ކާޖޮލްއާ އެކު ފިލްމު ނުކުޅެން އާމިރަށް ޝާހްރުކް ޚާން ލަފާ ދިން

ބަަތަލާ ކާޖޮލްއާ އެކު މަސައްކަތްނުކުރަން އާމިރު ޚާނަށް ލަފާ ދިން ކަމަށް ޝާހްރުކް ޚާން ބުނެފި އެވެ.

އިންޑިއަން އެކްސްޕްރެސް އަށް ކާޖޮލް އާއި ޝާހްރުކް ދިން އިންޓަވިއުއެއްގައި ކުރީގެ ހަނދާންތައް އާކުރަމުން ޝާހްރުކް ބުނި އޭނާ އާއި ކާޖޮލް އެކީގައި ކުޅުނު ފުރަތަމަ ފިލްމު 1993 ގެ "ބާޒީގަރް" ގެ މަސައްކަތްކުރަމުން ދިޔަ ދުވަސްވަރު އެއް ދުވަހަކު އާމިރު ގުޅާފައި ކާޖޮލްގެ ޕަފޯމަންސާ ބެހޭ ގޮތުން ސުވާލުކުރި ކަމަށެވެ.

"އެ ދުވަހު އަހަރެން އޭނަ ކައިރީ ބުނިން މިއީ އެކީގައި މަސައްކަތްކުރަން ހެޔޮވާވަރުގެ ބަތަލާއެއް ނޫނޭ. މަސައްކަތަކަށް ފޯކަސްއެއްނުކުރެވޭ. ބޭކާރު އަނގަތެޅުމުޅޭ އޮންނަކީ ކަމަކަށް. ވަރަށް އުނދަގޫވާނޭ މީނައާ އެކު މަަސައްކަތްކުރަން،" ޝާހްރުކް ބުންޏެވެ.

އޭނާ ބުނީ "ބާޒީގަރް" ކުޅުނު ދުވަސްވަރު ކާޖޮލްއާ މާ ގާތް ގުޅުމެއް ވެސް ނޯންނަ ކަމަށެވެ. އަދި އެއީ އަނގަގަދަކަމުން ބޮލަށް އުނދަގޫވާ ކަހަލަ ބަތަލާއެއް ކަމަށް ބުންޏެވެ. ޝާހްރުކް ބުނީ އަދިވެސް ކާޖޮލް އަކީ އެކަހަލަ މިޒާޖެއްގެ މީހެއް ކަމަށެވެ.

"ފަހުން ވެސް އަހަރެމެން ދެ މީހުން އެކީގައި މަސައްކަތްކުރި އިރު އެންމެ ގިނައިން އޭނައާ ދިމާއަށް ބުނަން ޖެހެނީ އަނގަމަޑުންލައިގެން ހުންނާށޭ،" ޝާހްރުކް ބުންޏެވެ. "ކާޖޮލްއާ ދޭތެރޭ އަހަރެން ދެކުނު ގޮތް ބަދަލުވީ ބާޒީގަރުގެ ޝޫޓިންތަކަށް ފަހު، އެޑިޓިންގައި ފިލްމުގެ މަސައްކަތްތައް ބަލާލަން ފުރުސަތު ލިބުނީމަ. ހިތަށް އެރި މިއީ ހަމަ ވަރަށް ހުނަރުވެރި ބަތަލާއެކޭ. އަދި ފަހުން އާމިރަށް މެސެޖްކޮށްފައި ބުނިން ކާޖޮލް އަކީ ސްކްރީނުގައި ޖާދޫއެއް ކަހަލަ މީހެކޭ."

އައްބާސް-މަސްތާން ޑައިރެކްޓްކުރި ސަސްޕެންސް ތުރިލާ "ބާޒީގަރް" އަށް ފަހު، ޝާހްރުކާއި ކާޖޮލްވެގެން ދިޔައީ ހިންދީ ސިނަމާގެ އެންމެ މަގުބޫލު އެއް ޖޯޑަށެވެ. އަދި އޭގެ ފަހުން ގިނަ ފިލްމުތަކެއްގައި ދެ ތަރިން މަސައްކަތްކުރި އެވެ. އޭގެ ތެރޭގައި 1995 ގެ "ކަރަން އަރުޖުން" އާއި ހަމަ އެ އަހަރުގެ "ދިލްވާލޭ ދުލްހަނިޔާ ލޭޖާއޭގޭ" ގެ އިތުރުން 1998 ގެ "ކުޗް ކުޗް ހޯތާ ހޭ" އާއި 2001 ގެ "ކަބީ ޚުޝީ ކަބީ ޢަމް" އަދި 2010 ގެ "މައި ނޭމް އިޒް ޚާން" ހިމެނެ އެވެ.

ޝާހްރުކާއި ކާޖޮލް އެންމެ ފަހުން އެކީގައި ކުޅުނު ފިލްމަކީ 2015 ގެ "ދިލްވާލޭ" އެވެ. ރިޕޯޓްތައް ބުނާގޮތުން ޑައިރެކްޓަރު ރާޖްކުމާރު ހިރާނީގެ ކުރިއަށް އޮތް ފިލްމުގެ ކާސްޓުންނަކީ ވެސް އެ ދެ ތަރިންނެވެ.

އާމިރާއި ކާޖޮލް މިހާތަނަށް އެކީގައި މަސައްކަތްކުރީ އެންމެ ދެ ފިލްމުގަ އެވެ. އަދި ލޯބީގެ ރޯލްތަކެއް އެކީގައި ކުޅުނީ 2006 ގެ "ފަނާ" ގައި އެކަންޏެވެ. ދެ ތަރިން އެކީގައި މަސައްކަތްކުރި އަނެއް ފިލްމަކީ ކާޖޮލްގެ ފިރިމީހާ އަޖޭ ދޭވްގަނާއި ޖޫހީ ޗާވްލާ ވެސް މުހިއްމު ރޯލްތަކެއް ކުޅުނު 1997 ގެ "އިޝްގް" އެވެ.