މުސާރައިގެ 80 ޕަސެންޓް ހަދިޔާކުރާ ޓީޗަރަކަށް މިލިއަން ޑޮލަރުގެ އެވޯޑެއް

މި އަހަރުގެ ގްލޯބަލް ޓީޗާ ޕްރައިޒް ހޯދި ޕީޓާ ތަބީޗީ.

އަހުމަދު އަދްޝަން، މިހާރު

26 މާޗް 2019 - 07:05

ފަގީރު އާއިލާތަކުގެ ކުދިންގެ ކިޔެވުމަށް، މަހު މުސާރައިގެ 80 ޕަސެންޓް ކޮންމެ މަހަކު ވެސް ހަދިޔާކުރާ ކެންޔާގެ ޓީޗަރަކަށް އިނާމެއްގެ ގޮތުގައި އެއް މިލިއަަން ޑޮލަރު ލިބިއްޖެ އެވެ.

ހިސާބާއި ފިޒިކްސް ކިޔައިވައިދޭ ފިރިހެން ޓީޗަރު ޕީޓާ ތަބީޗީ އަށް އެއް މިލިއަން ޑޮލަރު ލިބުނީ ކުދިންނަށް ތައުލީމު ފޯރުކޮށްދޭން ހިލޭ ސާބަހަށް މަސައްކަތްކުރާ އިނގިރޭސިވިލާތުގެ ވާކީ ފައުންޑޭޝަނުން ދޭ ގްލޯބަލް ޓީޗާ ޕްރައިޒާ އެކީގަ އެވެ. އެ އިނާމު އޭނާއާ ހަވާލުކޮށްފައި ވަނީ ދުބާއީގައި އާދީއްތަ ދުވަހު ބޭއްވި އެވޯޑް ހަފުލާގަ އެވެ.

އެ ހަފުލާގައި ދުބާއީގެ ވަލީއަހުދު ޝައިހް ހަމަދު ބިން މުހައްމަދު އަލް މަހްތޫމާއި ހޮލީވުޑްގެ މަޝްހޫރު އެކްޓަރު ހިއު ޖެކްމަން ވެސް ބައިވެރިވި އެވެ.

Our 2019 Global @TeacherPrize Winner @petertabichi, alongside Dubai Crown Prince Sheikh Hamdan bin Mohammed bin Rashid Al Maktoum, and actor and performer @RealHughJackman.

Congratulations Peter, from all of us at the Varkey Foundation. pic.twitter.com/ic5TggDDWE
— Varkey Foundation (@VarkeyFdn) March 24, 2019

ޕީޓާއަކީ ކެންޔާގެ ފަގީރު ސަރަހައްދެއް ކަމަށްވާ ޕުވާނީ އަވަށުގައި ހިންގާ ސްކޫލެއްގައި ކިޔަވައިދޭ ޓީޗަރެކެވެ. ފަގީރު އާއިލާތަކާއި ޔަތީމުވެފައިވާ ކުދިންނަށް ތައުލީމު ދޭން ކުރާ މަސައްކަތުގެ އަގު ވަޒަންކޮށް ބައިނަލްއަގްވާމީ އެވޯޑެއް އޭނާ އަށް ލިބުނު އިރު، ޕިޓީއަކީ އިންޓަނެޓްގެ އެހީގައި ވެސް ކިޔަވައިދޭ މީހެކެވެ.

From Dubai, we congratulate the African continent for Global @TeacherPrize winner, Kenyan maths and science teacher @PeterTabichi. The lack of resources at his school was never an obstacle in the face of his creativity. We believe that teachers are the creators of needed change. pic.twitter.com/cBV3PMripV
— Hamdan bin Mohammed (@HamdanMohammed) March 24, 2019

އެގޮތުން އޭނާ ކިޔަވައިދޭ ދަރިވަރުން އަންނަނީ ބައިނަލްއަގްވާމީ ގޮތުން ކާމިޔާބީތައް ވެސް ހޯދަމުންނެވެ.

އެންމެ ފާހަގަކޮށްލެވޭ އެއް ކާމިޔާބީއަކީ މި އަހަރު އެމެރިކާގެ އެރިޒޯނާގައި ބާއްވާ އިންޓެލް އިންޓަނޭޝަނަލް ސައިންސް އެންޑް އިންޖިނިއަރިން ފެއާ އަށް ޕީޓާގެ މެތަމެޓިކަލް ސައިންސް ޓީމް ކޮލިފައިވުމެވެ. އަދި އޭނާ ކިޔަވައިދިން ދަރިވަރުންތަކެއް ވަނީ ގަސްގަހާގެހީގެ ހަކަތައިން ކަރަންޓް އުފައްދައިގެން ރޯޔަލް ސޮސައިޓީ އޮފް ކެމިސްޓްރީ އެވޯޑް ވެސް ހާސިލުކޮށްފަ އެވެ.

We are incredibly proud of the work that our 2019 Global @TeacherPrize Winner Peter Tabichi does to help his community in Kenya.

Find out more about why he is an inspiration to so many people. pic.twitter.com/Zk2qTetKr1
— Varkey Foundation (@VarkeyFdn) March 24, 2019

ޓީޗާޒް ޕްރައިޒް ލިބުމުން އުފާވެފައި ހުރި ޓީޗަރު ބުނީ މިއީ ހަމައެކަނި އޭނާ އަށް ލިބުނު ކާމިޔާބީއެއް ނޫން ކަމަށެވެ.

Kenyan President Uhuru Kenyatta congratulates Global #TeacherPrize 2019 Winner @PeterTabichi! Watch the full message: https://t.co/w7OXbR8WeW #TeacherPrize pic.twitter.com/Mm2cKGqzQS
— Global Teacher Prize (@TeacherPrize) March 24, 2019

"މިއީ ކެންޔާގެ ވާހަކަ އަށް އިތުރުވި އާ ސޮފުހާއެއް. މިއީ ކެންޔާ އާއި ގައުމުގެ ޒުވާނުންނަށް، ކުރިމަގަށް ލިބުނު ކާމިޔާބީއެއް،" އޭނާ ބުންޏެވެ. "މިއީ އަހަރެމެން ކުރާ މަސައްކަތަށް އިތުރުވި އާ ބާބެއް."

ޕީޓާ ބުނި ގޮތުގައި އޭނާ އަބަދުވެސް ގެންގުޅޭ ފިލޯސަފަކީ "ވާހަކަ މަދުކޮށްފައި އަމަލު ގިނަ ކުރުމެ" ވެ.

"ކާމިޔާބީއަކާ ހަމައަށް ނުވަތަ ނަތީޖާއަކާ ހަމައަކަށް ފޯރާނީ ހިތްވަރާ އެކު މަސައްކަތްކޮށްގެން،" އޭނާ ބުންޏެވެ.

ޕީޓާ ބުނި ގޮތުގައި ދަރިވަރުންނަށް ކިޔަވައިދެނީ އެތައް ގޮންޖެހުންތަކެއްގެ ތެރެއިންނެވެ. އަދި އޭނާގެ ގިނަ ދަރިވަރުންނަކީ ރަނގަޅަށް ކާން ނުލިބޭ ކުދިންނާއި މަސްތުވާތަކެތީގެ ވަބާގައި ޖެހިފައިވާ ކުދިންނާއި ޅައުމުރުގައި ބަލިވެ އިނުމާއި ކައިވެނި ކުރުން ފަދަ އިޖުތިމާއީ ބޮޑެތި މައްސަލަތަކުގެ ތެރެއަށް ވެއްޓިފައިވާ ކުދިންނެވެ.

"ހަގީގަތުގައި ވަރަށް ހާލުގައި މަސައްކަތް މި ކުރަނީ. އެކަމަކު އަބަދު ވެސް ބަލަން ވީހާ ވެސް ގިނަ ކުދިންތަކަކަށް ކިޔަވައިދީގެން ރަނގަޅު މިސްރާބަކަށް ގެންދެވޭތޯ،" ޕީޓާ ބުންޏެވެ.

އޭނާ ގައުމަށް ހޯދައި ދިން ކާމިޔާބީ އަށް ކެނިއާގެ ރައީސް އުހޫރު ކެނިއައްޓާ ވެސް ވަނީ މަރުހަބާ ވިދާޅުވެ، ހިތްވަރު ދެއްވައިފ އެވެެ.