ރިލީޒްކުރުމުގެ ކުރިން "ދަބަންގް 3" އަށް 155 ކްރޯޑް ރުޕީސްގެ ފައިދާއެއް

ސަލްމާން ޚާންގެ އާ ފިލްމު "ދަބަންގް 3" އަށް ރިލީޒްކުރުމުގެ ކުރިން 155 ކްރޯޑް ރުޕީސް (22 މިލިއަން ޑޮލަރު) ގެ އާމްދަނީއެއް ލިބިއްޖެ އެވެ.

ފިލްމީ ޚަބަރުތައް ގެނެސްދޭ ނޫސްތަކުން ބުނިގޮތުގައި ޕްރަބޫދޭވާ ޑައިރެކްޓްކޮށްފައިވާ ފިލްމުގެ ޑިޖިޓަލް ރައިޓްސް އެމެޒޯން ޕްރައިމް ވީޑިއޯ އަށް 60 ކްރޯޑް ރުޕީސް އަށް ވިއްކަލާފައިވާ އިރު، ފިލްމުގެ ސެޓެލައިޓް ރައިޓްސް ޒީ ނެޓްވޯކަށް 80 ކްރޯޑަށް ވަނީ ވިއްކާލައިފަ އެވެ.

މީގެ އިތުރުން ފިލްމުގެ މިއުޒިކް ރައިޓްސް ޓީ ސީރީޒަށް 15 ކްރޯޑް ރުޕީސް ވިއްލާފައިވާތީ، ފިލްމު ރިލީޒްކުރުމުގެ ކުރިން ލިބުނު އާމްދަނީ މިހާރު ވަނީ 155 ކްރޯޑަށް އަރައިފަ އެވެ.

"ދަބަންގް 3" މި މަހުގެ 20 ވަނަ ދުވަހު ރިލީޒްކުރަން ނިންމާފައިވާ އިރު، ފިލްމު ވަރަށް ހިނގާނެ ކަމަށް ބެލެވެ އެވެ. އެގޮތުން އެންމެ މަދުވެގެން ވެސް 100 ކްރޯޑް ރުޕީސް (14 މިލިއަން ޑޮލަރު) ގެ އާމްދަނީއެއް ސަލްމާންގެ ފިލްމަކަށްވާތީ ބޮކްސް އޮފީހުގައި ކަށަވަރުކުރާނެ އެވެ. މި ފިލްމުގެ ބަޖެޓް މިހާތަނަށް އަދި ހާމައެއްނުކުރެ އެވެ.

"ދަބަންގް 3" އަކީ 2010 އިން ފެށިގެން ގެނެސްދެމުން އަންނަ "ދަބަންގް" ސީރީޒްގެ ތިން ވަނަ ފިލްމެވެ.

ސަލްމާން ފުލުހެއްގެ ރޯލުން ފެނިގެންދާ ފިލްމުގެ އެއް ބަތަލާ އަކީ މި ފަހަރު ވެސް ކުރީގެ ދެ ބައިގެ ބަތަލާ ސޮނާކްޝީ ސިންހާ އެވެ. އަދި "ދަބަންގް 3" އިން އާ ބަތަލާ އަކު ތައާރަފުކުރާނެ އެވެ. އެއީ އެކްޓަރު މަހޭޝް މަންޖްރޭކަރްގެ ދަރިފުޅު ސާއީ މަންޖްރޭކަރެވެ.