ޕްރަބާސްއާ އެކު ކިއާރާ އަށް ފިލްމެއް؟

"ބާހްބަލީ" ގެ ބަތަލު ޕްރަބާސްއާ އެކު ފިލްމެއް ކުޅެން ބޮލީވުޑްގެ ޒުވާން ބަތަލާ ކިއާރާ އަދުވާނީ އަށް ލިބިފައިވާ ކަމަށް ރިޕޯޓްތައް ބުނެފި އެވެ.

ފިލްމީ ޚަބަރުތައް ގެނެސްދޭ ނޫސްތަކުން ބުނިގޮތުގައި މިދިޔަ އަހަރުގެ އެންމެ ކާމިޔާބު ފިލްމުތަކުގެ ތެރޭގައި ހިމެނޭ "ގުޑް ނިއުޒް" އާއި "ކަބީރު ސިންގް" ގެ ބަތަލާ އަށް ލިބިފައި ވަނީ އިންޑިއާގެ ދެކުނު ފިލްމު އިންޑަސްޓްރީގެ ޑައިރެކްޓަރު ނަގް އަޝްވިން ހަދާ ސައިންސް ފިކްޝަން ފިލްމުގެ ބަތަލާގެ ރޯލެވެ. އެ ފިލްމަށް ޕްރަބާސް ސޮއިކުރި ނަމަވެސް، ކިއާރާ އަދި ފިލްމަށް ސޮއިކުރިކަން ކަށަވަރު ނުވާ ކަމަށް ނޫސްތަކުން ބުންޏެވެ.

ނަމަވެސް އަދި ނަން އިއުލާންނުކުރާ ފިލްމުން އޭނާ ފެނުމުގެ ފުރުސަތު ވަރަށް ބޮޑު ކަމަށްވެ އެވެ.

ރިޕޯޓްތައް ބުނާ ގޮތުން ޕްރަބާސްގެ މި ފިލްމު ދީޕީކާ ޕަދްކޯނަށް ވެސް ހުށަހެޅި އެވެ. އެކަމަކު އޭނާ ކީ އަގު ބޮޑުކަމުން، ޕްރޮޑިއުސަރުން ދީޕިކާ ނެގުމުގެ ހިޔާލު ދޫކޮށްލީ އެވެ. އޭގެ ފަހުން އާލިއާ ބަޓާއި ކެޓްރީނާ ކެއިފާ ވެސް ވާހަކަތަކެއް ދެކެވުނު ކަމަށް ނޫސްތަކުން ނުންޏެވެ.

މި ފަހަކަށް ވަރަށް ގިނަ ފުރުސަތުތައް އޮހެމުން އަންނަ ކިއާރާ، 27، އަކީ ކުރިން ވެސް އިންޑިއާގެ ދެކުނު ފިލްމުތަކުގައި ވެސް މަސައްކަތްކޮށްފައިވާ ބަތަލާއެކެވެ. އޭނާގެ ކުރިއަށް ހުރި ފިލްމުތަކުގެ ތެރޭގައި "ލަކްޝްމީ ބޮމްބް"، "ޝޭރްޝާހް"، "ބޫލް ބުލައްޔާ 2" އަދި "އިންދޫ ކީ ޖަވާނީ" ހިމެނެ އެވެ.

ކިއާރާގެ އެންމެ ފަހުގެ ފިލްމަކީ މިދިޔަ މަހު ނެޓްފްލިކްސް އިން ސްޓްރީމްކުރި "ގިލްޓީ" އެވެ.

މިދިޔަ އަހަރު ރިލީޒްކުރި ޕްރަބާސްގެ އެންމެ ފަހުގެ ފިލްމު "ސާހޯ" ގެ ބަތަލާ އަކީ ވެސް ބޮލީވުޑްގެ ބަތަލާއެކެވެ. އެއީ ޝްރަދާ ކަޕޫރެވެ. ކޮރޯނާވައިރަހާ ދިމާކޮށް އިންޑިއާގައި ލޮކްޑައުން އިއުލާންކުރި އިރު، ޕްރަބާސް ގެންދިޔައީ "ޖާން" ކިޔާ ފިލްމެއްގެ މަސައްކަތްކުރަމުންނެވެ. އެ ފިލްމުގެ ބަތަލާ އަކީ ސަލްމާން ޚާންގެ "ކަބީ އީދު ކަބީ ދިވާލީ" އަށް ސޮއިކޮށްފައިވާ ޕޫޖާ ހެގްޅޭ އެވެ.

ޕްރަބާސްއާ އެކު އަޝްވިން ހަދާ ފިލްމާ ބެހޭ މާ ބޮޑު ތަފުސީލުތަލުތަކެއް އަދި ހާމައެއްނުކުރެ އެވެ. އަޝްވިން ކުރިން ގެނެސްދިން ފިލްމުތަކުގެ ތެރޭގައި މިދިޔަ އަހަރު ބަތަލާ ކީރްތީ ސުރޭޝް އަށް އެންމެ މޮޅު ބަތަލާގެ ނެޝަނަލް އެވޯޑް ލިބުނު މަހާނަތީ" އަދި "ޔެވާޅޭ ސުބްރަމާނިއަމް" ހިމެނެ އެވެ.