ފިލްމީ ތަރިންނަކީ ނަމޫނާ ބައެއް ނޫން: ސާރާ އަލީ ޚާން

ފިލްމުތައް ކުޅުމަކީ އެކްޓަރުން ރޯލް މޮޑެލުންގެ ގޮތުގައި ދެކެންޖެހޭ ސަބަބެއް ނޫން ކަމަށް ބަތަލާ ސާރާ އަލީ ޚާން ބުނެފި އެވެ.

ދެހާސް އަށާރައިގައި އެކްޓިން އަށް ނުކުތް އުންމީދީ ޒުވާން ބަތަލާ ހިންދުސްތާން ޓައިމްސް އަށް ދިން އިންޓަވިއުއްގައި ބުނީ ވަރަށް ފިލްމު ބަލާ މީހުން ފިލްމީ ތަރިން އެކި ގޮތްގޮތަށް ޖަޖްކުރާ ކަމަށެވެ. އެކަމަކު އެއީ އެންމެ ރަނގަޅު ގޮތް ނޫން ކަމަށް ބުންޏެވެ.

ފިލްމީ އާއިލާއަކަށް އުފަން ސާރާ، 24، ބުނީ އެކްޓަރުން ފިލްމުތަކުގައި ކުރާ ކަމަކީ ލިޔުންތެރިން، ޑައިރެކްޓަރުން ކިޔައިދޭން ބޭނުންވާ ވާހަކައެއް ހުށަހަޅައި ދިނުން ކަމަށެވެ. އެހެންވެ ފިލްމުތަކުގައި ތަރިން އަދާކުރާ ރޯލްތަކަކީ އެ މީހުންގެ އަމިއްލަ ދިރިއުޅުމާ އެއްވެސް ގުޅުމެއް ހުރި ކަންކަމެއް ނޫން ކަމަށް ބުންޏެވެ.

އޭނާ ބުނީ ފިލްމުތައް ބަލާފައި އެ އެއްޗެހިން ދައްކުވައިދޭ ގޮތަށް ބައެއް މީހުން އަމިއްލަ ދިރިއުޅުން ބިނާކުރަން އުޅުމާއި އެކްޓަރުން ކުޅޭ ކެރެކްޓާތަކާއި އެ މީހުން ރޯލް މޮޑެލްތަކުގެ ގޮތުގައި ބެލުމަކީ އަމިއްލަ ނަފުސަށްވެވޭ އިހުމާލެއް ކަމަށެވެ.

"ކުރުކޮށް ބުނަންޏާ ފިލްމުތަކަކީ ފިލްމު ކުޅޭ މީހުން ރޯލް މޮޑެލުންގެ ގޮތުގައި ބަލައިގަންނަން ޖެހޭ ޕްލެޓްފޯމެއް ވެސް ނޫނޭ. އަދި އެ މީހުންނަކީ އެކްޓަރުންނަށްވާތީ ރޯލް މޮޑެލުންގެ ގޮތުގައި އެހެން މީހުން ނަމޫނާއަކަށް ބަލާ ބަޔަކަށް ވާކަށް ވެސް ނުޖެހޭ. އެކަން ކުރެވޭނެ އެހެން ގޮތްގޮތް ހުންނާނެ،" އޭނާ ބުންޏެވެ.

ސާރާ ބުނި ގޮތުގައި ފިލްމުތަކުގައި ތަރިން ކުޅޭ ކެރެކްޓާތަކަށް ބިނާކޮށްފައި އެ މީހުން ޖަޖްކުރުމަކީ ވެސް އިންސާފެއް ނޫނެވެ. އެގޮތުން މި މަހުގެ 14 ގައި ރިލީޒްކުރި "ލަވް އާޖް ކަލް" ގައި އޭނާ ކުޅުނު ކެރެކްޓާ ޒޯއީ އަކީ ގިނަ ބައެއްގެ ސަމާލުކަން ހުއްޓުނު ރޯލެއް ކަމަށް ގަބޫލުކުރާ ކަމަށް ބުންޏެވެ.

"އެކަމަކު އެ ކެރެކްޓާގައި ދައްކުވައި ދެނީ އަހަރެންގެ އަސްލު އުޅޭ ގޮތެއް ނޫން. އެހެންވެ މި ބުނަނީ ފިލްމުތައް ބަލާފައި އޯޑިއަންސް ތަރިން ޖަޖްނުކުރާށޭ." ސާރާ ބުންޏެވެ. "އަހަންނަކީ އަބަދު ވެސް ފާޑުކިޔުންތަކަށް ވެސް މަރުހަބާކިޔާނެ މީހެއް. އެކަމަކު ފާޑު ވެސް ކިޔަން ވާނީ ޒާތީ ނުވެ."

އެކްޓަރު ސައިފް އަލީ ޚާންގެ ދަރިފުޅު ބުނީ އޭނާގެ އެކްޓިން އަށް ބައެއް މީހުން ވަރަށް ޒާތީކޮށް ފާޑުކިޔުމަކީ ވަރަށް ހިތުގައި ޖެހޭ ކަމެކެވެ. އެކަމަކު އަބަދު ވެސް ކުޅޭ ކޮންމެ ފިލްމެއްގައި މަސައްކަތްކުރަނީ ޑައިރެކްޓަރިން ބުނާ ގޮތަށް ހަދައިގެން، ހުނަރު ރަނގަޅުކުރަން ކަމަށް މެއި މަހު ރިލީޒްކުރާ "ކޫލީ ނަމްބަރު 1" ގެ ބަތަލާ ބުންޏެވެ.