ސައިފްގެ ދަރިފުޅު ބުނަނީ ބައްޕަ މުސްކުޅިވެއްޖެ ކަމަށް

ބައްޕަ ސައިފް އަލީ ޚާނަކީ މުސްކުޅިއެއް ކަމަށް ބުނެ ދޮށީ ފިރިހެން ދަރިފުޅު އިބްރާހީމް އަލީ ޚާން އިންސްޓަގްރާމްގައި ޖޯކެއް ޖަހައިފި އެވެ.

ސައިފާއާ އެކު ނަގާފައިވާ ފޮޓޯއަކާ އެކު 19 އަހަރުގެ އިބްރާހީމް ކެޕްޝަނަކަށް ލިޔެފައި އިނީ "ޖަސްޓް މީ އެންޑް ދި އޯލްޑް މޭން" އެވެ. މި ފޮޓޯ އަށް ވަރަށް ގިނަ މީހުން ކޮމެންޓްކުރަމުން ބައްޕަ އާއި ދަރިފުޅު ވަރަށް ރީތި ކަމަށާއި އުމުރުގައި މާ ބޮޑު ތަފާތެއް ހުރި ކަމަށް ނުދައްކާ ކަމަށް ބުނެފައިވެ އެވެ. އަދި ބައެއް މީހުން ބުނެފައި ވަނީ ސައިފް މިހާރު ވެސް މާ ރީތި ކަމަށާއި އޭނާ އަކީ އަދިވެސް އެ މީހުންގެ ކްރަޝްއެއް ކަމަށެވެ.

ފޮޓޯ އަށް ކޮމެންޓްކުރި ބައެއް މީހުން ވަނީ ސައިފާއި އިބްރާހީމް އެކީގައި ފިލްމަކުން ފެންނާނެ ދުވަހަކަށް އިންތިޒާރުކުރަމުން އަންނަ ކަމަށް ވެސް ބުނެފަ އެވެ.

ބައްޕަ އަކީ މުސްކުޅިއެއްގެ ގޮތުގައި އިބްރާހީމް ސިފަކުރި އިރު، މިދިޔަ ޖެނުއަރީ މަހު ރިލީޒްކުރި "ޖަވާނި ޖާނެމަން" ގައި ސައިފް ވަނީ އަންހެނުން ހިތި ޕްލޭބޯއިއެއްގެ ރޯލް ވެސް ކުޅެފަ އެެވެ. އޭގައި އޭނާ ފެންނަނީ ޒުވާން އަންހެން ދަރިއަކު ހުރިކަން އެނގުމުން އެކަން ހަޖަމުކުރަން ދަތިވެގެން އުޅޭ ހިތް ޒުވާން ބައްޕައެއްގެ ރޯލެވެ.

ބަތަލާ ކަރީނާ ކަޕޫރާ ކައިވެނިކޮށްގެން ވެސް ދަރިއަކު ހުރި ސައިފަކީ ބަތަލާ ސާރާ އަލީ ޚާން، 24، ގެ ވެސް ބައްޕަ އެވެ. ސާރާ އާއި އިބްރާހީމްގެ މަންމަ އަކީ ބަތަލާ އިމްރިތާ ސިންގެވެ.