ފެންނަންހުންނާނެ އެވެ. މީގެ އިތުރުން އަތޮޅު ތެރޭގެ ދަތުރުތަކަށް ވެސް މަލްޓިބީމް ސާވޭ މެދުވެރިކޮށް، ދަތުރުފަތުރުކުރާ އުޅަނދުތަކަށް ރައްކާތެރިކަން ފޯރުކޮށްދެވޭނެ އެވެ. އެހެންކަމުން، މަލްޓްބީމް ސާވޭއަކީ ކަނޑު ދަތުރުގެ ރައްކާތެރިކަމަށް ވަރަށް މުހިންމު އަގުހުރި ސާވޭއެކެވެ.

މަލްޓްބީމް ސާވޭތަކުން، ޑައިވް ކުރުމުގެ ވައްޓަފާޅި ބަދަލުކޮށްލަދޭ

ރާއްޖޭގައި ހުރި ޑައިވްސައިޓް ތަކަކީ ކޮންމެ ދުވަހަކު އެތައް ޑައިވަރުންނެއް ޑައިވްކުރާ ތަންނަނެވެ. ނަމަވެސް، މިއިން އެއްވެސް ޑައިވްސައިޓެއްގެ ފުރިހަމަ ޗާޓެއް އަދި މިހާތަނަކަށް ހެދިފައެއް ނެތެވެ. މިހާރު ކުރަހާފައި ހުންނަ ޗާޓްތަކަކީ އެތަނަށް ޑައިވްކުރާ މީހުންނަށް ފެންނަގޮތުގެ މައްޗަށް ބިނާކޮށް ކުރެހިފައިވާ ޗާޓް ތަކެކެވެ. މިއިން އެއްވެސް ޗާޓަކީ އެތަނެއް އޮންނަގޮތާ އެއްވައްތަރުގެ ޗާޓެއް ނޫނެވެ. ސަބަބަކީ މި ޗާޓްތައް ކުރެހިފައިވަނީ ފެންނަ ފެނުމަށް، އަންދާޒީ އަދަދުތަކެއްގެ މައްޗަށް ބިނާކޮށްގެން ކަމަށް ވުމެވެ. ނަމަވެސް މަލްޓިބީމް ސާވޭ އިން، ޑައިވްކުރާ ސައިޓްތަކުގެ އަޑި އޮންނަ ގޮތް ވަރަށް ތަފްސީލްކޮށް ކުރަހާދެ އެވެ.

ޑައިވް ކުރާ މީހުންނަށް މީގެ ސަބަބުން ޑައިވްކުރުމުގެ ކުރިން އެތަން އަސްލު އޮންނަ ގޮތް ފެނެ އެވެ. މިކަމުގެ ފައިދާއަކީ ޑައިވް ކުރުމުގެ ކުރިން އެސަރަހައްދެއްގައި ފީނާނެގޮތް ރާވައި އަދި ޑައިވަރުންނަށް އެސަރަހައްދު އޮންނަގޮތް ކިޔައިދޭން ފަސޭހަވެގެން ދިއުމެވެ. ޚާއްސަކޮށް، ޑައިވް ސައިޓަކަށް އަލަށް ފީނާ މީހުންނަށް އެތަނެއްގެ އަޑި އޮންނަގޮތް ކުރިން އެނގޭނަމަ ހާސްކަން ކުޑަކޮށްދެ އެވެ.

މިހާތަނަށް ހޯދިފައި ނުވާ އެތަކެއް ޑައިވް ސައިޓްތައް ރާއްޖޭގެ ކޮންމެ އަތޮޅެއްގައި ހުންނާނެކަމަށް ތަޖުރިބާކާރުން ވިދާޅުވެ އެވެ. އެހެންކަމުން، މަލްޓިބީމް ސާވޭތަކުން މިފަދަ ނުފެނި ހުންނަ ތަންތަނާއި ތަކެތި ހޯދުމުގެ ގާބިލްކަން ލިބެ އެވެ. މިސާލަކަށް، އަޑިއަށް ގޮސްފައި ހުންނަ ބޯޓު ފަހަރު ހޯދޭނެ އެވެ. އެގޮތުން މިދިޔަ އަހަރު، ވޯޓާ ސޮލިއުޝަންސް އިން އިސް ނަގައިގެން ވަނީ ދ. އަތޮޅުގެ ބޮޑު ސަރަހައްދެއް ސާވޭ ކޮށް، އެސަރަހައްދު އޮންނަގޮތުގެ ޗާޓެއް ކުރަހާފަ އެވެ.

އެ އަތޮޅުގެ ހުޅަނގު ބިތުގައި އޮންނަ ތަންމަތި ފަޅަކީ ގުދުރަތީގޮތުން ކަނޑު އަޑީގައި އުފެދިފައިވާ ތިލަ ތަކެކެވެ. ތިލައިގެ މަތީގައި ހަ މީޓަރު ހުންނަ އެ ސަރަހައްދުގެ ތިލަ ތައް އުފެދިފައިވަނީ ވަކިވަކި "ތަންމަތި" ތަކެއް ހެންނެވެ. ދެ ތިލަ ދެމެދުގެ ފުންމިނުގައި 30 މީޓަރު ހުރެއެވެ. އެ ތިލަތިލަ އުފެދިފައިވަނީ ބޮޑުސަރަހައްދެއް ހިމެނޭގޮތަށް އެކި ބައްޓަމަށެވެ. މި ތިލަތައް އޮންނަނީ ކަނޑުއޮޅިއާ ސީދާ ދިމާވާގޮތަށްކަމުން، މި ސަރަހައްދުގައި ހުންނަ ބާރު އޮއިވަރުގެ ސަބަބުން އާދައިގެ ޑައިވަރުންނަށް ފީނުމަކީ އެހާ ފަސޭހަކަމެއް ނޫނެވެ. އަދި އޮއިވަރުގެ ސަބަބުން އެއް ތިލައިން އަނެއް ތިލައަށް ޑައިވަރުން ބާރުސްޕީޑްގައި ގެންދެ އެވެ.

ދ. އަދޮޅުގައި ދާދިފަހުން ހުޅުވި ދޫރެސް ރިސޯޓްގެ ޑައިވް ސެންޓަރުގެ އެދުމުގެ މަތިން ވޯޓާ ސޮލިއުޝަންސް އިން މިހާރުވަނީ މިސަރަހައްދު ސާވޭކޮށް، ޑައިވަރުންނަށް ފަސޭހައިން ޑައިވްކުރެވޭނެފަދަ ޗާޓްތަކެއް ތައްޔާރު ކޮށްފަ އެވެ. މީގެ ސަބަބުން މިހާރު އެ ތިލަތަކަށް ފީނަންދާ މީހުންނަށް އެ ސަރަހައްދުގެ އަޑި އޮންނަގޮތް ފަސޭހައިން ދެނެގަނެވި، ފީނުމަށް ވަރަށް ފަސޭހަވެގެން ދާނެއެވެ.

ހަމަ މިގޮތަށް، ފެތިފައިވާ ބޯޓުފަހަރު ހޯދައި، ދެނެގަތުމުގެ ގާބިލްކަން މަލްޓިބީމް ސާވޭތަކުން ލިބިދެ އެވެ. ފަރުތަކަށް އުރޭ ބޯޓުފަހަރު ސަލާމަތްކުރުމުގެ ކުރިން، ލިބިފައިވާ ގެއްލުން ބަލައި ދެނެގަނެވޭނެ އެވެ. މިއީ އިންޝުއަރެންސް ކުންފުނިތަކަށް ވަރަށް މުހިންމު ކަމެކެވެ. އަދި ކަނޑުމަތީގެ ހާދިސާ ތަކުގައި އަޑިއަށްދާ އުޅަނދުތައް ކަނޑުއަޑިން ނެގުމުގެ ކުރިން އޭގެ ހާލަތު ދެނެގަތުމަށް މަލްޓިބީމް ސާވޭ އަކީ ވަރަށް މުހިންމު ވަސީލަތެކެވެ. ޚާއްސަކޮށް ޑައިވަރުންނަށް ނުފީނޭ ފުންމިނުގައި ހުންނަ ތަކެތި ހޯދާ ދެނެގަތުމަކީ ވަރަށް ފަސޭހައިން ކުރެވޭނެ ކަމެކެވެ.

މަތީގައިވާ ފޮޓޯ އިން ފެންނަނީ މާލެއަތޮޅު ހުޅުލޭ ފަރަށް އަޑިއަށް ގޮސްފައިވާ މަޝްހޫރު ވިކްޓަރީ ރެކްގެ މަލްޓި ބީމް ސާވޭއެއްގެ ނަތީޖާ އެވެ. އެ ބޯޓު، ކަނޑުގެ 33 މީޓަރު އަޑީގައި އޮންނަ ގޮތް ވަރަށް ފުރިހަމަޔައް މި ސާވޭ އިން ދައްކުވައިދެ އެވެ. މިއީ ރާއްޖޭގެ އެންމެ މަޝްހޫރު އެއް ޑައިވް ސައިޓެވެ. އަދި އެތަނަށް އަލަށް ފީނާ މީހަކަށް މި ފަދަ ފޮޓޯއެއް ފެނުމުން، އެތައް ގޮތަކަށް އޭގެ ފައިދާ ކުރާނެ އެވެ.

ފަރުތަގުގައި ހިންގާ ތަރައްގީގެ މަޝްރޫއުތައް

ކަނޑުތަކާއި ފަރުތަކުގައި ހިންގާ ތަރައްގީގެ މަޝްރޫއުތަކަށް ވެސް މިއީ ވަރަށް މުހިންމު ކަމެކެވެ. އެގޮތުން ބިން ހިއްކުމާއި، ފަޅު ފުންކުރުމުގެ އިތުރުން ކަނޑު ތޮށި ލުމުގެ މަސައްކަތްކަތަކީ ފަރުގެ ބައްޓަން ދެނެގަނެވިގެން ނޫނީ ރަނގަޅަށް ކުރެވޭނެ މަސައްކަތްތަކެއް ނޫނެވެ. މިސާލަކަށް ކަނޑުތޮއްޓެއް ލާއިރު ފަރުގެ އުރަފަށް އަދި ޖުމްލަކޮށް މުޅި ސަރަހައްދު އޮންނަގޮތް ބެލުމުގެ މުހިންމުކަން ހުރިހާ ކޮންޓްރެކްޓަރުންނަށް އެނގޭނެ އެވެ. މަޝްރޫއުތަކަށް އަގު ހެދުމާއި ތަކެތިބޭނުންވާ ވަރާއި މަސައްކަތް ކުރާނެގޮތާއި މަސައްކަތް ކުރުމުގައި ދިމާވާ ދަތިތަކާއި އެކަންތައްތައް ހައްލުކުރާނެގޮތް ދެނެގަނެވެ އެވެ.

ފަރުހަތު ވިދާޅުވީ، ވޯޓާ ސޮލިއުޝަންސް އިން ދޭން ފެށި މި އާ ހިދުމަތަކީ ރާއްޖޭގެ ކޮންމެ ސިނާއަތަކަށް ވެސް މުހިންމު ޚިދުމަތަކަށް ވާނެ ކަމަށެވެ. ވޯޓާ ސޮލިއުޝަންސްގެ މަސައްކަތްތައް، ދުނިޔޭގެ ބޮޑެތި ކުންފުނިތަކާއި ރާއްޖޭގެ ކުދި އަދި ބޮޑެތި ކުންފުނިތަކުން ވެސް މިހާރު ވަނީ ބަލައިގަންނަށް ފަށައިފަ އެވެ. އެގޮތުން އަމިއްލަ ކުންފުނިތަކާއި، ސަރުކާރުގެ އެކިއެކި ކުންފުނިތަކުން ހިންގާ ތަރައްގީގެ މަޝްރޫއުތައް ކުރިއަށް ގެންދިއުމަށް ބޭނުންވާ އެހިތެރިކަން ފޯރުކޮށްދިނުމަށް ވޯޓާ ސޮލިއުޝަންސް އިން މިހާރު ވެސް އޮތީ ތައްޔާރަށެވެ.