ޑަންގަލް: ނޫހެއްގައި އޮތް ޚަބަރަކުން އުފަންވި ޚިޔާލެއް

އާމިރު ޚާންގެ "ޑަންގަލް"ގެ ޕޯސްޓަރު

ފާތުމަތު އަނީސާ، މިހާރު

26 އޮކްޓޯބަރ 2016 - 05:46

އާމިރު ޚާންގެ އާ ފިލްމު "ޑަންގަލް" އަކީ ނޫހެއްގައި އޮތް ކުޑަކުޑަ ޚަބަރެއް ކިޔާފައި އުފަންވި ޚިޔާލެކެވެ. އެ ޚަބަރުގައި ވަނީ ބައްޕައަކު އޭނާގެ ދެ އަންހެންދަރިން ވާލްޑް ޗެމްޕިއަންޝިޕިއަނުންނަށް ހަދަން ތައްޔާރުކުރި ގޮތެވެ. މަހާވީރް ސިންގް ޕޯގަޓް ކިޔާ ރެސްލިން ތަޅާ މީހަކާ ގުޅޭ ގޮތުން ލިޔެފައިވާ މި ޚަބަރަކީ 2012 ވަނަ އަހަރު ނޫހެއްގައި ޖަހާފައި އޮތް ޚަބަރެކެވެ.

ޑިޒްނީގެ ކްރިއޭޓިވް އެގްޒެކެޓިވްއެއް ކަމަށްވާ ދިވްޔާ ރާއޯ އަށް މިޚަބަރު ކިޔާފައި ފިލްމެއް ތައްޔާރުކުރުމުގެ ޚިޔާލު އައީ އެވެ.

ބޮލީވުޑްގައި މިފަދަ ހަގީގީ ހާދިސާތަކަށް ވަރަށް މޮޅު ފިލްމުތައް އުފައްދާފައި ވުމާ އެކު މި ޚަބަރުގައިވާ ވާހަކަ އަށް ވެސް މޮޅު ފިލްމެއް އުފެއްދިދާނެކަމަށް ދިވްޔާ ގަބޫލު ކުރި އެވެ. ސަބަބަކީ މަހާވީރު އޭނާގެ ދެ އަންހެން ދަރިންނަށް ރެސްލިން ތެޅުމުގެ ތަމްރީނުތައް ދޭން ނިންމުމަކީ ވެސް އާދަޔާޚިލާފު ނިންމުމަކަށް ވާތީ އެވެ. ސަބަބަކީ ރެސްލިން އަކީ އާއްމުކޮށް އަންހެނުން ކުޅޭ ކުޅިވަރަކަށް ނުވެފައި އެމީހުން ދިރިއުޅުނު އިންޑިޔާގެ ހަރްޔާނާ ސްޓޭޓްގައި ޚާއްސަކޮށް އަންހެނުން މިފަދަ ކަންތައްތައް ކޮށް ނޫޅޭތީ އެވެ.

ދިވްޔާގެ ޚިޔާލަށް ޑިޒްނީ ޓީމުގައި ހިމެނޭ އެހެން މެމްބަރުންނާއި ޔޫޓީވީގެ ހެޑް ސިދާރްތު ރޯއި ކަޕޫރުގެ ތާއީދު ލިބުނެވެ. އޭގެ ފަހުން ދެން އޮތީ ފިލްމުގެ ސްކްރިޕްޓް ލިޔާނެ މީހަކު ހޯދުމެވެ. ލިޔުންތެރިޔާ ނިތޭޝް ތިވާރީ އެ ޓީމާ ގުޅުނީ އެހިސާބުންނެވެ. ޚުދް ނިތޭޝް އަށް ވެސް މި ވާހަކައިގެ އަސަރު އިހްސާސް ކުރެވުނެވެ. އަދި ވަގުތުން މަހާވީރް އާއި އޭނާގެ ރެސްލިންތަޅާ ދެ ދަރިންނާ ބައްދަލުކުރަން ހަރްޔާނާ އަށް ދިޔަ އެވެ.

މަހާވީރް އޭނާގެ ހަޔާތުގެ ވާހަކަ ހިއްސާކުރަން ބޭނުންވި ހިސާބުން ނިތޭޝް ސްކްރިޕްޓް ލިޔެ ނިންމާލި އެވެ. މަހާވީރްގެ ރޯލު އާމިރު ޚާނަށް ހުށަހެޅީ ޑިޒްނީގެ ފަރާތުންނެވެ.

ޑައިރެކްޓަރު ކިޔައިދިން ވާހަކައާ އާމިރު ވަރަށް ހިތްހަމަޖެހި ފިލްމު ކުޅެން ސޮއިކުރި ހިސާބުން ފިލްމުގެ މަސައްކަތް ފެށޭ ގޮތް ވީ އެވެ.

ބައޮގްރަފިކަލް ސްޕޯޓްސް ޑްރާމާއެއްގެ ގޮތުގައި ބެލެވޭ މި ފިލްމުގައި މަހާވީރުގެ އަންހެނުންގެ ރޯލުން ފެނިގެން ދާނީ ސާކްޝީ ތާންވަރް އެވެ. އަދި އޭނާގެ ރެސްލިން ތަޅާ ދެ އަންހެން ދަރިންގެ ރޯލު ކުޅެނީ ފާތިމާ ސަނާ ޝައިޚް އާއި ސާންޔާ މަލްހޯތުރާ އެވެ.

މިއަހަރުގެ ޑިސެމްބަރު 23 ގައި ފިލްމު ރިލީޒްކުރަން ހަމަޖެހިފައި ވާއިރު ފުރަތަމަ ޓްރެއިލާ ބަލާފައި އެންމެން ތިބީ ބުނާނެ އެއްޗެއް ވެސް ނޭނގިފަ އެވެ. އަދި ފިލްމުގައި އާމިރުގެ ފިލްމުތަކުގައި ހުންނަ އަސަރު ވަރަށް ފުރިހަމައަށް ހުންނާނެކަމަށް މިހާރުއްސުރެ ގިނަ ބަޔަކު ދަނީ ބުނަމުންނެވެ. ޚާއްސަކޮށް މި ފިލްމަކީ އަންހެނުން ބާރުވެރިކުރުވުމަށް ވަކާލާތުކުރާ މީހުންނަށް ރަނގަޅު ހަދިޔާއަކަށް ވާނެ އެވެ.